Fa’ahōho’ara’a nō Nephi i ni’a i te pare o te ’āua nā Jerry Thompson

24–30 nō ’Ātete

Helamana 7–12

« Ha’amana’o a’era i te Fatu »

’Ua fa’aitoito Nephi i tōna mau ta’ata ’ia ha’amana’o i te Fatu. E nehenehe ato’a e rave i te reira nō rātou tā ’oe e ha’api’i ra. ’A tai’o ai ’oe i te Helamana 7–12, e pāpa’i i te mau mana’o e tae mai nō ni’a nāhea e nehenehe e tauturu i te mau pīahi ’ia ha’amana’o i te Fatu.

Pāpa’i i te mau mana’o e tae mai

Tītau i te mana’o

E ani i te mau pīahi ’ia pāpa’i i ni’a i te tāpura ’ere’ere i te tahi mau parau tumu tā rātou i ’ite mai i roto i te Helamana 7–12, ’e tae noa atu te mau fa’ahorora’a e ’itehia ai te reira mau parau tumu. I muri mai e nehenehe ’outou te piha ha’api’ira’a e fa’aoti i te mau parau tumu ’e te mau ’īrava tā ’outou e paraparau atu.

Ha’api’i i te ha’api’ira’a tumu

Helamana 7–11

E heheu mai te mau peropheta i te hina’aro o te Atua i te mau ta’ata.

• ’Ei tauturura’a i te mau pīahi ’ia ’apo mai nā roto mai i te Helamana 7–11 nō ni’a i te mau ti’ara’a ’e te mau hōpoi’a a te mau peropheta, e nehenehe e ha’amata mā te tai’o-’āmui-ra’a i te parau ra « Peropheta » i roto i te Arata’i nō te mau pāpa’ira’a mo’a (scriptures.ChurchofJesusChrist.org). E nehenehe te mau pīahi e hi’o mai i te mau ti’ara’a o te mau peropheta i fa’ahitihia ’e e tāpura i te reira i ni’a i te tāpura ’ere’ere. ’Ei reira e nehenehe e ani i te mau pīahi tāta’itahi ’ia hi’o hō’ē pene i roto i te Helamana 7–11. E ani ia rātou ’ia hi’o mai nāhea Nephi i te ha’apa’ora’a i te mau ti’ara’a i fa’ahitihia i ni’a i te tāpura ’ere’ere. Nāhea tō tātou mau peropheta ’e mau ’āpōsetolo ora i te ha’apa’ora’a i terā mau ti’ara’a ? Nāhea e ti’a ai ia tātou ’ia pāturu ia rātou i roto i tā rātou mau hōpoi’a ?

• Nō te aha e tītauhia i te tahi taime ’ia parau hua te mau peropheta mai tā Nephi i rave ? E nehenehe e ani i te mau pīahi ’ia tai’o i te Helamana 7:11–29, ma te hi’o mai i te mau fa’aarara’a tā Nephi i hōro’a ’e te mau tumu ’oia i parau hua roa mai i te reira. E aha te mau fa’aarara’a a te peropheta tei fa’auru ia tātou ’ia tātarahapa ’e ’ia haere mai i te Fatu ra ? I roto i « Te tahi atu mau mātēria tauturu » e ’ite mai ’oe i te hō’ē aura’a parau tā Elder Neil L. Andersen i fa’a’ohipa nō te tauturu ia tātou ’ia ha’amana’o i te mau ata’atara’a nō te tāu’a-’ore-ra’a i te mau fa’aarara’a a te peropheta.

Helamana 9:1–20 ; 10:1, 11–15

Tītauhia ’eiaha e patu i te fa’aro’o i ni’a i te mau tāpa’o noa ’e te mau temeio.

• Hō’ē rāve’a nō te tāu’aparau i teie mau ’īrava, ’o te vāhira’a ïa i te piha ’ei piti pupu ma te ani i te pupu tāta’itahi ’ia tai’o i te Helamana 9:1–20 ’e ’ia feruri ia rātou iho ’o nā ta’ata e pae ānei ’aore rā ’o te mau ha’avā rahi. E aha tā teie mau ta’ata i fāri’i ? E aha tei fa’auru i te pupu tāta’itahi ’ia pāhono ta’a ’ē i te hō’ē ā tohura’a temeio ? Nāhea tātou i te ha’apāpū ē, e patu teie mau temeio i tō tātou ’itera’a pāpū e’ita rā e riro mai ’ei niu noa nō te reira ? Nāhea tātou e fa’aoti ē, e parau mau ānei te mau parau a tō tātou peropheta i teie mahana ?

Helamana 10:1–12

E hōro’a te Fatu i te mana i te feiā e ’imi i tōna hina’aro ’e e ha’apa’o ho’i i tāna mau fa’auera’a.

• E nehenehe te ’ā’amu nō te ha’amaita’ira’a te Fatu ia Nephi i roto i te Helamana 10 e fa’auru i te mau pīahi ’ia fa’aitoito atu ā i te ’imira’a ’e ’i te ravera’a i te hina’aro o te Fatu. E nehenehe te mau pīahi e tai’o i te mau ’īrava 1–12, ma te ’imi i te mea tā Nephi i rave ’ia noa’a iāna te ti’aturi o te Fatu ’e nāhea te Fatu i te ha’amaita’i iāna. ’Ei reira e nehenehe rātou e fa’a’ite i te tahi hi’ora’a o te mau ta’ata tei ’imi ’e tei rave i te hina’aro o te Fatu « ma te itoito tu’utu’u ’ore » (Helamana 10:4), i roto ānei i te mau pāpa’ira’a mo’a ’aore rā tō rātou iho orara’a. Nāhea te Fatu i ha’amaita’i ai i teie mau ta’ata i te mana « ’ia hurihia i raro » (Helamana 10:9) te mau mou’a o tō rātou orara’a ? Vaiiho i te mau pīahi i te tahi taime nō te feruri i te mau rāve’a e ti’a e ha’amaita’i a’e i tā rātou ’imira’a i te hina’aro o te Fatu ’e te ha’apa’ora’a i tāna mau fa’auera’a.

Helamana 12

’Ua hina’aro te Fatu ’ia ha’amana’o tātou iāna.

• E rave rahi pīahi tei rave i te mau fafaura’a e ha’amana’o noa ia Iesu Mesia. Penei a’e e nehenehe tā rātou e fa’a’ite mai i te tahi ’e te tahi i te tahi mau mea ’o tē tauturu nei ia rātou ’ia « ha’amana’o noa iāna » (Moroni 4:3 ; PH&PF 20:77), i te taime ruperupe o te orara’a ’e i te taime fifi. I muri mai e nehenehe te mau pīahi e ’imi i roto i te Helamana 12 i te tahi mau tumu e ha’amo’e ai te mau ta’ata i te Fatu. Nāhea tātou ’ia upo’oti’a i te mau peu i fa’ahitihia i roto i teie pene ? Nāhea te ’ati e tauturu ai ia tātou ’ia ha’amana’o i te Atua ? (hi’o Helamana 11:4–7).

• ’Ei fa’a’itera’a i te tauto’ora’a e tītauhia nō te ha’amana’o i te hō’ē mea, e nehenehe e vaiiho i te mau pīahi ma’a minuti nō te hi’o fa’ahou i te Helamana 12. I muri mai e nehenehe e ui ia rātou i te tahi mau uira’a nō ni’a i te pene nō te hi’o e aha tā rātou e ha’amana’o ra. Penei a’e e nehenehe rātou e fa’a’ite mai i te mea tā rātou e rave nō te ha’amana’o i te ha’api’ira’a nō te hō’ē hi’opo’ara’a. E aha te reira e tū’ati ai i te tauto’ora’a e tītauhia nō te « ha’amana’o i te Fatu »? (Helamana 12:5). E aha te mau ta’a-’ē-ra’a ? E ani i te mau pīahi ’ia ’imi mai i te hō’ē ’īrava ’aore rā te hō’ē parau i roto i te Helamana 12 ’o tā rātou e nehenehe e pia i roto i tō rātou fare ’aore rā tā rātou e nehenehe e tāmau ’ā’au nō te fa’aha’amana’o ia rātou i te maita’i ’e te mana o te Atua.

Fa’aitoito i te ha’api’ira’a mai i te fare

Nō te fa’aitoito i te mau pīahi ’ia tai’o i te Helamana 13–16, e nehenehe e ha’apāpū ē, te mau tohura’a a Samuela te ’āti Lamana nō ni’a i te mau ’ohipa e tupu i te fānaura’a ’e te fa’asataurora’a o te Fa’aora, e nehenehe ïa e fa’aau i te mau ’ohipa e tupu i tō tātou nei mahana nā mua a’e i te Tae-piti-ra’a mai o te Fa’aora.

Te tahi atu mau mātēria tauturu

Fa’aro’o i te arata’ira’a a te mau peropheta.

’Ua fa’a’ite mai Elder Neil L. Andersen i teie ’ohipa i muri nei :

« Te feiā e mā’iti e tāvini i te Fatu, e fa’aro’o māite noa rātou ’e e fa’aro’o ta’a ’ē rātou i te peropheta…

« E fa’ahōho’a atu vau i te reira ’e teie ’ohipa i tupu. E rave rahi matahiti tō mātou orara’a i te tufa’a fenua nō Florida. Nō te mea e mea one roa Florida, e tanuhia i roto i te ’āua te hō’ē ’aihere rao’ere ’ā’ano tā mātou e pi’i nei te Saint Augustine. Hō’ē ’enemi rahi o te matie nō Florida, ’o te hō’ē ïa perete’i na’ina’i ’e te pa’atoa tei pi’ihia te taupe-grillon.

« I te hō’ē pō tē ti’a ra māua tō’u hoa i mua i te fare, tē ’ite ra ’oia i te hō’ē manumanu tē nā-ni’a-ra’a i te ’ē’a. ’Ua nā ’ō mai ’oia : ‘E pīpī i te rā’au i ni’a i tā ’oe matie. ‘E taupe-grillon terā e haere atura’. Nō pīpī noa nei au i te rā’au i te mau hepetoma ri’i noa i ma’iri, ’e ’aita vau e mana’o ra e taime tō’u ’e te moni ho’i nō te rave fa’ahou i te reira i teienei.

« ’Ia po’ipo’i a’e, ’ia ao, ’ua hi’opo’a māite au i tā’u matie. E mea ruperupe maita’i ’e te nehenehe. ’Ua hi’o vau nā rotoroto i te ’aihere nō te hi’o ē, e ’ite ānei au i te tahi mau manumanu. ’Aita hō’ē a’e. Tē ha’amana’o nei au ’ua mana’o vau ē : ‘Penei a’e paha e mea rātere noa terā taupe-grillon iti nā tō’u ’āua ’e tē haere ra i te ’āua o tō’u hoa…’

« E mea ’ino rā te fa’ahope’ara’a. I te hō’ē po’ipo’i, tē haere ra vau i rāpae i te fare, fātata 10 mahana i muri mai i tā māua paraparaura’a ’e tō’u hoa. ’Ua hitimahuta vau, mai te mea ra ē hō’ē pō terā ’ohipa i te tupura’a, ’ua patapata haere te matie. Horo a’enei au i te fare toa, ho’o mai nei i te tahi rā’au ’e pīpī haere ihora, ’ua taere roa rā. ’Ua ’ino roa ho’i te matie, ’e nō te fa’a’āpī i te reira, tītauhia ’ia tanu fa’ahou i te mea ’āpī ’e ’ia ’ohipa i ni’a i te reira e rave rahi hora ’e ’ia ’aufau i te moni rahi.

« ’Ua riro te fa’aarara’a a tō’u hoa ’ei ’ohipa tumu nō te maita’i o tā’u matie. I ’ite ho’i ’oia i te mau mea ’aita i noa’a iā’u ’ia ’ite. I ’ite ho’i ’oia i te hō’ē mea ’aita vau i ’ite. I ’ite ho’i ’oia ē, tei raro a’e te mau taupe-grillon i te repo ’e e matara noa mai ratōu i te pō, ’aita ïa i faufa’a tā’u hi’opo’ara’a i te taime māramarama. I ’ite ho’i ’oia ē, ’aita te mau taupe-grillon e ’amu i te mau rao’ere, ’o te a’a rā tā rātou mā’a. I ’ite ho’i ’oia ē, e ti’a i teie manumanu na’ina’i e ’amu i te mau a’a e rave rahi hou vau e ’ite ai i te hō’ē noa a’e mea nā ni’a. E ho’o iti rahi tā’u i ’aufau nō tō’u ha’apa’o-noa-ra’a i tō’u mana’o…

« E mau taupe-grillon pae vārua e pao nei nā raro a’e i tō tātou mau patu pāruru ’e ’ua ’amu i tō tātou mau a’a iti. E rave rahi o teie mau manumanu parau-ti’a ’ore i te mea na’ina’i ’ia hi’ohia, ’e i te tahi taime fātata roa ’aita e ’itehia…

« ’Eiaha na tātou e pe’e i tā’u peu i te hi’ora’a vau i te mau taupe-grillon i Florida. ’Eiaha roa atu tātou e tāu’a ’ore i te mau fa’aarara’a. ’Eiaha roa atu tātou e ha’apa’o noa i tō tātou iho mana’o. Fa’aro’o noa ana’e ’e ha’api’i noa ana’e ma te ha’eha’a ’e te fa’aro’o, ma te fa’arū i te tātarahapa ’ia tītauhia te reira » (« Prophets and Spiritual Mole Crickets », Ensign, Nov. 1999, 16–18).

Ha’amaita’ira’a i tā tātou ha’api’ira’a

Fa’a’ite i te here. « Tei te huru, e nehenehe te fa’a’itera’a i te here i te feiā tā ’outou e ha’api’i nei e tupu nā roto i te ha’apoupou-māite-ra’a ia rātou, te ’ana’anataera’a i te ’ohipa e tupu nei i roto i tō rātou orara’a, te fa’aro’o-māite-ra’a ia rātou, te fa’a’ohipara’a ia rātou i roto i te ha’api’ira’a, te ravera’a i te tahi mau ’ohipa tāvinira’a nō rātou, ’aore rā te aroha-maita’i-ra’a ia rātou ’ia fārerei ana’e ’outou ia rātou (Ha’api’ira’a mai tā te Fa’aora, 6).