Tē pāpa’i ra Moroni i ni’a i te mau ’api ’auro, nā Dale Kilborn

2–8 nō Novema

Moromona 7–9

« Tē parau nei au mai tē mea ra tei ’ō nei ’outou »

Hi’o i te mau mana’o i tae mai tā ’oe i tāpa’opa’o i roto i tā ’oe iho tuatāpapara’a i teie hepetoma nō te Moromona 7–9. E aha te mau tuha’a i roto i teie mau pene e tano ’ia tāpe’a mai nō te ha’api’i ?

Pāpa’i i te mau mana’o e tae mai

Tītau i te mana’o

Nō te hōro’a i te mau pīahi i te taime nō te fa’a’ite i te hō’ē mea nō roto mai i tā rātou tuatāpapara’a ta’ata hō’ē ’aore rā tuatāpapara’a ’utuāfare, e nehenehe e fa’aitoito ia rātou ’ia hi’o rereamanu i te Moromona 7–9 ’e ’ia fa’a’ite mai i te hō’ē pereota (’aore rā te hō’ē ’īrava) ’o tā rātou i māuruuru ia Moromona ’e ia Moroni i te mā’itira’a e tu’u i roto i te mau ’api.

Ha’api’i i te ha’api’ira’a tumu

Moromona 7:8–10 ; 8:12–22 ; 9:31–37

E faufa’a rahi roa te Buka a Moromona

• Hō’ē rāve’a nō te ha’amata i te hō’ē ’āparaura’a nō ni’a i te faufa’a rahi roa o te Buka a Moromona, ’o te paraparaura’a ïa nō ni’a i te huru tātou e hi’o nei i te faufa’a o te hō’ē tao’a. Nāhea te ’itera’a i te faufa’a o te hō’ē mea e taui ai i te huru tā tātou e fa’a’ohipa i te reira ? E nehenehe te mau pīahi e ’imi i roto i te Moromona 8:12–22 i te mea tā Moroni i parau nō ni’a i te faufa’a o te Buka a Moromona (« teie parau tuatāpapa »). E nehenehe ato’a tā rātou e fa’a’ite i te mau ’ohipa i tupu nō rātou iho tei fa’a’ite ia rātou i te faufa’a o te Buka a Moromona. Nāhea tātou ’ia fa’a’ite atu ē, tē ha’afaufa’a nei tātou i te Buka a Moromona ?

  

  Tē ha’apāpū nei te Buka a Moromona i te ha’api’ira’a tumu e ha’api’ihia ra i roto i te Bibilia.

• Nō te tauturu i te mau pīahi ’ia ’ite nāhea te Buka a Moromona ’e te Bibilia e turu ai te tahi i te tahi, e nehenehe e ani ia rātou ’ia tai’o i te Moromona 7:8–10 ’e ’ia tātara poto i te fa’ahitira’a a Moromona nō nā pāpa’a parau e piti nā roto i tā rātou iho mau parau (« te parau tuatāpapa ato’a ra e tae i te ’Ētene », ’o te Bibilia ïa). E nehenehe e pāpa’i e piti menemene ’o tē ’amu te tahi i roto i te tahi ma te tu’u i te i’oa te Bibilia i ni’a i te hō’ē, ’e te Buka a Moromona i ni’a i te tahi. E nehenehe te mau pīahi e fa’ahiti mai i te mau tū’atira’a i roto i nā buka pāpa’ira’a mo’a e piti, e pāpa’ihia i roto i terā tuha’a e ’amu ra i roto i te tahi, ’e te mau ta’a-’ē-ra’a i roto i te tahi atu mau tuha’a. ’Aita ana’e, e nehenehe e tāpura i te mau parau mau rau o te ’evanelia i ni’a i te tāpura ’ere’ere ’e e ani i te mau pīahi ’ia hi’o i roto i te Arata’i nō te mau pāpa’ira’a mo’a nō te ’ite mai i te mau ’īrava i roto i te Buka a Moromona ’e i roto i te Bibilia ’o tē tauturu ia rātou ’ia māramarama i te mau parau mau.

Moromona 8:1–11

E nehenehe tā tātou e vai ha’apa’o maita’i, noa atu o tātou ana’e iho.

• Tē vai nei paha te tahi mau ta’ata e mana’o nei ē, ’o rātou ana’e iho i roto i te tauto’ora’a e ora i te ’evanelia. E aha tā rātou e nehenehe e ’apo mai i roto i te hi’ora’a o Moroni ’o tē nehenehe e tauturu ia rātou ? E nehenehe e ani i te mau pīahi ’ia tai’o i te Moromona 8:1–11 ’e ’ia feruri i te mau uira’a ’o tā rātou e ui ia Moroni nō te ha’api’i mai nāhea ’oia i te vai ha’apa’o-maita’i-noa-ra’a, noa atu tōna mau fifi. E aha te mea e fa’auru i roto i tōna hi’ora’a ? ’A fa’a’ite mai ai te mau pīahi i tō rātou mau mana’o, e fa’aitoito ia rātou ’ia fa’a’ite i te tahi ’ohipa i tupu ’e ’ua vai ha’apa’o maita’i noa rātou ’aore rā te tahi atu ta’ata, noa atu ’o rātou ana’e. Nāhea te Fatu i te tauturura’a ia rātou ?

Moromona 8:26–41 ; 9:1–30

’Ua pāpa’ihia te Buka a Moromona nō tō tātou nei ’anotau.

• ’A fātata mai ai te hope’a o teie matahiti nō te tuatāpapara’a i te Buka a Moromona, penei a’e e nehenehe te mau pīahi e feruri nō te aha, i tō rātou mana’o, ’ua pāpa’ihia teie buka nō tō tātou nei tau. E nehenehe e ha’amata i te ’āparaura’a nā roto i te tai’ora’a i te fa’ahitira’a parau a te peresideni Ezra Taft Benson i roto i « Te tahi atu mau mātēria tauturu ». ’Ei reira te mau pīahi e fa’a’ohipa ai i te mau uira’a a te peresideni Benson nō te Moromona 8:26–41. Nō te aha te Fatu i fa’auru ai ia Moroni e tu’u ato’a mai i teie mau parau i roto i te mau pāpa’a parau ? Nāhea te reira e tauturu ai ia tātou i teie nei mahana ?

• Mai tei ha’api’ihia i roto i te arata’i ha’api’ira’a o teie hepetoma o te Mai, pe’e mai—nō te ta’ata hō’ē ’e te ’utuāfare, tē vai ra i roto i te Moromona 9:1–30 te hō’ē poro’i a Moroni i te ’erera’a i te fa’aro’o ia Iesu Mesia i tō tātou nei mahana. Penei a’e e nehenehe e vāhi i te piha ’ei toru pupu ’e e ani i te pupu tāta’itahi ’ia hi’o mai i te parau a’o e tauturu ia rātou, i roto i te mau ’īrava : 1–6 (te mau fa’ahope’ara’a nō te ’orera’a e fa’aro’o i te Mesia), 7–20 (te faufa’a rahi e fa’aro’o i te hō’ē Atua e hōro’a i te heheura’a ’e e rave i te temeio), ’e 21–30 (te parau a’o a Moroni ia tātou nei).

• Noa atu ā ’ua pāpa’ihia te Moromona 9:1–6 nō « te ’ore e fa’aro’o i te Mesia », e tauturu te reira nō tātou pā’āto’a ’ia feruri i te ti’ara’a atu i mua i te Atua hō’ē mahana ’ia ha’avāhia. E ani i te mau pīahi ’ia hi’o i teie mau ’īrava nō te ’imi i te mau ta’o ’aore rā te mau pereota e fa’a’ite nei i te mau mana’o o te feiā ’ī’ino i terā mahana. E aha te ti’a ia tātou ’ia rave ’eiaha ’ia tae mai teie mau mana’o ? E nehenehe te mau pīahi e ’ite mai i te tahi mana’o tauturu i roto i te ’ā’amu tā te peresideni Boyd K. Packer i fa’ati’a i roto i « Te tahi atu mau mātēria tauturu ».

• E rave rahi ta’ata i teie mahana e ti’aturi nei ē, ’ua ’ore te mau temeio. Nāhea e ti’a ai ’ia fa’a’ohipa i te mau ha’api’ira’a a Moroni nō te tauturu i te mau pīahi ’ia fa’aro’o i te hō’ē « Atua e rave i te temeio » ? E nehenehe e ha’amata nā roto i te anira’a i te mau pīahi ’ia hi’o i te Moromona 9:7–26 ’e ’ia ’imi i te mau temeio tā Moroni e fa’aitoito nei ia tātou ’ia fa’aro’o. E aha tā tātou e ha’api’i nei i roto i teie mau ’īrava nō ni’a i te Atua ’e tāna ’ohipa i tō tātou nei mahana ? E aha tei tītauhia ia tātou ’ia rave ’ia rave te Atua i te mau temeio ? (hi’o Moromona 9:20–21). E aha te mau temeio tā tātou i ’ite ?

Fa’aitoito i te ha’api’ira’a mai i te fare

’Ua uiui a’ena ānei te mana’o o te mau pīahi ē, nāhea e ti’a ai ia rātou ’ia fa’arahi i tō rātou fa’aro’o i te Metua i te Ao ra ’e ia Iesu Mesia ? Mai te peu ’ua nā reira ānei rātou, ’a tītau manihini ia rātou ’ia ’imi i roto i te Etera 1–5 i te mau rāve’a nō te tauturu i tō rātou fa’aro’o ’ia tupu i te rahi.

Te tahi atu mau mātēria tauturu

’Ua pāpa’ihia te Buka a Moromona nō tō tātou nei ’anotau.

’Ua parau te peresideni Ezra Taft Benson ē :

« ’Aita te mau ’āti Nephi i fāri’i i te buka ; ’aita ato’a te mau ’āti Lamana nō muta’a ra. ’Ua fa’ata’ahia te reira nō tātou.

« ’Ua fa’a’ite pāpū te rahira’a o te mau ta’ata pāpa’i o te Buka a Moromona ē, ’ua pāpa’i rātou nō te u’i nō a muri a’e » [hi’o 2 Nephi 25:21 ; Iakoba 1:3 ; Moromona 7:1 ; 8:34–35]…

« Mai te mea ē, ’ua ’ite ātea mai rātou i tō tātou nei tau ’e ’ua mā’iti i te mau mea ’o tē riro ’ei mau mea hau atu i te faufa’a nō tātou, e ’ere ānei ïa ē, e ti’a ia tātou i te tuatāpapa i te Buka a Moromona ? ’Ia ui tāmau noa tātou ia tātou iho ē : « Nō te aha te Fatu i fa’auru ai ia Moromona (’aore rā ia Moroni ’aore rā ia Alama) ’ia tu’u i te reira i roto i tāna pāpa’a parau ? E aha ïa te ha’api’ira’a tā’u e nehenehe e ’apo mai, e tauturu iā’u ’ia ora i teie mahana ’e i teie nei tau ? »(« The Book of Mormon—Keystone of Our Religion », Ensign, Nov. 1986, 6).

E nehenehe tātou e vai pōra’o ’ore.

’Ua fa’ati’a te peresideni Boyd K. Packer i te hō’ē tere ono mahana i tōna ’āpīra’a, ’ōna ’e te tahi pupu fa’ehau, nā ni’a i te hō’ē pere’o’o auahi ve’ave’a maita’i, ’e ’aita e rāve’a nō te hapu i te pape ’aore rā nō te taui i te ’ahu. I te tāpe’ara’a te pere’o’o auahi, ’ua haere teie pupu ta’ata po’ia i roto i te hō’ē fare tāmā’ara’a.

« E mea ta’ata roa, nō reira ’ua tīa’i mātou i roto i te rēni tīa’ira’a. ’O vau tō mua, i muri noa mai i te tahi mau vahine ’ahu nehenehe. ’Aita e faufa’a nō teie vahine nehenehe i mua iā’u ’ia fāriu mai, ’ua ta’a oi’oi ’oia tei reira mātou.

« ’Ua fāriu mai rā ’oia ’e ’ua hi’o mai ia mātou. ’Ua fāriu a’era i ni’a iā’u ’e ’ua hi’o mai, mai te upo’o ē raro roa. Teie ïa vau i mua iāna i roto i tō’u ’ahu puru hou ’e te reporepo ’e te mi’omi’o. Ma te faufau, ’ua nā ’ō mai ’oia : ‘E aha ïa huru ta’ata reporepo !’ Fāriu pauroa mai nei te mata i ni’a ia mātou.

« E mea pāpū roa ē, ’ua hina’aro ’oia ’eiaha mātou i reira ; ’o vau ato’a ho’i. ’Ua ’ite roa vau i tō’u reporepo ’e te au ’ore ’e te ha’amā ».

’Ua fa’ahiti a’era te peresideni Packer i te Moromona 9:4 ma te fa’aau i te ’ohipa i tupu nōna ’e te vi’ivi’ira’a pae vārua i mua i te aro o te Atua. Ma te fa’a’ite pāpū ē, ’o te tāra’ehara a Iesu Mesia ana’e te rāve’a ’oia e mā ai i te pae vārua, ’ua nā ’ō a’era ’oia ē :

« E ti’a ānei ia ’outou ’ia feruri i tō’u mana’o i te ’itera’a vau i te hope’a ē, ’ia pe’e noa atu vau i te hō’ē noa a’e tītaura’a tā te Tāra’ehara e tu’u mai, ’aita roa atu e tītauhia iā’u ’ia fa’a’oroma’i i te mamae nō te vi’ivi’ira’a pae vārua ? ’A feruri na i te mana’o tāmāhanahana ’e te fa’aora ’e te fa’ateitei e tae mai ia ’outou ra i te taime e ’ite ai ’outou i te pāpū o te Tāra’ehara ’e te faufa’a au o te reira nō ’outou tāta’itahi, i te mahana tāta’itahi » (« Washed Clean », Ensign, Mē 1997, 9–10).

Ha’amaita’ira’a i tā tātou ha’api’ira’a

’A pure nō tā ’outou mau pīahi. Tē fifi ra ānei te hō’ē pīahi i roto i te piha ? Mai tā te Fa’aora i pure nō Petero (hi’o Luka 22:31–32), e nehenehe tā ’oe e pure nō te feiā tā ’oe e ha’api’i nei, ’ia ha’apūaihia (hi’o Ha’api’ira’a mai tā te Fa’aora, 6).