te mau ’are e haruru ra i ni’a i te ’ōfa’i

17–23 nō ’Ātete

Helamana 1–6

« Te papa o tō tātou Ora »

’Ua mātau mau ānei ’oe i tā ’oe mau pīahi ? E tāmata i te ha’amātau maita’i a’e i te hō’ē pīahi i te hepetoma tāta’itahi. ’A nā reira ai ’oe, e vai maita’i a’e ia ’oe tō rātou mau hina’aro i roto i te ferurira’a ’a fa’aineine ai ’oe nō te ha’api’i.

Pāpa’i i te mau mana’o e tae mai

ītona fa’a’itera’a

Tītau i te mana’o

E nehenehe e ani i te mau pīahi ’ia haere i te ha’api’ira’a ma te fa’ainene ’ia rātou nō te fa’a’ite i te hō’ē tao’a tā rātou e nehenehe e fa’a’ohipa nō te ha’api’i nō ni’a i te hō’ē parau tumu tā rātou i ’apo mai i roto i teie mau pene. E aha te tahi atu ā mau rāve’a nō te ha’api’i i teie mau parau tumu i te ta’ata ?

ītona ha’api’ira’a

Ha’api’i i te ha’api’ira’a tumu

Helamana 1–6

E fa’ata’a ’ē te te’ote’o ’ia tātou i te Vārua ’e i te pūai o te Fatu.

• Tē fa’ata’a nei te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare i te hō’ē « ’ohura’a o te te’ote’o » tei tā’iri i te mau ’āti Nephi. Penei a’e e nehenehe te hō’ē pīahi e pāpa’i i te hō’ē nīno’a iti nō terā ’ohura’a i ni’a i te tāpura ’ere’ere. ’Ei reira e nehenehe ai te mau pīahi e hi’o mai i te tahi mau ’īrava i roto i te Helamana 1–6 ’o tā rātou e mana’o ra e fa’ahōho’a i te mau tuha’a o terā ’ohura’a, ’e ’ia pāpa’i i te reira i pīha’i iho i te mau tuha’a o te nīno’a iti. (Mai te peu e hina’aro te mau pīahi i te tauturu, e nehenehe tā ’oe e tu’u atu i te mana’o e hi’o i roto i te Helamana 3:24–36 ; 4:11–26.) E mea nāhea tātou e riro ai mai te mau ’āti Nephi te huru i te tahi taime ? Nāhea tātou ’ia ’ape i tō rātou huru e he’e atu i te te’ote’o ? E ti’a ato’a ia ’oe ’ia fa’a’ite i te tahi mau tuha’a o te « Pene 18 : E ara i te te’ote’o » (Te mau Ha’api’ira’a a te mau Peresideni o te ’Ēkālesia : Ezra Taft Benson [2014], 255–66).

  te ’ohura’a o te te’ote’o

  Te « ’ohura’a o te te’ote’o ».

• E nehenehe ’oe e ani i te mau pīahi ’ia tai’o i te Helamana 4:13 ’e 24–26 ’e ’ia hi’o mai i te hō’ē hīmene e ha’api’i nei nō ni’a i tō tātou tūru’ira’a i ni’a i te Atua, mai te hīmene ra « Hina’aro vau ia ’oe » (Te mau hīmene, n°50). Nō te aha te te’ote’o e fa’ata’a ’ē ai ia tātou i te Atua ? Nāhea tātou i te ’ite ē e mea tūru’i tātou i ni’a i te Atua ? E nehenehe te mau pīahi e fa’a’ite mai nāhea rātou i te ha’apūaira’ahia e te Vārua ’e te mana o te Fatu nō tō rātou vai-ha’eha’a-ra’a.

• Te mau melo o te ’Ēkālesia e fa’ahitihia nei i roto i te Helamana 3:33–34, e hāmani-’ino-hia ra rātou e te tahi atu mau melo o te ’Ēkālesia. Nō tō rātou te’ote’o, ’ua fa’afaohia te feiā veve ’e ’ua rave rātou i te tahi atu mau huru hara ato’a (hi’o Helamana 4:11–13). E nehenehe e tai’o ’āmui i te Helamana 3:33–34 ’e te 4:11–13 ’e e ani i te mau pīahi ’ia ’āparau mai i te tahi mau rāve’a e ti’a ia tātou ’ia fa’a’ite i te hāmani maita’i rahi a’e ’e te fa’atura i ni’a i te ta’ata, ’e tae noa atu i tō tātou mau melo o te ’Ēkālesia e mea ta’a ’ē ri’i ia tātou. E nehenehe ato’a e ani i te mau pīahi ’ia feruri i te hō’ē ta’ata tā rātou i mātau e māuiui nei paha i te mau ’ohipa ’ino a vetahi ma te feruri i te huru e ti’a ai ia rātou ’ia tauturu i te ha’apūai ’e i te fa’aitoito i terā ta’ata.

Helamana 3:33–35

E tae mai te ha’amo’ara’a nō te aurarora’a tō tātou ’ā’au i te Atua.

• Pāpū ē e mea tāmāhanahana te Helamana 3:33–35 nō rātou i roto i tā ’oe piha ha’api’ira’a e fa’aruru nei i te « hāmani-’ino-rahi-ra’a-hia [’e ’aore rā] te mau ’ati e rave rahi » (’īrava 34). Penei a’e e nehenehe e ani i te mau pīahi ’ia mā’imi i roto i teie mau ’īrava i te parau a’o tā rātou e hōro’a atu i te hō’ē ta’ata e hāmani-’ino-hia ra. ’Aore rā e nehenehe te mau pīahi e fa’a’ite mai nāhea rātou i te ’itera’a i « te ’oa’oa ’e te hau » i te mau taime ’ati, nā roto i te ravera’a i te mau mea i fa’ata’ahia i roto i te ’īrava 35.

• E nehenehe e ani i te piha ha’api’ira’a ’ia tuatāpapa i te Helamana 3:33–35 ’e i te mau fa’ahitira’a ’e te mau fa’ahorora’a nō ni’a i te rirora’a ’ei ta’ata ha’amo’ahia, i roto i « Te tahi atu mau mātēria tauturu ». E aha tā teie mau ’īrava ’e mau fa’ahitira’a e ha’api’i nei nō ni’a i te ha’amo’ara’a ? Nāhea te ha’apaera’a mā’a ’e te pure i te fa’atae mai i te mau ha’amaita’ira’a i fa’ata’ahia i roto i te Helamana 3:35 ? Nāhea tātou ’ia auraro i tō tātou ’ā’au i te Atua ? (hi’o Helamana 3:35). Nāhea te reira e tauturu i te ha’amo’a ia tātou ? E nehenehe ato’a e fa’aineine ’e e ’ōpere i te tahi ’api parau tei ni’a hō’ē o te mau fa’ahitira’a ’aore rā fa’ahorora’a i roto i « Te tahi atu mau mātēria tauturu », ’e e ani i te mau pīahi ’ia huti huna mai hō’ē nō te tuatāpapa i te reira. ’Ei reira e ti’a ai ia rātou ’ia fa’a’ite mai i te tahi ’e te tahi e aha tā rātou i ’apo mai nō ni’a i te ha’amo’ara’a.

Helamana 5:12

Mai te peu e fa’ariro tātou ia Iesu Mesia ’ei niu nō tātou, e’ita tātou e topa.

• Tē hāpono hua nei Sātane i « tōna ra mata’i ’ū’ana » i roto i tō tātou orara’a ato’a. E rave rahi ta’ata i roto i tā ’oe piha ha’api’ira’a tei fa’aruru a’ena i te reira, ’e e au ē, e rahi atu ā te mau vero ananahi. E aha tā ’oe e nehenehe e rave nō te tauturu i te mau pīahi ’ia fa’aineine nō terā mau vero nā roto i te patura’a tō rātou orara’a i ni’a ia Iesu Mesia ?

  E nehenehe ’oe e ha’amata i te tāu’ara’a parau ma te fa’a’itera’a i te mau hōho’a nō mau hiero ’aore rā te tahi mau fare patu ’e ’ia fa’aau i tō tātou orara’a i te hō’ē fare. E aha te mau mā’itira’a e tītauhia i te hō’ē tāmuta fare ’ia rave ? E aha te mau mā’itira’a tā tātou e rave ’o tē fa’atupu e mea nāhea tō tātou orara’a i te patura’ahia ? I muri mai e tai’o ’āmui i te Helamana 5:12 ’e e ’āparau e aha te aura’a e patu i tō tātou orara’a i ni’a ia Iesu Mesia. E nāhea te rirora’a ’oia ’ei niu nō tātou e fa’auru ai i te tahi mau mā’itira’a tā tātou e rave ’a patu ai tātou i tō tātou orara’a ?

  E nehenehe te mau pīahi e fa’a’ite mai nāhea te ha’amaura’a i te Fa’aora ’ei niu nō rātou i te tauturu ia rātou ’ia fa’aruru i te mau vero o te orara’a. Vaiiho i te tahi taime i te mau pīahi ’ia feruri i te huru orara’a tā rātou e patu nei ’e nāhea rātou i te ha’apāpū ē, ’ua niu-pāpū-hia rātou i ni’a i te Mesia. E nehenehe te ’ā’amu nō ni’a i te hiero nō Roto Miti i roto i « Te tahi atu mau mātēria tauturu » e tauturu i tā ’outou tāu’ara’a parau.

Helamana 5:14–50

E ha’apūaihia tō tātou fa’aro’o nā « te rahi o te ’ite i noa’a mai ia [tātou nei] ».

• Hō’ē o te mau ha’amaita’ira’a nō te putuputura’a i te Ha’api’ira’a Sābati, ’o te rāve’a ïa nō te ha’apūai i tō te tahi ’e tō te tahi fa’aro’o—mai tā te mau ’āti Lamana i rave i roto i te Helamana 5:50. Penei a’e e nehenehe e tai’o ’āmui i te Helamana 5:50 ma te ani i te mau pīahi ’ia hi’o mai « i te mau mea tā [te mau ’āti Lamana] i fa’aro’o ’e i hi’o ra » i roto i te mau ’īrava 20–49. ’Ei reira ïa te mau pīahi e nehenehe ai e fa’a’ite mai i te tahi ’e te tahi i te tahi mau ’itera’a pae vārua tei fa’ati’aturi ia rātou ē e parau mau te ’evanelia—noa atu ā ’aita rātou i ’ite mata i te mau melahi ’aore rā te mau pou auahi. E aha te mau mea tā rātou i ’ite mata ’o tei fa’ati’aturi ia rātou i te ’evanelia a Iesu Mesia tei fa’aho’ihia mai ?

ītona ’āpora’a ha’api’ira’a

Fa’aitoito i te ha’api’ira’a mai i te fare

Tē fa’ata’a nei te Helamana 7–12 nāhea te noa’ara’a ia Nephi te ti’aturi o te Fatu ’e ’ua hōro’ahia iāna te mana rahi. E nehenehe ’oe e parau i te mau pīahi ē, nā roto i te tai’ora’a i teie mau pene e ti’a ai ia rātou ’ia ha’api’i mai nāhea ’ia noa’a rahi atu ā te ti’aturi i te Atua i roto i tō rātou orara’a.

ītona mātēria tauturu

Te tahi atu mau mātēria tauturu

Te ha’amo’ara’ahia nā roto ia Iesu Mesia.

• Te ha’amo’ara’a, ’o « te ’ohipa tau maoro nō te vai-ti’amā-ra’a i te mau hara, nō te vai-ateate-ra’a, nō te vai-mā-ra’a ’e nō te vai-mo’a-ra’a nā roto i te tāra’ehara a Iesu Mesia » » (Arata’i nō te mau pāpa’ira’a mo’a, « Ha’amo’ara’a », scriptures.ChurchofJesusChrist.org).

• « ’Ia tātarahapa mau tātou, e fa’a’ore te Mesia i te teimaha o te hape o tā tātou mau hara. E ’ite tātou iho ē, ’ua fa’a’orehia tā tātou hara ’e ’ua tāmāhia. E ha’apāpū mai te Vārua Maita’i i te reira ia tātou ; ’o ’oia te Ha’amo’a. ’Aita e ’itera’a pāpū rahi atu nō te fa’a’orera’a hara » (Dieter F. Uchtdorf, « Te rēni nō te ho’ira’a ’ati ’ore », Ensign ’aore rā Liahona, Mē 2007, 101).

• « Te ha’amo’ara’a i te toto o te Mesia ’o te rirora’a ’ei mea mā ïa, te vai-ateate-ra’a ’e te mo’a. Mai te peu e fa’a’ore te fa’ati’ara’a i te utu’a nō te hara tahito, nā te ha’amo’ara’a ïa e tātara i te tāfetafetara’a ’aore rā i te mau fa’ahope’ara’a o te hara » (D. Todd Christofferson, « Justification and Sanctification », Ensign, Tiunu 2001, 22).

• « I te taime ’ua auraro maita’i roa te hina’aro, te hotohoto ’e te mau mana’o ho’i o te hō’ē ta’ata i te Atua ’e i tāna mau tītaura’a, ’ua ha’amo’ahia ïa terā ta’ata » (Brigham Young, « Discourse », Deseret News, 7 nō Tetepa 1854, 1).

• E ha’amo’ahia tātou e te mana o te Vārua Maita’i maoti te tāra’ehara a Iesu Mesia (hi’o Hebera 13:12 ; Alama 13:10–12 ; 3 Nephi 27:19–20 ; Moroni 10:32–33 ; PH&PF 76:40–42).

• I muri mai i te ha’amo’ara’ahia tātou, e nehenehe ā tātou e topa mai i te ātea o te aroha hanahana (hi’o PH&PF 20:30–34).

E niu pāpū.

I roto i te patura’a o te hiero nō Roto Miti, ’ua ’itehia te mau ’afāra’a i ni’a i te mau ’ōfa’i niu. Noa atu ā fātata e iva matahiti nō te hāmanira’a i te reira, ’ua fa’aue te peresideni Brigham Young ’ia tātarahia te mau ’ōfa’i niu ’afā ’e ’ia monohia e te tahi ’ōfa’i fāito maita’i a’e. E pae fa’ahou ïa matahiti nō te tātara i te mau ’ōfa’i niu ’ino ’e nō te fa’a’ī fa’ahou mai i te reira. ’Ua nā ’ō te peresideni Young : « ’Ua hina’aro vau ’ia patuhia te reira hiero i te fāito e vai noa mai te reira ē tae noa atu te mileniuma » (« Remarks », Deseret News, 14 nō ’Ātopa 1863, 97).

Ha’amaita’ira’a i tā tātou ha’api’ira’a

Fa’a’ite i te ’itera’a pāpū nō Iesu Mesia. ’Aita paha Aminadaba i mana’o ē, ’o ’ōna te mea ’aravihi a’e nō te ha’api’i i te mau ’āti Lamana ’ia tātarahapa ’e ’ia vai te fa’aro’o i te Mesia (hi’o Helamana 5:35–41). Terā rā, ’ua fa’a’ite ’oia i te mea tāna i ’ite, ’e ’ua fa’auru rahi atu tōna ’itera’a pāpū. E aha te ha’api’ira’a tā ’oe e ’apo mai nā roto mai i tōna hi’ora’a ?