Piti tauasini taure’are’a fa’ehau, nā Arnold Friberg

10–16 nō ’Ātete

Alama 53–63

« Fa’aorahia rātou i te mana ta’a ’ē o te Atua »

’A hi’o ai ’oe i te mau mana’o ha’api’ira’a i roto i teie arata’i ha’api’ira’a, ’a feruri i te mea e haere i roto i tā ’oe piha ha’api’ira’a ’e e fa’aau ’e e fa’atano i te mau ’ohipara’a ’ia pāhono te reira i te mau hina’aro o te mau pīahi.

Pāpa’i i te mau mana’o e tae mai

Tītau i te mana’o

Nō te fa’aitoito i te mau pīahi ’ia fa’a’ite mai i tā rātou i ’apo mai i roto i te Alama 53–63, e nehenehe e ani ia rātou ’ia hi’o rereamanu i te mau pene nō te ’imi i te hō’ē ’īrava tā rātou e nehenehe e fa’a’ite i te hō’ē ta’ata e fa’aruru nei i te tahi mau tāmatara’a. E ani ia rātou ’ia fa’a’ite i te reira mau ’īrava i te tahi atu ta’ata i rāpae i te piha ha’api’ira’a.

Ha’api’i i te ha’api’ira’a tumu

Alama 53:17–21 ; 56:43–48, 55–56 ; 57:20–27 ; 58:39–40

’Ia fa’a’ohipa tātou i te fa’aro’o ’e te ti’aturi i te Atua, e ha’apūai mai ’oia ia tātou.

• E nehenehe e ha’amaita’i atu ā i te mau ’āparaura’a i roto i te piha ha’api’ira’a nō ni’a i te mau fa’ehau a Helamana nā roto i te tūru’ira’a i ni’a i te mea tā te mau pīahi i ha’api’i mai i te fare. Hō’ē rāve’a e nehenehe ai e rave i te reira, ’o te anira’a ïa i te mau pīahi ’ia fa’a’ite mai i te huru o te mau fa’ehau feiā ’āpī tā rātou i tāpe’a mai (e ’itehia vetahi o te reira i roto i te Alama 53:17–21 ; 56:45–48 ; 57:20–21, 26–27 ; 58:40). Nāhea te reira huru i te tauturura’a i te mau fa’ehau feiā ’āpī i roto i tā rātou mau ’arora’a ? Nāhea te reira e nehenehe ai e tauturu ia tātou i roto i tā tātou mau ’ārora’a pae vārua ? E nehenehe ato’a te mau pīahi e fa’ati’a mai i te ’ā’amu nō te tahi mau « fa’ehau feiā ’āpī » i tō tātou nei mahana.

• E mea pāpū ē, tē vai nei terā tīa’ira’a i roto i te mau metua o tā ’oe piha ha’api’ira’a ē e fa’ananea tā rātou mau tamari’i i te fa’aro’o mai tō te mau fa’ehau ’āpī a Helamana. Nō te tauturu i te mau metua ’e te mau metua nō ananahi o tā ’oe piha ha’api’ira’a ’ia ’apo mai i te ha’api’ira’a nā roto mai i tō rātou ’ā’amu, e nehenehe ’oe e fa’anaho i te hō’ē pupu vauvau parau nō te mau ta’ata e rave rahi nō te fa’a’ite mai i tō rātou mau mana’o nō ni’a i te patura’a i te fa’aro’o i roto i te mau tamari’i. E ani i te mau melo o te pupu vauvau parau ’ia tai’o i te Alama 56:47–48 ’e te 57:20–27 nā mua a’e rātou e haere mai ai, ’e ’ia fa’aineine ia rātou nō te fa’a’ite mai i mea tā rātou i ’apo mai nō te tauturu i te mau fa’ehau feiā ’āpī ’ia fa’atupu i te fa’aro’o. Hōro’a i te mau pīahi i te taime nō te fa’a’ite mai i tō rātou hi’ora’a, ’a hōhora mai ai te mau melo o te pupu vauvau parau i tō rātou mau mana’o. Te tahi ato’a mātēria tauturu e nehenehe e tūra’i i te ’āparaura’a, ’o te mau parau ïa a te tuahine Joy D. Jones i roto i « Te tahi atu mau mātēria tauturu », nā reira ato’a te a’ora’a a te peresideni Russell M. Nelson « E reo tāparu i tō’u mau tuahine » (Ensign ’aore rā Liahona, Nov. 2015, 95–97). I te pae hope’a o te tāu’ara’a parau, e nehenehe e hōro’a i te mau pīahi ma’a minuti nō te feruri i te mau uira’a mai teie i muri nei : ’O vai te tūru’i nei i ni’a i tō ’outou ’itera’a pāpū ? E aha te mea tā ’outou e nehenehe e parau ’e e rave nō te ha’apūai ia rātou ?

Mau ’aito (Ha’api’ihia e tō rātou mau metua vahine), nā Liz Lemon Swindle

Alama 58:1–12, 30–37 ; 61

E ti’a ia tātou ’ia mā’iti e feruri i te mana’o maita’i nō vetahi ’ē ’e ’eiaha ’ia ’ino’ino.

• E nehenehe te huru o Helamana i te ’orera’a tāna nu’u i fāri’i i te tauturu, ’ia riro ’ei hi’ora’a pūai nō tātou i te taime e tae mai te mana’o ē, e hape tei ravehia i ni’a ia tātou. Nō te fa’aitoito i te tāu’ara’a parau nō ni’a i tōna huru, e nehenehe e ani i te hō’ē pīahi ’ia fa’aineine iāna nō te fa’ati’a poto mai i te vaira’a o Helamana ’e te tumu ’aita te fa’aterera’a hau i pāhono i tāna mau tītaura’a (hi’o Alama 58:1–9, 30–37 ; 61:2–8). E nehenehe e pāpa’i i ni’a i te tāpura ’ere’ere Pahonora’a a Helamana ’e Te tahi atu huru pahonora’a. I muri iho e ani i te mau pīahi ’ia mā’imi i roto i te Alama 58:1–12 ’e te 30–37 ’e ’ia pāpa’i i raro a’e i te upo’o parau tāta’itahi te mau mana’o, te mau parau ’e te mau ’ohipa a Helamana i te hi’ora’a i tōna vaira’a, ’e i pīha’i iho, te tahi atu mea tāna e nehenehe e mana’o, e parau ’e e rave. E aha tā tātou e nehenehe e rave nō te pe’e i te hi’ora’a o Helamana i te taime e hape tei ravehia i ni’a ia tātou ’aore rā ’aita tātou i tāu’ahia ?

• I te fa’ahapahapara’a Moroni ia Pahorana i roto i te Alama 60, e nehenehe tā Pahorana e mā’iti ’ia ’ino’ino i tāna parau. ’Aita rā, ’ua pāhono mai ’oia ē « ’aita [’oia] i riri » ’e « tē ’oa’oa ra [’oia] i te aroha rahi o tō [Moroni] ’ā’au » (Alama 61:9). Nō te tauturu i te mau pīahi ’ia ’apo mai nā roto i te hi’ora’a o Pahorana, e nehenehe e ani ia rātou ’ia feruri ē, ’ua anihia rātou ’ia pāpa’i i te hō’ē parau ve’a nō te ve’a a te ’Ēkālesia, ’o tē paraparau atu nō ni’a i te hi’ora’a o Pahorana i roto i te Alama 61 nō te ha’api’ira’a nō ni’a i te ha’apaera’a i te ’ino’ino nō te parau a vetahi ’ē. ’Ei reira, e nehenehe e vāhi i te mau pīahi ’ei pupu ma te ani ia rātou ’ia tai’o i te Alama 61:3–14 ’e e tāpura mai i te tahi mau tuha’a tā rātou e tu’u i roto i tā rātou parau ve’a. E nehenehe ato’a te parau a’o a Elder David A. Bednar i roto i « Te tahi atu mau mātēria tauturu » e tauturu mai.

Alama 60:7–14

E hōpoi’a nā tātou te fa’ateiteira’a i te feiā ’ati a’e ia tātou.

• ’Ua pāpa’i Moroni ē nā Pahorana iho e fāri’i i tāna utu’a i mua i te Atua ’ia tāu’a ’ore ’oia i te mau hina’aro o te mau nu’u ’āti Nephi ma te ’ōpua i te reira. E nehenehe e ani i te mau pīahi ’ia tai’o ’āmui i te Alama 60:7–14, ’ei reira e ani atu ai ia rātou ’ia feruri i te hō’ē ta’ata tā rātou i mātau, ’o te hina’aro i te tauturu ’e ’o tē mana’o ra ē, ’aita ’oia e tāu’ahia ra. E aha te nehenehe e rave nō te vai ara i te mau hina’aro o vetahi ’ē ’e nō te pāhono i te reira ? Nāhea tō tātou mau hina’aro i te pāhonohia e vetahi ’ē ’e i tō tātou ato’a mau taea’e ’e mau tuahine aupuru ?

Alama 62:39–41, 48–51

’Ia ha’amana’o tātou i te Fatu i roto i tō tātou mau taime ’ati ’e te mau taime ruperupe e ti’a ai.

• Tē fa’a’ite nei te huru o te mau ’āti Nephi i roto i te taime fifi ’e i te taime ruperupe (hi’o Alama 62:39–41, 48–51) i te mea ē, e ti’a ia tātou ’ia mā’iti ’ia vai ha’eha’a noa, i roto ānei i te ’ati ’aore rā i te ruperupe. E nehenehe e ani i te mau pīahi ’ia tai’o i teie mau ’īrava ’e ’ia fa’a’ite mai i te mea tā rātou i tāpe’a mai. E nehenehe e ani ia rātou ’ia paraparau piti piti ta’ata i tō rātou mau mana’o, hou ’a ani ai i te tahi o rātou ’ia fa’a’ite mai i tō rātou mana’o i mua i te piha ha’api’ira’a.

Fa’aitoito i te ha’api’ira’a mai i te fare

’Ei fa’atupura’a i te ’ana’anatae nō te Helamana 1–6, e nehenehe e fa’ata’a i te piha ha’api’ira’a ē, i roto i teie mau pene, ’ua riro mai te mau ’āti Nephi ’ei nūna’a parau-ti’a ’ore ’e te mau ’āti Lamana ’ei nūna’a parau-ti’a. Tē vai nei i roto i teie ta’ahurira’a te ti’ara’a o te tahi mau ha’api’ira’a faufa’a rahi nō tātou i teie mau mahana hope’a nei ’e te ’ati rahi.

Te tahi atu mau mātēria tauturu

Fa’ariro i tā tātou mau tamari’i ’ei mea pa’ari i mua i te hara.

’Ua fa’a’ite te tuahine Joy D. Jones, te peresideni rahi nō te Paraimere, i te mau tāviri i muri nei nō te fa’atupura’a i « te hō’ē u’i pa’ari i mua i te hara » :

« Nō tē ha’amata… tītauhia ’ia tātou ’ia tauturu [i tā tātou mau tamari’i] ’ia ’ite ma te uiui ’ore ē e mau tamāroa ’e e mau tamāhine rātou nā te hō’ē Metua here i te Ao ra ’e e mau tīa’ira’a hanahana tāna nō rātou.

« Te piti, e mea faufa’a rahi roa te māramaramara’a i te ha’api’ira’a tumu nō te tātarahapara’a nō te pāto’i i te hara. E ʼere te pāto’ira’a i te hara ’o te faʼaearaʼa ma te hara ʼore, e tītau rā te reira ’ia tāmau noa i te tātarahapa, i te ara ʼe te itoito. Penei a’e e tae mai te pa’ari i mua i te hara ’ei haʼamaitaʼiraʼa nō te pāto’i-pinepine-raʼa i te hara…

« Te toru o te tāviri ’o te tauturura’a i te mau tamari’i ’ia riro mai ’ei mea pa’ari i mua i te hara, ’o te ha’amata mai te ’aru’arura’a i te nīni’i atu i te mau ha’api’ira’a tumu ’e te mau parau tumu o te ’evanelia—mai roto mai i te mau pāpa’ira’a mo’a, te mau Hīro’a Fa’aro’o, te buka iti Nō te Pūai ’o te Feiā ’Āpī, te mau hīmene Paraimere, te mau hīmene, ’e tō tātou iho ’itera’a pāpū—’o tē arata’i i te mau tamari’i i te Fa’aora…

« Te tauturura’a i te mau tamari’i ’ia hāro’aro’a, ’ia rave, ’e ’ia tāpe’a i te mau fafaura’a mo’a, ’o te tahi atu ïa tāviri… Te ha’api’ira’a i te mau tamari’i ’ia tāpe’a i te mau fafaura’a ’ōhie i tō rātou ’āpīra’a e hōro’a te reira ia rātou te mana nō te tāpe’a i te mau fafaura’a mo’a ’ia pa’ari mai rātou » (« Te hō’ē u’i pa’ari i mua i te hara », Ensign ’aore rā Liahona, Mē 2017, 88–89).

Nāhea i te ha’apae i te fa’atupu i te ’ino’ino.

I roto i tāna a’ora’a « ’E ’aore o rātou e turorira’a » (Ensign ’aore rā Liahona, Nov. 2006, 89–92), tē hōro’a nei Elder David A. Bednar i te parau a’o i muri nei :

• ’Ia ’ite tātou ē, te ’ino’ino, e mā’itira’a tā tātou e rave. « ’Ia feruri ana’e tātou ē, e nehenehe tā te hō’ē ta’ata ’e ’aore rā tā te hō’ē mea e fa’atupu i te ’ino’ino, te riri, te māuiui ’e aore rā te au ’ore, tē fa’aiti ra ïa tātou i tō tātou ti’amāra’a mōrare ’e tē fa’ariro ra ïa tātou ia tātou ’ei tao’a ’o tē fa’a’ohipahia. ’Āre’a rā, ’ei mau ti’a mana, tei ia ’outou ïa e tei iā’u ato’a nei te mana nō te ’ohipa ’e nō te mā’iti e nāhea tātou i te pāhono i te hō’ē huru fa’a’ino ’e ’aore rā i te hō’ē huru ha’amāuiui ».

• E hi’o i ni’a i te Fa’aora. « Te Fa’aora tei riro ’ei hi’ora’a rahi roa nō te ’ite ē, nāhea tātou ’ia pāhono i te mau mea ’e ’aore rā, i te mau huru e fa’atupu i te ’ino’ino » [hi’o 1 Nephi 19:9].

• ’Ia māramarama i te mau paruparu o vetahi ’ē. « Hō’ē o te mau tāpa’o rahi roa a’e o tō tātou pa’ari pae vārua, e ’itehia ïa i roto i te huru nō tā tātou pāhonora’a i te paruparu, te ’aravihi ’ore, ’e te mau ’ohipa huru fa’a’ino o te ta’ata ».

• Paraparau ’āfaro « Mai te mea ē, e parau mai te hō’ē ta’ata ’e ’aore rā, e rave ’oia i te hō’ē ’ohipa o tā tātou e fa’ariro ’ei fa’atupura’a i te ’ino’ino, tā tātou tītaura’a mātāmua ’o te pāto’ira’a ïa ’ia ’ino’ino, ’e i muri iho, e ’āparau ta’a ’ē, ma te parau-ti’a, ’e i mua roa i taua iho ta’ata ra. I roto i teie huru ravera’a, e roa’a ai te fa’aurura’a nō ’ō mai i te Vārua Maita’i, ’e e ti’a ato’a ai ’ia ha’amāramaramahia te mau vāhi pāpū ’ore, ’e ’ia ta’a maita’i i te mana’o mau ».

Ha’amaita’ira’a i tā tātou ha’api’ira’a

Tūru’i i ni’a i te mau ’ohipa i tupu i te fare. Nō te mea ho’i ’o te ’utuāfare te pū nō te ha’api’ira’a ’evanelia, ’a feruri nāhea te ’ohipa i roto i te piha ha’api’ira’a e nehenehe e tūru’i i ni’a i te ’ohipa i tupu i ’ō. ’Ei hi’ora’a, e nehenehe e taui i te mau ’ohipara’a e rave rahi i roto i te Mai, pe’e mai—nō te ta’ata hō’ē ’e te ’utuāfare nō te faa’ohipa i te reira i roto i te piha ha’api’ira’a nō te ha’apūai fa’ahou ā te tuatāpapara’a a ta’ata hō’ē ’e te tuatāpapara’a ’utuāfare.