« 2–8 nō Novema. Moromona 7–9 : ‘Tē parau nei au mai tē mea ra tei ’ō nei ’outou’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)

« 2–8 nō Novema. Moromona 7–9 », Mai, pe’e mai—nō te ta’ata hō’ē ’e te ’utuāfare : 2020

Hōho’a

Tē pāpa’i ra Moroni i ni’a i te mau ’api ’auro

Tē pāpa’i ra Moroni i ni’a i te mau ’api ’auro, nā Dale Kilborn

2–8 nō Novema

Moromona 7–9

« Tē parau nei au mai tē mea ra tei ’ō nei ’outou »

E fa’aro’o tō Moromona ’e tō Moroni ē, e riro tā rāua mau pāpa’a parau i te fa’auru i te feiā e ora i te mau mahana hope’a. ’A tai’o ai ’outou i te Moromona 7–9, ’a pāpa’i i te mau mana’o e tae mai nō ni’a e nāhea e fa’a’ohipa i te mea tā ’outou e ha’api’i nei.

Pāpa’i i te mau mana’o e tae mai

’Ua ’ite Moromona ’e ’o Moroni e aha te huru nō te vai-’ōtahi-noa-ra’a i roto i te hō’ē ao ’ino. Nō Moroni, e mea huru teimaha paha te reira i te pohera’a tōna metua tāne i roto i te ’arora’a ’e ’ua mou roa te mau ’āti Nephi. « ’O vau ana’e te toe », tāna i pāpa’i. « ’Aita o’u e hoa, ’e ’aita o’u e vāhi ’ia haerehia atu » (Moromona 8:3, 5). E au ē, ’aita e rāve’a fa’ahou, ’ua ’ite rā Moroni i te tīa’ira’a i roto i tōna ’itera’a pāpū nō te Fa’aora ’e i roto i tōna ’ite ē « tā te Fatu mau rāve’a, e ti’a ïa i te vaira’a, e tupu ā ho’i » (Moromona 8:22). ’E ’ua ’ite ato’a Moroni ē, te hō’ē tuha’a rahi i roto i teie mau ’ōpuara’a mure ’ore, ’o te Buka a Moromona ïa—te pāpa’a parau tāna e fa’aoti itoito nei, te pāpa’a parau ē ’ia tae i te hō’ē mahana e « māramarama nō roto mai i te pōuri ra » ’e e hōpoi e rave rahi ta’ata « i te ’ite i te Mesia ra » (Moromona 8:16 ; 9:36). Maoti te fa’aro’o o Moroni i teie mau mea i parauhia i parau ai ’oia i te feiā e tai’o i teie nei buka ananahi ē « tē parau nei au mai tē mea ra tei ’ō nei ’outou » ’e « ’ua ’ite ho’i au ē e ’ite ’outou i tā’u nei parau » (Moromona 8:35 ; 9:30). I teienei rā, tei ia tātou nei tāna mau parau ’e tē tupu ra te ’ohipa a te Fatu, ’e te hō’ē ho’i tumu, nō te vai-pāpū-ra’a Moromona ’e ’o Moroni i ni’a i tā rāua misiōni, noa atu ā ’o rātou ana’e iho tē vai ra.

Hōho’a

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

Moromona 7

E mea tītauhia ’ia ti’aturi au ia Iesu Mesia ’e ’ia « tāpe’a mai » i tāna ’evanelia.

Te mau parau hope’a a Moromona i roto i te Moromona 7, nō te hua’ai ïa o te mau ’āti Lamana i te mau mahana hope’a, tē vai nei rā te mau parau mau nō tātou pā’āto’a nei. E aha tā te poro’i a Moromona e ha’api’i nei nō ni’a ia Iesu Mesia ’e nō ni’a i tāna ’evanelia ? Nō te aha Moromona i mā’iti ai i teie poro’i nō te ’ōpani i tāna mau parau ?

Moromona 7:8–10 ; 8:12–22 ; 9:31–37

E faufa’a rahi roa tō te Buka a Moromona

’Ua ui te peresideni Russell M. Nelson : « ’Āhani e daiamani ’e te poe e hōro’ahia ia ’outou, ’e te Buka a Moromona, e aha tā ’outou e mā’iti ? I roto ia ’outou, e aha te mea rahi a’e i te faufa’a ?(« Te Buka a Moromona : E aha ïa te huru tō ’outou orara’a ’āhani ’aita te reira ? » Ensign ʼaore rā Liahona, Novema 2017, 61).

’Ua ’ite Moromona ’e ’o Moroni teie pāpa’a parau tā rātou e tāpe’a nei, e mea faufa’a rahi ïa i tō tātou nei ’anotau, nō reira ’ua fa’atusia rahi rātou nō te fa’aineine ’e nō te pāruru i te reira. ’A tai’o ai ’oe i te Moromona 7:8–10 ; 8:12–22 ; ’e te 9:31–37, ’a feruri nō te aha e mea faufa’a rahi teie pāpa’a parau i tō tātou nei ’anotau. E ti’a ’ia ’ite i te tahi atu mau hi’ora’a i roto i te 1 Nephi 13:38–41 ; 2 Nephi 3:11–12 ; ’e Te Parau Ha’api’ira’a ’e te mau Parau Fafau 33:16 ; 42:12–13. E aha te mau ’ohipa i tupu tei tauturu ia ’oe ’ia ’ite ē, e mea faufa’a rahi te Buka a Moromona ?

E tano te mau pāpa’ira’a a te mau peropheta o te Buka a Moromona ia tātou.

Moromona 8:26–41 ; 9:1–30

’Ua pāpa’ihia te Buka a Moromona nō tō tātou nei ’anotau.

’Ua fa’a’ite Iesu Mesia ia Moroni e aha te tupu ’ia tae mai te Buka a Moromona (hi’o Moromona 8:34–35), ’e nō te mea tā Moroni i ’ite, ’ua hōro’a mai ’oia i te mau fa’aarara’a rahi nō tō tātou nei mahana. ’A tai’o ai ’oe i te Moromona 8:26–41 ’e te 9:1–30, ’a feruri tē vai ra ānei te mau tāpa’o nō te reira huru ’e te reira mau ’ohipa i roto i tō ’oe orara’a. E aha tā ’oe e nehenehe e fa’ata’a ’ē te ravera’a ?

’Ei hi’ora’a, tē vai ra i roto i te Moromona 9:1–30 te poro’i a Moroni ’ei pāhonora’a i te parare rahi o te ti’aturi ’ore ia Iesu Mesia tāna i ’ite ātea i tō tātou nei mahana. E nehenehe e pāpa’i i tā ’oe i ’apo mai i roto i tāna parau nō ni’a i te mau tumu parau i muri nei :

Te mau fa’ahope’ara’a nō te ti’aturi-’ore-ra’a i te Mesia (mau ’īrava 1–6, 26)
Te faufa’a rahi nō te ti’aturira’a i te hō’ē Atua hōro’a heheura’a ’e te fa’atupu temeio (mau ’īrava 7–20)
Te parau a’o a Moroni ia tātou nei (mau ’īrava 21–30)

E aha te ha’api’ira’a tā ’oe e ’apo mai nei nā roto mai ia Moroni ’o tē tauturu ia ’oe ’ia hōpoi ha’afātata atu ā ia vetahi ’ē i te Metua i te Ao ra ’e ia Iesu Mesia ?

Hōho’a

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Moromona 7:5–7, 10 ; 9:11–14

E aha tā teie mau ’īrava e ha’api’i nei ia tātou nō ni’a i te fa’anahora’a a te Metua i te Ao ra ’e nō te aha e tītauhia te hō’ē Fa’aora nō tātou ?

Moromona 7:8–10

E aha te ha’api’ira’a tā tātou i ’apo mai i roto i tā tātou tuatāpapara’a i te Buka a Moromona i teie matahiti ’o tē tauturu i te ha’apūaira’a i tō tātou ti’aturi i te Bibilia ? Nō te ha’amata i te hō’ē ’āparaura’a, e nehenehe e tai’o ’āmui i te tahi mau ’īrava nō roto mai i te Buka a Moromona ’e te Bibilia ’o tē ha’api’i nei i te hō’ē ā mau parau mau, mai te Alama 7:11–13 ’e te Isaia 53:3–5 ’aore rā te 3 Nephi 15:16–24 ’e te Ioane 10:16.

Moromona 8:1–9

E aha te vai-’ōtahi-ra’a mai ia Moroni ? E aha te mea tā tātou e fa’ahiahia nei nō ni’a i te ’ohipa tāna i rave ?

Moromona 8:12, 17–21 ; 9:31

E nehenehe te ’utuāfare e tai’o i teie mau ’īrava ’e i muri iho e tai’o i te fa’ahitira’a parau a Elder Jeffrey R. Holland : « Ta’a ’ē noa atu i tāna Tamaiti fānau tahi ’e te maita’i roa, e mau ta’ata hapehape ana’e tā te Atua i rave i te ’ohipa mai te ’ōmuara’a mai ā o te tau… ’Ia ’ite ana’e ’outou i te mau hapehape, ’a ha’amana’o ē e ’ere i te paruparu nō roto mai i te hanahana o teie ’ohipa » (« E te Fatu, ’ua fa’aro’o vau », Ensign ’aore rā Liahona, Mē 2013, 94). Nō te aha e ’ohipa ataata te rōtahira’a i ni’a i te mau hapehape a vetahi ’ē ’e tae noa atu te hapehape o rātou i pāpa’i i te Buka a Moromona ?

Moromona 8:36–38

E aha te aura’a nō te ravera’a i te i’oa o Iesu Mesia i ni’a ia tātou ? Nō te aha te hō’ē ta’ata e ha’amā ai ’ia rave i ni’a iāna i te i’oa o Iesu Mesia ? Nāhea tātou ’ia vai itoito noa i roto i tō tātou ’itera’a pāpū nō te Fa’aora ?

Moromona 9:16–24

E tītauhia te tahi mau mea ’ia ’āno’ihia nō te ha’amanuia i te hō’ē tāmatamatara’a ’aore rā te hō’ē mā’a. E nehenehe e rave i te hō’ē tāmatamatara’a ’aore rā te hō’ē mā’a hou te ’utuāfare e tai’o ai i te Moromona 9:16–24. ’A tai’o ai ’outou i terā mau ’īrava (te mau ’īrava 20–21 iho ā rā), ’a ’imi i te mau « mea e ’āno’ihia » tei fa’atupu i te mau temeio. E aha te mau temeio tā tātou e nehenehe e ’ite i roto i te ao ’ati a’e ia tātou ’e i roto i tō tātou ’utuāfare ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i te tuatāpapara’a pāpa’ira’a mo’a a te ta’ata iho

Tūru’i i ni’a i te mau mātēria tauturu ha’amanahia e te ’Ēkālesia. Mai te peu e mau uira’a tā ’outou nō ni’a i te ’evanelia, te vāhi maita’i roa a’e nō te pāhono, ’o te pure ïa, te mau pāpa’ira’a mo’a, te mau parau a te mau peropheta ora ’e te tahi mau pūharara’a mana a te ’Ēkālesia (hi’o Ha’api’ira’a mai tā te Fa’aora, 17–18, 23–24).