« 3–9 nō ’Ātete. Alama 43–52 : ‘Mau pāpū i te fa’aro’o i te Mesia ra’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 3–9 nō ’Ātete. Alama 43–52 », Mai, pe’e mai—nō te ta’ata hō’ē ’e te ’utuāfare : 2020
Nō te ha’amaita’ira’a o te ti’amā, nā Scott M. Snow
3–9 nō ’Ātete
Alama 43–52
« Mau pāpū i te fa’aro’o i te Mesia ra »
E nehenehe e mana’o ē, ’aita te mau ’ohipa e tupu ra i roto i te Alama 43–52 e huru au i tō ’outou orara’a. Terā rā, mai tei ’itehia i roto i te mau pāpa’ira’a mo’a ato’a, e poro’i tā te Fatu nō ’outou. E ’imi i te reira nā roto i te pure.
Pāpa’i i te mau mana’o e tae mai
’Ia tai’o tātou i te ha’amatara’a o te pene 43 nō Alama i te mau parau ra—« ’E teienei, e ho’i au i te pāpa’a parau o te mau tama’i o te ’āti Nephi ’e te ’āti Lamana »—e uiui iho ā te mana’o ē, nō te aha pa’i Moromona i tu’u mai ai i teie mau ’ā’amu nō ni’a i te tama’i, ’aita ho’i e vāhi i rahi roa i ni’a i te mau ’api (hi’o Te mau parau a Moromona 1:5). Tē vai ato’a nei tā tātou mau tama’i i teie mau mahana hope’a nei, ta’a ’ē noa atu rā te mau perera’a ’e te ’ati o te tama’i, ’ua hau atu te faufa’a o tāna mau parau. Tē fa’aineine ato’a nei tāna mau parau ia tātou nō te tama’i « tei roto tātou i te nu’u faehau » ( Te mau hīmene, n°153), te tama’i tā tātou e ’aro nei i te mahana tāta’itahi i mua i te nu’u o te ’ino. E tama’i pāpū mau teie, ’e te hope’a o te reira tama’i, e fa’ahope’a ato’a ïa i ni’a i tō tātou ora mure ’ore. Mai te mau ’āti Nephi, ’ua fa’aitoitohia tātou « e te hō’ē mea maita’i a’e », ’oia ho’i, « tō tātou ra Atua, ’e tā tātou ha’apa’ora’a, ’e tō tātou ti’amā, ’e tō tātou hau, ’e [tō tātou mau ’utuāfare] ». Tē parau nei Moroni i te reira « te ’ohipa a te feiā keresetiano », te tumu ato’a tātou e ’aro nei i teie mahana (Alama 43:45 ; 46:12, 16).
Mau mana’o nō tā ’oe iho tuatāpapara’a pāpa’ira’a mo’a
Tē ha’api’i nei te mau ’arora’a i roto i te Buka a Moromona nō ni’a i tā’u mau ’arora’a i te ’ino.
’Ia tai’o ’oe nō ni’a i te mau tama’i i roto i te mau ’āti Nephi ’e te mau ’āti Lamana, e mea au a’e ’ia hi’o i te mau tū’atira’a i tā ’oe iho mau ’arora’a pae vārua. ’Ia tai’o ’oe i te Alama 43–52, ’a hi’o i te mea tā te mau ’āti Nephi i rave tei ha’amanuia ia rātou (’aore rā tei ha’amanuia ’ore ia rātou). I muri iho, ’a feruri nāhea i te fa’a’ohipa i te mea tā ’oe i ’apo mai nō te upo’oti’a i tā ’oe mau ’arora’a pae vārua. ’Ia tai’o ’oe i te mau ’īrava i muri nei, ’a pāpa’i i tō ’oe mau mana’o nō ni’a i te huru e ti’a ia ’oe ’ia pe’e i te hi’ora’a o te mau ’āti Nephi :
-
Alama 43:19. ’Ua ineine te mau ’āti Nephi ma te ha’ana tama’i. (E nehenehe tā’u e tūtava ’ia fa’aineine iā’u ma te ha’ana tama’i).
-
Alama 43:23–24. ’Ua tīta’u rātou i te arata’ira’a a te peropheta.
E hi’o ato’a nāhea te mau ’āti Lamana ’e te mau ’orure hau ’āti Nephi i tāmata ai i te ha’apau i te mau ’āti Nephi. E ti’a i teie mau mea e fa’aara ia ’oe i te huru te ’enemi e tāmata ai i te ’aro ia ’oe. ’A rave ai ’oe i tā ’oe tuatāpapara’a, ’a pāpa’i nāhea Sātane e nehenehe ato’a ai e ’aro ia ’oe mai te reira :
-
Alama 43:8. ’Ua ’imi Zerahemana ’ia noa’a te riri o tōna mau ta’ata ’ia noa’a tōna mana i ni’a ia rātou. (’Ia riri au i te tahi atu mau ta’ata, tē noa’a ra tō Sātane mana i ni’a iā’u.)
-
Alama 43:29. ’Ua hina’aro te mau ’āti Lamana e fa’atītī i te mau ’āti Nephi.
Te pārurura’a i te hō’ē ’oire ’āti Nephi, nā Minerva K. Teichert
’Ia tūtava vau i te ha’apa’o maita’i noa mai ia Moroni, e riro rahi atu ā vau mai te Fa’aora te huru.
Tē hia’ai nei ānei ’oe ’ia riro rahi atu ā mai te Fa’aora ’e ’ia iti mai te mana o te ’enemi i roto i tō ’oe orara’a ? Hō’ē rāve’a, ’o te pe’era’a ïa i te parau a’o i roto i te Alama 48:17 nō te riro « mai ia Moroni ra ». E hi’o maita’i i te huru o Moroni ’e tāna mau ’ohipa tei fa’ata’ahia i roto i te Alama 43–52, i roto iho ā rā i te 46:11–28 ’e te 48:7–17. E aha tā ’oe e tāpe’a mai nō ni’a i teie « ta’ata mana » ? Nāhea te huru ’e te mau ’ohipa mai tāna e ha’aparuparu nei i te mana o te diabolo i roto i tō ’oe orara’a ? ’A feruri i te fa’aurura’a e tae mai ’ia rave nō te pe’e i te hi’ora’a o Moroni ’e nō te riro rahi atu ā mai te Fa’aora.
Tē rāmā ’e tē fa’ahema itiiti nei Sātane ia tātou.
’Ua ’ite Sātane ē, ’aita te rahira’a o tātou i hina’aro i te rave i te mau hara rahi ’aore rā e ti’aturi i te mau ha’avarera’a rahi. Nō reira e tu’u mai ’oia i te mau ha’avare ’e te mau fa’ahemara’a patatoa nō te arata’i ia tātou i roto i te tahi mau hara huru na’ina’i—te rahira’a ’ua ti’aturi ’oia ē, e fāri’i tātou. E tāmau noa ’oia i te rave i te reira ē tae roa ’ua hahi ’ē roa tātou i te pāruru o te orara’a parau-ti’a.
E nehenehe e ’ite i te reira hōho’a i roto i te fa’ati’ara’a nō ni’a ia Amalikia tei fa’ahema ia Lehoniti, e ’itehia i roto i te Alama 47. ’A rave ai ’oe i tā ’oe tuatāpapara’a, ’a feruri i te huru Sātane e tāmata ra i te fa’ahema ia ’oe, mai tā Elder Robert D. Hales i parau :
« ’Ua ani ’ū’ana Amalikia te ta’ata ha’avare ia Lehoniti ’ia ‘haere mai i raro’ e fārerei iāna i te pae tumu mou’a. I tō Lehoniti fa’aru’era’a i te tupua’i mou’a, ’ua fa’ata’ero ‘ri’iri’ihia’ ihora ’oia ē pohe atura e haruhia ihora tōna nu’u e Amalikia (hi’o Alama 47). Nā roto i te mārō ’e te parira’a, e fa’ahemahia tātou ’ia fa’aru’e i te fenua teitei. Te fenua teitei, tei reira ïa te māramarama… ’O te fenua pāpū »(« E te itoito o te keretiano : Te ho’o o te aupipira’a », Ensign ’aore rā Liahona, Novema 2008, 74).
Hi’o ato’a 2 Nephi 26:22 ; 28:21–22.
E tae mai te pāruru nā roto i te tāhō’ē.
’Ia hi’ohia te vaira’a o te mau ’ohipa i te ha’amatara’a nō Alama 50, mai te huru ra ē, ’aita e rāve’a tā te mau ’āti Lamana i mua i te mau ’āti Nephi. I te ha’ana tama’i ’e i te mau patura’a ha’apa’ari ’e i te mau tauto’ora’a tāhō’ē o te mau ’āti Nephi, e au ē, ’aita e ta’ata e nehenehe e haru mai ia rātou (hi’o Alama 49:28–30 ’e 50:17–20). ’Aita rā i maoro, e rave rahi ’oire tā te mau ’āti Lamana i haru mai—’e tae noa atu i terā tā Moroni i ha’apa’ari (hi’o Alama 51:26–27). Nāhea pa’i te reira i te tupura’a ? E hi’o i te mau pāhonora’a ’a tai’o ai ’oe i teie mau pene (hi’o ta’a ’ē Alama 51:1–12). ’A feruri e aha te mau fa’aarara’a i roto i teie fa’ati’ara’a nō ’oe ’e nō tō ’oe ’utuāfare.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Alama 45:2–8
E riro paha te tai’o-’āmui-ra’a i teie mau ’īrava i te fa’auru i tō ’outou ’utuāfare ’ia fa’atupu i te mau ’āparaura’a hō’ē hō’ē ’e te mau melo o te ’utuāfare nō ni’a i te ’evanelia, mai tā Alama i rave ia Helamana ra.
Alama 46:12–22
’Ua fa’auru te tāpa’o nō te tiāma i te mau ’āti Nephi ’ia ha’apa’o i te mau fa’auera’a a te Atua ’e ’ia pāruru i tō rātou fa’aro’o. E aha te mea e fa’auru nei ia tātou ’ia nā reira ato’a ? Penei a’e e nehenehe tō ’outou ’utuāfare e hāmani i tāna iho tāpa’o nō te tiāma—e reva ’aore rā e paruai ’e te mau parau ’aore rā te mau hōho’a e fa’aha’amana’o ia ’outou ’ia ha’apa’o i te mau fa’auera’a a te Atua i te mahana tāta’itahi.
Alama 48:7–9 ; 49:1–9 ; 50:1–6
’A tai’o ai tō ’outou ’utuāfare nō ni’a i te mau patura’a ha’apa’arira’a a te mau ’āti Nephi, e nehenehe tā ’outou e paraparau nō ni’a i te huru ’outou e ha’apa’ari ai i tō ’outou ’utuāfare i mua i te ’enemi. E au paha te mau tamari’i e patu i te hō’ē pare ma te tahi pārahira’a ’e mau ’ahu ta’oto, ’aore rā e nehenehe tā rātou e pāpa’i i te hōho’a o tā rātou e mana’o ra, mai te reira te mau patura’a ha’apa’arira’a ’āti Nephi.
Alama 51:1–12
E aha tā teie mau ’īrava e ha’api’i nei nō ni’a i te mea e nehenehe e tupu mai i roto i te ’utuāfare ’ia tupu te mārōra’a ? Nāhea tātou nō te fa’arahi atu ā i te tāhō’ēra’a ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Ui i te mau uira’a ’a rave noa ai i te tuatāpapara’a. ’A tuatāpapa ai ’outou i te mau pāpa’ira’a mo’a, ’a ui ia ’outou iho i te mau uira’a e tauturu ia ’outou ’ia feruri e aha tō ’outou fāito orara’a i te mea tā ’outou e tai’o nei.
Te tāpa’o nō te tiāma, nā Larry Conrad Winborg