tē pure ra Iesu ’e te mau ’āti Nephi

Te pure a te Mesia, nā Derek Hegsted

19–25 nō ’Ātopa

3 Nephi 27–4 Nephi

« ’Aita ho’i e feiā… tei hau ia rātou i te ’oa’oa »

’O te tuatāpapara’a a te ta’ata hō’ē i te 3 Nephi 27–4 Nephi te rāve’a maita’i roa a’e nō te fa’aineine ia ’oe nō te ha’api’i. E riro te mau ha’api’ira’a tumu ’e te mau mana’o i roto i teie arata’i ha’api’ira’a i te tauturu ia ’oe ’ia pāhono i te mau muhumuhu pae vārua tā ’oe e fāri’i i roto i tā ’oe tuatāpapara’a.

Pāpa’i i te mau mana’o e tae mai

ītona fa’a’itera’a

Tītau i te mana’o

Hō’ē rāve’a nō te fa’aitoito i te mau pīahi ’ia fa’a’ite mai i tā rātou i ’apo mai i roto i tā rātou iho tuatāpapara’a, ’o te anira’a ïa ia rātou ’ia ’imi mai i te hō’ē hīmene e tū’ati i te hō’ē parau mau tā rātou i ’apo mai i roto i te 3 Nephi 27–4 Nephi. I muri iho e nehenehe rātou e fa’a’ite mai i te mau hīmene tā rātou i ’ite mai ’e nāhea teie mau hīmene e tū’ati ai i te mau parau mau i roto i te mau pāpa’ira’a mo’a.

ītona ha’api’ira’a

Ha’api’i i te ha’api’ira’a tumu

3 Nephi 27:1–22

’Ua pi’ihia Te ’Ēkālesia a Iesu Mesia i tōna i’oa ’e ’ua patuhia i ni’a i tāna ’evanelia.

• E nehenehe te ’āparaura’a nō ni’a i te i’oa o te ’Ēkālesia e fa’ahōhonu i te au maita’i o te mau pīahi nō te rirora’a ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a Nei. E nehenehe e ani i te mau pīahi ’ia tāpura i te mau i’oa o te tahi mau fa’anahora’a rau ma te fa’ata’a e aha tā te i’oa e parau nei nō ni’a i te reira mau fa’anahora’a. I muri mai e nehenehe tā te mau pīahi e tai’o i te 3 Nephi 27:1–12, ma te ’imi e aha tā te Fa’aora i ha’api’i nō ni’a i te i’oa o tāna ’Ēkālesia. E nehenehe ato’a tā rātou e fa’a’ite mai e aha te aura’a nō rātou te rirora’a ’ei melo nō te ’Ēkālesia a te Mesia. E aha te aura’a nō te ravera’a i tōna i’oa i ni’a ia tātou ?

• Teie te tahi fa’ahou ā rāve’a nō te tāu’aparau i te faufa’a rahi o te i’oa o te ’Ēkālesia a te Fa’aora. I muri mai i te tāu’aparaura’a i te mau parau mau i roto i te 3 Nephi 27:1–22, e nehenehe e pāpa’i i te i’oa tā’āto’a o te ’Ēkālesia i ni’a i te tāpura ’ere’ere. ’Ei reira e nehenehe te mau pīahi e mā’iti i te tahi mau ta’o i roto i te i’oa ma te parau mai nāhea te ta’o tāta’itahi e tauturu ai ia tātou ’ia ’ite ’o vai tātou ’aore rā e aha tā tātou e ti’aturi nei. E nehenehe te fa’ahitira’a parau a te peresideni M. Russell Ballard i roto i « Te tahi atu mau mātēria tauturu » e tauturu mai. Nō te aha e mea faufa’a te fa’a’ohipara’a i te i’oa o te ’Ēkālesia ’a fa’a’ite ai tātou i tō tātou fa’aro’o i te ta’ata ?

• I muri iho i te fa’ata’ara’a ē, tītauhia ’ia patu i tāna ’Ēkālesia « i ni’a iho i [tāna] ’evanelia » (3 Nephi 27:10), ’ua parau mai te Fa’aora e aha tāna ’evanelia. Penei a’e e nehenehe e ani i te mau pīahi ’ia fa’a’ite mai nāhea rātou i te fa’ata’a atu i te hō’ē hoa e aha te ’evanelia. ’Ei reira, e nehenehe e ani ia rātou ’ia ’imi i roto i te 3 Nephi 27:13–22 i te mea tā te Fa’aora i parau nō tāna ’evanelia. E aha tā tātou e parau nō te ha’apoto i tā te Fa’aora i parau mai ? ’A tuatāpapa ai tātou i te tātarara’a a te Fa’aora nō te ’evanelia, e aha te mau mea tā tātou e ’apo mai nō ni’a i te huru o te orara’a i te ’evanelia i te mau mahana ato’a ?

3 Nephi 29–30

E tāpa’o te Buka a Moromona ē, tē tupu ra te ’ohipa a te Atua nō te mau mahana hope’a nei.

• Penei a’e e nehenehe e ha’amata i te hō’ē tāu’ara’a parau nō ni’a i te 3 Nephi 29–30 nā roto i te ’āparaura’a nō ni’a i te mau tāpa’o. ’Ei hi’ora’a, e nehenehe te mau pīahi e fa’ata’a mai i te mau tāpa’o e fa’a’ite nei ē, tē haere mai ra te vero ’aore rā tē taui ra te pu’e tau. I muri iho e nehenehe tā rātou e tai’o i te 3 Nephi 29:1–3 nō te hi’o mai e aha tei parauhia nō te taera’a mai te Buka a Moromona, ’o tā Moromona i pi’i « teie nei mau parau » (hi’o ato’a 3 Nephi 21:1–7). E aha te poro’i tā te Fatu i hōro’a i roto i te 3 Nephi 29:4–9 ia rātou e « vahavaha » ’aore rā e « huna » i te ’ohipa a te Atua i te mau mahana hope’a ? Nāhea te tai’ora’a i te Buka a Moromona i te mahana tāta’itahi i te ha’apūai i tō tātou fa’aro’o, i teie mau mea tā te tahi atu mau ta’ata e « vahavaha » nei ’aore rā ’o tā rātou e « huna » nei i tō tātou nei ’anotau ? Penei a’e e hina’aro ’oe e ani i te mau pīahi ’ia tai’o i te tītaura’a manihini a te Fatu i roto i te 3 Nephi 30 ’e ’ia fa’a’ite mai nāhea te Buka a Moromona i te tauturura’a ia rātou ’ia fāri’i i teie tītaura’a manihini.

4 Nephi

E arata’i te fa’afāriura’a ia Iesu Mesia ’e i tāna ’evanelia, i te tāhō’ē ’e i te ’oa’oa.

• Tē fa’ahōho’a nei te fa’ati’ara’a i roto i te 4 Nephi i te ’oa’oa e nehenehe e tae mai i roto i tō tātou orara’a—’ei ta’ata hō’ē ānei, ’ei ’utuāfare ’e ’ei pāroita ’e ’ei titi—’a tūtava ai tātou ’ia fāriu hope atu ā i ni’a ia Iesu Mesia. E nehenehe e ani i te mau pīahi ’ia ’imi i roto i te 4 Nephi 1:1–18 i te mau ha’amaita’ira’a tā te mau ta’ata i fāri’i i te fa’afāriura’a rātou pā’āto’a i te Fatu ra, ’e ’ia pāpa’i i te reira i ni’a i te tāpura ’ere’ere. Nāhea tō rātou fa’afāriura’a i taui i te huru tā rātou ravera’a i te tahi ’e te tahi ? Penei a’e e nehenehe te mau pīahi e fa’a’ite mai nāhea te ’evanelia i te hōpoira’a mai i te mau ha’amaita’ira’a i tō rātou ’utuāfare ’aore rā i tō rātou pāroita. Nō te tauturu i te mau pīahi ’ia māramarama nāhea tātou tāta’itahi e nehenehe ai e ora rahi atu ā mai te ta’ata i roto i te 4 Nephi ’e nāhea tātou e nehenehe e fa’aitoito i te tāhō’ēra’a rahi a’e ’e te ’oa’oara’a i rotopū i te ta’ata ’ati a’e ia tātou, e nehenehe e tai’o i te fa’ahitira’a parau a Elder D. Todd Christofferson i roto i « Te tahi atu mau mātēria tauturu ». E nehenehe te mau pīahi e hi’opo’a i tā rātou iho mau tauto’ora’a i roto i nā tuha’a e toru tā Elder Christofferson i fa’ahiti.

• E rave rahi tenetere tō te mau ta’ata i roto i te Buka a Moromona paraura’a ia rātou ’ei mau ’āti Nephi ’e ’ei mau ’āti Lamana—’e tē vai atu ra—i muri iho rā i te tāvinira’a te Fa’aora i rotopū ia rātou, ’ua mo’e te reira. I muri iho i te tai’o-’āmui-ra’a i te 4 Nephi 1:17, penei a’e e nehenehe te mau pīahi e fa’a’ite mai i tō rātou mau mana’o nō ni’a i te mau huru « pupu » mai te reira e vai ra i roto i te sōtaiete i teie mahana. E aha te nehenehe e rave nō te fa’a’ore i te tāpupura’a mai te reira ’e ’ia riro mau « ’ei hō’ē, ’o te tamari’i ana’e a te Mesia » ? (’īrava 17).

• E aha tā te mau pīahi e nehenehe e ha’api’i mai nō ni’a i te topatopara’a te sōtaiete nō Ziona i fa’a’itehia i roto i te 4 Nephi ? E nehenehe e ani ia rātou ’ia ’imi i roto i te 4 Nephi 1:19–34 i te mau mea i fa’ahope i te ’oa’oa ’e te tāhō’ē o te ta’ata i muri mai e 200 ti’ahapa matahiti i muri mai i te tere o te Fa’aora i reira. E aha te mau parau mau i roto i teie mau ’īrava e nehenehe e tauturu ia tātou ’ia fa’ata’a i te mana’o ’e te huru i roto i tō tātou orara’a ’e tō tātou sōtaiete tei tītauhia ’ia taui ?

ītona ’āpora’a ha’api’ira’a

Fa’aitoito i te ha’api’ira’a mai i te fare

Tē fa’ata’a nei te Moromona 1–6 i te mau ’ohipa ’oto rahi tei arata’i i te ha’amoura’a o te nūna’a ’āti Nephi. Nō te fa’aitoito i te mau pīahi ’ia tai’o i teie mau pene, e ani ia rātou ’ia hi’o mai i te mau mea tā rātou i ’ite nō ni’a i te mau ’āti Nephi ’o tē tupu ra i tō tātou nei mahana.

ītona mātēria tauturu

Te tahi atu mau mātēria tauturu

Te i’oa o te ’Ēkālesia a te Mesia.

’Ua parau te peresideni M. Russell Ballard :

« ’Ua feruri rahi au i te tumu te Fa’aora i hōro’a mai ai i nā 15 ta’o i’oa o tāna ’Ēkālesia tei fa’aho’i-fa’ahou-hia mai. E mea roa te reira, teie rā mai te mea e feruri tātou i te reira mai te hō’ē pū’ohura’a nō te ti’ara’a o te ’Ēkālesia, e ’ite ïa tātou i tōna poto, tōna ’āfaro, ’e tōna ’ōhie. Nāhea te tahi tātarara’a ’ē atu e riro ai ’ei tātarara’a hau atu i te ’āfaro ti’a ’e te pāpū maita’i, ma te fa’a’ohipa i te tahi ma’a ta’o ri’i noa mai teie te huru ?

« ’Ua riro te ta’o tāta’itahi ’ei ha’amāramaramara’a ’e te mea faufa’a ho’i. Tē fa’a’ite ra te ta’o ra Te i te ti’ara’a hō’ē o te ’Ēkālesia i fa’aho’i-fa’ahou-hia mai i rotopū i te mau fa’aro’o o te ao nei.

Tē fa’a’ite ra « Te mau ta’o ’Ēkālesia a Iesu Mesia ē, ’o tāna ’Ēkālesia teie [hi’o 3 Nephi 27:8]…

« Tē ha’amāramarama ra I te Mau Mahana Hope’a Nei ē, ’ua tū’ati te ’Ēkālesia i te ’Ēkālesia tā Iesu Mesia i fa’ati’a i te taime o tāna tāvinira’a i ni’a i te fenua nei, terā rā, ’ua fa’aho’i-fa’ahou-hia mai i teie mau mahana hope’a nei. ’Ua ’ite tātou ē, ’ua tupu te fa’aru’era’a, ’e ’aore rā te tāivara’a, ’e ’ua tītauhia te fa’aho’i-fa’ahou-ra’a mai i tāna parau mau ’e te ’Ēkālesia tā’āto’a i tō tātou nei ’anotau.

« Feiā Mo’a, te aura’a ra, e pe’e taua mau melo ra iāna ’e e tūtava ho’i ’ia rave i tōna hina’aro, ’ia ha’apa’o i tāna mau fa’auera’a, ’e ’ia fa’aineine fa’ahou ā ’ia ora i pīha’i iho i tō tātou Metua i te Ao ra. Feiā Mo’a, ’o te feia ïa e ’imi ra ’ia ha’amo’a i tō rātou orara’a nā roto i te fafaura’a ’ia pe’e i te Mesia » (« Te faufa’a o te hō’ē i’oa », Ensign ’aore rā Liahona, Nov. 2011, 80).

E aha tei tītauhia nō te patu ia Ziona ?

’Ua ha’api’i Elder D. Todd Christofferson : « E riro Ziona ’o Ziona nō te huru, te mau ti’ara’a, ’e te ha’apa’o o tōna mau ta’ata [hi’o Mose 7:18]… Mai te mea e hina’aro tātou ’ia fa’atupu ia Ziona i roto i tō tātou mau ’utuāfare, te mau ’āma’a, te mau pāroita ’e te mau titi, e ti’a ïa ia tātou ’ia ora mai te au i teie tītaura’a. E tītauhia ïa (1) ’ia riro ’ei hō’ē ’ā’au ’e hō’ē ā mana’o, (2) ’ia riro ’ei nūna’a mo’a ’ei ta’ata tāta’itahi, ’e ’ei pupu ta’ata, ’e (3) ’ia ha’apa’o i te feiā veve ’e te nava’i ’ore ma te manuia ’ia noa’a ia tātou i te fa’a’ore i te veve i rotopū ia tātou. E’ita e nehenehe ia tātou ’ia tīa’i i te taime e tae mai ai ’o Ziona nō te fa’atupu i teie mau mea—E tae mai ’o Ziona mai te mea e tupu teie mau mea » (« Haere mai i Ziona », Ensign ’aore rā Liahona, Nov. 2008, 38).

Ha’amaita’ira’a i tā tātou ha’api’ira’a

’A fa’a’ohipa i te mau rāve’a huru rau nō te ha’api’i. E mea ’ōhie ’ia au maita’i noa i te fa’a’ohipara’a i te hō’ē noa huru rāve’a ha’api’ira’a, tera ra e tano ’ia fa’a’ohipahia te mau rāve’a ha’api’ira’a huru rau nō te mau pīahi huru rau o te piha ha’api’ira’a. ’A feruri i te mau rāve’a tā ’oe i fa’a’ohipa a’enei—’ua fa’a’ohipa ānei ’oe i te mau ’ā’amu, te mau ha’api’ira’a tao’a, te mau hōho’a ’e te tahi atu mau mea ? (Hi’o Ha’api’ira’a mai tā te Fa’aora, 7).