Tē tere ra te mau ’āti Iareda nā roto i te medebara

Tē fa’aru’e ra te mau ’āti Iareda i Babela, nā Albin Veselka

9–15 nō Novema

Etera 1–5

« Ha’aparari i te pāruru o te fa’aro’o ’ore »

E aha te mau parau mau tā ’oe i ha’api’i mai i roto i tā ’oe iho tuatāpapara’a i te Etera 1–5 ’o tā ’oe e nehenehe e fa’a’ite i te feiā tā ’oe e ha’api’i ra ? E aha te mau rāve’a tā ’oe e nehenehe e hōro’a ia rātou nō te fa’a’ite i te mea tā rātou i ’apo mai ?

Pāpa’i i te mau mana’o e tae mai

ītona fa’a’itera’a

Tītau i te mana’o

E hi’o na i teie rāve’a i ferurihia nō te tītau manihini i te ta’ata ’ia fa’a’ite mai i te mana’o : E ’ōpere i te mau ’ōfa’i i na 16 pīahi, ma te ani ia rātou ’ia fa’a’ite mai i te hō’ē parau mau o tā rātou e ha’amana’o ra i roto i tā rātou tuatāpapara’a ta’ata hō’ē ’aore rā ’utuāfare o te Etera 1–5. E aha tā rātou e rave maoti te mea tā rātou i ha’api’i mai ?

ītona ha’api’ira’a

Ha’api’i i te ha’api’ira’a tumu

Etera 1–3 ; 4:8–19

’Ia tāmau noa tātou i te pi’i i te Fatu, e heheu mai ’oia i tōna hina’aro.

• Tātou pā’āto’a tei fifi a’ena nō te ’ite mai i te pāhonora’a nō te hō’ē fifi ’aore rā te hō’ē uira’a. Nāhea te ’ohipa i tupu nō te taea’e o Iareda e nehenehe e tauturu i tā ’oe mau pīahi ’ia ha’api’i mai nāhea i te ’imi i te tauturu a te Fatu ? Penei a’e e nehenehe ’oe e hāmani i te hō’ē tāpura i ni’a i te tāpura ’ere’ere ma teie mau upo’o parau i ni’a i te mau pou Te uira’a a te taea’e o Iareda, Te ’ohipa a te taea’e o Iareda, ’e Te pāhonora’a a te Fatu. I muri iho e nehenehe e vāhi i te piha ’ei toru pupu, ’e e hōro’a i te pupu tāta’itahi hō’ē pou. E ’ohipa ’āmui te pupu tāta’itahi nō te hi’o i roto i te Etera 1:33–43 ’e te 2:16–3:6 nō te pāpa’i i te mea tā rātou e ’ite mai i roto i te pou tano. I muri iho, e nehenehe te piha e ’āparau i te mau uira’a mai teie : E aha tā tātou i ha’api’i mai nō ni’a i te mau rāve’a rau tā te Fatu i mā’iti nō te tauturu ia tātou ? E aha tā tātou i ha’api’i mai nō ni’a i tō tātou ti’ara’a i roto i te fa’anahora’a nō te fāri’ira’a i te heheura’a ? Penei aʼe e nehenehe te mau pīahi e fa’a’ite mai i te tahi atu mau hi’ora’a i roto i te mau pāpa’ira’a mo’a ’o tē ha’api’i nei i te mau parau tumu mai te reira. E rahi atu ā te mea e ’apohia mai i roto i te fa’ahitira’a parau a Elder Richard G. Scott i roto i « Tahi atu mau mātēria tauturu » nō ni’a i te huru te Fatu e pāhono ai i tā tātou mau pure.

• E nehenehe paha te pure a te taea’e o Iareda i roto i te Etera 3:1–5 e fa’auru i te mau pīahi ’ia hi’opo’a i tā rātou iho mau pure. Penei a’e e nehenehe te mau pīahi e feruri ē tē hōro’a nei rātou i te tahi parau a’o i te hō’ē ta’ata e ha’api’i noa mai nāhea ’ia pure. E aha te parau a’o tā rātou e hōro’a atu ? I muri iho e nehenehe tā rātou e ’imi i roto i te Etera 3:1–5 ’e e tātara poto mai i te ’īrava tāta’itahi ma te hō’ē ’aore rā e piti mana’o ’aore rā parau tumu nō ni’a nāhea ’ia pure ti’a roa. E mana’o e hōro’a i te mau pīahi ma’a minuti nō te feruri nō ni’a i tā rātou iho mau pure ’e nāhea rātou e nehenehe ai e pe’e i te hi’ora’a o te taea’e o Iareda nō te ha’amaita’i atu ā i tā rātou mau pure.

• I muri mai i te fa’a’itera’a mai i te ’itera’a heheuhia o te taea’e o Iareda i roto i te Etera 3, ’ua hōro’a Moroni i te hō’ē parau a’o i roto i te Etera 4 nō ni’a nāhea tātou e fāri’i i te heheura’a nō ’ō mai i te Fatu. Nō te tauturu i te mau pīahi ’ia ’apo mai nā roto mai i teie parau a’o, e nehenehe e pia i te hō’ē hōho’a nō Iesu ’e e ani i te mau pīahi ’ia ’imi i roto i te Etera 4:8–10 te mau mea e ’ore ai rātou e fāri’i i te heheura’a ’aore rā te parau mau nō ’ō mai i te Fatu ra. ’A fa’a’ite mai ai te mau pīahi i tā rātou i ’ite mai, e nehenehe e tāpo’i marū noa i te hōho’a o te Mesia ’e te hō’ē ’ahu ’aore rā te hō’ē ’api parau. Nāhea tātou ’ia ’ore teie mau āraira’a pae vārua ’ia tae mai i roto i tō tātou orara’a ? I muri iho, e nehenehe te mau pīahi e ’imi i roto i te Etera 4:7, 11–15 e nāhea tātou e nehenehe ai e fa’ata’ahia nō te fāri’i i te parau mau nō ’ō mai i te Fatu ra. ’A fa’a’ite noa mai ai te mau pīahi i tā rātou i ’ite mai, e tātara te ’ahu ’aore rā ’api parau. E aha te aura’a o te parau « e fa’aro’o ai [i te Fatu] mai te taea’e o Iareda i fa’aro’o iā’u ra »? (Etera 4:7 ; hi’o ato’a Etera 3:1–9). E aha te aura’a o te parau « ’ia ha’aparari [i te] pāruru o te fa’aro’o ’ore » i roto i tō tātou orara’a? (Etera 4:15). Nāhea tātou ’ia tauturu ia vetahi ’ē ’ia rave ato’a mai te reira ? E nehenehe ato’a te mau pīahi e ’imi i te mau parau mau nō ni’a i te heheura’a a te ta’ata hō’ē i roto i te a’ora’a a te peresideni Russell M. Nelson « Heheura’a nō te ’Ēkālesia, heheura’a nō tō tātou orara’a » (Ensign ’aore rā Liahona, Mē 2018, 93–96).

Etera 2:14–15

Nā roto i tāna ’avau, tē tītau manihini nei te Fatu ’ia tātarahapa ’e ’ia haere iāna ra.

• Noa atu ā e peropheta rahi te taea’e o Iareda, ’ua tama’ihia ’oia e te Fatu. ’Ia hi’ohia, hō’ē tumu ’oia i riro ai ’ei ta’ata rahi ’o te huru ïa ’oia i pāhono ai ’a tama’ihia ai ’oia. Nō te tauturu i te mau pīahi ’ia ’apo mai nā roto mai i te hi’ora’a o te taea’e o Iareda, e nehenehe e ani ia rātou ’ia tai’o ’āmui piti piti i te Etera 2:14–15. I muri iho, e ani ia rātou e ha’uti mai hō’ē i te taea’e o Iareda ’e te tahi i te hō’ē ta’ata tei tama’ihia e te hō’ē ti’a fa’atere o te ’Ēkālesia ’aore rā te hō’ē metua. ’Ia paraparau rāua, ’aore rā ’ia ha’uti ta’ata ora rāua e aha tā te taea’e o Iareda e parau atu nō ni’a i te ’ohipa i tupu nōna iho nō te tauturu i teie ta’ata. E aha te parau a’o tāna e hōro’a atu ? E aha te mau ha’api’ira’a tā tātou e ’apo mai ’o tē riro i te tauturu ia tātou ’ia ha’afātata atu i te Metua i te Ao ra ? E nehenehe ato’a e ’āparau nāhea te ’avau a te Fatu ’e te pāhonora’a a te taea’e o Iareda e tauturu ai i te fa’aineinera’a iāna nō te ’ohipa i tupu i roto i te Etera 3:1–20. Teie fa’ahou ā te tahi mau mātēria tauturu e nehenehe e tauturu : te ’aora’a a Elder D. Todd Christofferson « ’O tā’u e here ra, ’o ta’u ïa e a’o, ’e e papa’i ho’i » (Ensign ’aore rā Liahona, Mē 2011, 97–100) ’aore rā te tuha’a i raro a’e i te upo’o parau « Te fa’atītī’aifarora’a » i roto i te a’ora’a a Elder Lynn G. Robbins « Te ha’avā parau-ti’a » (Ensign ’aore rā Liahona, Nov. 2016, 96–97).

Etera 5

E toru ’ite e fa’a’ite pāpū nei i te parau mau o te Buka a Moromona.

• E nehenehe te ha’api’i-rahi-atu-ā-ra’a mai nō ni’a i te parau tohu a Moroni nō ni’a i nā ’ite to’otoru e tauturu ’ia ha’apūai i te ’itera’a pāpū o te mau pīahi nō ni’a i te Buka a Moromona. Penei a’e e nehenehe te ’āfara’a o te piha e tai’o i te Etera 5 ’e te tahi atu ’āfara’a e tai’o i te « E parau fa’a’ite a nā ’ite to’otoru » (tei te ha’amatara’a o te Buka a Moromona) ’e e fa’a’ite atu te tahi i te tahi e aha te fā tā rātou e mana’o ra ’ua fa’ati’a te Fatu i nā ’ite to’otoru ’ia ’ite i te hō’ē melahi ’e i te mau ’api parau. E nehenehe ato’a tā rātou e ’āparau i te tahi mau huru i reira e rave rahi ’ite tei ha’amau i te parau mau (hi’o, ’ei hi’ora’a, Mataio 3:13–17 ; 18:15–16 ; Ioane 5:31–47 ; PH&PF 128:3). E aha te mau ’ite i roto i tō tātou orara’a tei fa’auru ia tātou ’ia fa’aro’o ? Nāhea « te mana o te Atua… ’e tāna ra parau » i « fa’a’itehia mai » ia tātou i roto i te Buka a Moromona? (Etera 5:4).

ītona ’āpora’a ha’api’ira’a

Fa’aitoito i te ha’api’ira’a mai i te fare

E ani i te mau pīahi ’ia feruri mai te huru ē, tē tāmau noa nei tō rātou feiā fa’atere poritita i te haru ’e i te ha’apohe te tahi i te tahi. I roto i te Etera 6–11, e tai’o rātou nō ni’a i te huru te reira i tupu ai nō te hua’ai o Iareda ’e o tōna taea’e. E ’ite ato’a mai rātou i te tahi mau fa’aarara’a e tauturu ia rātou ’ia ’ape i te mau fifi i fa’aruruhia e te mau ’āti Iareda.

ītona mātēria tauturu

Te tahi atu mau mātēria tauturu

Hāro’aro’a i te mau pāhonora’a o te pure.

’Ua ha’api’i Elder Richard G. Scott :

« ’Ia fa’ata’a atu tātou i te hō’ē fifi ’e te rāve’a i ferurihia, i te tahi taime e pāhono mai ’oia ’ē, i te tahi taime e ’aita. E mea pinepine ’oia i te tāpe’a i te pāhonora’a, e ’ere nō te ’orera’a ’oia e māna’ona’o ia tātou, nō tōna ra here ia tātou—i te fāito maita’i roa. ’Ua hina’aro ’oia ’ia fa’a’ohipa tātou i te mau parau mau tāna i hōro’a mai. Nō te tupu i te rahi, tītauhia ’ia ti’aturi tātou i tō tātou ’aravihi ’ia rave i te mau fa’aotira’a tano. Tītauhia ’ia rave tātou i tā tātou e mana’o ra e mea maita’i. I tōna iho taime, e pāhono mai ’oia. E’ita ’oia e fa’aru’e ia tātou…

« ’Ua hina’aro ’oia ia tātou ’ia rave ’ia noa’a mai te ’ite :

« ’Ia pāhono mai ’oia ē ’ē, nō te ha’apūai ïa i tō tātou ti’aturira’a.

« ’Ia pāhono mai ’oia ē ’aita, nō te ’ape ïa i te hape.

« ’Ia tāpe’a ’oia i te hō’ē pāhonora’a, nō te fa’atupu ïa ia tātou nā roto i te fa’aro’o iāna, te ha’apa’ora’a i tāna mau fa’aue ’e te ineine ’ia rave mai te au i te parau mau. Tē tīa’ihia ra tātou ’ia amo i te hōpoi’a nā roto i te ravera’a i te hō’ē fa’aotira’a e au i tāna mau ha’api’ira’a ma te tīa’i ’ore i te ha’apāpūra’a. ’Eiaha tātou e tīa’i ma te pārahi noa ’aore rā e amuamu noa nō te ’orera’a te Fatu i parau mai. ’Ei rave ra tātou » (« Learning to Recognize Answers to Prayer », Ensign, Nov. 1989, 31–32).

Ha’amaita’ira’a i tā tātou ha’api’ira’a

’A haere nā mua roa i roto i te mau pāpa’ira’a mo’a. ’Ia riro te mau pāpa’ira’a mo’a ’ei puna mātāmua nō tā ’outou tuatāpapara’a ’e fa’aineinera’a. ’Eiaha e ha’amo’e ē, e ’āmui te mau parau a te mau peropheta nō teie ’anotau i te mau buka tumu ’e e pāpa’ira’a mo’a ato’a ho’i (hi’o Ha’api’ira’a mai tā te Fa’aora, 17–18).