Tē ha’apoto ra Moromona i te mau ’api, nā Tom Lovell

26 nō ’Ātopa–1 nō Novema.

Moromona 1–6

« E hina’aro tō’u ’ia fa’afāriu i tō te ao ato’a nei… i te tātarahapa »

’A tai’o ai ’oe i te Moromona 1–6, e ’imi i te mau parau mau ’o tē nehenehe e tauturu i te mau pīahi ’ia vai ha’apa’o maita’i noa i te taime e tupu te mau ’ohipa parau-ti’a ’ore, mai tā Moromona i rave.

Pāpa’i i te mau mana’o e tae mai

Tītau i te mana’o

I te tahi taime, e taiā ri’i te mau melo ’ia fa’a’ite mai i te mea tā rātou i ’apo mai nō te mea ’aita tō rātou e taime nō te fa’anaho i tō rātou mau mana’o. Nō te tauturu ia rātou, e hōro’a ia rātou ma’a minuti nō te pāpa’i i te mea tā rātou i ’apo mai i te tuatāpapara’a rātou i te Moromona 1–6 i te fare ; i muri iho e ani ia rātou ’ia fa’a’ite mai.

Ha’api’i i te ha’api’ira’a tumu

Moromona 1–6

E ti’a ia tātou ’ia ora parau-ti’a noa atu te tāiroiro e ha’ati ra ia tātou.

• E rave rahi pīahi e nehenehe e māramarama i te ’ohipa i tupu nō Moromona i te tūtavara’a ’ia ora ma te parau-ti’a i roto i te hō’ē ao ’īno. Penei a’e e nehenehe rātou e fa’a’ite mai e aha tā rātou i ’apo mai nā roto mai i te hi’ora’a o Moromona. Nō te tauturu i te ’āparaura’a, e nehenehe e ani i te mau pīahi ’ia ’imi mai e pae ’īrava e fa’a’ite nei i te huru o Moromona ’e ’ia tāpura i te reira i ni’a i te tāpura ’ere’ere (hi’o, ’ei hi’ora’a, Moromona 1:2–3, 15–16 ; 2:1, 23–24 ; 3:1–3, 12, 17–22). Nāhea te reira huru i te tauturu ia Moromona ’ia vai pūai noa i te pae vārua ? Nāhea te reira e tauturu ai ia tātou ’ia riro rahi atu mai ia Moromona te huru ?

  

  Te tama’i, nā Jorge Cocco

• Pinepine Moromona i te pāpa’i ’āfaro i te mau ta’ata nō tō tātou nei mahana. E aha tā tātou e nehenehe e ’apo mai i roto i tāna mau parau ia tātou i roto i te Moromona 3:17–22 ’e te 5:10–24 ? E hōro’a i te mau pīahi tāta’itahi i te hō’ē ’api parau ma teie parau i ni’a iho « Te parau a’o a Moromona ia tātou », pāpa’i i ni’a roa, ’e e fa’aitoito ia rātou ’ia ’imi mai i te mau poro’i i roto i teie mau ’īrava e tano i tō tātou nei ’anotau. Nāhea tātou ’ia fa’a’ohipa i te parau a’o a Moromona nō te tauturu ia tātou ’ia fa’aea pūai noa i te pae vārua i roto i teie ao i teie mahana ?

• Mai te mea tē ha’api’i ra ’oe i te feiā ’āpī, e nehenehe e fa’a’ohipa i te hi’ora’a o Moromona nō te tauturu ia rātou ’ia māramarama ē, e nehenehe rātou e riro ’ei feiā fa’atere parau-ti’a i tō rātou ’āpīra’a. Mai te mea tē ha’api’i ra ’oe i te feiā pa’ari, e nehenehe e fa’a’ohipa i tōna hi’ora’a nō te ha’amata i te hō’ē ’āparaura’a nō ni’a i te mau rāve’a nō te tauturu i te feiā ’āpī ’ia riro mai ’ei feiā fa’atere maita’i. Nō te ha’amata i te hō’ē ’āparaura’a, e nehenehe e ani i te tahi mau pīahi ’ia hi’o i te Moromona 1 ’e i te tahi atu, ’ia hi’o i te Moromona 2, ma te tāpa’opa’o i te mau rāve’a i hōro’ahia ia Moromona nō te fa’atere i roto i tōna ’āpīra’a. E aha te mau mea i fa’ariro iāna ’ei ta’ata fa’atere rahi ? E nehenehe te mau pīahi e fa’a’ite mai i te mau hi’ora’a tā rātou i ’ite nō te fa’aurura’a rahi a te mau tamari’i parau-ti’a ’e te feiā ’āpī parau-ti’a. E nehenehe ato’a tā rātou e tāu’aparau i tā rātou mau rāve’a—’aore rā tā te feiā ’āpī ’o tā rātou i mātau—nō te riro ’ei feiā fa’atere mai ia Moromona te huru.

Moromona 2:10–15

Tē tītau nei te tātarahapara’a i te ’ā’au tātarahapa ’e te vārua marū.

• Nō te ha’api’i mai nō ni’a i te ta’a-’ē-ra’a i roto i te māuiui e arata’i i te tātarahapara’a ’e te māuiui e’ita e arata’i i te tātarahapara’a, e nehenehe e tai’o ’āmui i te Moromona 2:10–15 ’e e ’āparau nō ni’a i te mau uira’a mai teie : E aha te ’ohipa a te « māuiui » i roto i te tātarahapara’a ? E aha te ta’a-’ē-ra’a i roto i te « māuiui e fa’atupu i te tātarahapa » ’e te « māuiui… o te feiā i ’anatemahia ra » ? E aha te mana’o ’e te huru e nehenehe e tauturu ia tātou e fa’atupu i te « ’ā’au tātarahapa ’e te vārua marū » ?

Moromona 3:12

E ti’a ia tātou ’ia here ia vetahi ’ē, noa atu ’aita tātou e au i tā rātou mau mā’itira’a.

• Mai ia Moromona te huru, e rave rahi i roto i tā ’oe mau pīahi e fārerei nei i te mau ta’ata e mau ti’aturira’a ’ē tō rātou. Nāhea i te fa’a’ohipa i te mau mea i tupu nō Moromona nō te ha’api’i i te mau pīahi nō ni’a i te herera’a ia vetahi ’ē noa atu tō rātou mau ta’a-’ē-ra’a ? E nehenehe e tai’o ’āmui i te Moromona 3:12 ’e e ’āparau i te mau taime ’ua fa’a’ite Moromona i te here i te feiā tei pāto’i i tāna poro’i ’e tei onoono e ’ōrure hau i mua i te Atua (hi’o, ’ei hi’ora’a, Moromona 1:16–17 ; 2:12). E aha te tahi mau ’ohipa i tupu i roto i te orara’a o te mau pīahi ’o tā rātou e nehenehe e fa’a’ite mai nō ni’a i te herera’a i te ta’ata ’aita e fāri’i nei i tō rātou mau ti’aturira’a ’e mau hi’ora’a faufa’a ? E nehenehe te fa’ahitira’a parau a te peresideni Dallin H. Oaks i roto i « Te tahi atu mau mātēria tauturu » e hōro’a mai i te tahi parau a’o.

Moromona 6:17

Tē ti’a noa nei Iesu Mesia ma te rima fa’atoro noa nō te fāri’i ia tātou.

• Nō te feiā ’aita fa’ahou e tīa’ira’a ē, e nehenehe tā rātou mau hara ’ia fa’a’orehia, e riro te fa’a’itera’a a Moromona nō te Fa’aora « ma te rima fa’atoro-noa-hia e ’ite mai ia ’outou ra » e ha’apāpū ia rātou. E nehenehe e tai’o ’āmui i te Moromona 6:17 ’e e fa’a’ite i te hō’ē hōho’a nō Iesu Mesia ma te rima toro (mai te hōho’a i roto i te Buka hōho’a ’evanelia, n°66). E aha tā teie ’īrava e ha’api’i nei nō ni’a i te hina’aro o te Fa’aora ’ia tauturu ia tātou ? E nehenehe ato’a e hīmene ’āmui i te hō’ē hīmene e ha’api’i ra i te hō’ē poro’i mai te reira, mai te hīmene ra « Haere mai ia Iesu » (Hīmene, n°56). E nehenehe ato’a e fa’a’ite i te ’ohipa i tupu nō te peresideni Russell M. Nelson i roto i « Te tahi atu mau mātēria tauturu » ’e e ani i te mau pīahi ’ia ’āparau nāhea tātou e nehenehe ai e tauturu ia vetahi ’ē ’ia ’ite ē, e nehenehe e tātarahapa.

Fa’aitoito i te ha’api’ira’a mai i te fare

E nehenehe e ani i te mau pīahi ’ia feruri nō ni’a i te mea tā rātou e pāpa’i i roto i te hō’ē rata i te mau ta’ata nō ananahi. I roto i te Moromona 7–9 tē tai’o nei tātou ē, ’ua pāpa’i Moromona ’e Moroni i te mau ta’ata i tō tātou nei ’anotau, e rave rahi tenetere nā mua atu.

Te tahi atu mau mātēria tauturu

Here i te ta’ata e mea ’ē tāna ti’aturira’a.

’Ua fa’ata’a te peresideni Dallin H. Oaks :

« E mea tītauhia ia tātou pā’āto’a ’ia pe’e i te mau ha’api’ira’a ’evanelia, ’ia here i tō tātou ta’ata tupu ’e ’ia ha’apae i te mārō. ’Ia riro te feiā e pe’e i te Mesia ’ei mau hi’ora’a nō te peu maita’i i mua i te ta’ata. ’Ia here tātou i te mau ta’ata ato’a e ti’a ai, ’ia riro tātou ’ei feiā fa’aro’o maita’i ’e ’ia fa’a’ite tātou i te māna’ona’ora’a i tō rātou mau ti’aturira’a mau. Noa atu ā ’aita tātou e tū’ati i tō rātou mana’o, ’eiaha tātou ’ia riro ’ei feiā au ’ore. ’Eiaha tō tātou ti’ara’a ’e tā tātou mau parau nō ni’a i te mau tumu parau fifi ’ia riro ’ei mārōra’a. E fa’a’ite tātou i te pa’ari i roto i te ha’amāramaramara’a ’e te fa’aeara’a i ni’a i tō tātou mana’o ’e te fa’a’ohipara’a i tō tātou mana fa’auru. ’A nā reira ai tātou, tē ani atu nei mātou ē, ’eiaha vetahi ’ē ’ia ’ino’ino i tō tātou mau ti’aturira’a pāpū pae fa’aro’o, ’e ’eiaha ato’a ’ia ’ino’ino i tō tātou ti’amāra’a ’ia ha’apa’o i tā tātou fa’aro’o. Tē fa’aitoito nei mātou ia tātou pā’āto’a ’ia ha’apa’o i te ture rahi a te Fa’aora : ‘E te mau mea ato’a tā ’outou i hina’aro ia vetahi ’ē ra, e nā reira atoa atu ’outou ia rātou’ (Mataio 7:12).

« Mai te mea ’aita tō tātou mau mana’o e fāri’ihia, e fāri’i tātou i te reira ma te maita’i, ’e e fa’a’ite tātou i te peu maita’i i ni’a i tō tātou mau ta’ata pāto’ito’i » (« Te herera’a ia vetahi ’ē ’e te orara’a i roto i te ta’a-’ē-ra’a », Ensign ’aore rā Liahona, Nov. 2014, 27).

E nehenehe te tātarahapara’a.

’Ua fa’a’ite te peresideni Russell M. Nelson i teie ’ohipa i tupu :

« I teie matahiti i ma’iri a’enei, tē tere ra māua ’o Elder David S. Baxter i te hō’ē ’āmuira’a titi, tāpe’a atura māua i te hō’ē fare tāmā’ara’a. I tō māua ho’ira’a i tō māua pere’o’o, tāpiri mai nei te hō’ē vahine ’o tei pi’i mai ia māua… Ui mai nei ē, e nā Elders ānei māua nō te ’Ēkālesia. Pāhono atura māua ē, ’ē. Ma te ’imi e nāhea ’ia ha’amata, fa’ati’a mai nei i te ’ā’amu o tōna orara’a fifi roa, tei mure i roto i te hara. I teienei, 28 matahiti tōna, ’ua ’ino roa. ’Aita e faufa’a fa’ahou iāna ’ia ora. ’A fa’ati’a noa ai ’oia, ha’amata mai ra te maita’i o tōna vārua i te ’iteahia. Nā roto i te ta’i ’e te tāparu, ani mai nei ē, tē vai ra ānei te tahi ti’aturira’a nōna, te hō’ē rāve’a nō te ’īritira’a iāna i rāpae i teie ’āpo’o.

« ‘’Ē’, ’o tā māua ïa i pāhono, ‘tē vai nei te ti’aturira’a. ’Ua tā’amuhia te ti’aturira’a i te tātarahapa. E nehenehe ’oe e taui. E nehenehe ’oe e « haere mai i te Mesia, ’e ’ia maita’i roa iāna »’ [Moroni 10:32]. ’Ua ani ’ū’ana atu māua iāna ’eiaha e ha’amaoro [hi’o Alama 13:27 ; 34:33]. ’Ua ta’i ’oia ma te marū ’e ’ua ha’amāuruuru ’oia ia māua.

« I roto i tō māua tere ’e ’o Elder Baxter, ’ua feruri hōhonu māua i teie nei ’ohipa. ’Ua ha’amana’o māua i te a’o tei hōro’ahia e Aarona i te hō’ē vārua ti’aturi ’ore, ’o tei parau ē : ‘’E ’ia tātarahapa i tā ’oe mau hara, ’e ’ia pi’o i raro i mua i te Atua, ’e ’ia pi’i atu i tōna ra i’oa i te fa’aro’o… ’ei reira ’oe e roa’a ai te tīa’i tā ’oe e hina’aro nei’ [Alama 22:16]…

« I teie vahine 28 matahiti ’o tei mure i roto i te vari o te hara, ’e ia tātou tāta’itahi, tē parau atu nei au e mea pāpū te ha’amaita’ira’a o te tātarahapa. E tae mai te reira nā roto i te fa’afāriura’a tā’āto’a i te Fatu ’e i tāna ’ohipa mo’a ».

Hau atu, ’ua nā ’ō te peresideni Nelson ē : « Tē ha’amana’o ato’a ra tātou i te feiā hara i raro a’e i te utuutura’a a tō rātou feiā fa’atere, ’e ’ua pāpa’i Moromona ē : « Inaha rā, ’aita roa o’u e ti’aturira’a, ’ua ’ite ho’i au i te ’utu’a a te Fatu e tu’uhia mai i ni’a ia rātou ; ’aita ho’i rātou i tātarahapa i tā rātou mau parau ’ino, tē tama’i noa ra rā rātou ’ia ora, ’aore rā rātou i ti’aoro i Tei hāmani ia rātou ra’ (Moromona 5:2) » (« Te tātarahapa ’e te fa’afāriura’a », Ensign ’aore rā Liahona, Mē 2007, 102, 104).

Ha’amaita’ira’a i tā tātou ha’api’ira’a

E tupu te tupura’a pae vārua i roto i te ’utuāfare. E 165 hora tā tā ’outou mau pīahi i rāpae i te fare purera’a. I taua taime ra, tē tupu nei tō rātou iho mau ’ohipa pae vārua ’o te ha’api’i ia rātou nō ni’a i te ’evanelia. ’A ui i te mau uira’a e fa’aitoito i te feiā ’apo mai ’ia fa’a’ite mai i te mau mea tā rātou i ha’api’i i roto i te hepetoma ’e tō rātou ’utuāfare (hi’o Ha’api’ira’a mai tā te Fa’aora, 18).