te fāra’a Iesu i te mau ’āti Nephi

’O vau te māramarama o te ao nei, nā James Fullmer

14–20 nō Tetepa

3 Nephi 8–11

« ’A ti’a mai i ni’a, ’e ’a ha’afātata mai iā’u »

E nehenehe te hi’o-fa’ahou-ra’a i tā ’oe i pāpa’i i roto i tā ’oe tuatāpapara’a i te 3 Nephi 8–11 e hōro’a mai i te tahi mau mana’o ha’api’ira’a. E nehenehe te mau mea i raro nei e hōro’a mai i te tahi atu ā mau mana’o.

Pāpa’i i te mau mana’o e tae mai

ītona fa’a’itera’a

Tītau i te mana’o

I te tahi taime, e ’ana’anatae a’e te ta’ata ’ia fa’a’ite mai i tō rātou mana’o mai te peu e ui ’oe i te tahi uira’a ta’a ’ē. ’Ei hi’ora’a, e nehenehe e ani i te mau pīahi ’ia fa’a’ite mai i te hō’ē mea i roto i te 3 Nephi 8–11 tei ha’api’i ia rātou nō ni’a i te huru o Iesu Mesia. E tu’u atu i te reira anira’a ma’a mahana nā mua atu, ’ia ineine rātou nō te fa’a’ite mai hou ’a haere mai ai.

ītona ha’api’ira’a

Ha’api’i i te ha’api’ira’a tumu

3 Nephi 8–10

Mai te mea e tātarahapa tātou, e ha’aputu, e pāruru ’e e fa’aora te Fa’aora ia tātou.

• Tē vai nei i roto i teie mau pene te fa’ati’ara’a nō te ha’amoura’a ’e te fa’aanora’a, tē ha’api’i ato’a nei rā te reira i te mau ha’api’ira’a pae vārua ’o tē nehenehe e tauturu ia tātou ’ia ha’afātata a’e ia Iesu Mesia. Penei a’e e nehenehe e vāhi i te piha ha’api’ira’a ’ei toru pupu ’e e ani i te pupu tāta’itahi ’ia ’imi hō’ē pene i roto i te 3 Nephi 8–10, nō te hi’o mai i te mau ta’o ’e te mau pereota e fa’a’ite nei e aha tā te mau ta’ata i ha’api’i mai ’e i ora. I muri iho e nehenehe hō’ē ta’ata o te pupu tāta’itahi e fa’a’ite mai i mua i te piha ha’api’ira’a i te mea tā tō rātou pupu i ’ite mai. Fa’aitoito i te mau pīahi ’ia paraparau nāhea teie mau ha’api’ira’a pae vārua e nehenehe ai e tauturu ia tātou ’ia ha’afātata atu i te Fa’aora.

• Hō’ē poro’i faufa’a rahi i roto i teie mau pene, ’oia ho’i, tē toro nei te Fa’aora i te rima ia tātou ma te here ’e te aroha, i roto ato’a i tō tātou mau taime fifi rahi roa. E nehenehe e ani i te mau pīahi ’ia feruri i te hō’ē ta’ata tā rātou i mātau e fa’aruru nei i te hō’ē taime fifi, ’ei reira e ’imi atu ai i te mau parau a te Fa’aora i roto i te 3 Nephi 9:13–22 ’e te 10:1–10 e nehenehe e tauturu i terā ta’ata. Penei a’e e nehenehe ato’a te mau pīahi e fa’a’ite i te mau ’ohipa i tupu nō rātou i te torora’a te Fa’aora i te rima ia rātou.

3 Nephi 9:19–22

Tē tītau nei te Fatu i « te ’ā’au tātarahapa ’e te vārua marū ».

• Hou te taera’a mai te Fa’aora, ’ua ha’apa’o te feiā ha’apa’o maita’i o te fenua i parauhia ra i te ture a Mose, tei roto ato’a ïa te fa’atusiara’a ’ānimara. Nō te tauturu i te mau pīahi ’ia māramarama maita’i a’e i teie ture, e nehenehe e hi’o poto noa i te Mose 5:5–8. Nō te aha i fa’auehia ai te mau ta’ata o te Atua ’ia fa’atusia i te mau ’ānimara i tahito ra ? E aha te fa’auera’a ’āpī tā te Fa’aora i hōro’a i roto i te 3 Nephi 9:20, ’e nāhea te reira e fa’atoro nei i ni’a iāna ’e tāna tusia ? E nehenehe te mau fa’ahitira’a nō ni’a i te ture nō te tusia i roto i « Te tahi atu mau mātēria tauturu » e tauturu mai.

• Nāhea e nehenehe ai e tauturu i te mau pīahi ’ia māramarama i te aura’a nō te ’ā’au tātarahapa ’e te vārua marū ? Penei a’e e nehenehe e ha’amata ma te pāpa’i i ni’a i te tāpura ’ere’ere i te mau ta’o tātarahapa, marū, ’e fa’atusia. I muri iho e nehenehe e ui i te mau pīahi ’ia pāpa’i i te tahi mau hōho’a e fa’ahōho’a i te aura’a o teie mau ta’o nō rātou ’aore rā e pāpa’i i te mau ta’o ’aore rā te mau parau e ’āpiti i teie nau ta’o. ’A fa’a’ite ai te mau pīahi i tā rātou mau hōho’a, mau ta’o ’e mau parau, e nehenehe tā rātou e paraparau nāhea te reira e au ai i te mea tā te Fa’aora e ani nei ia tātou i roto i te 3 Nephi 9:19–22. E nehenehe ato’a te fa’ahitira’a a Elder D. Todd Christofferson i roto i « Te tahi atu mau mātēria tauturu » e tauturu mai.

3 Nephi 11:1–17

’O Iesu Mesia te māramarama o te ao nei.

• Te mau ’ohipa i tupu i roto i te 3 Nephi 11:1–17, ’o te hō’ē ïa o te mau ’ohipa mo’a roa a’e i tupu i roto i te Buka a Moromona. E nehenehe e vaiiho i te tahi taime i te mau pīahi nō te tai’o māmū noa i teie mau ’īrava. Penei a’e e nehenehe e pāpa’ipa’i ma’a uira’a i ni’a i te tāpura ’ere’ere ’ia feruri rātou ’a tai’o noa ai, te uira’a mai teie : E aha tō ’outou mana’o ’āhani tei rotopū ’outou i terā mau ta’ata ? E aha tā ’outou e tāpe’a mai nō ni’a i te Fa’aora i roto i teie mau ’īrava ? E aha tā ’outou e ’apo mai nā roto mai i te hi’ora’a o Iesu ? ’aore rā E aha te mau ’itera’a tei hōro’a ia ’outou i te ’itera’a pāpū nō Iesu Mesia ’ei Fa’aora nō ’outou ? E nehenehe e vaiiho i te mau pīahi ’ia fa’a’ite mai i tō rātou mau mana’o ’aore rā te mau ’āehuehu e tae mai.

  tē fa’a’ite ra Iesu i te mau puta i roto i tōna nā rima i te mau ’āti Nephi

  Ta’ihō’ē, nā Walter Rane

3 Nephi 11:10–41

’Ua ha’amau Iesu Mesia i tāna ha’api’ira’a tumu ’e tāna ’Ēkālesia.

• Hō’ē ’ohipa au e hi’o, ’o te mau mea mātāmua ïa tā te Fa’aora i mā’iti e parau ’e e rave i te fāra’a ’oia i te fenua nō Bounetifula. Penei a’e e nehenehe te mau pīahi e tāpa’o ’aore rā e pāpa’i i te mau parau mau tā rātou i ’ite mai i roto i te mau parau ’e te mau ’ohipa a te Fa’aora i roto i te 3 Nephi 11:10–41. Ani ia rātou ’ia fa’a’ite mai e aha tā rātou i ’ite mai. E aha tā tātou e ha’api’i nei nō ni’a i te Fa’aora i roto i teie mau ’īrava ? E aha tā tātou e ha’api’i nei nō ni’a i tāna ’Ēkālesia ?

• ’Ei fa’ahopera’a i te tahi ri’i mārōra’a i rotopū i te mau ta’ata nō ni’a i te bāpetizora’a, ’ua heheu mai te Fa’aora i te mau parau mau faufa’a rahi nō ni’a i teie ’ōro’a i roto i te 3 Nephi 11. Nō te tauturu i te mau pīahi ’ia ʼite i teie mau parau mau, e nehenehe e pāpa’i i te mau ’īrava i muri nei i ni’a i te tāpura ’ere’ere : 21–25, 26–27, 33–34. E ani i te mau pīahi tāta’itahi ’ia mā’iti i te hō’ē ’īrava ’aore rā e piti ’e e fa’a’ite mai i te hō’ē parau mau nō ni’a i te bāpetizora’a tā te reira e ha’api’i nei.

ītona ’āpora’a ha’api’ira’a

Fa’aitoito i te ha’api’ira’a mai i te fare

E ’ana’anatae paha te mau pīahi ’ia ’ite ē, ’ua fa’atupu te tere o te Fa’aora i rotopū i te mau ’āti Nephi ’e te mau ’āti Lamana i te tauira’a rahi roa i roto i teie mau ta’ata mārō rahi nā mua a’e ’e ’ua ora mai rātou ma te hau e 200 matahiti (hi’o 4 Nephi 1). E fa’auru paha te reira i te mau pīahi ’ia tuatāpapa i te 3 Nephi 12–16 nō te ’apo mai i tā te Fa’aora i ha’api’i i te mau ta’ata i tupu ai te reira tauira’a rahi roa ’ino.

ītona mātēria tauturu

Te tahi atu mau mātēria tauturu

Te ture nō te tusia.

’Ua fa’ata’a te peresideni M. Russell Ballard nāhea tātou e ora ai i te ture nō te tusia :

« I muri mai i te tusia hope a te Fa’aora, e piti fa’atanora’a tei ravehia i roto i te ravera’a i [te ture nō te tusia]. ’A tahi, ’ua mono te ’ōro’a mo’a i te ’ōro’a nō te fa’atusiara’a ; ’e te piti, ’ua tūra’i teie tauira’a i te rōtahira’a mai te fa’atusiara’a i te ’ānimara a te hō’ē ta’ata i ni’a i terā iho ta’ata. E nehenehe e parau ē, ’ua tauihia te fa’atusiara’a mai te tao’a pūpū i ni’a i te ta’ata pūpū…

« I tītau na te Fatu i tā tātou mau ’ānimara ’e tā tātou mau mā’a huero, i teienei rā, tē hina’aro nei ’oia ’ia ha’apae tātou i te mau mea paieti ’ore ato’a…

« I te taime e upo’oti’a tātou i tō tātou iho mau hina’aro pipiri ’e e tu’u tātou i te Atua i te ti’ara’a mātāmua i roto i tō tātou orara’a ma te fafau atu ’ia tāvini iāna noa atu ā te ho’o, tē ora nei ïa tātou i te ture nō te tusia » (« The Law of Sacrifice », Ensign, ’Ātopa 1998, 10).

’Ua parau Elder Neal A. Maxwell nō te pupu nō te Tino ’Ahuru Ma Piti ’āpōsetolo ē : « ’Aita te tusia mau, tā tatou iho tusia, i riro a’enei i te tu’ura’a i te hō’ē ’ānimara i ni’a i te fata. ’Aita, ’o te ineine rā e tu’u i te ’ānimara i roto ia tātou i ni’a i te fata ’ia pau te reira i te auahi ! »(« Deny Yourselves of All Ungodliness », Ensign, Mē 1995, 68).

Te ’ā’au tātarahapa ’e te vārua marū.

’Ua fa’ata’a mai Elder D. Todd Christofferson e aha te aura’a nō te ’ā’au tātarahapa ’e te vārua marū :

« E nehenehe tā ’outou e pūpū atu i te Fatu te hōro’a o tō ’outou ’ā’au tātarahapa ’e tō ’outou vārua ’oto ’e te ha’apa’o maita’i. ’Oia mau, ’o te hōro’ara’a ia ’outou iho—’o tō ’outou iho huru ’e te ta’ata e riro mai ’outou a muri a’e.

« Tē vai ra ānei te hō’ē mea i roto ia ’outou ’e ’aore rā i roto i tō ’outou nei orara’a tei vi’ivi’i ’aore rā, tei ’ore i tano ? ’Ia vaiiho ana’e ’outou i te reira i te hiti, ’o te hō’ē ïa tao’a nā te Fa’aora. Tē vai ra ānei te ho’ē peu maita’i ’aore rā te viretu e ’ere nei i roto i tō ’outou orara’a ? ’Ia fāri’i ’outou i te reira ’e ’ia fa’ariro ’ei tufa’a nō tō ’outou huru ta’ata, tē hōro’a ra ïa ’outou i te hō’ē tao’a aroha nā te Fatu » (« ’E ’ia fa’afāriuhia mai ’oe ra », Ensign ’aore rā Liahona, Mē 2004, 12).

Ha’amaita’ira’a i tā tātou ha’api’ira’a

’A ’ohipa ’āmui ’e te mau melo nō te ’utuāfare. « Te feiā e mana rahi tō rātou i ni’a i te hō’ē ta’ata—nō te maita’i ’aore rā te ’ino—i te rahira’a ’o te taime ’o te feiā ïa i roto i tōna iho ’utuāfare. Nō te mea ho’i ē ’o te ’utuāfare te pū nō te orara’a ’e te ha’api’ira’a mai i te ’evanelia, e hau atu ïa te manuiara’a o tā ’outou mau tauto’ora’a nō te ha’apūaira’a i te hō’ē melo nō te piha ha’api’ira’a ’ia ha’a ’āmui ana’e ’outou ’e te… mau melo o te ’utuāfare » (Ha’api’ira’a mai tā te Fa’aora,8–9).