te fāra’a Iesu i te mau ’āti Nephi

’Ana’ana atura te māramarama nō tōna mata i ni’a ia rātou, nā Gary L. Kapp

28 nō Tetepa–11 nō ’Ātopa

3 Nephi 17–19

« ’Ua tae tō’u ’oa’oa i te rahi ra »

’Ia haʼamata tā ʼoe faʼaineineraʼa nō te ha’api’i i te ta’ata nā roto i tā ʼoe iho tuatāpaparaʼa i te mau pāpaʼiraʼa moʼa. E ti’a i te Mai, pe’e mai—nō te ta’ata hō’ē ’e te ’utuāfare e turu i tā ’oe tuatāpapara’a, ’e e hōro’a ato’a teie arata’i ha’api’ira’a i te tahi mau mana’o nō te tauturu ia ’oe ’ia fa’aineine.

Pāpa’i i te mau mana’o e tae mai

ītona fa’a’itera’a

Tītau i te mana’o

I roto i te 3 Nephi 17:1–3, ’ua ani te Fa’aora i te ta’ata ’ia ho’i i tō rātou fare ’e ’ia « fa’aineine i tō [rātou] mana’o nō ananahi » hou ’a ho’i mai ai, ’ia ha’api’ihia rātou. E nehenehe e ui i te mau pīahi nāhea rātou i te fa’aineine nō te tāu’ara’a parau i teie mahana ’e e aha te mea tā rātou i feruri.

ītona ha’api’ira’a

Ha’api’i i te ha’api’ira’a tumu

3 Nephi 17 ; 18:24–25, 28–32

’O te Fa’aora tō tātou hi’ora’a parau-ti’a nō te tāvinira’a.

• ’Ua fāna’o tātou pā’āto’a i te rāve’a nō te tāvini ia vetahi ’ē, ’e e nehenehe tātou pā’āto’a e maita’i atu ā nō te reira. Hō’ē rāve’a nō te ’apo mai i te ha’api’ira’a i roto i te hi’ora’a tāvinira’a a te Fa’aora, ’o te tai’ora’a ïa i te 3 Nephi 17 i roto i te piha ha’api’ira’a ’e te anira’a i te mau pīahi ’ia hōhora mai i tō rātou mana’o ’ia ’ite mai rātou i te hō’ē mea e ha’api’i nei nō ni’a i te tāvinira’a. E aha tā tātou e ha’api’i nei nō ni’a i te huru o te Fa’aora tei fa’ariro iāna ’ei hi’ora’a rahi roa nō te tāvinira’a ? E aha te mau parau mau tā tātou e ’apo mai nō ni’a i te tāvinira’a nā roto mai i te hi’ora’a o te Fa’aora ? E nehenehe ato’a e hi’o i te tahi atu mau hi’ora’a i roto i te 3 Nephi 18:24–25 ’e te 28–32. I muri iho e nehenehe te mau pīahi e ’āparau nō ni’a i te mau mea ta’a ’ē tei fa’auruhia ia rātou ’ia rave nō te pe’e i te hi’ora’a tāvinira’a a te Fa’aora.

  te ha’amaita’ira’a Iesu i te mau tamari’i ’āti Nephi

  ’A hi’o na i tā ’outou mau tamari’i ri’i, nā Gary L. Kapp

3 Nephi 17:13–22 ; 18:15–25 ; 19:6–9, 15–36

Tē ha’api’i nei te Fa’aora ia tātou nāhea ’ia pure.

• Nō te tauturu i te mau pīahi ’ia ’apo mai nā roto mai i te mau hi’ora’a e rave rahi ’e te mau ha’api’ira’a ho’i nō ni’a i te pure i roto i te 3 Nephi 17–19, e nehenehe e pāpa’i i ni’a i te tāpura ’ere’ere ’O vai ? Nāhea ? Ahea ? ’e Nō te aha ? ’e e ani i te piha tā’āto’a ’ia hi’o mai i te pāhonora’a i teie mau uira’a nō ni’a i te pure i roto i te mau ’īrava i muri nei : 3 Nephi 17:13–22 ; 18:15–25 ; ’e te 19:6–9, 15–36. E aha te tahi atu ā ha’api’ira’a tā te mau pīahi i fana’o ’ia tai’o rātou i teie mau ’īrava ? E nehenehe te fa’ahitira’a parau a Elder Richard G. Scott i roto i « Te tahi atu mau mātēria tauturu » e fa’ananea i te tāu’ara’a parau. E nehenehe ato’a e ani i te mau pīahi ’ia fa’a’ite mai e aha tā rātou e rave nei nō te ha’amaita’i atu ā i tā rātou mau pure ta’ata hō’ē ’e te pure ’utuāfare (hi’o 3 Nephi 18:18–21).

• Tē vai nei i roto i te arata’i ha’api’ira’a o teie hepetoma o te Mai, pe’e mai—nō te ta’ata hō’ē ’e te ’utuāfare i te mau uira’a nō te feruri nō ni’a i te pure ’a tai’o ai i teie mau ’īrava. E nehenehe e ani i te mau pīahi ’ia fa’a’ite mai i te mea ato’a tā rātou i ’apo mai nō ni’a i te reira mau uira’a. ’Aore rā e nehenehe e ani i te mau pīahi e rave rahi ’ia haere mai i te piha ha’api’ira’a ma te fa’aineine ia rātou nō te ’āparau nō ni’a i te hō’ē mea tā rātou i ha’api’i mai nō ni’a i te pure i roto i te 3 Nephi 17–19. E aha te mau mea i fa’auruhia ia rātou ’ia rave nō te ha’amaita’i atu ā i tā rātou mau pure ?

• ’Ua ha’api’i Iesu nō te aha e ti’a ’ia pure tāmau noa (hi’o 3 Nephi 18:15–18). E nehenehe te hō’ē ha’api’ira’a tao’a e tauturu i te mau pīahi ’ia māramarama e aha tāna i ha’api’i. ’Ei hi’ora’a, e nehenehe ’oe e fa’a’ī i te hō’ē fa’ari’i pape nō te fa’ahōho’a i te muhumuhu a Sātane. E tu’u māite i te hō’ē ’ahu iti (e fa’ahōho’a ia tātou) i te hōhonu o te hō’ē hāpaina (e fa’ahōho’a i te pure-tāmau-ra’a). Fa’atāhuri i te hāpaina ’e patia i te hōhonu o te fa’ari’i pape. E vai marō noa te ’ahu i te hōhonu o te hāpaina noa atu ē e pape ’ati a’e iāna. E aha tā teie ha’api’ira’a tao’a ’e te 3 Nephi 18:15–18 e ha’api’i nei ia tātou nō ni’a i te pure ? (hi’o ato’a PH&PF 10:5). E aha te aura’a « ʼia pure tāmau noa » ? Nāhea te pure e tauturu ai ia tātou ’ia pāto’i i te muhumuhu a Sātane ? E nehenehe e vaiiho ma’a taime ’ia pāpa’i te mau pīahi i te mau mana’o e tae mai nō ni’a i te mau mea e rave nō te ha’amaita’i atu ā i tā rātou mau pure.

3 Nephi 18:1–12

E ti’a ia tātou ’ia pa’ia i te pae vārua ’ia rave tātou i te ’ōro’a mo’a.

• Nō te ha’amata i te hō’ē ’āparaura’a nō ni’a i te mau ha’api’ira’a a te Fa’aora nō ni’a i te ’ōro’a mo’a i roto i te 3 Nephi 18, e nehenehe e vāhi i te mau pīahi ’ei pupu ma te hōro’a i te pupu tāta’itahi i te hō’ē o te mau ’īrava i muri nei, ’ia tai’o ’e ’ia ’āparau : Mataio 26:26–28 ; 3 Nephi 18:1–12 ; ’e Te Parau Ha’api’ira’a ’e te mau Parau Fafau 20:75–79 ; 27:1–4. I muri iho i te tai’ora’a i tā rātou mau ’īrava i hōro’ahia, e nehenehe te pupu tāta’itahi e feruri i te hō’ē uira’a ’aore rā e piti uira’a nō ni’a i te ’ōro’a mo’a tē vai ra te pāhonora’a i roto i te mau ’īrava tā rātou i tai’o, ’e ’ia pāpa’i i te reira i ni’a i tāpura ’ere’ere. ’Ei reira, nā te tahi atu mau pīahi e ’imi i roto i te mau ’īrava i te pāhonora’a i te mau uira’a. E nehenehe ato’a te mau pīahi e ’āparau nāhea i te ha’amaita’i atu ā i tā rātou ravera’a i te ’ōro’a.

• E aha te aura’a ’ia « pa’ia » i te ravera’a i te ’ōro’a mo’a ? (hi’o 3 Nephi 18:4–5, 9 ; 20:9). E nehenehe e ani i te mau pīahi ’ia tāu’aparau piti piti i teie uira’a ’a tai’o ’āmui ai i te 3 Nephi 18:1–12. E nehenehe ato’a e ani i te mau pīahi ’ia feruri i te taime hope’a ’ua tae mai terā mana’o « pa’ia » i te pae vārua, i te ravera’a i te ’ōro’a mo’a. Penei a’e e nehenehe rātou e ’āparau i te mau mea e ārai ’aore rā e fa’a’ōnevaneva ia tātou i te « pa’iara’a » i te ’ōro’a mo’a ’e ’ia fa’a’ite i te tahi mau mana’o nō ni’a i te huru e upo’oti’a i ni’a i teie mau ti’a’iara’a (obstacles).

3 Nephi 19:9–15, 20–22

E tītau te mau pipi a Iesu Mesia i te hōro’ara’a o te Vārua Maita’i.

• E nehenehe e ui i te mau pīahi ’ia feruri i te hō’ē mea tā rātou e hina’aro roa nei. E aha tā rātou i ineine e rave nō te fāri’i i te reira ? E nehenehe te reira e ha’amata i te hō’ē ’āparaura’a nō ni’a i te « hina’aro rahi » o nā pipi e ’ahuru ma piti mai tei ’itehia i roto i te 3 Nephi 19:9–15 ’e te 20–22. Nō te aha ïa e mea faufa’a rahi te reira nō rātou ? Nō te aha e mea faufa’a rahi te reira nō tātou ? ’Ia au i teie mau ’īrava, nāhea tātou ’ia ’imi pāpū i te hoara’a o te Vārua Maita’i ?

ītona ’āpora’a ha’api’ira’a

Fa’aitoito i te ha’api’ira’a mai i te fare

’Ua nā ’ō te Fatu : « E mea maita’i ho’i te mau parau a Isaia » (3 Nephi 23:1). Nō te fa’aitoito i te mau pīahi ’ia tai’o i te 3 Nephi 20–26, e nehenehe e parau ia rātou ē, i roto i teie mau pene, ’ua fa’ata’a Iesu i te tahi o te mau parau « maita’i » a Isaia. E ani i te mau pīahi ’ia feruri nō te aha e mea maita’i te mau parau a Isaia. Fa’aitoito ia rātou ’ia fa’aineine nō te sābati i muri nei, ’ia fa’a’ite mai i te mea tā rātou i ’apo mai.

ītona mātēria tauturu

Te tahi atu mau mātēria tauturu

Te faufa’a rahi o te pure.

’Ua fa’a’ite pāpū Elder Richard G. Scott i te faufaʼa rahi o te pure :

« E pure tātou i tō tātou Metua i te Ao ra i te i’oa mo’a o tāna Tamaiti here, ’o Iesu Mesia. E mea hau atu te manuiara’a o te pure ’ia tūtava ana’e tātou ’ia vai mā ’e ’ia ha’apa’o i te mau fa’auera’a, ma te hina’aro parau-ti’a ’e te ineine ho’i i te rave i te mea tāna e ani mai. E fa’atae mai te pure o te ’ā’au ha’eha’a ’e te ti’aturi i te arata’ira’a ’e te hau.

« ’Eiaha e ha’ape’ape’a nō te mau mana’o tei ’ore i fa’ahiti-maita’i-hia. ’A paraparau noa i tō ’oe Metua tei ’ī i te aroha ’e te ’ite. E tamari’i faufa’a rahi ’oe nāna ’o tāna e here maita’i nei ’e ’o tāna e hina’aro nei ’ia tauturu. ’A pure ai ’oe, ’ia ’ite ’oe ē, tei pīha’i iho tō ’oe Metua i te Ao ra, ’e tē fa’aro’o ra ’oia.

« Te hō’ē tāviri nō te ha’amaita’i i te pure ’o te ha’api’ira’a ïa nāhea ’ia ani i te mau uira’a ti’a. ’A feruri na i te rave i te hō’ē tauira’a, ’ia ’ore e ani i te mau mea tā ’oe e hina’aro, ’ia mā’imi mau rā i te mea tāna e hina’aro nei nō ’oe. I muri iho ’a ’apo mai ai ’oe i tōna hina’aro, ’a pure ’ia arata’ihia ’oe nō te fāri’i i te pūai nō te fa’atupura’a i taua hina’aro ra.

« ’Ia mana’o ana’e ’oe ē ’ua ātea ’ē ’oe i tō tātou Metua, penei a’e tē vai ra e rave rahi mau tumu. Noa atu e aha te tumu, ’ia tāmau noa ’oe i te tāparu i te tauturu, e arata’i ïa ’oia ia ’oe ’ia rave i te mea ’o tē fa’aho’i mai i te ti’aturira’a ē tei pīha’i iho noa ’oia ia ’oe. ’A pure, noa atu ’aita ’oe e hina’aro i te pure. I te tahi mau taime, mai te hō’ē tamari’i, e rave paha ’oe i te ’ohipa ti’a ’ore ’e e mana’o ’oe ē e’ita e nehenehe ia ’oe ’ia ha’afātata atu i tō ’oe Metua ’e te hō’ē pe’ape’a. Teie ïa te taime tītau-rahi-hia ia ’oe ’ia pure. ’Eiaha roa ’oe e mana’o ē e’ita roa ’oe i te mea parau-ti’a nō te pure.

« Tē uiui nei tō’u mana’o ē e nehenehe mau ānei ia tātou ’ia ta’a i te mana rahi o te pure maori rā i te taime tātou e fa’aruru ai i te hō’ē pe’ape’a rahi ’e te rū ’e ’ua ’ite tātou ē ’aita tō tātou e mana nō te tātara i te reira. I reira tātou e fāriu atu ai i ni’a i tō tātou Metua ma te ’ite ha’eha’a ē tei roto mau tātou i tōna rima. E mea au ’ia ’imi i te hō’ē vāhi mo’emo’e i reira tō tātou mau mana’o e nehenehe ai e parau-vaha-hia ma te roara’a ’e te pūai e tītauhia » (« Using the Supernal Gift of Prayer », Ensign ’aore rā Liahona, Mē 2007, 8).

Ha’amaita’ira’a i tā tātou ha’api’ira’a

Tūtava i te here mai tō te Mesia ra. Mai te mea e pīahi i roto i te piha ha’api’ira’a e tītauhia te fa’ahoara’a, e feruri nāhea tā ’oe e nehenehe e tauturu iāna ’ia ’ana’anatae ’oia i roto i te piha ha’api’ira’a. ’Ei hi’ora’a, e nehenehe e ani i te tahi atu pīahi e pārahi i pīha’i iho i teie ta’ata ’e ’ia fa’ahoa iāna.