Mai, pe’e mai
20–26 nō Tiurai. Alama 36–38 : « E hi’o i te Atua, e ora »

« 20–26 nō Tiurai. Alama 36–38 : ‘E hi’o i te Atua, e ora’ », Mai, pe’e mai—nō te Ha’api’ira’a Sābati : Buka a Moromona 2020 (2020)

« 20–26 nō Tiurai. Alama 36–38 », Mai, peʼe mai—nō te Haʼapiʼiraʼa Sābati : 2020

Hōho’a
e ta’ata e pure ra

Faʼahōhoʼaraʼa nā Joshua Dennis

20–26 nō Tiurai

Alama 36–38

« E hi’o i te Atua, e ora »

’A fa’aineine ai ’oe nō te ha’api’i, ’a ha’amana’o ē e mea pāpū ē ’ua tupu te tahi ’ohipa au nō te mau pīahi nō ni’a i te Alama 36–38. E aha tā ’oe e nehenehe e rave nō te patu i ni’a i te reira mau ’ohipa i tupu ?

Pāpa’i i te mau mana’o e tae mai

Hōho’a
ītona fa’a’itera’a

Tītau i te mana’o

Hō’ē rāve’a nō te fa’aitoito i te mau pīahi ’ia fa’a’ite mai i te mea tā rātou i ’apo mai i roto i te mau pāpa’ira’a mo’a, ’o te vāhira’a ïa i te piha ’ei toru pupu ma te fa’ata’a hō’ē pene o te Alama 36–38 nō te pupu tāta’itahi. E ani i te pupu tāta’itahi ’ia hi’o mai i te hō’ē ’īrava fa’auru i roto i tā rātou pene ’e ’ia fa’a’ite mai i te reira.

Hōho’a
ītona ha’api’ira’a

Ha’api’i i te ha’api’ira’a tumu

Alama 36

E ti’a ia tātou ’ia fānauhia i te Atua ra ’a vai ha’eha’a ai tātou ’e ’a tātarahapa ai.

  • E uiui paha te tahi o tā ’oe mau pīahi nō te aha ’aita tō rātou fa’afāriura’a i tupu mai te ’ohipa rahi i tupu nō Alama. Penei a’e e tauturu atu te fa’a’itera’a i te mea tā Elder David A. Bednar i ha’api’i : « Nō tātou e rave rahi, e ’ohipa tāmau te ’ohipa o te fa’afāriura’a, e ’ere i te hō’ē ’ohipa nō te hō’ē taime noa tei tupu mai nā roto i te hō’ē ’itera’a fa’ahiahia ’e ’aore rā te hō’ē ’ohipa rahi roa » (« Fa’afāriuhia i te Fatu », Ensign ’aore rā, Liahona, Novema 2012, 107–8). Noa atu ā e mea ta’a ’ē roa te tahi mau mea nō te fa’afāriura’a o Alama, tē ha’api’i mai nei te ’ohipa i tupu nōna i te tahi mau parau tumu e tītauhia ’ia fa’a’ohipa tātou pā’āto’a i roto i tō tātou fa’afāriura’a tāmau. E nehenehe e ani i te tahi mau pīahi ’ia mā’imi i roto i te Alama 36 i te reira mau parau tumu ’e ’ia tāpura i te reira i ni’a i te tāpura ’ere’ere. E aha atu ā te mea i tauturu ia tātou ’ia fa’afāriu-rahi-hia atu ā i te ’evanelia a Iesu Mesia ?

  • ’Ua fa’a’ohipa Alama i te parau ra « fānauhia i te Atua ra » nō te parau nō tōna fa’afāriura’a. ’Ei tauturura’a i te mau pīahi ’ia māramarama i te reira mana’o, e nehenehe e ani ia rātou ’ia tai’o i te mau ’īrava i muri nei, rātou noa iho ’aore rā e tai’o ’āpipiti, ma te hi’o i te aura’a nō te parau fānauhia i te Atua ra : 1 Ioane 4:7 ; Mosia 5:7 ; 27:25–26 ; ’e Alama 5:14 ; 22:15. E ani i te mau pīahi ’ia fa’a’ite mai i te mea tā rātou i ’apo mai. I muri iho, e nehenehe tā rātou e hi’o i roto i te Alama 36, ma te ’imi i te mau pāhonora’a i teie uira’a : E aha tā te ta’ata e mana’o ’e e rave ’ia fānauhia rātou i te Atua ra ? ’Ei tauturura’a i te mau pīahi ’ia feruri e mea nāhea rātou i te fānauhia i te Atua ra, e nehenehe e fa’a’ite atu i te fa’ahitira’a a te peresideni Ezra Taft Benson e ’itehia i roto i « Te tahi atu mau mātēria tauturu ».

Alama 37

’Ua fa’ahereherehia te mau pāpa’ira’a mo’a « nō te mea pa’ari ho’i ».

  • Penei a’e e riro te tuatāpapara’a i te mau parau a Alama ’a hōro’a ai ’oia i te mau pāpa’a parau mo’a i tāna ra tamaiti ia Helamana, i te tauturu i te mau pīahi ’ia fa’a’ite mai nāhea rātou i te ’itera’a i te mana o te mau pāpa’ira’a mo’a i roto i tō rātou orara’a. Fa’aitoito ia rātou ’ia hi’o i te Alama 37 nō te ’ite mai i te tahi mau poro’i tā Alama i hōro’a ia Helamana nō ni’a i te mau pāpa’ira’a mo’a (hi’o ta’a ’ē i te mau ’īrava 1–19 ’e te 43–47). E aha tā tātou e rave nei nō te fa’a’ite ē, e mea mo’a te mau pāpa’ira’a mo’a nō tātou ? Nāhea tātou e ha’api’i atu, mai ia Alama, i te feiā tā tātou e here nei ’ia « mo’a [ia rātou] taua mau mea ato’a nei » ? (Alama 37:2). Mea nāhea te mau pāpa’ira’a mo’a « i te fa’a’ite mai i [tō te Atua] mana » ia tātou nei ? (Alama 37:14).

  • Hō’ē rāve’a nō te ’apo mai i te mau ha’amaita’ira’a nō te fāna’ora’a i te mau pāpa’ira’a mo’a, ’o te tuatāpapara’a ïa i tā Alama i parau i roto i te Alama 37 nō ni’a i te mau pāpa’a parau mo’a ’e te tahi atu mau tao’a tāna i ti’aturi ia Helamana. E nehenehe e hāmani i te hō’ē tāpura nō te mau tao’a mo’a i ni’a i te tāpura ’ere’ere : te mau ’api a Nephi ’e te mau ’api veo (Alama 37:2–20), nā ’api piti ’ahuru ma maha ’e nā ’īriti parau (Alama 37:21–37), ’e te Liahona (Alama 37:38–47). E nehenehe te mau pīahi e tai’o i teie mau ’īrava nō te ha’api’i i te mea tā Alama i ha’api’i nō ni’a i teie mau tao’a tāta’itahi. Nāhea te mau pāpa’ira’a mo’a e nehenehe ai e fa’a’ā’ano i tō tātou mēharo ? (hi’o Alama 37:8). E aha tā tātou e nehenehe e ’apo mai i roto i te mau parau a Alama nō ni’a i te mau ha’amaita’ira’a nō te fāna’ora’a i te mau pāpa’ira’a mo’a i roto i tō tātou nei orara’a i teie mahana ?

    Hōho’a
    e vahine e tai’o ra i te mau pāpa’ira’a mo’a

    Tē ha’api’i nei te mau pāpa’ira’a mo’a ia tātou nāhea i te pe’e i te Atua.

Alama 37:6–7, 41–42

« Nā roto i te mau mea iti ’e te pāpū ra e fa’atupuhia ai te mau mea rarahi ».

  • Nō te ha’api’i nō ni’a i te faufa’a rahi o « te mau mea iti ’e te pāpū ra » i roto i te ’ohipa a te Atua, ’ua hōro’a Alama e piti hi’ora’a : te mau pāpa’ira’a mo’a ’e te Liahona (hi’o Alama 37:6–7, 41–42 ; hi’o ato’a 1 Nephi 17:41). I muri mai i te hi’ora’a i te reira mau hi’ora’a, e nehenehe paha te mau pīahi e fa’a’ite mai i te mau hi’ora’a nō roto mai i tō rātou iho orara’a, e hi’ora’a nō te mau mea iti ’e te pāpū ra, i roto i te ’ohipa a te Atua. E paraparau ’oi’oi paha ïa ’oe i te hō’ē pīahi ’aore rā e piti nō te ani ia rāua ’ia ’āfa’i mai i te hō’ē tao’a i te piha ha’api’ira’a, hō’ē tao’a iti tei fa’atae mai i te tahi mau mea rahi i roto i tō rāua orara’a. E nehenehe ato’a ’oe e fa’a’ite i te fa’ahitira’a a te peresideni Dallin H. Oaks i roto i « Te tahi atu mau mātēria tauturu ». Nō te tauturu i te mau pīahi ’ia fa’atano i ni’a ia rātou iho i teie parau tumu, e nehenehe e ui i te mau uira’a mai teie i muri nei : Nō te aha tātou, i te tahi taime, ’aita tātou e rave nei i te mau mea iti ’e te pāpū ra ? Nāhea e ti’a ai ia tātou ’ia fa’auru ia tātou iho ’e i tō tātou ’utuāfare ’ia upo’oti’a i ni’a i teie peu ?

Alama 37:38–47

E ti’a i te parau a te Mesia e arata’i ia tātou i terā mahana ’e terā mahana.

  • E nehenehe te fa’aaura’a i te parau a te Atua i te Liahona e fa’auru i te mau pīahi ’ia fa’aitoito atu ā ’e ’ia tai’o tāmau atu ā i te mau pāpa’ira’a mo’a. Nō te arata’i i te hō’ē tāu’ara’a parau nō ni’a i te reira, e nehenehe e ani i te mau melo o te piha ’ia tai’o i te Alama 37:38–47 a piti piti, ma te ’imi i te mau tū’atira’a i roto i te Liahona ’e te parau a te Atua. E nehenehe e tu’u i te ’ōpuara’a e hi’o mai hō’ē tū’atira’a i roto i te ’īrava tāta’itahi. I muri iho e nehenehe e pāpa’i i te nūmera ’īrava tāta’itahi i ni’a i te tāpura ’ere’ere e e ani atu i te mau pīahi ’ia pāpa’i i te mau tū’atira’a i pīha’i iho i te mau nūmera. E aha te mana’o e tupu mai nō teie fa’aaura’a nō ni’a i te huru e hi’o ai i tā tātou tuatāpapara’a pāpa’ira’a mo’a ?

Alama 38

E ha’apūai te fa’a’itera’a i tō tātou ’itera’a pāpū nō Iesu Mesia i te feiā tā tātou e here nei.

Hōho’a
ītona ’āpora’a ha’api’ira’a

Fa’aitoito i te ha’api’ira’a mai i te fare

’Ua uiui a’enei te mana’o o te mau pīahi ē, nāhea i te a’o i te hō’ē ta’ata herehia tei rave i te hō’ē hape teimaha ? E fa’ata’a ē, e ’ite mai rātou i te tahi mau mana’o tauturu i roto i te Alama 39–42.

Hōho’a
ītona mātēria tauturu

Te tahi atu mau mātēria tauturu

’Ua riro te fa’afāriura’a mai te hō’ē fānaura’a ’āpī.

’Ua ha’api’i te peresideni Ezra Taft Benson ē : « ’Ia oti ana’e teie tauira’a rahi i roto ia tātou, e mea nā roto ana’e i te fa’aro’o ia Iesu Mesia ’e nā roto ho’i i tā te Vārua ’ohipara’a i ni’a ia tātou, e au ïa ē, ’ua riro mai tātou ’ei ta’ata ’āpī. Nō reira, e au ïa te reira tauira’a mai te hō’ē fānaura’a ’āpī. E rave rahi tauatini ’outou tei fāri’i i teie tauira’a. ’Ua ha’apae ’outou i te orara’a hara, i te tahi taime e hara rahi ’e te ’ino ho’i, ’e nā roto i te fa’a’ohipara’a i te toto o te Mesia i roto i tō ’outou orara’a, ’ua mā ’outou. ’Aita ’outou e hina’aro fa’ahou e ho’i i roto i tā ’outou mau peu tahito. E ta’ata ’āpī mau ’outou. Te reira ïa te aura’a o te parau, te tauira’a o te ’ā’au » (« A Mighty Change of Heart », Ensign, ’Ātopa 1989, 4).

Te mau mea iti ’e te ’ōhie

ʼUa haʼapiʼi te peresideni Dallin H. Oaks ē :

« I te hōʼē poʼipoʼi ’a haere ’āvae noa ai au, ’ua fa’aha’amana’o te tahi mea tā’u i ’ite atu i te pūai o te mau mea iti ’e te ʼōhie i roto i te hōʼē tau roa… Tē paparari ra te hiti porōmu tima me’ume’u ’e te paʼari. Nā te tahi ānei tūraʼiraʼa pūai ʼe te rarahi teie ’ohipa ? ’Aita, nā te tupuraʼa marū noa ʼe te haʼihaʼi o te torora’a hōʼē o te mau aʼa o te tumu rāʼau piri mai i fa’atupu i teie ʼafāfāraʼa…

Mai te reira atoʼa te pūai o te mau mea iti ʼe te ʼōhie tei haʼapiʼihia ia tātou i roto i te mau pāpaʼiraʼa moʼa ʼe nā te mau peropheta ora. ʼA feruri na i te tuatāpaparaʼa i te mau pāpaʼiraʼa moʼa tei haʼapiʼihia ia tātou ’ia faʼaʼohipa i roto i tō tātou oraraʼa i te mau mahana atoʼa. ʼAore rā ʼa feruri na i te mau pure tātaʼitahi ʼe te mau pure ʼutuāfare nā roto i te tūturiraʼa tei riro ʼei mau peu tāmau nā te feiā moʼa haʼapaʼo i te mau mahana hopeʼa nei. Noa atu e au ra ē e mea iti ʼe e mea ʼōhie roa teie mau peu tātaʼitahi, i te roaraʼa rā o te taime e riro ïa rātou ʼei faʼaitoitoraʼa ʼe ’ei tupuraʼa pūai i te pae vārua. E tupu te reira nō te mea ē, teie mau mea iti tātaʼitahi ʼe te ʼōhie e ani te reira i te auhoaraʼa o te Vārua Maitaʼi, te Faʼaʼite pāpū ʼo tē haʼamāramarama mai ʼe ʼo tē arataʼi hoʼi ia tātou i te parau mau ra » (« Te mau mea iti ʼe te ʼōhie », Ensign ’aore rā Liahona, Mē 2018, 90).

Ha’amaita’ira’a i tā tātou ha’api’ira’a

Tītau manihini i te mau pīahi ’ia ha’api’i te tahi i te tahi. ’Ia hōro’a ana’e te mau pīahi i tō rātou ’itera’a pāpū ’aore rā ’ia fa’a’ite mai rātou i te mea tā rātou i ’apo mai, e nehenehe tā rātou e toro atu i te rima i te tahi atu pīahi ’aore rā e fa’auru atu iāna i te huru e’ita e roa’a ia ’oe. (Hi’o Ha’api’ira’a mai tā te Fa’aora, 30.)

Nene’i