tē huna ra te mau Aniti-Nephi-Lehi i tā rātou mau mauiha’a tama’i

Aniti-Nephi-Lehi e huna i tā rātou mau mauiha’a tama’i, nā Jody Livingston

29 nō Tiunu–5 nō Tiurai

Alama 23–29

« ’Aita roa atura rātou i tāiva »

’A tai’o ai ’oe i te Alama 23–29, e ha’amana’o ē, nō te tauturu ia vetahi ’ē ’ia ha’api’i i te mau parau mau i roto i teie mau pene, tītauhia ’ia tupu te tahi ’ohipa ta’a ’ē nō ’oe e teie mau parau mau.

Pāpa’i i te mau mana’o e tae mai

ītona fa’a’itera’a

Tītau i te mana’o

E ti’a ia ’oe ’ia ani i te mau pīahi ’ia pāpa’i i ni’a i te tāpura ’ere’ere i te tahi mau ’īrava ta’a ’ē tā rātou i ’ite i roto i tā rātou tuatāpapara’a ta’ata hō’ē ’aore rā tuatāpapara’a ’utuāfare. Vaiiho ma’a minuti nō te ani i te tahi mau ta’ata ’ia paraparau mai i te hō’ē parau mau tā rātou i ’apo mai i roto i te mau ’īrava tā rātou i pāpa’i.

ītona ha’api’ira’a

Ha’api’i i te ha’api’ira’a tumu

Alama 23–25 ; 27

Nā roto i tō tātou fa’afāriura’a ia Iesu Mesia ’e i tāna ’evanelia tō’u orara’a i taui ai.

• ’Ei pipi nā Iesu Mesia, tē tūtava nei tātou nō te fa’ahōhonu atu ā i tō tātou fa’afāriura’a. E ti’a paha i te ’ā’amu o te mau Aniti-Nephi-Lehi i te tauturu atu i te feiā tā ’oe e ha’api’i ra, i roto i tā rātou mau tauto’ora’a nō te rave i te reira. E nehenehe e ha’amata nā roto i te pāpa’ira’a i ni’a i te tāpura ’ere’ere i te hō’ē uira’a mai teie nei : E aha te aura’a te fa’afāriura’a ? ’aore rā E aha te mau tauira’a e tupu i roto i te orara’a o te mau ta’ata ’ia fa’afāriuhia rātou ? E nehenehe te mau pīahi e ’imi i te mau pāhonora’a i roto i teie mau ’īrava : Alama 23:6–7, 17–18 ; 24:17–19 ; 25:15–16 ; ’e 27:26–30. E ti’a paha ia rātou ’ia fa’a’ite mai i tā rātou i ’apo mai i roto i te tahi atu mau ’īrava tā rātou i tai’o i roto i te Alama 23–25 ’e 27. E ti’a ato’a i te mau pīahi ’ia ’ite mai i te tahi pāhonora’a maita’i i teie mau uira’a i roto i te a’ora’a a Elder David A. Bednar « Fa’afāriuhia i te Fatu » (Ensign ’aore rā Liahona, Nov. 2012, 106–9 ; hi’o ato’a « Te tahi atu mau mātēria tauturu »). E aha te mau tauira’a tā te mau Aniti-Nephi-Lehi i rave i muri iho i tō rātou fa’afāriura’a ? E aha te fa’aurura’a e noa’a mai nō tō rātou hi’ora’a nō te fa’ahōhonu atu ā i tō tātou fa’afāriura’a ia Iesu Mesia ’e i tāna ’evanelia ?

• E aha te fa’aurura’a tā ’oe e nehenehe e hōro’a i te mau pīahi nō te fa’aru’e i te mau peu hape ato’a, ’ia huna rātou i tā rātou mau mauiha’a tama’i i roto i te repo, mai tā te mau Aniti-Nephi-Lehi i rave? E nehenehe e hi’o ’āmui i te Alama 23:5–7. E aha te tahi mau peu maita’i tā te ’evanelia e tauturu nei ia tātou ’ia fa’atupu ? E aha te nehenehe e fa’ahōho’a i te mau « mauiha’a tama’i » a te mau ’āti Lamana i teie mahana ? Nāhea e ti’a ai ia tātou ’ia « huna roa [i te reira] i roto roa i te repo »? (Alama 24:17). E ani i te mau pīahi ’ia feruri e aha te tahi mau peu hape ’aore rā mau mauiha’a tama’i e tītauhia ia rātou ’ia fa’aru’e i muri ia rātou ’ia ti’a ia rātou ’ia ora hope a’e i te ’evanelia

Alama 24:7–16

Nā roto i te tāra’ehara a Iesu Mesia, e ti’a i tā tātou mau hara ’ia fa’a’orehia i te taime e tātarahapa tātou.

• Mai te peu e tae mai te mana’o e paraparau i roto i te piha ha’api’ira’a nō ni’a i te tātarahapa, e hi’ora’a maita’i roa ïa te fa’ati’ara’a nō ni’a i te mau Aniti-Nephi-Lehi i roto i te Alama 24. E nehenehe e hōro’a i te pīahi tāta’itahi te hō’ē ’īrava o te Alama 24:7–16 ’ia tai’o ma te ani ia rātou ’ia pāpa’i i ni’a i te tāpura ’ere’ere i te hō’ē mea tā rātou i ’apo mai nō ni’a i te tātarahapa i roto i tā rātou ’īrava. I muri iho, e nehenehe ato’a tā rātou e ’imi i te mau ’īrava i muri nei nō te tahi atu ā mau parau nō ni’a i te tātarahapa : Isaia 53:5–6 ; 2 Nephi 2:6–8 ; ’e Mosia 5:2.

Alama 24:13–15 ; 26 ; 29

E fa’atae mai te ’evanelia i te ’oa’oa.

• I roto i te Alama 23–29, ’ua hau i te 24 taime e ’itehia te parau « ’oa’oa », ’ua riro ïa teie mau pene ’ei vāhi maita’i nō te ha’api’i i te huru nō te orara’a i te ’evanelia—’e te fa’a’itera’a ho’i i te reira—e fa’atae mai i te ’oa’oa. E nehenehe e tāpupu i te mau pīahi ma te ani i te pupu tāta’itahi ’ia hi’o i teie mau ’īrava i muri nei nō te ’imira’a i te mau tumu o Amona, te mau tamaiti a Mosia ’e o Alama i ’oa’oa ai : Alama 24:13–15 ; 26:12–22 ; ’e 29:1–17. E nehenehe te mau pīahi e pāpa’i i te mea tā rātou i ’ite mai i ni’a i te tāpura ’ere’ere. E aha tā tātou e ha’api’i nei i roto i teie mau ’īrava nō ni’a i te huru te ’evanelia e fa’atae mai nei i te ’oa’oa ?

• ’Ua ha’api’i te peresideni Russell M. Nelson ē : « Tei ni’a te fa’atumura’a o tō tātou orara’a i te fa’anahora’a nō te fa’aorara’a a te Atua ’e ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ra ’e nōna te ’oa’oa e tae mai ai. ’O ’oia te tumu o te ’oa’oa ato’a » (« Te ’oa’oa ’e te oraora pae vārua », Ensign ’aore rā Liahona, Novema 2016, 82). Penei a’e e nehenehe te mau pīahi e fa’a’ite mai i te tahi mau ’ohipa i tupu i ni’a ia rātou tei tauturu ia rātou ’ia māramarama i te parau mau o te mau parau a te peresideni Nelson.

• ’Ua ’ite mai Alama ’e Amona i te ’oa’oa rahi i roto i te fa’a’itera’a i te ’evanelia. E nehenehe tā ’oe e ani i te mau pīahi ’ia hi’o mai i te mau ’īrava i roto i te Alama 26 ’e te 29 ’o te nehenehe e fa’auru i te hō’ē taure’are’a ’ia haere e tāvini i te hō’ē misiōni—’aore rā e fa’auru i te hō’ē ta’ata ’ia fa’a’ite i te ’evanelia i te tahi atu mau ta’ata. E nehenehe e hōro’a ma’a minuti i te mau pīahi nō te fa’anaho mai i te hō’ē mea tā rātou e nehenehe e rave nō te fa’a’ite atu i te ’evanelia. E ani ia rātou ’ia rave i tā rātou fa’anahora’a, ’e i roto i te hō’ē piha ha’api’ira’a i muri nei, e nehenehe tā ’oe e fa’aitoito ia rātou ’ia parau mai nō ni’a i tā rātou mau tauto’ora’a.

• I te tauturura’a Alama i te ta’ata ’ia tātarahapa, ’ua ha’amana’o ’oia i te maita’i o te Atua (hi’o Alama 29:10–13). Penei a’e e nehenehe tā ’oe e hōro’a ma’a taime i te mau pīahi nō te tuatāpapa i teie mau ’īrava nō te tāpura i te mea tā Alama i ha’amana’o. E aha te mea e fa’aha’amana’o nei ia tātou i te maita’i o te Atua ? E aha te mau mea i roto i tō tātou orara’a tei fa’a’ite i te maita’i o te Atua ?

Alama 26–27

E ti’a ia tātou ’ia riro ’ei mauiha’a i roto i te rima o te Atua.

• Nō te tauturu i te mau pīahi e fāfā e aha te aura’a nō te rirora’a « ’ei mauiha’a i roto i te rima o te Atua » (Alama 26:3), e nehenehe tā ’oe e fa’a’ite i te tahi mau mauiha’a. E nehenehe ato’a e ani i te mau pīahi ’ia ’āfa’i mai i te tahi mau mauiha’a tā rātou e fa’a’ohipa nei. E aha te faufa’a o teie mau mauiha’a ? Mai te aha tātou e riro ai ’ei mau mauiha’a i roto i te ’ohipa a te Atua ? E nehenehe e ani i te mau pīahi ’ia hi’o i te huru o Amona ’e tōna mau hoa misiōnare tei riro na ’ei mau mauiha’a i roto i te rima o te Atua (hi’o, ’ei hi’ora’a, Alama 26:1–5, 11–12). E aha tā tātou e ’apo mai nei mai roto mai i Te Parau Ha’api’ira’a ’e te mau Parau Fafau 4 nō ni’a i te rirora’a ’ei mau mauiha’a i roto i tōna rima ? E nehenehe ato’a te mau pīahi e fa’a’ite mai i te mau taime ’ua ’ite rātou i te ’oa’oa nō te rirora’a ’ei mauiha’a i roto i te rima o te Atua.

ītona ’āpora’a ha’api’ira’a

Fa’aitoito i te ha’api’ira’a mai i te fare

E rave rahi mana’o hape e arata’i ’ē nei i te mau tamari’i a te Atua i teie mahana ’o tei ’ite-ato’a-hia i te tau o Alama. E parau i te mau pīahi ē, i roto i te Alama 30–31 e riro rātou i te hi’o mai nāhea Alama ’e te tahi mau pu’era’a i pāhono ai i teie mau ha’api’ira’a hape.

ītona mātēria tauturu

Te tahi atu mau mātēria tauturu

Fa’afāriuhia i te Fatu.

’Ua ha’api’i Elder David A. Bednar :

« E tītau te ’evanelia a Iesu Mesia i te hō’ē tauira’a hōhonu ’e te mure ’ore o tō tātou huru mau, ’e e tupu te reira tauira’a nā roto i te tāra’ehara a te Fa’aora. Nā te fa’afāriura’a mau e fa’atupu i te hō’ē tauira’a i roto i te mau ti’aturira’a, te mau hina’aro ’e te orara’a o te hō’ē ta’ata nō te fāri’i ’e nō te ha’apa’o i te hina’aro o te Atua (hi’o Te mau ’Ohipa 3:19 ; 3 Nephi 9:20), ’e e fa’atupu ato’a i te hō’ē fafaura’a pāpū ’ia riro ’ei pipi nā te Mesia ».

’Ua fa’ahiti Elder Bednar i te Alama 23:6–8, ’ei reira ’ua tātara mai ’oia i te aura’a :

« E piti tuha’a faufa’a teie i fa’a’itehia i roto i teie nau ’īrava : (1) te ’ite i te parau mau, ’o tē nehenehe e fa’aauhia i te hō’ē ’itera’a pāpū, ’e te (2) fa’afāriuhia i te Fatu ra, tā’u e hāro’aro’a nei ’ei fa’afāriura’a i te Fa’aora ra ’e i tāna ’evanelia. Nō reira, nā teie ’āpitira’a pūai o te ’itera’a pāpū ’e te fa’afāriura’a i te Fatu ra e fa’atupu i te vai-pāpū-ra’a ’e te ’āueue ’ore, ’e e hōro’a ato’a mai i te pārurura’a i te pae vārua.

’Aita rātou e hi’a fa’ahou ’e ’aita ato’a i rave fa’ahou i « tā rātou mauiha’a tama’i, ’aita rātou i tama’i fa’ahou i te Atua ». Nō te tu’u i te hiti i « te mau mauiha’a tama’i » iti, mai te ’ā’au pipiri, te te’ote’o ’e te ha’apa’o ’ore, e tītau te reira i te hō’ē mea hau atu i te ti’aturira’a ’e te ’itera’a noa. Hou ’a ti’a ai ia tātou ’ia fa’aru’e i tā tātou mau mauiha’a tama’i, e tītauhia ia tātou ’ia roa’a te ti’aturira’a pāpū, te ha’eha’a, te tātarahapa, ’e te auraro. Te tāpe’a noa ānei ’outou ’e ’o vau nei i te mau mauiha’a tama’i ’o tē tāpe’a nei ia tātou ’eiaha ’ia fa’afāriuhia i te Fatu ? Mai te mea ē, ’oia, ’ua tītauhia ïa ia tātou ’ia tātarahapa i teienei.

« ’Ia ’ite mai tātou ē, ’aita te mau ’āti Lamana i fa’afāriuhia e te mau misiōnare tei ha’api’i ia rātou, ’e ’aore rā, i te mau fa’anahora’a maita’i a te ’Ēkālesia. ’Aita rātou i fa’afāriuhia i te huru o tō rātou mau ti’a fa’atere, ’e ’aore rā, i te fa’ahereherera’a i te hīro’a tumu, ’e ’aore rā, i te mau peu a tō rātou huimetua. ’Ua fa’afāriuhia rātou i te Fatu ra—’Oia te Fa’aora ’e i tōna ti’ara’a hanahana ’e i tāna ha’api’ira’a—’e ’aita rātou i hi’a fa’ahou » (« Fa’afāriuhia i te Fatu », Ensign ’aore rā Liahona, Nov. 2012, 107–9).

Ha’amaita’ira’a i tā tātou ha’api’ira’a

E tītau i te arata’ira’a mai roto mai i tō ’oe feiā fa’atere. « Tē hina’aro nei tō ’outou feiā fa’atere autahu’ara’a ’e pupu tauturu e tauturu ’ia ’outou ’ia manuia. ’A ani i tō rātou mana’o tauturu ’a tūtava ai ’outou i te ha’amaita’i atu ā ’ei ’orometua ha’api’i ’e ’a feruri ai ’outou i te mau hina’aro o te feiā tā ’outou e ha’api’i ra » (Ha’api’ira’a mai tā te Fa’aora, 5).