Samuela te ’āti Lamana i ni’a i te patu, nā Arnold Friberg

31 nō ’Ātete–6 nō Tetepa

Helamana 13–16

« Te parau ha’amāuruuru ’e te ’oa’oa rahi ra »

’Ia mana’o ’oe, e aha te mau ha’api’ira’a ’e te mau tohura’a a Samuela te ’āti Lamana e tauturu rahi a’e i tā ’oe mau pīahi ? ’A tuatāpapa ai ’oe i te Helamana 13–16, ’a feruri nāhea ’oe e tauturu ia rātou ’ia ’ite i te aura’a o te mau parau i roto i teie mau pene.

Pāpa’i i te mau mana’o e tae mai

Tītau i te mana’o

E ani i te mau pīahi ’ia fa’a’ite i te hō’ē ’āpiti i te mea tā rātou i ’apo mai, te hō’ē mea tā rātou i māramarama maita’i a’e, ’aore rā te hō’ē mea tā rātou i fa’a’ohipa ’a tai’o ai rātou i te ’ā’amu o Samuela te ’āti Lamana i roto i te Helamana 13–16 i teie hepetoma. I muri iho e fa’a’ite mai vetahi o rātou i mua i te piha ha’api’ira’a tā’āto’a.

Ha’api’i i te ha’api’ira’a tumu

Helamana 13

Tē parau nei te tāvini a te Fatu ’e te ’ohipa nei ho’i mai te au i te arata’ira’a a te Atua.

• ’Ua ani te Fatu ia Samuela te ’āti Lamana ’ia rave i te hō’ē mea huru fifi : e poro i te mau ta’ata tei tīahi iāna i tō rātou ’oire. E riro paha te tai’ora’a i te Helamana 13:2–5 i te fa’aha’amana’o i te mau pīahi i te tahi mau mea fifi tā te Fatu i ani ia rātou ’ia rave. ’A ani ia rātou ’ia fa’a’ite mai i te mau mea i tupu nō rātou. Nāhea te Fatu i te tauturura’a ia rātou ? ’Ei hi’ora’a, penei a’e e nehenehe tā te mau pīahi e fa’a’ite i te tahi mau ’ohipa i tupu i reira te Fatu i te tu’ura’a i roto i tō rātou ’ā’au i te hō’ē mea tāna i hina’aro ia rātou ’ia parau i te tahi atu ta’ata (hi’o ’īrava 4). E aha te mau ha’amaita’ira’a tā te mau pīahi i ’ite i te pe’era’a i te arata’ira’a a te Fatu ?

  

  Tē fa’atoro nei te peropheta ia tātou i ni’a ia Iesu Mesia.

• Noa atu ā nō tō te mau ’āti Nephi ’ā’au ’eta’eta te mau fa’aarara’a a Samuela, tē vai nei te tahi ha’api’ira’a i roto i te Helamana 13 nō tātou pā’āto’a nei. Nō te tauturu i te mau pīahi ’ia ’ite mai i te hō’ē ha’api’ira’a nō rātou iho i roto i tāna mau parau, e nehenehe e ani ia rātou ’ia mā’imi i roto i te Helamana 13 i te hō’ē poro’i e tano i tō tātou nei tau. (’Ua hina’aro rātou i te tauturu ra, e nehenehe e pāpa’i i teie mau ’īrava i ni’a i te tāpura ’ere’ere : 8, 21–22, 26–29, 31, ’e 38.) I muri mai, e nehenehe tā rātou e fa’a’ite i te mea tā rātou i ’ite mai, piti piti ānei ’aore rā ’ei pupu na’ina’i ’aore rā i mua i te piha tā’āto’a. E aha te mau poro’i mai te reira tā te mau peropheta i hōro’a ia tātou i teie nei mahana ?

Helamana 14 ; 16:13–23

E ti’a i te mau tāpa’o ’e i te mau ’ohipa māere e ha’apūai i te fa’aro’o o te feiā e ’ore e fa’a’eta’eta i tō rātou ’ā’au.

• Tē parau nei te arataʼi ha’api’ira’a o teie hepetoma o te Mai, peʼe mai—nō te taʼata hō’ē ʼe te ʼutuāfare ʼia hi’o mai i te mau tāpa’o tā te Fatu i hōro’a mai « ’ia fa’aro’o [tātou] i tōna ra i’oa » (Helamana 14:12). Penei a’e e nehenehe te mau pīahi e fa’a’ite mai i te mea tā rātou i ’ite mai ’a feruri ai rātou i teie mana’o. E ti’a ’ia parau ē, e nehenehe te mau tāpa’o i roto i tō tātou orara’a e iti a’e te ri’ari’a ’e e hau atu nō tātou iho, i te mau tāpa’o i tohuhia e Samuela. E aha te tahi atu mau tumu nō te mau tāpa’o i fa’ahitihia i roto i te Helamana 14:28–30 ? E nehenehe ato’a te mau pīahi e fa’a’ite mai i te tahi atu mau mea tā te Fatu i rave nō te tauturu ia rātou ia fa’atupu i te fa’aro’o iāna ra.

• Te tai’ora’a e mea nāhea te tupura’a o te mau tohu a Samuela i ti’a ai e patu i te fa’aro’o o te mau pīahi i ni’a ia Iesu Mesia ’e i tāna misiōni. Penei a’e e nehenehe te mau pīahi e fa’a’ohipa i te Helamana 14 nō te hāmani i te hō’ē tāpura e fa’ahiti i te mau tohura’a a Samuela nō ni’a i te fānaura’a ’e te pohe o te Mesia i te hō’ē pae, ’e i te tahi pae, ’o te mau fa’ahorora’a ïa i reira teie mau tohura’a i te tupura’a. Vetahi o teie mau fa’ahorora’a ’o te mau ’īrava ïa i roto i te 3 Nephi 1:15–21 ’e te 3 Nephi 8:5–25. Nō te aha e mea faufa’a nō tātou ’ia ’ite nō ni’a i teie mau parau tohu ’e tō te reira tupura’a ?

• ’Ua ’ite mai paha te mau pīahi ē—i roto i te Helamana 16 ’e i te tahi atu mau vāhi o te mau pāpa’ira’a mo’a—e’ita te ’itera’a i te mau tāpa’o ’e i te mau ’ohipa māere e fa’atupu pāpū noa i te ti’aturira’a i te Mesia. E ani ia rātou ’ia fa’a’ite mai i te tahi mau hi’ora’a mai roto mai i te mau pāpa’ira’a mo’a nō te mau ta’ata tei ’ite i te mau tāpa’o ’aita rā i ti’aturi. ’Ia au i tei pāpa’ihia i roto i te Helamana 16:13–23, nō te aha e rave rahi ta’ata i te tau o Samuela te ’āti Lamana ’aita i ti’aturi i te mau tāpa’o ’e te mau parau tohu ? Nāhea Sātane i te tītau i te mau ta’ata ’ia « ti’aturi… rātou i tō rātou iho pūai, ’e te pa’ari »? (Helamana 16:15). E aha te ha’api’ira’a tā tātou e nehenehe e ’apo mai i roto i teie fa’ati’ara’a ’o tē nehenehe e tauturu ia tātou ’ia ’ape i terā huru hape ?

Helamana 15:3

E fa’autu’a te Fatu i te feiā tāna e here nei.

• Tē vai nei i roto i te mau parau a Samuela e rave rahi parau-fa’autu’a-ra’a ’āfaro, ’āre’a rā tē hōro’a nei te Helamana 15:3 i te hō’ē hi’ora’a ta’a ’ē roa nō ni’a i te fa’autu’a a te Fatu. Hō’ē rāve’a nō te tauturu i te mau pīahi ’ia māramarama i teie huru hi’ora’a, ’o te tai’o-’āmui-ra’a ïa i teie ’īrava ma te ani ia rātou ’ia fa’ahiti mai i te mau fa’a’itera’a tā rātou e ’ite ra nō te here o te Atua ’e tōna ho’i aroha i roto i te mau parau tohu ’e te mau parau fa’aara a Samuela. Nō te aha e nehenehe te fa’autu’ara’a a te Fatu ’ia riro ’ei tāpa’o nō tōna here ?

• Nō te tauturu i te mau pīahi ’ia māramarama maita’i a’e i te poro’i i roto i te Helamana 15:3, e nehenehe e fa’a’ite e toru tumu nō te fa’autu’ara’a a te ra’i tei ha’api’ihia e Elder D. Todd Christofferson (hi’o « Te tahi atu mau mātēria tauturu »). E vāhi i te piha ha’api’ira’a ’ei piti pupu ’e e ani i te pupu tāta’itahi ’ia tāu’aparau hō’ē o te reira mau tumu (e nehenehe te mau ’īrava ’e te video i roto i « Te tahi atu mau mātēria tauturu » e tauturu mai). I muri iho e nehenehe te pupu tāta’itahi e fa’a’ite i mua i te piha ha’api’ira’a i te mau mea ato’a tā rātou i ’apo mai i roto i te tāu’ara’a parau, ’o tei tauturu ia rātou ’ia māramarama maita’i a’e ē, tē fa’autu’a nei te Fatu i te feiā tāna i here.

Helamana 16

Tē fa’atoro nei te peropheta ia tātou i ni’a i te Fatu.

• I roto i te Helamana 16, e aha tā tātou e ha’api’i mai nei nō ni’a i te feiā tei fāri’i i te mau ha’api’ira’a a Samuela ? E aha tā tātou e ha’api’i mai nei nō ni’a i te feiā tei pāto’i iāna ? E ’ohipa fa’auru paha te fa’aro’ora’a i te mau pīahi ’ia fa’a’ite mai nāhea te noa’ara’a tō rātou ’itera’a pāpū nō ni’a i te faufa’a rahi ’ia pe’e i te mau peropheta ora. E nehenehe ato’a tā rātou e fa’a’ite mai nāhea rātou i te fa’a’ohipa i te Helamana 16 ’aore rā te mau parau a Elder Andersen i roto i « Te tahi atu mau mātēria tauturu » nō te fa’ata’a i te ta’ata nō te aha rātou i mā’iti ai e pe’e i te peropheta.

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o i te 3 Nephi 1–7 nō te hepetoma nō muri iho, e nehenehe e parau ia rātou ē, e rave rahi parau tohu o teie hepetoma e tupu i roto i teie mau pene.

Te tahi atu mau mātēria tauturu

Te tumu nō te fa’autu’ara’a hanahana.

’Ua fa’a’ite mai Elder D. Todd Christofferson e toru tumu nō te fa’autu’ara’a hanahana (hi’o « ’O tā’u e here ra, ’o ta’u ïa e a’o, ’e e papa’i ho’i », Ensign ’aore rā Liahona, Mē 2011, 97–100):

1. « Tāparu ia tātou ’ia tātarahapa. » Hi’o Etera 2:14–15 ; Te Parau Ha’api’ira’a ’e te mau Parau Fafau 1:27 ; 93:41–50 ; 105:6.

2. « Ha’amaita’i ’e ha’amo’a ia tātou. » Hi’o Mosia 23:21–22 ; Te Parau Ha’api’ira’a ’e te mau Parau Fafau 101:1–5 ; 136:31.

3. « Fa’atītī’aifaro i tō tātou haere’a i roto i te orara’a i ni’a i te ’ē’a tā te Atua i ’ite ē e mea maita’i a’e. » Hi’o i te ’ā’amu nō te peresideni Hugh B. Brown ’e te tumu vine i roto i te a’ora’a a Elder Christofferson (mau ’api 98–99) ; « The Will of God » (video, ChurchofJesusChrist.org).

Tē ’oa’oa nei tātou e peropheta tō tātou.

’Ua ha’api’i Elder Neil L. Andersen ē :

« ’Aita te hō’ē peropheta e ti’a i rōpū ia ’oe ’e te Fa’aora. E ti’a maoti rā ’oia i tō ’oe pae ma te fa’atoro i te rima i ni’a i te ’ē’a o te Fa’aora. Te hōpoi’a rahi roa a’e ’e te tao’a hōro’a faufa’a roa a’e a te hō’ē peropheta nō tātou, ’o tōna ’itera’a pāpū mau, tōna ’ite pāpū ē, ’o Iesu te Mesia. Mai ia Petero i tahito ra, tē fa’a’ite nei tō tātou nei peropheta : ‘’O te Mesia [’o ’oia], te Tamaiti a te Atua ora’ [Mataio 16:16 ; hi’o ato’a Ioane 6:69].

« ’Ia tae i te hō’ē mahana, ’ia hi’o tātou i muri i tō tātou nei orara’a tāhuti, e pōpou tātou ’ua ta’ahi tō tātou ’āvae i te fenua i te tau o te hō’ē peropheta ora. I taua mahana ra, tē pure nei au ē e ti’a ia tātou ’ia parau ē :

« ’Ua fa’aro’o tātou iāna. ’Ua ti’aturi tātou iāna. ’Ua tuatāpapa tātou i tāna mau parau ma te fa’a’oroma’i ’e te fa’aro’o. ’Ua pure tātou nōna. ’Ua ti’a tātou i tōna pae. ’Ua nava’i tō tātou ha’eha’a nō te pe’e iāna. ’Ua here tātou iāna » (« Te peropheta a te Atua », Ensign ’aore rā Liahona, Mē 2018, 27).

Ha’amaita’ira’a i tā tātou ha’api’ira’a

Ha’amatau i te mau ta’ata tā ’outou e ha’api’i nei. ’Aita e piti ta’ata hō’ē ā huru. E orara’a, e hi’ora’a, ’e e mau tāreni ta’a ’ē tō te ta’ata tāta’itahi tā ’outou e ha’api’i nei. E pure ’ia ’ite ’outou e nāhea ra ’ia fa’a’ohipa i teie mau huru ta’a ’ē nō te tauturu i te mau pīahi ’ia ha’api’i mai. ’Ia mātau maita’i ’outou i tā ’outou mau pīahi, e nehenehe ïa tā ’outou e fa’atupu i te mau taime ha’api’ira’a faufa’a rahi. (Hi’o Ha’api’ira’a mai tā te Fa’aora, 7.)