Hō’ē mahana, hō’ē pō ’e hō’ē mahana, nā Jorge Cocco

7–13 nō Tetepa

3 Nephi 1–7

« Fa’ateitei i tō upo’o i ni’a »

E nehenehe i te Vārua Maita’i e fa’atae mai i te mana’o e rōtahi i ni’a i te tahi mau parau tumu ta’a ’ē o te 3 Nephi 1–7 i roto i te piha ha’api’ira’a. E nehenehe te reira e riro noa ’ei mau parau tumu ’o te ha’amaita’i atu i te ta’ata e tītau nei i te tauturu.

Pāpa’i i te mau mana’o e tae mai

Tītau i te mana’o

Nō te tauturu i te mau pīahi ’ia faʼaʼite mai i te mea tā rātou i haʼapiʼi mai i te fare, e ani ia rātou ’ia pāpaʼi i ni’a i te mau ’api parau i te tahi mau parau mau tā rātou i ’ite mai i roto i te 3 Nephi 1–7 ’e te mau pāpa’ira’a mo’a fa’ahoro nō ni’a i te mau parau mau. E tu’u i te reira i roto i te fa’ari’i ’a huti mai ai te tahi nō te tāu’aparau ’e te piha ha’api’ira’a. ’A fa’a’ite noa mai ai te mau pīahi, e hi’o e mau mana’o ānei i roto i teie arata’i e fa’ahōhonu atu ā i te tāu’ara’a parau ’e e fa’aō mai i te tahi atu mau pīahi.

Ha’api’i i te ha’api’ira’a tumu

3 Nephi 1–7

E ’ohipa tau maoro te fa’afāriura’a ’o tē tītau i te tauto’ora’a itoito.

• Tē fa’ata’a nei te 3 Nephi 1–7 nō te mau ta’ata tei fa’afāriuhia ia Iesu Mesia ’e i tāna ’evanelia ’e ’o rātou ato’a tei ’ore i fa’afāriuhia. Nō te tauturu i tā ’oe mau pīahi e hi’o mai i te mea i ta’a ’ē ai teie nā pupu, e nehenehe e hāmani i te hō’ē tāpura i ni’a i te tāpura ’ere’ere ma teie nau upo’o parau : Mau ti’aturira’a ’e mau ’ohipa e ha’aparuparu i te fa’afāriura’a ’e Mau ti’aturira’a ’e mau ’ohipa e ha’apūai i te fa’afāriura’a. E ’ōpere haere teie mau ’īrava nā ni’a i te mau pīahi ’e e ani ia rātou ’ia fa’a’ī i te tāpura i te mea tā rātou e ’ite mai (’ua hōro’ahia te tahi hi’ora’a nō te ’īrava mātāmua).

  • 3 Nephi 1:4–23, 29–30: Ha’aparuparu i te fa’afāriura’a : ’aita e ti’aturi nei i te mau parau a te peropheta ’e ’ua fa’ao’ō’o i te feiā parau-ti’a (mau ’īrava 5–6). Ha’apūai i te fa’afāriura’a : fa’aro’o i te mau parau a te peropheta ’e ’ua pure nō te tauturu (mau ’īrava 8, 11).

  • 3 Nephi 2:1–3

  • 3 Nephi 3:12–16

  • 3 Nephi 4:8–10, 30–33

  • 3 Nephi 6:13–18

  • 3 Nephi 7:15–22

  Nāhea tātou ’ia vai pūai noa i tō tātou fa’afāriura’a noa atu ā te pāto’ira’a ?

• Penei a’e e ’ana’anatae te mau pīahi i te hi’o mai nāhea i te ha’apūai i tā te 3 Nephi 1:27–30 e parau nei « te u’i ’āpī ra ». E nehenehe e ani i te mau pīahi ’ia ’imi mai i te mau tumu i roto i teie mau ’īrava nō te aha i ’ore ai i noa’a i te feiā ’āpī ’āti Nephi ’e ’āti Lamana ’ia pāto’i i te ’ohipa ’ino ’ati a’e ia rātou ra. E nehenehe te reira e arata’i atu i te hō’ē tāu’ara’a parau nō ni’a i te tahi mau tāmatara’a e fa’aruruhia nei e te u’i ’āpī ’e te mau rāve’a maita’i a’e nō te tauturu ia rātou ’ia fa’atupu i te fa’aro’o i te Mesia. Tē vai ra te tahi mau mana’o i roto i « Te tahi atu mau mātēria tauturu ».

3 Nephi 1:4–21 ; 5:1–3

E fa’atupu te Fatu i tāna mau parau ato’a.

• E nehenehe te tai’ora’a i te mau fa’ati’ara’a i roto i te 3 Nephi 1:4–21 ’e te 5:1–3 e ha’apūai i te fa’aro’o o te mau pīahi i te mau mea i parauhia e te Fatu. Penei a’e e nehenehe te mau pīahi e tai’o ’āmui i te 3 Nephi 1:4–7 nō te tāpura i ni’a i te tāpura ’ere’ere e aha tō rātou mana’o ’āhani ’o rātou te mau ta’ata fa’aro’o i roto i teie mau ’īrava. E nehenehe ato’a tā rātou e feruri i te mau mea mai te reira tā tātou e fa’aruru nei i teie mahana. E aha tā tātou e ’apo mai nei i roto i te 3 Nephi 1:8–21 ’e te 5:1–3 nō ni’a i te Fatu ’e te mau mea i parauhia e āna ? Nō te fa’a’ā’ano atu ā i te tāu’ara’a parau, e nehenehe e hi’o mai i te hō’ē hīmene nō ni’a i te ti’aturira’a i te Atua. E nehenehe te mau pīahi e fa’a’ite mai i te mau ’ohipa i tupu nō rātou ’a ho’onahia ai tō rātou fa’aro’o ’e te ti’aturi i te Atua, noa atu ā te pāto’ira’a.

3 Nephi 1:4–15 ; 5:12–26 ; 6:10–15 ; 7:15–26

E mau pipi tātou nā Iesu Mesia.

• ’Ua nā ’ō Moromona ē : « Inaha, e pipi au nā Iesu Mesia » (3 Nephi 5:13). Nō te hi’o ’e te mau pīahi e aha te aura’a te rirora’a ’ei pipi, e nehenehe e ani i te mau pīahi ’ia mā’imi i roto i te 3 Nephi 1:4–15 ; 5:12–26 ; 6:10–15 ; ’e te 7:15–26, i te huru, te mau ti’aturira’a ’e te mau ’ohipa a te mau pipi a te Mesia. E nehenehe e vaiiho ma’a minuti i te mau pīahi nō te feruri ’e nō te pāpa’i mai i te hō’ē mea tā rātou e nehenehe e rave nō te riro mai ’ei pipi maita’i a’e nā Iesu Mesia.

3 Nephi 2:11–12 ; 3:12–26 ; 5:24–26

’Ia putuputu te feiā parau-ti’a, e ti’a i te Fatu ’ia ha’apūai ’e ’ia pāruru ia rātou.

• Hō’ē tumu ’ua ti’a i te mau ’āti Nephi e tā’iri i te feiā ’eiā nō Gadianetona, ’o te ’āmuira’a ïa tō rātou pūai i te pūai o te mau ’āti Lamana i fa’afāriuhia ’e te pe’era’a i te arata’ira’a fa’auru a Lakoneusa e haere i Zarahemela « ’ei ha’aputuputura’a » (3 Nephi 3:22). E aha te mau ha’api’ira’a tā te reira e tāpe’a mai nō te mau pīahi ? E nehenehe e ani ia rātou ’ia fa’a’ite mai i te taime ’ua ha’apūaihia rātou e te feiā parau-ti’a ’ati a’e ia rātou. ’Ei reira e nehenehe e ani i te mau pīahi ’ia hi’o i te 3 Nephi 3:12–26, nō te ’imi mai i te mau tumu te ’āti Nephi i ha’aputuputu ai ’e te mau ha’amaita’ira’a i noa’a mai ia rātou. Nāhea e roa’a ato’a mai ia tātou te reira mau ha’amaita’ira’a ’ia putuputu tātou ’e te mau melo o tō tātou ’utuāfare ’aore rā ’e te mau melo o te ’āma’a ’aore rā pāroita ? E aha atu ā tē nehenehe e ’apo mai nō ni’a i te putuputura’a i roto i te 3 Nephi 5:24–26 ?

• E ti’a i te tai’ora’a i te 3 Nephi 3 ’ia riro ’ei taime nō te tauturu i te mau pīahi ’ia hi’o i tō tātou fāito pūai a’e ’ia putuputu ’āmui ana’e tātou i roto i te parau-ti’a. Penei a’e e nehenehe ’oe e feruri i te hō’ē ha’api’ira’a tao’a e fa’a’ite ra nāhea te hō’ē mea paruparu e pūai mai ’ia tāhō’ē ana’e i te tahi atu mau mea. E ani i te mau pīahi ’ia feruri ē, ’ua anihia rātou ’ia fa’ati’aturi i te mau ’āti Nephi i te mau maita’i ’ia putuputu ’āmui, mai tei fa’ata’ahia i roto i te mau ’īrava 12–26. Penei a’e e nehenehe rātou e ’ohipa ’ei pupu nō te tāu’aparau nāhea e rave i te reira, ’ia au i te mea tā rātou i tai’o i roto i teie mau ’īrava. Vaiiho ia rātou ’ia fa’a’ite mai i tō rātou mau mana’o. I muri mai e nehenehe ’outou e te piha ha’api’ira’a e tāu’aparau i te mau uira’a mai teie i muri nei : E aha te mau tāmatara’a tā tātou e fa’aruru nei ’o tē nehenehe e fa’aau i te feiā ’eiā nō Gadianetona ? Nāhea e nehenehe ai e fa’ariro i tō tātou mau fare ’e mau pāroita ’ei vāhi ha’apūra’a ?

3 Nephi 3:1–13

’Eiaha tātou e mata’u ia Sātane.

• Te ’episetole i pāpa’ihia e Gidiani, te ra’atira o te feiā ’eiā nō Gadianetona, e rāve’a ïa nō te fa’ari’ari’a ’e nō te fa’ahema i te ’āti Nephi. Penei a’e e nehenehe te mau pīahi e hi’o i tāna mau parau i roto i te 3 Nephi 3:2–10 ma te fa’aau i te reira i te huru o Sātane e tamata nei i te fa’ahema ia tātou i teie mahana. E aha tā tātou e ’apo mai nā roto mai i tā Lakoneusa, te ha’avā rahi o te mau ’āti Nephi, i rave ?

Fa’aitoito i te ha’api’ira’a mai i te fare

Nō te fa’auru i te mau pīahi ’ia tai’o i te 3 Nephi 8–11 nō te ha’api’ira’a i muri iho, ’a parau ia rātou ē, tei roto i te 3 Nephi 11 « te ’ohipa rahi hope » o te Buka a Moromona—te tāvinira’a a Iesu Mesia iho i rotopū i te mau ’āti Nephi (hi’o i te ’ōmuara’a o te Buka a Moromona).

Te tahi atu mau mātēria tauturu

Tauturu i te patura’a i te fa’aro’o i roto i te u’i ’āpī.

’Ua hōro’a mai Elder Valeri V. Cordón nō te Hitu ’Ahuru e toru rāve’a nō te tauturu i te u’i ’āpī ’ia ha’apa’o maita’i noa i te ’evanelia :

1. « ’Ia fa’aitoito ’e ’ia ha’apa’o maita’i i roto i te ’utuāfare… E mea faufa’a rahi te ha’api’ira’a pūai nō te pāruru i te ’evanelia i roto i tō tātou ’utuāfare, ’e e tītau te reira i te itoito ’e te tūtava. E rave rahi taime tātou i anihia ’ia noa’a te peu mātau nō te pure ’utuāfare i te mau mahana ato’a ’e te tai’o-tāta’itahi-ra’a i te pāpa’ira’a mo’a. E rave rahi mau ’utuāfare ’o tei nā reira tei ha’amaita’ihia i te mahana tāta’itahi i roto i te auhō’ēra’a rahi atu ā ’e te aura’a fātata e te Fatu ».

2. « Te hōho’a maita’i pūai i roto i te ’utuāfare… ’Aita e nava’i ’ia paraparau noa i tā tātou mau tamari’i i te faufa’a o te fa’aipoipora’a i roto i te hiero, i te ha’apaera’a mā’a, ’e i te ha’amo’ara’a i te mahana sābati. Tītauhia ’ia hi’o rātou ia tātou i te fa’ata’ara’a i te taime i roto i tā tātou tārena nō te haere pinepine i te hiero mai tā tātou e nehenehe. Tītauhia ’ia ’ite rātou i tā tātou fafaura’a ’ia ha’apae pinepine i te mā’a ’e te ha’amo’ara’a i te tā’āto’ara’a o te mahana sābati ».

3. « Te mau hīro’a tumu… ’Ei mau ’utuāfare, tītauhia ia tātou ’ia fa’a’ore i te mau hīro’a tumu ’o tē fa’aātea ia tātou ’ia ha’amo’a i te mahana sābati ’aore rā ’ia tai’o i te mahana tāta’itahi i te pāpa’ira’a mo’a ’e te pure i roto i te ’utuāfare. Tītauhia ’ia ’ōpani i te mau ’ūputa tānūmera o tō tātou ’utuāfare i te hōho’a faufau ’e i te tahi atu mau fa’aurura’a a te diabolo. Nō te fa’aū i te mau hīro’a tumu a te ao nei i teie ’anotau, tītauhia ’ia fa’a’ohipa tātou i te mau pāpa’ira’a mo’a ’e te reo o tō tātou mau peropheta nō teie ’anotau nō te ha’api’i i tā tātou mau tamari’i i ni’a i tō rātou huru atua, te fā nō teie orara’a, ’e te misiōni hanahana a Iesu Mesia » (« Te reo o te ’evanelia », Ensign ’aore rā Liahona, Mē 2017, 56–57 ; ’ua tu’uhia te pāpa’ira’a fa’a’opa).

Ha’amaita’ira’a i tā tātou ha’api’ira’a

’A fa’a’ohipa i te mau pīahi i roto i te fifi. I te tahi mau taime, te mea tā te mau pīahi i roto i te fifi e hina’aro nei, ’oia ho’i ’ia fāri’ihia ’e ’ia herehia rātou. E nehenehe e ani ia rātou ’ia rave i te hō’ē tuha’a i roto i te hō’ē ha’api’ira’a e haere mai nei ’aore rā ’ia ha’apāpū ē, e faura’o tō rātou nō te haere mai i te purera’a. ’Eiaha e fa’aea mai te mea e’ita rātou e pāhono i tā ’outou mau tauto’ora’a i te ha’amatara’a. (Hi’o Ha’api’ira’a mai tā te Fa’aora,8-9.)