Moroni ’e te tāpa’o nō te ti’amāra’a

Nō te ha’amaita’ira’a o te ti’amāra’a, nā Scott M. Snow

3–9 nō ’Ātete

Alama 43–52

« Mau pāpū i te fa’aro’o i te Mesia ra »

Ta’a ’ē noa atu te hi’ora’a i te mau mana’o ’ohipara’a i’ō nei, ’a tītau i tā ’oe iho fa’aurura’a ’a tuatāpapa ai ’oe nā roto i te pure i te Alama 43–52 ’e ’a feruri ai nō ni’a i te rāve’a nō te tauturu i te mau pīahi ’ia ’ite mai i te ha’api’ira’a tumu e ha’api’ihia ra.

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te tītau manihini i te mau pīahi ’ia fa’a’ite mai i tā rātou i ha’api’i mai i roto i te Alama 43–52, e nehenehe tā ’oe e ui ia rātou nāhea rātou i te pāhono i te hō’ē ta’ata e parau mai ē : « ’Aita roa atu vau e ’ite ra i te aura’a o te mau tama’i i roto i te Buka a Moromona nō tō’u orara’a ».

ītona ha’api’ira’a

Ha’api’i i te ha’api’ira’a tumu

Alama 43–52

Tē ha’api’i nei te mau ’arora’a i roto i te Buka a Moromona nō ni’a i tā tātou mau ’arora’a i mua i te ’ino.

• I roto i tā rātou tuatāpapara’a ta’ata hō’ē ’e te ’utuāfare i teie hepetoma, ’ua feruri paha te mau pīahi ’aore rā ’ua pāpa’ipa’i paha i tō rātou mau mana’o nō ni’a i te huru te ’āti Nephi i te pāruru-manuia-ra’a ia rātou i mua i te ’āti Lamana ’e te huru ato’a te ’āti Lamana i te ’arora’a i te ’āti Nephi. Mai te peu ’ua rave te mau pīahi i te reira i te fare, e ani ia rātou ’ia fa’a’ite mai i tā rātou i ’ite mai. ’Aore rā, e nehenehe e hōro’a i te mau pīahi i te tahi taime nō te ’ite mai i teie mau mana’o i roto i te piha ha’api’ira’a ma te fa’a’ohipa i te mau pāpa’ira’a mo’a mai terā e ’itehia ra i roto i te arata’i ha’api’ira’a nō teie hepetoma o te Mai, pe’e mai—nō te ta’ata hō’ē ’e te ’utuāfare. ’Ia fa’a’ite mai te mau pīahi i te mea tā rātou i ’ite mai, ’a fa’aitoito ia rātou ’ia ’āparau nāhea tātou e nehenehe ai e pe’e i te hi’ora’a o te ’āti Nephi i te pārurura’a ia tātou iho i te mau ’ino ’e nāhea ato’a e ti’a ai ia tātou ’ia hāro’aro’a i te mau ’arora’a pae vārua a Sātane i ni’a ia tātou.

Alama 46:11–22

’Ia itoito ana’e tātou i te pārurura’a i tō tātou fa’aro’o, e ti’a ïa ia tātou ’ia fa’auru ia vetahi ’ē ’ia vai ha’apa’o maita’i noa.

• Nāhea ’oe e nehenehe ai e tauturu i te mau pīahi ’ia pe’e i te hi’ora’a o Moroni i te pāruru-itoito-ra’a i tō rātou fa’aro’o i te ’evanelia a Iesu Mesia tei fa’aho’ihia mai ? E nehenehe te mau pīahi e tai’o i te Alama 46:11–22 ’e e hi’o mai i te mea tā Moroni i rave ’e te mea tāna i ha’api’i ’o tei fa’auru i tōna mau ta’ata ’ia ha’apa’o maita’i atu ā. E nehenehe e pāpa’i i te reira i ni’a i te tāpura ’ere’ere i raro a’e i te upo’o parau Te hi’ora’a o Moroni. I muri iho e nehenehe e ani i te mau pīahi ’ia feruri i te mau ’ohipa a Moroni ’e ’ia tu’u mai i te mau mana’o e aha tā tātou e nehenehe e rave i teie mahana nō te pāruru i tō tātou mau ti’aturira’a. E hehenehe e pāpa’i i tō rātou mau mana’o i raro a’e i te upo’o parau Pāruru ma te itoito i te ’evanelia i teie mahana. E aha te mau parau mau ’e te mau parau faufa’a tā tō tātou peropheta i ha’api’i a’enei tei tītauhia ia tātou ’ia ha’api’i atu ’e ’ia pāruru ?

• Nāhea ’oe ’ia tauturu i te mau pīahi ’ia fa’a’ohipa i te mea tā Moroni i rave ’e te tāpa’o nō te tiāmara’a i roto i tō rātou iho orara’a ? E ani ia rātou ’ia tai’o i te Alama 46:11–22 ’e ’ia hi’o mai i te mau parau mau tā Moroni i ha’api’i ’e ’o tāna i ani i tōna mau ta’ata ’ia turu. E aha te mau parau mau ’e te mau parau faufa’a tā tō tātou mau feiā fa’atere i tūra’i i tō tātou nei ’anotau ? (E nehenehe e hi’o vetahi o te reira i roto i te Nō te Pūai ’o te Feiā ’Āpī, te « Te ’utuāfare : E Poro’i i tō te Ao nei », ’aore rā i roto i te mau a’ora’a o te ’āmuira’a rahi i ma’iri a’enei.) E aha te tahi mau fifi tō tātou nō te pārurura’a i tō tātou mau ti’aturira’a i roto i te ao i teie mahana ? E aha tā tātou e nehenehe e ’apo mai i roto i te hi’ora’a o Moroni ? Hōro’a i te mau pīahi i te taime nō te hāmani i tā rātou iho tāpa’o nō te tiāmara’a ’o te fa’aha’amana’o ia rātou ’ia fa’aitoito i te ora ’e i te pāruru i tō rātou ti’aturira’a.

  Tē ’aro ra te ’āti Nephi i te ’āti Lamana

  Minerva Teichert (1888–1976), Tē pārurura’a i te hō’ē ’oire ’āti Nephi, 1935, pēni hinu, 36 x 48 initi. Brigham Young University Museum of Art

Alama 47

Tē rāmā ’e tē fa’ahema itiiti nei Sātane ia tātou.

• E faufa’a tā te piha ha’api’ira’a e ’apo mai i te tuatāpapara’a i te Alama 47, ’o tē fa’a’ite nei nāhea te ha’avarera’a a Amalikia e fa’ahōho’a nei i te mea tā Sātane e rave nei nō te fa’ahema ia tātou. E nehenehe e ha’amata nā roto i te anira’a i te hō’ē ta’ata ’ia ha’apoto mai i te fa’ati’ara’a e ’itehia i roto i te Alama 47. ’Ei fa’atupura’a i te ’ana’anatae, e nehenehe e ani e piti pīahi ’ia feruri ē, ’o Amalikia ’e ’o Lehoniti rāua ’e ’a fa’ati’a atu ai i te ’ā’amu. E aha te mea tā Amalikia i rave e fa’aha’amana’o nei ia tātou i te mau mea tā Sātane e rave nei nō te rāmā ’e nō te fa’ahema ia tātou ? Fa’aitoito i te mau pīahi ’ia fa’atoro i te mau ’īrava ta’a ’ē ’a ’āparau ai rātou i teie uira’a. Tē vai ra i roto i « Te tahi atu mau mātēria tauturu » i te hō’ē fa’ahou hi’ora’a nō ni’a e nāhea Sātane i te fa’ahema ia tātou. E aha te parau a’o tā tātou e nehenehe e hōro’a i te tahi ’e te tahi nō te tauturu ia tātou ’ia vai ara e nāhea Sātane e rāmā ai ia tātou i teie mahana ? E aha tā tātou e nehenehe e rave nō te pāruru ia tātou iho ?

Alama 48:7–17

’A tūtava ai tātou ’ia vai ha’apa’o maita’i noa mai ia Moroni, e riro rahi atu ā tātou mai te Fa’aora te huru.

• E riro te hō’ē tāu’ara’a parau nō ni’a i te huru o Moroni e fa’auru i te mau pīahi ’ia tūtava ’ia pe’e i tōna hi’ora’a. E nehenehe ’oe e ha’amata nā roto i te fa’a’itera’a i te hō’ē hōho’a nō Moroni, mai terā e ’itehia i roto i te arata’i ha’api’ira’a nō teie hepetoma nō te Mai, pe’e mai—nō te ta’ata hō’ē ’e te ’utuāfare. I muri iho, e ani i te mau pīahi ’ia tuatāpapa i te Alama 44:3–4 ’e te 48:7–13 ’e e pāpa’i i ni’a i te tāpura ’ere’ere i te mau ta’o ’e te mau parau e fa’a’ite nei i te huru o Moroni. ’Ei reira e nehenehe ai e tai’o ’āmui i te Alama 48:17 ’e e tāu’aparau nāhea te huru o Moroni, mai terā i pāpa’ihia i ni’a i te tāpura ’ere’ere, i fa’ati’a iāna ’ia upo’oti’a i ni’a i te mana o Sātane ’e ’ia riro mai ia Iesu Mesia te huru. Nāhea e ti’a ai ia tātou ’ia riro rahi atu ā mai ia Moroni te huru ?

Alama 48:7–9 ; 49:1–9 ; 50:1–6

E ti’a ia tātou ’ia ha’apūai ia tātou iho ’e i tō tātou ’utuāfare i mua i te ’enemi.

• E mea maita’i paha nō tā ’oe mau pīahi ’ia fa’aro’o i te tahi ’e te tahi ’ia parau mai nāhea e ti’a ia rātou ’ia pāruru ia rātou iho ’e i tō rātou ’utuāfare i mua i te mau fa’ahemara’a ’e te rāma a Sātane. Nō te fa’atupu i taua tāu’ara’a parau ra, e nehenehe e tai’o ’āmui i te Alama 48:7–9 ; 49:1–9 ; ’e te 50:1–6. ’A feruri ai tātou i te tītaura’a nō te pārurura’a pae vārua i mua i te hara, e aha tā tātou e nehenehe e ’apo mai nā roto mai i te mau tauto’ora’a a te ’āti Nephi nō te pāruru ia rātou ? Nāhea tātou ’ia patu i te mau pāruru pae vārua nō te pāruru ia tātou iho ’e i tō tātou ’utuāfare i mua i te mana o te hara ’e te ’ino ? E fa’aitoito i te mau pīahi ’ia fa’a’ite mai i te mau mea i manuia nō rātou. Nō te aha e mea faufa’a ’eiaha e « fa’aea i te fa’aineine »? (Alama 50:1).

ītona ’āpora’a ha’api’ira’a

Fa’aitoito i te ha’api’ira’a mai i te fare

Hō’ē rāve’a nō te fa’aitoito i te mau pīahi ’ia tai’o i te Alama 53–63, ’o te paraura’a ïa ia rātou ē, e nehenehe te fa’ati’ara’a i roto i teie mau pene e fa’auru ia rātou ’e i tō rātou ’utuāfare ’ia ha’apa’o atu ā i te parau ’e ’ia fa’atupu i te fa’aro’o pūai a’e.

ītona mātēria

Te tahi atu mau mātēria tauturu

Te mau fa’ahope’ara’a nō te fatira’a i mua i te mau fa’ahemara’a na’ina’i.

Nō te ha’api’i ē « e ō mai te hara rahi i roto i tō tātou orara’a mai te mea ē, e fati tātou nā mua i raro a’e i te mau fa’ahemara’a na’ina’i », ’ua fa’ati’a mai te peresideni Spencer W. Kimball i teie fabula :

« Tē rātere ra [te hō’ē kamela e tōna fatu] nā roto i te mau pu’u one o te medebara, ’e ’ua tupu mai ra te hō’ē vero mata’i one. Fa’ati’a ’oi’oi a’era taua ta’ata ra i tōna fare ’ie, ’e tomo atura i roto, ma te tāpiri i te mau ’ūputa ato’a nō te pāruru iāna i te hu’a one. Tei rāpae te kamela i te fa’aeara’a, ’e nō te pūai o te vero mata’i one i ni’a i tōna tino ’e i roto i tōna mata ’e tōna ’āpo’o ihu, e’ita tāna e nehenehe fa’ahou e fa’a’oroma’i, nō reira, ani atura ’ia tomo ato’a ’oia i roto i te fare ’ie.

« ’O vau ana’e tē ō i roto nei », te parau ïa a te ta’ata rātere.

Ani mai nei te kamela ē : ‘E nehenehe ānei tā’u e tu’u noa atu i tō’u noa ihu i roto ’ia nehenehe iā’u ’ia huti i te mata’i one ’ore ?’

« ‘Nā reira, e nehenehe paha tā ’oe ’ia nā reira’, te pāhonora’a ïa a te ta’ata rātere, ’e ’ua ’īriti a’era ’oia ma’a vāhi iti o te ’ūputa, ’e ’ua tomo mai ra te ihu roa o te kamela i roto. ’Ua au roa te kamela i teienei ! Terā rā, ’aita i maoro i muri iho, ’ua fiu roa te kamela i te putaputa one i ni’a i tōna mata ’e te tari’a…

« ‘E au te mata’i one mai te faira i ni’a i tō’u ’āfi’i. E nehenehe ānei tā’u e tu’u atu i tō’u noa ’āfi’i i roto ?’

« ’Ua fa’ati’a fa’ahou te rātere ma te parau ē, e’ita vau e fifi, i te mea ē, tei te pae i ni’a o te fare ’ie te vaira’a te ’āfi’i o te kamela, ’e ’aita ho’i au e fa’a’ohipa i te reira vāhi. Nō reira, ’ua tu’u mai ra te kamela i tōna ’āfi’i i roto, ’e ’ua ’oa’oa fa’ahou te ’ānimara nei—terā rā, nō te tahi noa ma’a taime iti.

« ‘Te muara’a noa o tō’u tino’, te anira’a ïa a te kamela, ’e ’ua fa’ati’a fa’ahou te ta’ata rātere, e ’aita i maoro, tei roto mai nei te muara’a o te pa’ufifi ’e nā ’āvae i te fare ’ie. ’E i te pae hope’a, nā roto noa i teie huru ravera tāparu ’e te fa’ati’ara’a, ’ua ō roa mai te muara’a, te murira’a ’e te tā’āto’ara’a o te tino i roto i te fare ’ie. Terā rā, i teienei, e mea na’ina’i roa ïa te fare ’ie nō rāua to’opiti, ’e ’ua tu’e mai ra te kamela i te ta’ata rātere i rāpae i roto i te mata’i ’e te vero »(Te Mau Ha’api’ira’a a te Mau Peresideni o te ’Ēkālesia : Spencer W. Kimball [2006], 129–30).

Ha’amaita’ira’a i tā tātou ha’api’ira’a

E mea fa’auruhia tō ’outou pī’ira’a. « Tō ’outou pi’ira’a ’ia ha’api’i, no ’ō mai ïa i te Fatu… ’Ua fa’ata’ahia ’outou i raro a’e i te arata’ira’a a te feiā tei mau i te mau tāviri autahu’ara’a ; nō reira, tei ia ’outou ra te ti’ara’a ’ia fāri’i i te heheura’a tei tītauhia nō ’outou ’ia manuia. Nō ’outou teie mau ha’amaita’ira’a ’a ’imi ai ’outou i te reira, ’a vai itoito noa ai, ’e ’a tūtava ai ’ia vai ti’amā noa » (Ha’api’ira’a mai tā te Fa’aora, 5).