1 ’E i teienei, ’ua pāpa’i au, ’o Moroni, i te mau parau tei fa’auehia mai iā’u, mai te au i tā’u i ha’amana’o ra ; ’e ’ua fa’a’ite atu vau ia ’oe i te mau mea ’o tā’u i tāpiri ; nō reira ’eiaha ’oe e rave noa atu i te reira ’ia ti’a ia ’oe ’ia ’īriti, nō te mea ’ua ’ōpanihia ’oe ’ia rave i te reira, maori rā i te tau noa atu e ti’a ai i te pa’ari o te Atua.

2 ’E inaha, e fa’ati’ahia paha ’oe ’ia fa’a’ite atu i te mau ’api ia rātou ’o tē tauturu ia ’oe i te ravera’a i teie nei ’ohipa.

3 ’E e fa’a’itehia te reira i nā ta’ata to’otoru e te mana o te Atua ; nō reira e ’ite pāpū rātou ē, e parau mau teie nei mau mea.

4 ’E nā roto i te vaha o nā ’ite to’otoru e fa’atupuhia ai teie nei mau mea ; ’e nā roto i te ’itera’a pāpū o nā ’ite to’otoru, ’e teie nei ’ohipa e fa’a’itehia mai ai te mana o te Atua ’e tō tāna ato’a ho’i parau, ’o tā te Metua, ’e tā te Tamaiti, ’e tā te Vārua Maita’i e fa’a’ite pāpū mai—’e e ti’a atu teie mau mea ato’a ’ei ’itera’a pāpū nō te fa’ahapa i tō te ao nei i te mahana hope’a ra.

5 ’E mai te mea e tātarahapa rātou ’e e haere mai i te Metua nā roto i te i’oa o Iesu, e fāri’ihia ïa rātou i roto i te bāsileia o te Atua ra.

6 ’E i teienei, nā ’outou iho e feruri ē, ’aita ānei tō’u ha’amanara’a nō ni’a iho i teie nei mau mea, ’e e ’ite ho’i ’outou ē tē vai nei tō’u ha’amanara’a ’ia ’ite mai ’outou iā’u nei, ’e e ti’a atu tātou i mua i te Atua i te mahana hope’a ra. ’Āmene.