Iesu ’e Maria

E te vahine, nō te aha ’oe e heva ai ? nā Mark R. Pugh

27 nō Tiurai–2 nō ’Ātete.

Alama 39–42

« Te rāve’a rahi ’oa’oa »

’Ua rahi roa te mau ha’api’ira’a tumu i roto i te mau ha’api’ira’a a Alama i roto i te Alama 39–42 ’e tē ha’apāpū nei te reira i te tahi mau parau mau faufa’a rahi. ’A tuatāpapa ai ’oe i teie mau pene, ’a feruri e aha te mau parau mau e tauturu rahi roa a’e i tā ’oe piha ha’api’ira’a ’e e aha tā ’oe e nehenehe e rave nō te tauturu ia rātou ’ia ’ite mai i te reira.

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te hōro’a i te taime i te mau pīahi ’ia fa’a’ite mai i tō rātou mana’o ’e te mea tā rātou i ’apo mai nō ni’a i te Alama 39–42, e nehenehe tā ’oe e ani ia rātou ’ia hi’o poto mai i teie mau pene nō te ’imi mai i te hō’ē mea tā Alama i parau ’aore rā i rave tei fa’auru mau ia rātou.

ītona ha’api’ira’a

Ha’api’i i te ha’api’ira’a tumu

Alama 39

E ’ohipa faufau te hara pae mōrare i te mata o te Fatu.

• E aha te mea tā tātou e nehenehe e ’apo mai i roto i te fa’ati’ara’a nō te ’ohipa i tupu nō Korianotona ’e te hara ’e te tātarahapara’a ? E nehenehe paha ïa tā te mau pīahi e tai’o i te Alama 39:1–14, hō’ē pae o rātou e ’imi i te hape tā Korianotona i rave, ’e te tahi pae e ’imi i te mea i arata’i iāna i te hara, ’e te tahi atu pae o rātou e ’imi i te parau a’o tā Alama i hōro’a iāna. ’A fa’a’ite mai ai rātou i te mea tā rātou i ’ite mai, e nehenehe rātou e tāu’aparau mai e nāhea i te ’ape i te reira mau ’ohipa hape.

• ’Ia rave te ta’ata i te hara pae mōrare, pinepine e tae mai te mana’o ha’aparuparu ’aore rā te taiā ma te mana’o ato’a ē, ’aita tō rātou e faufa’a rahi. E aha te mau parau tumu i roto i te Alama 39–42 e fa’auru i te mau pīahi ’ia fa’atupu i te tīa’ira’a e arata’i i te tātarahapa ? E nehenehe te fa’a’itera’a i te fa’ahitira’a a te tuahine Joy D. Jones i roto i « Te tahi atu mau mātēria tauturu » e tauturu i te mau pīahi ’ia māramarama i te ta’a-’ē-ra’a i roto i te vai-ti’amā-ra’a ’e tō tātou faufa’a i te mata o te Atua. (Hi’o ato’a Lynn G. Robbins, « ’Ia hitu rā ’ahuru i te hitura’a », Ensign ’aore rā Liahona, Mē 2018, 21–23.)

• I roto i tā ’outou tāu’ara’a parau, e riro ē e mea maita’i nō te mau pīahi ’ia tāu’aparau i te mau fa’aturera’a a te Fatu nō ni’a i te vi’ivi’i ’ore. E mea maita’i atu ā ’ia fa’atumu te paraparaura’a i ni’a i te mau parau tumu ’eiaha rā i ni’a i te tāpura nō te mau mea e rave ’e te mau mea ’eiaha e rave. ’Ei hi’ora’a, e nehenehe ’oe e ani i te mau pīahi ’ia hi’o mai i te mau parau tumu tā Alama i ha’api’i ia Korianotona i roto i te Alama 39. Hau atu, e nehenehe rātou e hi’o i te tumu parau « Te vi’ivi’i ’ore i te pae nō te ’āpeni » i roto i te Nō te Pūai o te Feiā ’Āpī ma te feruri i teie mau uira’a : « Mai te peu e ha’apoto ’outou i teie mau parau a’o ato’a ’ei hō’ē parau tumu, e aha ïa te reira ? » ’aore rā « E aha te mau parau tumu tā ’outou e ’ite ra i’ō nei ’o tē tauturu nei ia ’outou ’ia ora i te ture nō te vi’ivi’i ’ore ? » E nehenehe ato’a te mau pīahi e hi’o i teie tuha’a i roto i te Nō te Pūai o te Feiā ’Āpī, ma te ’imi i te mau ha’amaita’ira’a nō te orara’a i te ture nō te vi’ivi’i ’ore ’e te mau fa’ahope’ara’a nō te ha’apa’o-’ore-ra’a i terā ture. E aha te ta’a-’ē-ra’a i roto i teie mau parau tumu ’e te mea tā te ao nei e ha’api’i nei ? E aha tā teie mau parau tumu e fa’atupu i ni’a i te huru tātou e feruri ai i te ture nō te vi’ivi’i ’ore ? E mea maita’i ato’a paha nō tā ’oe piha ha’api’ira’a e tai’o i te fa’ahitira’a a te tuahine Wendy Nelson i roto i « Te tahi atu mau mātēria tauturu » ’a pāhono ai rātou i teie mau uira’a.

• I te tahi taime e mea ’ōhie ’ia ti’aturi ē, ’aita tā tātou mau mā’itira’a e fa’atupu nei i te hō’ē mea i ni’a i te ta’ata—nā tātou noa iho tā tātou mau hara. E aha tā Alama i ha’api’i ia Korianotona i roto i te Alama 39:11–12 nō ni’a i te mau mea tā tāna mau mā’itira’a e fa’atupu ? E ani i te mau pīahi ’ia feruri ’o vai te putapū nō te mau mā’itira’a tā rātou e rave ra, e mā’itira’a maita’i ’e te ’ino. E nehenehe ato’a rātou e fa’a’ite mai nāhea te mau ’ohipa ’e te mau hi’ora’a o vetahi ’ē i te tauturu ia rātou ’ia mā’iti i te maita’i.

Alama 40–42

Maoti te tāra’ehara a Iesu Mesia e ti’a ai i te rāve’a nō te fa’aorara’a ’ia tupu.

• ’Ua ha’api’i Alama ia Korianotona i te mau parau mau ’o tei tītauhia ia tātou pā’āto’a ’ia māramarama, mai te mau parau mau nō ni’a i te ’ōpuara’a o te orara’a, te ao vārua, te ti’afa’ahoura’a ’e te ha’avāra’a. E nehenehe e rave mai hō’ē o te mau ha’api’ira’a a Alama ’e e hōro’a e piti minuti i te mau pīahi nō te mā’imi i roto i te Alama 40–42 (te ta’ata hō’ē ānei ’aore rā a piti piti) ’e ’ia pāpa’i i te mau parau mau ato’a nō ni’a i terā tumu parau tā rātou i ’ite mai. ’Ei reira e fa’a’ite mai te mau pīahi i te tahi ’e te tahi ’aore rā i te piha ha’api’ira’a i te mea tā rātou i ’ite mai. E nehenehe tā ’oe e rave fa’ahou i te reira ’ohipa nō te tahi atu mau tumu parau mai te peu e taimehia. Nō te aha e mea faufa’a ’ia ta’a i te tamaiti a Alama, ’o Korianotona, i taua nau parau mau faufa’a rahi nei ?

• E nehenehe te fa’ata’ara’a a Alama nō te vaira’a o te mau vārua i muri iho i teie orara’a e fa’atae i roto i te ferurira’a o te mau pīahi i te faufa’a rahi nō te haerera’a i te Fa’aora ’e te tātarahapara’a i tā rātou mau hara i roto i teie orara’a. E nehenehe tā ’oe e pāpa’i Parau-ti’a (’ā’au tātarahapa) ’e ’Ino (’ā’au tātarahapa ’ore) i ni’a i te tāpura ’ere’ere ma te ani i te mau pīahi ’ia mā’imi i roto i te Alama 40:11–26 ’e ’ia tāpura i ni’a i te tāpura ’ere’ere i te mau ta’o ’aore rā te mau pereota tā Alama i fa’a’ohipa nō te fa’ata’a i te huru o teie nau pupu ta’ata tāta’itahi i muri mai i te pohe. Nāhea teie mau ha’api’ira’a e nehenehe ai e fa’auru ia tātou ’ia tātarahapa ? Nō te tahi atu mau parau nō ni’a i te mea e tupu i roto i te ao vārua, ’a hi’o 1 Petero 3:18–20 ; 4:6 ’e Te Parau Ha’api’ira’a ’e te mau Parau Fafau 138:29–37.

• E aha te mana’o e tae mai i roto i te ferurira’a o tā ’oe mau pīahi ’ia fa’aro’o ana’e rātou i te mau ta’o « fa’aho’ihia » ’e « fa’aho’ira’a » ? E ani ia rātou ’ia mā’imi i roto i te Alama 41 nāhea Alama i te fa’a’ohipara’a i teie mau ta’o. E aha te aura’a o tāna parau ? E aha te fa’aho’ihia ia tātou ? Nō te aha e riro ’ei tauturu ’ia hi’o i te fa’anahora’a a te Metua i te Ao ra mai te hō’ē « fa’anahora’a nō te fa’aho’ira’a » ? (’īrava 2).

• Penei a’e tē vai ato’a ra i roto i te tahi o te mau pīahi te uira’a i roto i te ferurira’a o Korianotona—e mea ti’a ānei ’aore rā e mea tano ānei ’ia fa’autu’a te hō’ē Atua here i tāna mau tamari’i ? (hi’o Alama 42:1). E nehenehe paha e ui i te mau pīahi ’ia feruri e nāhea rātou e pāhono ai i teie uira’a ’a ’imi atu ai i te mau pāhonora’a i roto i te Alama 42:7–26.

• ’Ua mana’o ’oe e mea maita’i ra, e nehenehe tā ’oe mau pīahi e fana’o nā roto i te ’imira’a i te hō’ē ’īrava i roto i te Alama 42 ’o tā rātou e nehenehe e pāpa’i hōho’a ’ōhie ’aore rā e tāpa’o ’o tē fa’ata’a mai nō te aha e tītauhia te tāra’ehara a te Fa’aora nō tātou. E nehenehe te mau pīahi e fa’a’ite mai e aha te hōho’a tā rātou i pāpa’i, ’e nā te tahi atu mau pu’era’a e feruri e aha terā ’īrava. I muri iho, e nehenehe rātou e ’āparau i te mea tā rātou i ’apo mai nō ni’a i te faufa’a rahi o te tusia a te Fa’aora.

  e vahine e pure ra

  E ti’a ia tātou ’ia fāri’i i te hō’ē ’itera’a pāpū nō Iesu Mesia ’ei Fa’aora nō tātou.

ītona mātēria

Te tahi atu mau mātēria tauturu

E mea faufa’a rahi tō tātou vārua.

’Ua ha’api’i te tuahine Joy D. Jones :

« E fa’ata’a atu vau i te tītaura’a ’ia ta’a maita’i i nā parau e piti : te faufa’a ’e te ti’amā. E ’ere hō’ē ā parau. Te faufa’a pae vārua, ’o te ha’afaufa’ara’a ïa ia tātou iho mai tā te Metua i te Ao ra e ha’afaufa’a ia tātou, ’eiaha mai tā tō te ao nei e rave ra. ’Ua fa’aoti-a’ena-hia tō tātou faufa’a hou tātou ’a haere mai ai i ni’a i te fenua nei. ‘E mea mure ʼore te aroha o te Atua ʼe e vai noa te reira ē a muri noa atu’.

« I te tahi atu pae, e noa’a te ti’amā nā roto i te ha’apa’o. ’Ia hara tātou, e fifi tō tātou ti’amā, ’aita rā tō tātou faufa’a i fifi ! Tē tāmau nei tātou i te tātarahapa ’e i te tūtava ’ia riro mai ia Iesu ’e ma tō tātou noa faufa’a. Mai tā te peresideni Brigham Young i ha’api’i : ‘Te vārua iti ’e te ha’eha’a roa a’e i ni’a i te fenua nei… mai te mau ao tōna faufa’a.’ Noa atu ā te ’ohipa e tupu, e faufa’a noa tō tātou i te mata o tō tātou Metua i te Ao ra » (« E faufa’a fāito ’ore », Ensign ’aore rā Liahona, Nov. 2017, 14).

’Aita tō te hi’ora’a i te hereherera’a e tū’ati nei i tō te Atua hi’ora’a.

’Ua fa’a’ite te tuahine Wendy Nelson i te ta’a-’ē-ra’a i roto i tō te ao hi’ora’a i te hereherera’a—« te hereherera’a tino nei »—’e te mea tāna e parau nei « te orara’a fa’aherehere o te fa’aipoipora’a fa’auehia e te Atua » :

I roto i te hereherera’a tino nei, ’ua matara te mau mea ato’a. I roto i te orara’a fa’aherehere o te fa’aipoipora’a, e aupuru-rahi-hia te ’apera’a i te mau mea ato’a ē te mau mea rau—te parau, te pene ’e te hōho’a—e tuhi i te Vārua, i tō ’outou vārua ’e tō te hoa fa’aipoipo.

« Riro noa atu te hereherera’a tino nei ’ei ’ohipa tai’ata ’o te ha’apohe i te here, e fa’atupu ïa te orara’a fa’aherehere o te fa’aipoipora’a i te here rahi atu ā.

« E fa’a’ino te hereherera’a tino nei i te tāne ’e te vahine nā reira ato’a tō rāua tino, ’a riro ai te orara’a fa’aherehere o te fa’aipoipora’a i te fa’atura ia rāua ma te fa’ahanahana i te tino ’ei hō’ē o te mau perapeio rarahi o te orara’a tāhuti nei.

« I roto i te hereherera’a tino nei, e tae mai te mana’o rave ’ino, te hāmani ’ino ’e te vai-’ōtahi-ra’a i te hope’a. Ma te orara’a fa’aherehere o te fa’aipoipora’a, e ’ite nā ta’ata fa’aipoipo i te tāhō’ē ’e te here rahi a’e, te aupuru ’e te māramarama.

E ha’apau te hereherera’a tino nei i te mau aura’a ē ’ino roa atu. E ha’apūai te orara’a fa’aherehere o te fa’aipoipora’a i te fa’aipoipora’a. E turu te reira i te orara’a o nā ta’ata ’e tō rāua fa’aipoipora’a…

« E riro te hereherera’a tino nei ’ei vaoru (obsession) hope roa inaha e’ita roa atu te reira e hopoi mai i tāna i parau fafau. E mea hanahana te orara’a fa’aherehere o te fa’aipoipora’a fa’auehia e te Atua ’e e vai a muri noa atu te reira nō te mau tāne ’e te mau vahine ha’apa’o fafaura’a » (« Te here ’e te fa’aipoipora’a » [Purera’a ’ati ti’a i te ao nei, 8 nō Tēnuare 2017], broadcasts.ChurchofJesusChrist.org).

Ha’amaita’ira’a i tā tātou ha’api’ira’a

Fa’aineine hou te mahana ha’api’ira’a « ’A feruri ai ’outou e nāhea te mau parau tumu nō te ’evanelia tā ’outou e ha’api’i ra e ha’amaita’i ai i te mau melo nō tā ’outou piha ha’api’ira’a, e tae mai te mau mana’o ’e te mau fa’a’itera’a i roto i tō ’outou orara’a i te mau mahana ato’a—’a tere ai ’outou nō te haere i te ’ohipa, nō te rave i te mau ’ohipa i te fare, ’aore rā i roto i tō ’outou mau aura’a ’e te ’utuāfare ’e te mau hoa. ’Eiaha e feruri i te fa’aineinera’a pae vārua mai te tahi mea e fa’ata’a ’outou i te hō’ē taime mai te tahi rā mea tā ’outou e rave noa.(Ha’api’ira’a mai tā te Fa’aora,12).