tē fa’a’ite ra Iesu i nā ’ahuru ma piti ’āpōsetolo

Nephi toru : Teie nei tino ta’ata e hō’ē ’ahuru ma piti, nā Gary L. Kapp

21–27 nō Tetepa

3 Nephi 12–16

« ’O vau te ture ’e te māramarama »

E mea pāpū ē, e riro te pīahi tāta’itahi i te ’ite mai i te hō’ē ’ohipa ta’a ’ē nō rātou i roto i te mau ha’api’ira’a pūai e rave rahi a te Fa’aora i roto i te 3 Nephi 12–16. E vaiiho i te mau pīahi ’ia fa’a’ite mai i te mau parau tumu tā rātou i tāpe’a mai.

Pāpa’i i te mau mana’o e tae mai

ītona fa’a’itera’a

Tītau i te mana’o

’Ia ti’a i te tā’āto’ara’a ’ia fa’a’ite mai i te mea tāna i tuatāpapa i roto i te 3 Nephi 12–16, e nehenehe e pāpa’i i ni’a i te tāpura ’ere’ere mai te pae ’aui i te pae ’atau i te nūmera 12 haere atu i te 16. E nehenehe ïa te mau pīahi e ’imi i te hō’ē ’īrava i roto i teie mau pene ’o tā rātou i tāpe’a mai ’ei reira e pāpa’i atu ai i te nūmera o te ’īrava i raro a’e i te nūmera o te pene i ni’a i te tāpura ’ere’ere. E mā’iti i te tahi ma’a ’īrava nō te tai’o ’āmui ’a paraparau ai nō te aha rātou i tāpe’a ai i te reira.

ītona ha’api’ira’a

Ha’api’i i te ha’api’ira’a tumu

3 Nephi 12–14

Tē fa’a’ite nei te mau ha’api’ira’a a te Fa’aora nāhea i te riro ’ei pipi mau.

• Tē tu’u nei te arata’i ha’api’ira’a o teie hepetoma o te Mai, pe’e mai—nō te ta’ata hō’ē ’e te ’utuāfare i te mana’o e tātara poto i te mau ’īrava i roto i te 3 Nephi 12–14 ma te fa’aoti i teie pereota ra « Nō te mau pipi mau a Iesu Mesia… ». E ani i te mau pīahi tē vai ra ānei vetahi tei rave i teie ’ohipa ’e tei hina’aro e fa’a’ite mai i tāna i ’apo mai. ’Aore rā, e nehenehe e pāpa’i i terā parau i ni’a i te tāpura ’ere’ere ’e teie ato’a mau ’īrava : 3 Nephi 12:3–16, 38–44 ; 13:1–8, 19–24 ; ’e 14:21–27 (’aore rā te tahi atu mau ’īrava tā ’oe i ’ite mai i roto i tā ’oe iho tuatāpapara’a). E nehenehe te mau pīahi e mā’iti i te hō’ē tuha’a ’īrava e tai’o, e tai’o ta’ata hō’ē ānei ’aore rā ’ei pupu, ma te fa’a’ite mai i te tahi rāve’a nō te fa’aoti i te pereota i ni’a i te tāpura ’ere’ere ’ia au i te mau mea tā te mau ’īrava e ha’api’i nei. E fa’aitoito i te mau pīahi ’ia feruri ’e penei a’e ’ia pāpa’i ato’a i te mea tā rātou e rave nō te pe’e ia Iesu Mesia, ma te ha’apa’o maita’i atu ā nō te mea tā rātou i ha’api’i mai i roto i teie mau ’īrava.

• Nō te tauturu i te mau pīahi ’ia māramarama i te mau parau a te Fa’aora i roto i te 3 Nephi 12:48, e nehenehe e ani i te hō’ē o rātou, ’aore rā hau atu, ’ia tuatāpapa i te a’ora’a a Elder Jeffrey R. Holland « ’Ia maita’i roa ho’i ’outou—I te pae hope’a » (Ensign ’aore rā Liahona, Nov. 2017, 40–42) hou ’a haere mai ai i te piha ha’api’ira’a, ’e ’ia fa’a’ite mai i tā rātou i ’apo mai nō te hāro’aro’a i teie ’īrava.

3 Nephi 12:21–30

E mana’o, e ’ohipa.

• E nehenehe te hō’ē ’āparaura’a nō ni’a i te 3 Nephi 12:21–30 e tauturu i te mau pīahi ’ia hi’o nāhea te hi’opo’ara’a i tō tātou mau mana’o e tauturu i te fa’atano i tā tātou mau ’ohipa. Nō te ha’amata i te hō’ē tāu’ara’a parau, e nehenehe e pāpa’i i te hō’ē tāpura i ni’a i te tāpura ’ere’ere mai teie mau upo’o parau Mau ’ohipa ’ua hina’aro tātou e ’ape ’e Mau mana’o e arata’i i te reira. ’Ei reira e nehenehe e ani i te mau pīahi ’ia ’imi i te 3 Nephi 12:21–22 ’e 27–30 nō te fa’a’ī i te tāpura. E aha atu ā te tahi mau ’ohipa ’e mau mana’o tā te mau pīahi e nehenehe e tu’u i roto i te tāpura ? Nāhea tātou ’ia ’ore « e fa’ati’a ’ia tae taua huru mea ra i roto i tō ’outou ’ā’au »? (3 Nephi 12:29). Nāhea i te tīahi i te reira ’ia tomo mai rātou ? I muri a’e i te tai’ora’a i te parau a’o a te peresideni Ezra Taft Benson i roto i « Te tahi atu mau mātēria tauturu », e nehenehe e pāpa’i i te hō’ē tāpura ’āpī ma te mau upo’o parau ra Mau ’ohipa huru Mesia ’ua hina’aro tātou e rave ’e Mau manao e arata’i i te reira ’e e fa’aī i te reira ’e te piha tā’āto’a.

3 Nephi 13:1–8, 16–18

Tītauhia ’ia rave i tā tātou tāvinira’a ’e te ha’amorira’a nō te mau tumu ti’a.

• ’Ua riro te tuatāpapara’a i te 3 Nephi 13 ’ei rāve’a nō te mau pīahi ’ia hi’opo’a i te tumu rātou e rave ai i te mau ’ohipa maita’i. Nō te ha’amata i te hō’ē tāu’ara’a parau, e nehenehe e tai’o ’āmui i te mau ’īrava 1–2 ’e te 16 ma te hōro’a i teie tātarara’a nō te feiā ha’avare : « Mau fa’ahua » ; te aura’a o te ta’o heleni [tei fa’a’ohipahia i roto i te Faufa’a ’Āpī] ’oia ho’i ïa ‘e ta’ata ha’uti rau’, ’aore rā e ta’ata e… fa’arahi i tāna tuha’a’ ». Penei a’e e hina’aro hō’ē ’aore rā e piti pīahi e fa’ahua ’aore rā e ha’uti mai, mai te huru ra ē, tē hōro’a ra rāua i te feiā veve, ’aore rā tē ha’apae ra rāua i te mā’a. Nō te aha e fa’ahōho’ara’a tano te fa’ahuara’a ’aore rā te ha’utira’a ta’ata ora nō te feiā ha’avare ? Nāhea e ti’a ai ia tātou ’ia ha’apāpū ē, e mea ateatea ’e ’aita e ha’avarera’a i roto i tā tātou tāvinira’a, te pure ’e te ha’apaera’a mā’a ?

• I muri mai i te fa’ata’ara’a i te mau ’ohipa maita’i i fa’ahitihia i roto i te 3 Nephi 13:1–8 ’e 16–18, e nehenehe te mau pīahi e paraparau nō ni’a i te mau tumu te hō’ē ta’ata e rave ai i teie mau mea ’aore rā i te tahi atu mau mea e ani mai te Atua ia tātou. E aha tā tātou e parau mai te mea e ui mai te ta’ata ē, nō te aha tātou e rave ai i te mau ’ohipa maita’i ? E fa’aitoito i te mau pīahi ’ia feruri i ta rātou iho tumu nō te rave i te mau ’ohipa maitata’i mai te reira. Nāhea e ti’a ai ia tātou ’ia tāmā i tō tātou iho tumu nō te rave i te mau mea ?

3 Nephi 14:7–11

’Ia ’imi ana’e tātou i « te mau mea maita’i » nō ’ō mai i te Metua i te Ao ra, e fāri’i tātou.

• Nō te māramarama i te tītaura’a manihini a te Fatu ’ia ani, ’ia ’imi ’e ’ia pātōtō, e tauturu te reira ’ia hi’o e aha te aura’a o teie mau ta’o. E aha te tītaura’a o te ta’o tāta’itahi i roto i te mea tā te Fatu e ani nei ia tātou ’ia rave ? Nāhea tātou ’ia ani, ’ia ’imi ’e ’ia pātōtō ? E aha te mau mea i parauhia i roto i te 3 Nephi 14:7–8 i tupu i roto i tō tātou orara’a ? E nehenehe ato’a te mau pīahi e hi’o i te parau a’o a te peresideni Russell M. Nelson i roto i « Te tahi atu mau mātēria tauturu », ma te ’imi i te mau uira’a tāna e ui nei ’e te mau tītaura’a manihini tāna e tu’u nei. E hōro’a i te mau pīahi i te tahi taime nō te feruri ’e nō te pāpa’i i te pāhonora’a i teie mau uira’a ’e tā rātou mau ’ōpuara’a nō te ha’apa’o i tāna mau tītaura’a manihini.

• E mea pāpū ’ore ri’i paha nō vetahi mau pīahi nō ni’a i te mea tā te Fa’aora i parau i te nā-’ō-ra’a ē : « ’O tei ani ra ho’i, ’ua noa’a ïa » (3 Nephi 14:8). Nō te aha e au ra ē, ’aita te tahi mau pure e pāhonohia nei, ’e nō te aha ē, i te tahi taime, e tae mai te pāhonora’a ’aita tātou i hina’aro ? E nehenehe te hi’ora’a te piha ha’api’ira’a i te mau ’īrava i muri nei e pāhono i teie mau uira’a : Isaia 55:8–9 ; Helamana 10:4–5 ; 3 Nephi 18:20 ; ’e Te Parau Ha’api’ira’a ’e te mau Parau Fafau 9:7–9 ; 88:64. Fa’aitoito i te mau pīahi ’ia fa’a’ite mai i tā rātou i ’ite. Nāhea teie mau mana’o i te fa’ataui i te huru tātou e pure ai ?

ītona ’āpora’a ha’api’ira’a

Fa’aitoito i te ha’api’ira’a mai i te fare

Nō te fa’auru i te mau pīahi ’ia tai’o i te 3 Nephi 17–19 i te fare, e nehenehe e ani ia rātou ’ia feruri ē, e aha ra ’āhani e fa’aro’o rātou i te Fa’aora i te purera’a nō rātou ’e nō tō rātou ’utuāfare. I roto i teie mau pene, e tai’o rātou nō ni’a i te mau ta’ata tei fāna’o i te reira.

ītona mātēria tauturu

Te tahi atu mau mātēria tauturu

E ti’a ia tātou ’ia hi’opo’a i tō tātou mau mana’o.

’Ua ha’api’i te peresideni Ezra Taft Benson ē :

« ’Ua fa’aauhia te ferurira’a i te hō’ē tahua teata i reira e ha’utihia ai hō’ē noa teata i te taime hō’ē. I te hō’ē pae o te pererau, tē tāmata nei te Fatu, tei here ia ’outou, i te tu’u i ni’a i te tahua teata o tō ’outou ferurira’a i te mea e ha’amaita’i ia ’outou. I te tahi atu pae o te pererau, tē tāmata nei te diabolo, tei riri ia ’outou, i te tu’u i ni’a i te tahua teata o tō ’outou ferurira’a i te mea e ’anatemahia ai ’outou.

« ’O ’outou te fa’atere tahua teata—nā ’outou e fa’aoti e aha te mana’o e pa’uma i ni’a i te tahua teata… E riro mai ’outou i te mea tā ’outou e mana’o noa—te mea e vaiiho-tāmau-hia ’ia pa’uma i ni’a i te tahua teata o tō ’outou ferurira’a…

« ’Ua fa’ariro tō tātou mau mana’o ra ’o vai tātou, ’e tē tītau nei ho’i tātou ’ia riro mai te Mesia te huru, tītauhia ïa tātou ’ia feruri mai te Mesia » (« Think on Christ », Ensign, ’Ēperēra 1984, 10–11).

Tē hina’aro nei te Atua e paraparau ia ’outou.

’Ua parau te peresideni Russell M. Nelson :

Nā reira ato’a, e aha te mea tā tā ’outou ’imira’a e ’īriti atu ? E aha te ’ite tā ’outou e ’ere ra ? E aha tā ’outou e mana’o ra, e mea rū ’ia ’ite ’aore rā ’ia māramarama ? E pe’e i te hi’ora’a o te peropheta Iosepha Semita. E ’imi i te hō’ē vāhi hau e haere pinepine atu. E fa’aha’eha’a ia ’outou i mua i te Atua. E nīni’i i tō ’outou ’ā’au i mua i tō ’outou Metua i te Ao ra. E fāriu i ni’a iāna nō te pāhonora’a ’e te tāmāhanahanara’a.

« E pure nā roto i te i’oa o Iesu Mesia nō ni’a i tō ’outou mau māna’ona’ora’a, mau mata’u ’e mau paruparu—’oia, te hia’ai mau o tō ’outou ’ā’au. ’Ei reira e fa’aro’o atu ai ! E pāpa’i i te mau mana’o e tae mai i tō ’outou ferurira’a. E pāpa’i i te mau mana’o i tō ’outou ’ā’au ’e ’a pe’e i te reira nā roto i te mau ’ohipa e fa’auruhia ’outou ’ia rave.…

« ’Ua hina’aro mau ānei te Atua e paraparau ia ’outou ? ’Ē ! tē tāparu nei au ia ’outou ’ia fa’arahi atu ā i tō ’outou ’aravihi e fāri’i i te heheura’a…

« ’Auē, e mau mea hau atu ho’i tā tō ’outou Metua i te Ra’i i hina’aro ’ia ’ite ’outou » (« Heheura’a nō te ’Ēkālesia, heheura’a nō tō tātou orara’a », Ensign ’aore rā Liahona, Mē 2018, 95).

Ha’amaita’ira’a i tā tātou ha’api’ira’a

Tauturu i te mau pīahi ’ia turu i te tahi ’e te tahi. ’Ua riro te pīahi tāta’itahi i roto i tā ’outou piha ha’api’ira’a ’ei puna rahi nō te ’itera’a pāpū, te mau mana’o ’e te orara’a i te ’evanelia. ’A ani ia rātou ’ia fa’a’ite mai ’e ’ia fa’aitoito i te tahi ’e te tahi » (Ha’api’ira’a mai tā te Fa’aora,5).