1 ’E i teienei, tē fa’aoti nei au, ’o Moroni, i tā’u pāpa’a parau nō ni’a i te ha’amoura’ahia te feiā ’o tā’u i pāpa’i ra.

2 Inaha ho’i, ’ua pāto’i rātou i te mau parau a Etera ; inaha ’ua fa’a’ite mau ’oia ia rātou i te mau mea ato’a i tupu mai te ha’amatara’a mai o te ta’ata nei ; ’e i muri iho i te pāhe’era’a te mau pape mai ni’a atu i teie nei fenua, ’ua riro ihora teie nei fenua ’ei fenua maita’i roa a’e i te mau fenua ato’a, ’ei fenua i mā’itihia e te Fatu ; nō reira ’ua hina’aro te Fatu i te mau ta’ata ato’a e pārahi ra i ni’a i teie fenua nei ’ia tāvini atu iāna.

3 ’E e vāhi teie nō te Ierusalema ’Āpī, ’o tē tae mai i raro nei nō te ra’i mai, ’e e vāhi mo’a nō te Fatu.

4 Inaha, ’ua ’ite Etera i te mau mahana o te Mesia, ’e ’ua parau ’oia nō ni’a i te hō’ē Ierusalema ’Āpī i ni’a iho i teie nei fenua.

5 ’E ’ua parau ato’a ho’i ’oia nō ni’a i te ’utuāfare o ’Īserā’ela, ’e te Ierusalema e mea nā reira mai Lehi i te haere mai—’e i muri iho i tō te reira ha’amoura’ahia, e patu-fa’ahou-hia te reira ’ei ’oire mo’a i te Fatu ; nō reira, ’aita te reira e ti’a ’ia parauhia e Ierusalema ’Āpī nō te mea i vai na te reira i te ’anotau tahito ra ; ’āre’a rā e patu-fa’ahou-hia te reira, ’e e riro ’ei ’oire mo’a nō te Fatu ; ’e e mea ti’a i te reira ’ia patuhia nō te ’utuāfare o ’Īserā’ela—

6 ’E e fa’ati’ahia te hō’ē Ierusalema ’Āpī i ni’a i teie nei fenua, nō te toe’a o te hua’ai o Iosepha, e taipe ho’i tō te reira mau mea.

7 Mai tā Iosepha ho’i i hōpoi mai i tōna metua tāne i raro i te fenua ra nō ’Aiphiti, ’e i reira ho’i ’oia i te pohera’a ; nō reira ’ua hōpoi ato’a mai ra te Fatu i te hō’ē toe’a nō te hua’ai o Iosepha i rāpae mai te fenua mai ra o Ierusalema, ’ia aroha mai ’oia i te hua’ai o Iosepha ’e ’ia ’ore rātou ’ia mou, mai tāna i aroha mai i te metua tāne o Iosepha ’ia ’ore ’oia ’ia pohe.

8 Nō reira, e fa’ati’ahia te toe’a nō te hua’ai o Iosepha i ni’a i teie nei fenua ; ’e e riro te reira ’ei fenua ’āi’a nō rātou ; ’e e riro ho’i rātou i te fa’ati’a i te hō’ē ’oire mo’a i te Fatu, mai te au i te Ierusalema i tahito ra ; ’e e ’ore roa rātou e ’āno’i-haere-hia, ē tae noa atu i te hope’a, i te taime te fenua nei e ha’amouhia ai.

9 ’E e vai mai te hō’ē ra’i ’āpī ’e te hō’ē fenua ’āpī ; ’e e au te reira i te mea tahito, maori rā ’ua mou te mea tahito ’e ’ua fa’a’āpīhia te mau mea ato’a.

10 ’E i reira e tae mai ai te Ierusalema ’Āpī ; ’e e ha’amaita’ihia rātou ’o tē pārahi i reira, ’e ’o rātou ho’i teie ’o tei teatea tō rātou mau ’ahu i te toto o te ’Ārenio ; ’e ’o rātou ho’i teie ’o tei tai’ohia i rotopū i te toe’a o te hua’ai o Iosepha, nō te ’utuāfare o ’Īserā’ela.

11 ’E i reira ato’a e tae mai te Ierusalema tahito ; ’e e ha’amaita’ihia te mau ta’ata nō te reira, nō te mea ’ua horoihia rātou i te toto o te ’Ārenio ra ; ’e ’o rātou ho’i teie ’o tei ha’apurarahia ’e ’o tei ha’aputuputuhia mai ho’i mai nā tufa’a e maha o te fenua nei, ’e mai te mau fenua i te pae apato’erau, ’e ’o tē fa’atupu i te fafaura’a ’o tā te Atua i fafau atu i tō rātou metua tāne ra ia Aberahama.

12 ’E ’ia tupu teie nei mau mea, e tupu ïa te pāpa’ira’a mo’a ’o tei nā ’ō mai ē, tē vai ra vetahi nō mua roa, ’o tē riro ’ei hope’a ; ’e tē vai ra vetahi i muri roa, ’o tē riro nō mua roa.

13 ’E ’ua fātata vau i te pāpa’i fa’ahou atu ā, ’ua ’ōpanihia rā vau ; ’āre’a rā e mea rahi ’e te māere ho’i te mau parau tohu a Etera, ’ua fa’ariro rā rātou iāna ’ei mea faufa’a ’ore, ’e ’ua ti’avaru atu rātou iāna i rāpae ; ’e ’ua tāpuni ihora ’oia iāna iho i roto i te ana mato i te ao, ’e i te pō ’ua haere atu ’oia e māta’ita’i haere i te mau mea ’o tē tupu i ni’a i te mau ta’ata.

14 ’E ’a pārahi ai ’oia i roto i taua ana mato ra, ’ua pāpa’i ’oia i te toe’a o teie nei pāpa’a parau, ’a māta’ita’i ai ’oia i te pō i te mau ha’amoura’a i tae mai i ni’a i te mau ta’ata.

15 ’E i muri a’era, i taua iho matahiti ra ’a ti’avaruhia atu ai ’oia i rāpae mai rotopū atu i te mau ta’ata, ’ua tupu te hō’ē ’arora’a rahi i rotopū i te mau ta’ata, ’e ’ua ti’a mai ra ho’i e rave rahi mau ta’ata pūai i ni’a, ’e ’ua tītau rātou ’ia taparahi ia Korianetumera nā roto i tā rātou mau ’ōpuara’a huna nō te mau ’ohipa parauti’a ’ore, ’o tei parauhia na.

16 ’E i teienei, ’ua ha’api’i Korianetumera iāna iho i te mau huru ’ohipa ato’a nō te ’arora’a ’e te mau huru ha’avare ato’a a tō teie nei ao, nō reira ’ua ’aro atu ’oia i te feiā i tītau ’ia taparahi mai iāna.

17 ’Aita rā ’oia i tātarahapa, ’aita ato’a tāna ra mau tamari’i tamāroa nehenehe ’e te mau tamari’i tamāhine nehenehe ; ’aita ato’a te mau tamari’i tamāroa nehenehe ’e te mau tamari’i tamāhine nehenehe a Kohora ; ’aita ato’a te mau tamari’i tamāroa nehenehe ’e te tamari’i tamāhine nehenehe a Korihora ; ’e ’oia mau, ’aita roa ato’a te hō’ē a’e o te mau tamari’i tamāroa nehenehe ’e te mau tamari’i tamāhine nehenehe i ni’a i te fenua tā’āto’a i tātarahapa i tā rātou ra mau hara.

18 Nō reira, i muri a’era, i te matahiti mātāmua ’a pārahi ai Etera i roto i te ana mato ra, e rave rahi ta’ata i taparahihia i te ’o’e a te mau pupu ’ohipa huna, tei ’aro atu ia Korianetumera ’ia roa’a ia rātou te bāsileia.

19 ’E i muri a’era, ’ua tama’i pinepine a’era te mau tamari’i tamāroa a Korianetumera, ’e ’ua tahe rahi tō rātou toto.

20 ’E i te piti o te matahiti, ’ua tae mai ra te parau a te Fatu ia Etera, ’ia haere atu ’oia ’e ’ia tohu atu ia Korianetumera, i te nā-’ō-ra’a atu ē, mai te mea e tātarahapa ’oia ’e tōna ’utuāfare pā’āto’a, e hōro’a mai ïa te Fatu i tōna bāsileia iāna ra, ’e e fa’aora noa ’oia i te mau ta’ata—

21 ’E ’ia ’ore rātou e nā reira, e ha’amouhia rātou tōna ’utuāfare pā’āto’a, maori rā ’o ’oia ana’e. ’E e ora noa ’oia nō te ’ite atu i te tupura’a o te mau parau tohu i parauhia na nō ni’a i te tahi atu nūna’a ’o tē roa’a ia rātou te fenua ’ei ’āi’a nō rātou ; ’e e tanuhia ho’i Korianetumera e rātou ; ’e e riro te mau ta’ata ato’a i te ha’amouhia, maori rā ’o Korianetumera ana’e.

22 ’E i muri a’era, ’aita Korianetumera i tātarahapa, ’aita ato’a tōna ra ’utuāfare, ’aita ato’a te mau ta’ata ; ’e ’aita ho’i te mau tama’i i fa’aea ; ’e ’ua tītau rātou ’ia taparahi ia Etera, ’āre’a rā ’ua horo ’ē atu ra ’oia mai mua atu ia rātou ’e ’ua tāpuni fa’ahou ihora i roto i te ana mato ra.

23 ’E i muri a’era, ’ua ti’a mai ra Sareda, ’e ’ua ’aro ato’a atu ra ia Korianetumera ; ’e ’ua upo’oti’a ’oia i ni’a iāna, ’e nō reira ho’i i te toru o te matahiti ’ua ’āfa’i mai ’oia iāna i roto i te fa’atītīra’a.

24 ’E ’ua upo’oti’a te mau tamari’i tamāroa a Korianetumera, i te maha o te matahiti, i ni’a a’e ia Sareda, ’e ’ua roa’a fa’ahou ihora te bāsileia ia rātou nō tō rātou metua tāne.

25 I teienei, ’ua tupu ihora te hō’ē ’arora’a i ni’a i te fenua tā’āto’a, ’e tē tama’i ra te mau ta’ata tāta’itahi ’e tāna iho pupu ta’ata, ’ia roa’a tāna e hina’aro ra.

26 ’E tē vai ra te mau ta’ata ’eiā haru, ’e ’oia mau, te mau huru ’ohipa ’ī’ino ato’a i ni’a i te fenua tā’āto’a.

27 ’E i muri a’era, ’ua riri roa a’era Korianetumera ia Sareda, ’e ’ua haere atu ra ’oia ’e tōna mau nu’u fa’ehau e ’aro iāna ; ’e ’ua ’aro a’era rāua ma te riri rahi, ’e ’ua ’aro rāua i roto i te peho ra o Gilagala ; ’e ’ua rahi roa te ’arora’a.

28 ’E i muri a’era, ’ua ’aro mai ra Sareda iāna nō te ārea e toru mahana te maoro, ’e i muri a’era, ’ua pau a’era ’oia ia Korianetumera, ’e ’ua a’ua’uhia atu ra ’oia ē tae roa atu i te mau fenua pāpū nō Heselona ra.

29 ’E i muri a’era, ’ua ’aro fa’ahou mai ra Sareda iāna i ni’a i te mau fenua pāpū ; ’e inaha, ’ua pau a’era Korianetumera iāna, ’e ’ua tūra’i fa’ahou atu ra iāna i muri ē tae roa atu i te peho ra o Gilagala.

30 ’E ’ua ’aro fa’ahou atu ra Korianetumera ia Sareda i te peho ra o Gilagala, ’e ’ua pau a’era Sareda iāna, ’e ’ua taparahi ihora iāna.

31 ’E ’ua puta ihora te huha o Korianetumera ia Sareda, ’e nō reira ’aita ’oia i haere fa’ahou atu e ’aro iāna nō te ārea e piti matahiti te maoro, ’e i taua taime ra tē ha’amani’i ra te mau ta’ata ato’a i ni’a i te fenua nei i te toto, ’e ’aita roa e ta’ata nō te tāpe’a ia rātou.