« 21–27 nō Tītema. Noela : ‘E tae mai ’oia i te ao nei ’ia fa’aora i tōna ra mau ta’ata’ », Mai, pe’e mai—nō te Ha’api’ira’a Sābati : Buka a Moromona 2020 (2020)
« 21–27 nō Tītema. Noela », Mai pe’e mai—nō te Ha’api’ira’a Sābati : 2020
’A hi’o na i te Arenio a te Atua, nā Walter Rane
21–27 nō Tītema
Noela
« E tae mai ’oia i te ao nei ’ia fa’aora i tōna ra mau ta’ata »
’A tuatāpapa ai ’oe i te fānaura’a o Iesu Mesia i teie hepetoma, ’a feruri nāhea i te tauturu i te mau pīahi ’ia ha’apūai i tō rātou ’itera’a pāpū nō Iesu Mesia ’e nō tāna tāra’ehara. E riro te tahi mau mana’o i roto i teie arata’i ha’api’ira’a i te tauturu atu.
Pāpa’i i te mau mana’o e tae mai
Tītau i te mana’o
E ani i te mau pīahi ’ia fa’ata’a piti piti ia rātou ’aore rā ’ei pupu na’ina’i nō te fa’a’ite mai nāhea te ha’api’ira’a mai nō ni’a ia Iesu Mesia i roto i te Buka a Moromona i teie matahiti i te ha’apūai i tō rātou fa’aro’o iāna ’e i tāna mau ha’api’ira’a.
Ha’api’i i te ha’api’ira’a tumu
1 Nephi 11:13–23 ; Helamana 14:1–13 ; 3 Nephi 1:4–22
’Ua fānauhia Iesu Mesia nō te riro ’ei Fa’aora nō tātou.
-
Nāhea e nehenehe ai e fa’a’ohipa i te Buka a Moromona nō te ha’api’i i te mau pīahi nō ni’a i teie ’ohipa mo’a nō te fānaura’a o te Fa’aora ? Hō’ē rāve’a, ’o te vāhira’a ïa i te piha ’ei toru pupu ’e te hōro’ara’a i te pupu tāta’itahi hō’ē o te mau tuha’a ’īrava i muri nei ’ia tai’o ’āmui rātou : 1 Nephi 11:13–23 ; Helamana 14:1–13 ; ’e 3 Nephi 1:4–22. E ani i te mau pupu ’ia ’āparau e aha tā teie mau ’īrava e ha’api’i nei nō ni’a i te fānaura’a o te Fa’aora. I muri iho, e nehenehe te pupu tāta’itahi e fa’a’ite i te toe’a o te piha i te mea tā rātou i ’āparau. Nō te aha e ’ohipa faufa’a te fāna’ora’a i te fa’a’itera’a a te Buka a Moromona nō te fānaura’a o te Fa’aora ?
-
E mea faufa’a ’ia ’ite nō ni’a i te fānaura’a o te Mesia, ’e mea faufa’a roa atu rā te ’itera’a nō te aha ’oia i fānauhia ai. Nāhea ’oe e nehenehe ai e tauturu i te mau pīahi ’ia feruri i te mana fa’aora o Iesu Mesia ? Penei a’e e nehenehe te mau pīahi e fa’a’ite mai vetahi ’ā’amu ’aore rā tuha’a ’īrava tā rātou i tuatāpapa i roto i teie hepetoma (hi’o i te arata’i ha’api’ira’a o teie hepetoma o te Mai, pe’e mai—nō te ta’ata hō’ē ’e te ’utuāfare). Fa’aitoito ia rātou ’ia fa’a’ite mai nāhea te mau mea tā rātou i tuatāpapa i te fa’ahōhonu atu ā i tō rātou māuruuru i te fānaura’a o te Fa’aora ’e i tōna mana fa’aora.
-
Nō te ha’amata i te hō’ē ’āparaura’a nō ni’a i te mau hōro’a a te Atua ia tātou nei tāna i hōro’a nā roto i tāna Tamaiti, e nehenehe e ani i te mau pīahi ’ia parau mai i te tahi mau tao’a ta’a ’ē tā rātou i fāri’i i te Noela. E mea nāhea tātou i te fa’a’ite i te māuruuru rahi nō te mau tao’a hōro’a tā tātou e fāri’i nei ? I muri iho, e nehenehe te mau pīahi e tai’o i te fa’ahitira’a parau a te peresideni Thomas S. Monson i roto i « Te tahi atu mau mātēria tauturu » ’e e ’āparau nō ni’a i nā tao’a hōro’a e maha tā te peresideni Monson i fa’ahiti. E aha te ti’ara’a o te Fa’aora i roto i teie mau tao’a hōro’a ? Nāhea tātou ’ia fa’a’ite i tō tātou māuruuru rahi i te Metua i te Ao ra nō teie mau tao’a hōro’a ?
-
’Ei tuha’a nō tā ’outou ’āparaura’a nō ni’a i te Noela, e nehenehe e ani i te mau pīahi ’ia ha’uti ’aore rā ’ia hīmene i te mau hīmene Noela. E nehenehe ato’a e hi’o i te tahi mau mātēria tauturu tei tāpurahia i roto i « Te tahi atu mau mātēria tauturu ».
’Api upo’o parau o te Buka a Moromona ; ’ōmuara’a nō te Buka a Moromona ; 2 Nephi 25:23, 26 ; 33:4, 10
Tē fa’a’ite pāpū nei te Buka a Moromona nō Iesu Mesia
-
Nō te hopera’a te tuatāpapara’a o te Buka a Moromona i te Ha’api’ira’a Sābati, e hina’aro paha ’oe e hōro’a i te mau pīahi i te tahi taime nō te feruri i ni’a i te mea tā rātou i ha’api’i mai nō ni’a ia Iesu Mesia i roto i te Buka a Moromona i teie matahiti. Nō te tauturu ’ia ha’amata i te hō’ē ’āparaura’a, e nehenehe e tai’o ’āmui i te 2 Nephi 25:23, 26 ’e te 33:4, 10, ’e tae noa atu te tahi mau parau i roto i te ’ōmuara’a nō te Buka a Moromona ’e te ’api upo’o parau. E nehenehe ato’a e fa’a’ite i te hō’ē ’ā’amu ’aore rā te hō’ē tuha’a tei ha’afātata atu ā ia ’oe ia Iesu Mesia ’ei reira e nehenehe e hōro’a ma’a minuti i te mau pīahi nō te fa’a’ite mai i tā rātou iho ’ā’amu ’aore rā te mau tuha’a ’īrava. E hōro’a i tō ’oe ’itera’a pāpū ’a ani atu ai i te mau pīahi ’ia nā reira ato’a mai.
Fa’aitoito i te ha’api’ira’a mai i te fare
Nō te fa’auru i te mau pīahi ’ia ha’amata i te tai’o i Te Parau Ha’api’ira’a ’e te mau Parau Fafau, e nehenehe tā ’oe e fa’a’ite i tā ’oe ’īrava au roa a’e ’aore rā te tahi ’ohipa fa’auru mau tei tupu nō ’oe i te tuatāpapara’a i Te Parau Ha’api’ira’a ’e te mau Parau Fafau.
Te tahi atu mau mātēria tauturu
Mātēria tauturu nō te Noela
-
Mataio 1:18–25 ; 2 ; Luka 2
-
Mau hōho’a i roto i te arata’i ha’api’ira’a o teie hepetoma o te Mai, pe’e mai—nō te ta’ata hō’ē ’e te ’utuāfare
-
« A Savior Is Born—Christmas Video » (video, ChurchofJesusChrist.org)
-
Purera’a Noela a te Peresidenira’a Mātāmua (ChurchofJesusChrist.org/broadcasts/first-presidency-christmas-devotionals)
Te mau tao’a hōro’a a te Fa’aora
’Ua ha’api’i te peresideni Thomas S. Monson :
« ’Ua feruri au i te huru rau o te Noela. Te mau tao’a huru ’ē mau, tei tu’uhia i roto i te pū’ohu moni rahi ’e tei tāpo’i-ti’a-hia e te pāpie, e’ita ïa e nehenehe e parau i te huru ’ē i roto i te mau buka fa’atiani tuiro’o tei pāpa’ihia i ni’a i upo’o parau ‘Nō te ta’ata tei fāna’o i te mau mea ato’a’. I roto i te hō’ē buka mai te reira, ’ua hi’o vau i te hō’ē fare maha tauasini ’āvae tuea (370 m²) tei tāpo’ihia ’e te hō’ē tā’amu rahi roa ’e te tahi ato’a tāreta mai te reira e nā ’ō ra : ‘’Ia ’oa’oa i te Noela’. Te tahi atu mau tao’a, ’o te mau rā’au hui pōpō ïa tei ni’a iho te taiamani nō te ta’ata hui popo, te hō’ē tere nā te mau pae Caraibes mā nō te rātere ’e te tahi tere ato’a nā ni’a i te mau mou’a ra Alpes i Herevetia nō te rēhiti (aventurier). E au ē, ’ua tano roa te reira i te tumu parau o te hō’ē hōho’a Noela tei fa’a’ite i nā Ta’ata Pa’ari e toru e tere ra i Betelehema ’e tā rātou mau ’āfata tao’a i ni’a i tā rātou kamera. Tē nā ’ō ra te hō’ē : ‘’A pāpa’i i tā’u nei parau e Balthazar, i teie mau tao’a tē ha’amata ra tātou i te hō’ē peu e ’ū’ana roa mai !…
« Nō te tahi ma’a taime, vaiiho ana’e i te mau buka nō Noela ’e tā rātou mau tao’a hōho’a rau i te hiti. Fāriu ’ē ana’e ato’a i te mau tiare nō te Metua vahine, te tā’amu ’arapo’a iti nō te Metua tāne, te pēpe ha’avare iti, te pere’o’o auauahi ’e tōna pū, te pere’o’o ta’ata’ahi… nō te fa’atae i tō tātou nei mana’o i ni’a i te mau hōro’a a te Atua e vai noa. ’Ua mā’iti mai au e maha i ni’a i te hō’ē tāpura roa roa :
« ’A tahi, te hōro’a nō te fānaura’a. ’Ua hō-hua-hia mai te reira i ni’a ia tātou tāta’itahi. Tei ia tātou na te fāna’ora’a hanahana e fa’aru’e i te fare i te ra’i ra nō te tomo i roto i te tino nei ’e nō te fa’a’ite nā roto i tō tātou orara’a i tō tātou ti’amā ’e te mau mea i tītauhia nō te ho’i iāna ra ’ia tae i te hō’ē mahana, i te feiā poiherehia ho’i, ’e i te hō’ē bāsileia tei parauhia e mea tiretiera. Tei ia tātou nei te hōpoi’a e fa’a’ite i tō tātou māuruuru nā roto i te mau ’ohipa o tō tātou nei orara’a…
« Te piti, te hōro’a nō te hau. I roto i te ao māniania tā tātou e ora nei, e mea fa’atupu te māniania o te mau pere’o’o, te tuōra’a fa’atiani a te mau rāve’a ha’apararera’a ’e te mau tītaura’a ho’i tei tu’uhia i ni’a i tō tātou taime—’aita ïa i fa’ahitihia te mau fifi o te ao nei—i te māuiui upo’o, i te mamae ’e i te ha’aparuparura’a nō te fa’aruru atu…
« Tē paraparau nei ’oia tei teimaha i te ’oto ’e tei mātau i te māuiui i te mau ’ā’au hepohepo ato’a ma te tu’u atu i te hōro’a nō te hau. ‘E hau tā’u e vaiiho ia ’outou nei, ’o tō’u nei hau tā’u e hō atu nō ’outou ; e ’ere mai tā tō te ao nei hōro’a tā’u hōro’a ia ’outou. ’Eiaha e taiā tō ’outou ’ā’au, ’eiaha ho’i e mata’u » (Ioane 14:27)…
« Te toru, te hōro’a nō te here. ‘E Rabi, tei hea te parau rahi i roto i te ture ?’ tā te ha’api’i ture i ui ia Iesu. I reira noa te pāhonora’a i te taera’a mai : ‘Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a.
« ’O te ture mātāmua teie ’e te hau i te rahi.
« ’E mai te reira ato’a te piti, e aroha atu ’oe i tō ta’ata tupu, mai tō aroha ia ’oe iho’ (Mataio 22:36–39)…
« Te maha, te hōro’a nō te ora—’oia ho’i te tāhuti ’ore. Tei roto i te fa’anahora’a a te Metua i te Ao ra i te fa’a’itera’a hope nō te here mau. ’Āhani ’aita tō tātou Metua ’e tāna Tamaiti, ’o te Fatu ra Iesu Mesia, e mo’e te mau mea ato’a tā tātou i here, tō tātou nei ’utuāfare, tō tātou mau hoa, tō tātou ’oa’oa, tō tātou ’ite, tō tātou ’itera’a pāpū. I roto i te mau mana’o poihere roa ’e te mau pāpa’ira’a poihere roa i roto i teie nei ao, ’o teie ïa parau mau rahi : ‘I aroha mai te Atua i tō te ao, ’e ’ua tae roa i te hōro’a mai i tāna Tamaiti Fānau Tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore’ (Ioane 3:16) » (« Gifts », Ensign, Mē 1993, 59–62).
Ha’amaita’ira’a i tā tātou ha’api’ira’a
E ’ere i te mea ’ino ’ia parau ē : « ’Aita vau i ’ite ». Noa atu ā e fa’aitoito roa ’oe nō te pāhono i te mau uira’a a te mau pīahi nō ni’a i te ’evanelia, ’aita te Fatu e tīa’i nei ’ia ’ite ’oe i te mau mea ato’a. ’Aita ana’e ’oe i ’ite nāhea i te pāhono atu, e nehenehe e ani i te mau pīahi ’ia ’imi ’āmui i te hō’ē pāhonora’a i roto i te mau pāpa’ira’a mo’a ’e ’ia fa’a’ite mai i tā rātou i ’ite mai. (Hi’o Ha’api’ira’a mai tā te Fa’aora, 24.)