« 26 nō ’Ātopa–1 nō Novema. Moromona 1–6 : ‘E hina’aro tō’u ’ia fa’afāriu i tō te ao ato’a nei… i te tātarahapa’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 26 nō ’Ātopa–1 nō Novema. Moromona 1–6 », Mai, pe’e mai—nō te ta’ata hō’ē ’e te ’utuāfare : 2020
Tē ha’apoto ra Moromona i te mau pāpa’a, nā Tom Lovell
26 nō ’Ātopa–1 nō Novema.
Moromona 1–6
« E hina’aro tō’u ’ia fa’afāriu i tō te ao ato’a nei… i te tātarahapa »
’A tai’o ai ’outou i te Moromona 1–6, ’a feruri i te mea tā ’outou e ’apo mai nā roto mai i te hi’ora’a o Moromona. Pāpa’i i te mea e fa’auruhia ’outou ’ia rave.
Pāpa’i i te mau mana’o e tae mai
’Aita Moromona i hōhora mai i « te mau parau ē hope roa a’e » o te « ha’amani’i-ri’ari’a-ra’a i te toto » ’e te ’ino tāna i ’ite i rotopū i te mau ’āti Nephi (Moromona 2:18 ; 5:8). ’Ua nava’i noa rā tāna i pāpa’i i roto i te Moromona 1–6 nō te ha’amana’o ia tātou i te ātea roa e nehenehe te hō’ē nūna’a parau-ti’a e hi’a roa. I roto i terā parau ’ino i purara, ’aita e ta’ata e nehenehe e fa’ahapa ia Moromona nō te fiura’a ’e nō te paruparura’a te mana’o. Noa atu rā te mau ’ohipa ato’a tāna i ’ite ’e tei tupu, ’aita i mo’e iāna te mana’o nō te aroha rahi o te Atua ’e tōna ti’aturira’a ē, ’o te tātarahapara’a te rāve’a nō te fāri’i i te reira. ’E noa atu ā ’ua pāto’i te nūna’a iho o Moromona i tāna mau tāparura’a e tātarahapa, ’ua ’ite ’oia ē, tē tāparu ra ’oia i te hō’ē pupu ta’ata ’ā’ano a’e. ’Ua nā ’ō ’oia : « Inaha, tē pāpa’i nei au i tō te mau ’ōti’a o te ao nei. » E nehenehe ïa e parau ē, tē pāpa’i ra ’oia ia ’outou (hi’o Moromona 3:17–20). ’E tāna poro’i ia ’outou i teie mahana, hō’ē ā ïa poro’i tei fa’aora i te mau ’āti Nephi ’āhani rātou i fāri’i i te reira i tō rātou tau : « ’Ia fa’aro’o… ’outou i te ’evanelia a Iesu Mesia… I te tātarahapa ’e te fa’aineine i te ti’a i mua i te ha’avāra’a a te Mesia » (Moromona 3:21–22).
Mau mana’o nō tā ’oe iho tuatāpapara’a pāpa’ira’a mo’a
E ti’a iā’u ’ia ora parau-ti’a noa atu ā te ’ohipa parau-ti’a ’ore ’ati a’e iā’u.
Ha’amata nā ni’a i te pene mātāmua nō Moromona, e ’ite ’oe i te mau ta’a-’ē-ra’a rahi i roto ia Moromona ’e te ta’ata ’ati a’e iāna. ’A tai’o ai ’oe i te Moromona 1, e nehenehe e fa’aau i te huru ’e te mau hia’ai o Moromona i tō tōna mau ta’ata. E hi’o na i te mau fa’ahope’ara’a nōna ’e nō rātou (e ’ite ’oe i te hō’ē hi’ora’a i roto i te mau ’īrava 14–15). E aha te ha’api’ira’a tā ’oe e ’apo mai nei ’o tē fa’auru ia ’oe ’ia ora parau-ti’a i roto i te hō’ē ao ’ino ?
’A tai’o ai ’oe i te Moromona 2–6, ’a tāmau i te hi’o nāhea Moromona i te fa’a’ite i tōna fa’aro’o i te Metua i te Ao ra ’e ia Iesu Mesia noa atu ā te mau mana ’ino ’ati a’e iāna.
Te tama’i, nā Jorge Cocco
E arata’i te ’oto e au i te Atua i te tauira’a mau ’e te vai maoro.
I te ’itera’a Moromona i te ’oto o tōna mau ta’ata, ’ua tae mai tōna tīa’ira’a e tātarahapa rātou. ’Āre’a rā, « ’aita ho’i tō rātou māuiui i fa’atupu i te tātarahapa » (Moromona 2:13)—e ’ere ho’i i te ’oto e au i te Atua tei arata’i i te tauira’a mau (hi’o 2 Korinetia 7:8–11). ’Aita, e ’oto tō te mau ’āti Nephi e au i tō teie nei ao (hi’o Moromona 2:10–11). Nō te māramarama i te ta’a-’ē-ra’a i roto i te ’oto e au i tō teie nei ao ’e te ’oto e au i te Atua, e nehenehe e fa’ati’a i te hō’ē tāpura i reira e pāpa’i ai i te mea tā ’oe i ’apo mai Moromona 2:10–15 nō ni’a i teie nā huru ’oto. Mai teie ri’i tā ’oe tāpura :
|
Te ’oto e au i te Atua |
Te ’oto e au i tō te ao nei |
|---|---|
Te ’oto e au i te Atua Haere i mua ia Iesu (’īrava 14) | Te ’oto e au i tō te ao nei Fa’a’ino i te Atua (’īrava 14) |
Te ’oto e au i te Atua | Te ’oto e au i tō te ao nei |
Te ’oto e au i te Atua | Te ’oto e au i tō te ao nei |
’A feruri ai i te mea tā ’oe i ’apo mai, ’a fa’ata’a nāhea te reira e nehenehe ai e tūra’i i tā ’oe mau tauto’ora’a nō te upo’oti’a i ni’a i te hara ’e nō te riro rahi atu ā mai te Metua i te Ao ra ’e mai te Fa’aora ho’i.
Hi’o ato’a Dieter F. Uchtdorf, « E nehenehe tā ’outou e rave i teienei ! » Ensign ’aore rā Liahona, Novema 2013, 55–57.
E ti’a iā’u ’ia ’ite tāmau noa i te rima o te Atua i roto i tō’u orara’a e ti’a ai.
’Ua pāpa’i Moromona nō ni’a i te hō’ē paruparu tāna i ’ite i roto i te mau ’āti Nephi : ’aita rātou i ’ite i te huru te Fatu i te ha’amaita’ira’a ia rātou. ’Ua fa’aitoito te peresideni Henry B. Eyring ia tātou ’ia « ’ia ’imi i te mau rāve’a nō te ’ite ’e nō te ha’amana’o i te maita’i o te Atua… E pure ’e e feruri māite, ma te ui ē : ’Ua hāpono mai ānei te Atua i te hō’ē parau nō’u noa iho ? ’Ua ’ite ānei au i tōna rima i roto i tō’u orara’a ’aore rā, i roto i te orara’a o tā’u mau tamari’i ? … Tē fa’a’ite pāpū nei au ē, tē here nei ’oia ia tātou ’e tē ha’amaita’i nei ’oia ia tātou, hau atu i tā te rahira’a o tātou e ’ite nei » (« ’A ha’amana’o na, ’a ha’amana’o na », Ensign ’aore rā Liahona, Nov. 2007, 67, 69).
’A tai’o ai ’oe i te Moromona 3:3, 9, e nehenehe tā ’oe e feruri nāhea ’oe e ’ite ai i te mana fa’auru a te Atua i roto i tō ’oe orara’a. E aha te mau ha’amaita’ira’a e tae mai ’ia ’ite ’oe i tōna mana fa’auru ? E aha te mau fa’ahope’ara’a nō te ’itera’a iāna ? (hi’o Moromona 2:26).
Tē ti’a noa nei Iesu Mesia ma te rima fa’atoro noa nō te fāri’i ia tātou.
’Ua pāto’i te mau ’āti Nephi i te mau ha’api’ira’a a Moromona, ’ua vai rā tōna tīa’ira’a e fa’auru mai teie pāpa’a parau ia ’oe. ’A tai’o ai ’oe i te Moromona 5:8–24 ’e te 6:16–22, e aha tā ’oe e ha’api’i nei nō ni’a i te mau fa’ahope’ara’a o te hara ? E aha te ha’api’ira’a tā ’oe e ’apo mai i roto i teie mau tuha’a ’īrava nō ni’a i te mau mana’o o te Metua i te Ao ra ’e o Iesu nō ’oe, noa atu ’ua rave ’oe i te hara ? E aha tā ’oe i ’ite nō te torora’a Iesu Mesia i tōna nā rima ia ’oe ? E aha ïa tā ’oe e mana’o ra e rave ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Moromona 1:2
E aha te aura’a o te parau « ’oi’oi i te ’ite » ? Mai te aha te hōro’a nō te ’oi’oi i te ’ite e ha’amaita’ira’a nō Moromona ? Nāhea te reira e nehenehe ai e riro ’ei ha’amaita’ira’a nō tātou ?
Moromona 1:1–6, 15 ; 2:1–2
’Ua māramarama ānei te mau tamari’i i roto i tō ’outou ’utuāfare ē, e ti’a ia rātou ’ia fa’ananea atu ā i te mau maita’i ’e te mana pae vārua noa atu ā e mea ’āpī rātou ? E nehenehe te hi’ora’a o Moromona e tauturu ia rātou. E nehenehe e hāmani i te hō’ē pāpa’ara’a parau nō te tamari’ira’a ’e te taure’are’ara’a o Moromona, ma te fa’a’ohipa i te mau matahiti ’e te mau ’ohipa i roto i te Moromona 1:1–6, 15 ’e te 2:1–2. ’Ia paraparau ’outou nō te huru o Moromona ’e te mau ’ohipa i tupu nōna, e fa’ahiti i te mau maita’i o tā ’outou mau tamari’i ’o tē fa’auru nei ia ’outou ’e i te ta’ata ’ati a’e ia rātou.
Moromona 2:18–19
E aha te mau parau tā Moromona i fa’a’ohipa nō te fa’ata’a i te parau nō te ao tāna e ora ra ? Nāhea ’oia i te tāpe’a-noa-ra’a i te tīa’i ’a tupu ai te ’ino ’ati a’e iāna ? Nāhea tō tātou ’utuāfare e nehenehe ato’a ai e rave i te reira ?
Moromona 3:12
E aha te mana’o o Moromona i te mau ta’ata ’ati a’e iāna, noa atu ā tō rātou ’ino ? Nāhea tātou ’ia fa’atupu i te here mai tōna ?
Moromona 5:2
Nō te aha tātou e huru taiā ai i te pi’i i te Metua i te Ao ra i te taime ’ua fifi tātou ? E aha te nehenehe e rave nō te tūru’i rahi atu ā i ni’a i te Metua i te Ao ra ?
Moromona 5:16–18
Nō te tauturu i tō ’outou ’utuāfare e hi’o mana’o i te aura’a nō te « [purarara’a] te ota i mua i te mata’i ra » (’īrava 16), e pāhaehae i te tahi pāpie ’e e pūpuhi te mau melo o te ’utuāfare i ni’a iho. ’A fa’ata’a ia rātou ē, te ota e pa’a ïa nō ni’a mai i te hō’ē huero, e mea māmā te reira nō te mata’i ’ia puhi. Nō te aha te « [’erera’a] i te Mesia ’e te Atua ’a parahi ai i teie nei ao » (’īrava 16) ’ua riro mai te ota i mua i te mata’i ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Haʼamaitaʼiraʼa i tā tātou haʼapiʼiraʼa
Ha’api’i i te ha’api’ira’a tumu pāpū ’e te ’ōhie. E mea nehenehe te ’evanelia a te Fatu i roto i tōna huru ’ōhie (hi’o PH&PF 133:57). ’Eiaha e tāmata i te fa’anavenave i tō ’outou ’utuāfare nā roto i te mau ha’api’ira’a huru ’ē mau, e ha’apāpū maoti rā ē, te mea tā ’outou e ha’api’i ra, ’ua fa’atumuhia ïa i ni’a i te ha’api’ira’a tumu pāpū ’e te ’ōhie.
Te buka temeio a Moromona, nā Joseph Brickey