« 13–19 nō Tiurai. Alama 32–35 : ‘E tanu ’outou i teie nei parau i roto i tō ’outou ’ā’au’ », Mai, pe’e mai—nō te Haʼapiʼiraʼa Sābati : Buka a Moromona 2020 (2020)
« 13–19 nō Tiurai. Alama 32–35 », Mai, peʼe mai—nō te Haʼapiʼiraʼa Sābati : 2020
13–19 nō Tiurai
Alama 32–35
« E tanu ’outou i teie nei parau i roto i tō ’outou ’ā’au »
Noa atu ā te rahira’a taime tō ’oe tai’ora’a i te Alama 32–35, ’a tai’o fa’ahou i te reira ’a fa’aineine ai ’oe i te ha’api’ira’a. ’Ia vai matara noa tō ’oe ferurira’a i te mau mea ’āpī nō ’ō mai i te Vārua.
Pāpa’i i te mau mana’o e tae mai
Tītau i te mana’o
Nō te tauturu i te mau pīahi ’ia fa’a’ite mai i te mea tā rātou i ha’api’i i roto i te Alama 32–35 i te fare, e nehenehe tā ’oe e hōro’a ia rātou ma’a minuti nō te hi’o fa’ahou i teie mau pene ’e ma te pāpa’i i ni’a i te tāpura ’ere’ere i te mau tumu parau ’aore rā te mau parau tā rātou i ’ite mai. E tāu’aparau ’e te piha nō te aha e mea faufa’a teie mau tumu parau ’e ’aore ra teie mau parau.
Ha’api’i i te ha’api’ira’a tumu
E ti’a ia tātou ’ia mā’iti ’ia fa’aha’eha’a.
-
Nō te fa’atupu i te tāu’ara’a parau nō ni’a i te ha’eha’a mai tei ha’api’ihia i roto i te Alama 32:1–16, e nehenehe ’oe e ha’amata nā roto i te anira’a i te mau pīahi ’ia fa’ahiti mai i te tahi mau ’ohipa e nehenehe e fa’aha’eha’a i te hō’ē ta’ata (tē hōro’a nei te Alama 32:2–5 i te hō’ē hi’ora’a). E ineine paha te tahi mau pīahi ’ia fa’a’ite mai i te ’ohipa i tupu nō rātou iho i te ha’api’ira’a mai i te ha’eha’a. Nō te aha e ha’amaita’ira’a ’ia « fa’aha’eha’ahia ai tō [tātou] ’ā’au » (Alama 32:12) ? E nehenehe te mau fa’ahitira’a nō ni’a i te ha’eha’a i roto i « Te tahi atu mau mātēria tauturu » e tauturu i te tāu’ara’a parau. E nehenehe ato’a tā ’outou e tai’o i Te Parau Ha’api’ira’a ’e te mau Parau Fafau 112:10 ’aore rā e nehenehe te piha e hīmene i te hō’ē hīmene nō ni’a i te ha’eha’a, mai te hīmene « ’Ia ha’eha’a noa ’oe » (Te mau hīmene, n°64).
Tē fa’a’ohipa nei tātou i te fa’aro’o ia Iesu Mesia nā roto i te tanura’a ’e te fa’a’amura’a i tāna parau i roto i tō tātou ’ā’au.
-
I te tahi taime, tē feruri nei tātou i te ha’amorira’a ’ei mau mea tā tātou e rave i te hō’ē vāhi ta’a ’ē mai te fare purera’a (hi’o Alama 32:5, 9, 11), e mea ’ā’ano atu ā rā te tātarara’a a Alama nō ni’a i te ha’amorira’a. ’Ei hi’ora’a, ’ua ha’api’i ’oia ē, e hi’ora’a faufa’a rahi te fa’atupura’a ’e te fa’a’ohipara’a i te fa’aro’o ia Iesu Mesia nō te ha’amorira’a ’o tē nehenehe e rave i rāpae i te hō’ē vāhi ta’a ’ē. Nō te tauturu i te piha ’ia māramarama i teie parau tumu, e nehenehe tā ’oe e pāpa’i i te hōho’a nō te hō’ē huero ’e nō te hō’ē tumu rā’au i ni’a i te tāpura ’ere’ere ma te tāu’aparau i te mau uira’a mai teie i muri nei : E aha te huero ? (hi’o Alama 32:28 ; 33:22–23). Nāhea e ti’a ai ia tātou ’ia tanu i te huero—’aore rā te ’itera’a pāpū nō Iesu Mesia ’e nō tōna Tāra’ehara—i roto i tō tātou ’ā’au ’e ’ia fa’a’amu ho’i i te reira ? (hi’o Alama 32:36–43 ; 33). E aha te mau ’ohipa i tupu tā tātou e nehenehe e fa’a’ite atu, tei fa’atae mai nā roto i tā tātou mau tauto’ora’a ’ia pe’e i te Fa’aora i te hotu faufa’a rahi ? E aha tā te mau ha’api’ira’a a Alama e fa’auru nei ia tātou nō ni’a i te huru o tā tātou ha’amorira’a i te Metua i te Ao ra ’e ia Iesu Mesia ?
-
Te « tāmatamatara’a » tā Alama i vauvau i mua i te mau ’āti Zorama nō te tauturura’a ia rātou ’ia fa’atupu i te fa’aro’o ia Iesu Mesia, e ti’a ato’a ïa i te reira ’ia tauturu mai ia tātou ’ia ’apo mai ē e parau mau ānei te tahi atu ā mau parau tumu o te ’evanelia. Nō te tauturu i te piha ’ia māramarama i te tāmatamatara’a tā Alama i parau, e nehenehe e ’āparau e aha te hō’ē tāmatamatara’a. E ta’ata paha tō roto i te piha tei rave a’enei i te hō’ē tāmatamatara’a ’o tē nehenehe e tauturu i te tātarara’a i te reira. E aha te fā nō te hō’ē tāmatamatara’a ? E mea nāhea te hō’ē tāmatamatara’a e tū’ati ai i te mea tā Alama i ani i te ta’ata ’ia rave i roto i te Alama 32:26–36 ? Penei a’e e mau rāve’a rau tā te mau pīahi i ’ite i te « tāmatamatara’a » rātou i te parau a te Atua. Nāhea rātou i te ’itera’a ē « e parau maita’i [te parau a te Atua] » ? (Alama 32:28).
-
E aha tā Alama e parau atu i te hō’ē ta’ata tei hina’aro ’ia noa’a ’aore rā ’ia ha’apūai i te hō’ē ’itera’a pāpū nō Iesu Mesia ? Nō te tuatāpapa i teie uira’a, e nehenehe e vāhi i te piha ’ei piti pupu. E nehenehe te hō’ē pupu ’ia tai’o i te Alama 32:26–36 nō te hi’o mai e aha tā Alama e parau atu i te hō’ē ta’ata e tāmata nei ’ia noa’a te hō’ē ’itera’a pāpū, ’e e nehenehe te tahi pupu e tai’o i te Alama 32:36–43 nō te hi’o mai e aha tāna e parau i te hō’ē ta’ata tei paruparu te ’itera’a pāpū. ’Ei reira, e nehenehe te hō’ē ta’ata i roto i te pupu tāta’itahi e ti’a ’ei mono nō Alama nō te fa’a’ite mai nāhea ’ia tauturu i te hō’ē ta’ata ’ia noa’a ’aore rā ’ia ha’apūai i te hō’ē ’itera’a pāpū.
Alama 31:13–23 ; 33:2–11 ; 34:17–29
E ti’a ia tātou ’ia ha’amori i te Atua nā roto i te pure, i te mau taime ato’a ’e i te mau vāhi ato’a.
-
E nehenehe tā ’oe e tauturu i te piha ’ia fa’aau i tā Alama ’e Amuleka mau ha’api’ira’a nō ni’a i te pure ’e te ha’amorira’a i te mau mana’o hape o te mau ’āti Zorama nō te reira. E nehenehe te mau pīahi e hi’o i te Alama 31:13–23 ’e e tāpura atu ai i ni’a i te tāpura ’ere’ere e aha tā te mau ’āti Zorama i ti’aturi nō ni’a i te pure ’e te ha’amorira’a. ’Ei reira e nehenehe ai tā rātou e hi’o i te mau parau mau i roto i te Alama 33:2–11 ’e i te 34:17–29 ’o tē pāto’i nei i teie mau ti’aturira’a. E aha tā teie mau ’īrava e ha’api’i nei ia tātou nō ni’a i te mea e nehenehe e rave nō te ha’amaita’i atu ā i tā tātou mau pure ’e tā tātou ha’amorira’a ?
-
E nehenehe tā ’oe e fa’aitoito i te tāu’ara’a parau nō ni’a i te pure nā roto i te pāpa’ira’a i te mau parau mai teie ’O vai ? E aha ? Ahea ? I hea ? Nō te aha? ’e Nāhea ? i ni’a i te tāpura ’ere’ere. E nehenehe te mau pīahi e mā’imi i roto i te Alama 33:2–11 ’e te 34:17–29 nō te ’ite mai i te pāhonora’a i teie mau uira’a nō ni’a i te pure. ’Ei hi’ora’a, e nehenehe tā rātou e pāhono i teie mau uira’a mai teie : I hea tātou e nehenehe ai e pure ? E aha tā tātou e nehenehe e pure atu ? E nehenehe ato’a rātou e ’ite mai i te mau pāhonora’a i roto i te mau parau o te hō’ē hīmene nō ni’a i te pure, mai te mau hīmene « ’Ua pure ānei ’oe ? » ’aore rā « Hora pure » (Te mau hīmene, n°72, 73). Nāhea tātou ’ia ha’amaita’i atu ā i tā tātou mau pure ?
Te tusia tāra’ehara a te Fa’aora, e tusia « fāito ’ore [ïa] ’e te mure ’ore ».
-
’Ua fa’a’ohipa ’o Amuleka i te mau parau « fāito ’ore » ’e « mure ’ore » nō te fa’ata’a i te tusia tā Iesu Mesia i rave nō te tara ’ē i tā tātou mau hara. E nehenehe tā ’oe e ani i te mau pīahi ’ia ’imi i te reira mau parau i roto i te Alama 34:9–14 ’ei reira e hi’o atu ai i roto i te fa’atoro parau i te aura’a. Mea nāhea te tusia a te Fa’aora i riro ai ’ei mea fāito ’ore ’e te mure ’ore ? (hi’o Hebera 10:10 ; 2 Nephi 9:21 ; Mosia 3:13). ’Ia au i tei pāpa’ihia i roto i te Alama 34:15–17, e aha tei tītauhia ia tātou ’ia rave nō te fāri’i i te mau ha’amaita’ira’a nō te tusia a te Fa’aora ? E aha te aura’a te parau « te fa’aro’o e tupu ai te tātarahapa » ? (Alama 34:17).
« ’Eiaha ’outou e fa’aroa roa i te mahana o tā ’outou tātarahapa ».
-
E nehenehe te fa’ahi’ora’a mai teie i muri nei e tauturu i te mau pīahi ’ia feruri i te ata’atara’a e fa’aroa roa i tā tātou tātarahapa : e ani ia rātou ’ia feruri ē ’ua fāri’i rātou i te hō’ē tītaura’a manihini e haere i te hō’ē ’ohipa i tītauhia e rave rahi matahiti ha’api’ipi’ira’a ’e te fa’aineinera’a, mai te tata’ura’a Olympique ’aore rā te hō’ē tata’ura’a hīmene (’a rave i te hi’ora’a e ta’a mai te mau pīahi), e tupu rā te reira ’ohipa ananahi. ’Āparau ’e te piha nō te aha e’ita rātou e manuia atu i te haerera’a i terā ’ohipa noa atu ā e fa’aineine rātou ē pō noa atu. E aha te tū’atira’a o teie hi’ora’a ’e te mea tā Amuleka i fa’ahiti i roto i te Alama 34:32–35 ? Nō te aha e mea ata’ata ’ia fa’ataime i tā tātou mau tauto’ora’a e tātarahapa ’e e taui ? E ani i te mau pīahi ’ia feruri i te mea tā rātou e nehenehe e rave nō te « fa’aineine nō te tau mure ’ore ra » (’īrava 33) ’e ’ia fa’anaho mai nō te rave i te reira ma te ’ore e fa’ataime fa’ahou.
Fa’aitoito i te ha’api’ira’a mai i te fare
’Ei fa’aurura’a i te mau pīahi ’ia tai’o i te Alama 36–38 i teie hepetoma e haere mai nei, e nehenehe ’oe e tūra’i i te parau ē, « ’oto ihora Alama nō te parau-ti’a ’ore a tōna ra mau ta’ata », nō reira ’ua ha’aputuputu ’oia i tāna mau tamaiti ’e ’ua ha’api’i ho’i ia rātou « i te mau mea o te parau-ti’a ra » (Alama 35:15–16). Tē fa’ati’a nei te mau pene e rave rahi i muri mai i te mea tei fa’auruhia Alama e ha’api’i i tāna mau tamaiti.
Te tahi atu mau mātēria tauturu
E aha te aura’a te vai-ha’eha’a-ra’a ?
« Te vai-ha’eha’a-ra’a ’o te ’itera’a ïa ma te māuruuru i tō tātou turu’ira’a i ni’a i te Fatu—te ’itera’a ē tē hina’aro tāmau nei ’outou i tāna ra tauturu… E ’ere i te tāpa’o nō te paruparu, te mamahu, ’e ’aore rā te ri’ari’a, e tāpa’o rā ē tē ’ite nei ’outou tei hea tō ’outou pūai mau i te vaira’a » (Mau Māite i te Fa’aro’o [2004], 88).
’Ua fa’ata’a mai Elder Quentin L. Cook ē : « ’Ia feruri hōhonu anaʼe tātou i te Atua te Metua ʼe i te Mesia te Tamaiti, ’o vai rāua, ʼe te mea tā rāua i rave nō tātou, e fa’a’ī te reira ia tātou i te faʼatura, te māere, te māuruuru ʼe te ha’ehaʼa. Tei roto atoʼa i te ha’ehaʼa te manaʼo māuruuru nō tō tātou mau haʼamaitaʼiraʼa e rave rahi ʼe nō te tautururaʼa a te raʼi. E ʼere te ha’ehaʼa i te tahi ʼohipa rahi o te ʼite-mata-hia ʼaore rā te upoʼotiʼaraʼa i niʼa i te tahi fifi rahi. E tāpaʼo rā nō te pūai pae vārua. ʼO te fāriʼiraʼa ïa i te haʼapāpūraʼa hau ē e nehenehe tā tātou i te mau mahana ʼe i te mau hora atoʼa ’ia tiʼaturi i te Fatu, ’ia tavini iāna, ʼe ’ia faʼatupu i tāna mau ʼōpuaraʼa » (« Te mau mahana mure ’ore », Ensign ’aore rā Liahona, Nov. 2017, 52, 54).
Mau pāpaʼiraʼa moʼa nō niʼa i te fa’aro’o.
Ha’amaita’ira’a i tā tātou ha’api’ira’a
Fa’atumu i ni’a i te mau pāpa’ira’a mo’a. Noa atu ā ’ua rahi te mau mātēria tauturu e nehenehe e ha’amaita’i i te hō’ē tāu’ara’a parau, ’a ha’amana’o ē ’o te mau pāpa’ira’a mo’a te puna nō te ha’api’ira’a tumu. E tauturu i te mau melo ’ia ’ite mai i te mau parau mau i roto i te mau pāpa’ira’a mo’a. (Hi’o Ha’api’ira’a mai tā te Fa’aora, 21.)