Koeʻuhí ke Mou ʻIlo, tā ʻe Gary L. Kapp

ʻAho 14–20 ʻo Tīsemá

Molonai 10

“Haʻu kia Kalaisi, pea Hoko ʻo Haohaoa ʻiate Ia”

Mahalo ne ʻosi maʻu ʻe he kau mēmipa ʻo hoʻo kalasí ha ngaahi aʻusia mahuʻinga ʻi hono lau ʻo e Tohi ʻa Molomoná he taʻu ní. Fakaʻaongaʻi e ngaahi aʻusia ko ʻení ke poupouʻi e taha kotoa ʻi he kalasí ke nau ako e folofolá.

Lekooti ʻa e Ngaahi Ongo ʻOkú ke Maʻú

Fakaafeʻi e Feʻinasiʻakí

Te ke lava ʻo fakaafeʻi ʻa e kau mēmipa ʻo e kalasí ke nau ʻai ke pehē ʻoku ʻaʻahi mai ʻa Molonai ki he kalasí. Ko e hā te nau lea ʻaki kiate ia fekauʻaki mo e meʻa naʻá ne tohi ʻi he Molonai 10? ʻOku ʻi ai nai ha ngaahi veesi ʻoku mātuʻaki mahuʻinga mālie kiate kinautolu? Mahalo te nau lava ʻo vahevahe ha ngaahi aʻusia ne nau maʻu ʻi he ngaahi veesi ko ʻení.

Akoʻi e Tokāteliné

Molonai 10:3–7

Te u lava ʻo ʻilo ʻa e moʻoní ʻi he mālohi ʻo e Laumālie Māʻoniʻoní.

• ʻE lava ke maʻu ʻe he kau mēmipa ʻo e kalasí ha ngaahi ʻilo foʻou kapau te nau ako fakalelei e Molonai 10:3–5. Te ke lava ʻo hiki ha ngaahi kupuʻi lea mahuʻinga mei he ngaahi veesi ko ʻení ʻi ha ngaahi laʻi pepa kehekehe pea tufa takitaha ki he mēmipa kotoa ʻo e kalasí pe ki ha kulupu ʻo e kau mēmipa ʻo e kalasí, ke tokoni kiate kinautolu. Fakaafeʻi kinautolu ke nau fakalaulauloto pe aleaʻi e ʻuhinga ʻo ʻenau ngaahi kupuʻi leá, kau ai mo e meʻa te nau lava ke fai ke fakaʻaongaʻi ia ʻi heʻenau moʻuí. Hili ia pea te nau lava ʻo lau fakataha e Molonai 10:3–5, ʻo taʻofi ʻi he taimi ʻoku mou aʻu ai ki ha kupuʻi lea naʻe ako ʻe ha taha, ke lava ʻo vahevahe ʻe he kau mēmipa ʻo e kalasí ʻa ʻenau fakakaukaú.

• Te ke lava ʻo fakaafeʻi e kau mēmipa ʻo e kalasí ke nau fakakaukau ʻoku nau feinga ke fakalotolahiʻi hanau kaungāmeʻa pe mēmipa ʻo e fāmilí ke maʻu haʻane fakamoʻoni ki he Tohi ʻa Molomoná, ke fakalotolahiʻi ai kinautolu ke nau vahevahe ʻa e ngaahi aʻusia ne nau maʻu ʻi heʻenau fakahoko e fakaafe ʻa Molonaí ʻi he ngaahi veesi ko ʻení. Te nau fakaʻaongaʻi fēfē ʻa e Molonai 10:3–7? Ko e hā ha faʻahinga aʻusia te nau lava ʻo vahevahe? Te tau lava fēfē ke tokoni ke mahino ki ha niʻihi kehe hono ʻuhinga ʻo e ʻilo ha faʻahinga meʻa “‘i he mālohi ’o e Laumālie Māʻoniʻoní”? Molonai 10:5).

Molonai 10:8–25

“ʻOua naʻa mou fakaʻikaiʻi e ngaahi meʻa-foaki ʻa e ʻOtuá.”

• Ko e hā ʻoku mātuʻaki mahuʻinga ai ʻa e naʻinaʻi ke “ʻoua naʻa mou fakaʻikaiʻi e ngaahi meʻa-foaki ʻa e ʻOtuá” ʻi he ngaahi ʻaho kimui ní? (Molonai 10:4) Poupouʻi e kau mēmipa ʻo e kalasí ke nau fakalaulauloto ki he fehuʻi ko ʻení ʻi heʻenau lau ʻa e Molonai 10:8–18. Te ke lava ʻo fakaafeʻi e kau mēmipa ʻo e kalasí ke nau vahevahe ha ngaahi sīpinga ʻo ha kakai ne nau fakaʻaongaʻi e meʻafoaki takitaha ʻoku hiki ʻi he Molonai 10:9–16 ke tokoni ke fakamālohia kinautolu. ʻE lava ke maʻu e ngaahi sīpingá mei he folofolá, mei he hisitōlia ʻo e Siasí, pe mei heʻenau moʻuí. (Ko e ngaahi sīpinga mei he Tohi ʻa Molomoná ʻoku fokotuʻu atu ia ʻi he “Ngaahi Maʻuʻanga Tokoni Kehé.”) Te mou lava foki ‘o aleaʻi ʻa e founga naʻe fakaeʻa ai e ngaahi meʻa-foaki ʻe niʻihi ʻoku fakamatalaʻi ʻi he ngaahi veesi ko ʻení ʻi hono ʻomi ʻo e Tohi ʻa Molomoná. Ko e hā ʻoku mahuʻinga ai ki ha taha ʻoku fekumi ki ha fakamoʻoni ki he Tohi ʻa Molomoná ke tui ki he ngaahi meʻa-foaki fakalaumālié? Ko e hā ʻoku tau fai ʻi he taimi ʻe niʻihi ke “fakaʻikaiʻi” ‘a e ngaahi meʻa-foaki ko ʻení ʻi heʻetau moʻuí? ʻOku tokoniʻi fēfē kitautolu ʻe he ngaahi meʻa-foaki ko ʻení ke tau “haʻu kia Kalaisi, pea hoko ’o haohaoa ‘iate ia”? (vakai, Molonai 10:30–33).

• Ko ha founga ʻe taha ke vakavakaiʻi ai e ngaahi meʻafoaki fakalaumālie ʻoku fakamatalaʻi ʻi he ngaahi veesi ko ʻení ko hano hiki ʻi he palakipoé ha ngaahi fehuʻi hangē ko ʻení Ko e hā ʻa e ngaahi meʻa-foaki fakalaumālie? Ko hai ʻoku foaki ki aí? Ko e hā ʻoku foaki ai kinautolú? mo e ʻOku tau maʻu fēfē kinautolu? Hili ia pea fakaafeʻi ‘a e kau mēmipa ’o e kalasí ke nau fakatotolo ʻi he Molonai 10:8–25 ke maʻu e talí. (ʻE lava foki ke tokoni e fakamatala naʻe fai ʻe Palesiteni Pilikihami ʻIongi mo Palesiteni Tālini H. ʻOakesi ʻi he “Ngaahi Maʻuʻanga Tokoni Kehé.”) Makehe mei he ngaahi meʻa-foaki fakalaumālie ʻoku hiki ʻi he veesi 9–16, ko e hā mo ha toe ngaahi “meʻa-foaki ‘a e ’Otuá” kuo tau maʻu pe tāpuekina ʻaki? (Molonai 10:8). ʻE lava ke ke vahevahe e meʻa naʻe akoʻi ʻe ʻEletā Pulusi R. Makongikií: “ʻOku taʻefakangatangata mo taʻefaʻalaua ʻa e ngaahi meʻa-foaki fakalaumālié. Ko kinautolu ʻoku hiki atu ʻi he ngaahi folofola kuo fakahā maí ko ha ngaahi sīpinga pē ia ʻo e taʻe-fakangatangata ʻo e ʻaloʻofa fakalangi ʻoku foaki mai ʻe ha ʻOtua ʻaloʻofa kiate kinautolu ʻoku ʻofa mo tauhi kiate Iá” (A New Witness for the Articles of Faith1985], 371).

Molonai 10:30–33

Te u lava ʻo haohaoa tuʻunga ʻi he ʻaloʻofa ʻa Sīsū Kalaisí.

• Ko e hā ʻokú ke ongoʻi ʻe lava ʻo tokoni ki he kau mēmipa ʻo e kalasí ke nau tali e fakaafe ʻa Molonai ke “haʻu kia Kalaisi, pea hoko ‘o haohaoa ʻiate iá”? (Molonai 10:32) Mahalo ka kamata ʻaki ha himi ʻi he tefito ko ʻení, hangē ko e “Muimui ʻIate Aú” (Ngaahi Himi, fika 57), te ne lava ʻo fakaafeʻi ʻa e Laumālié ki hoʻomou fealēleaʻakí, pea ʻe lava ke vahevahe ʻe he kau mēmipa ʻo e kalasí ha faʻahinga fehokotaki ʻoku nau fakatokangaʻi ʻi he himí pea mo e ngaahi moʻoni ʻoku maʻu ʻi he Molonai 10:30–33. Ko e hā ʻoku tau ako mei he ngaahi veesi pea mo e himi ko ʻení fekauʻaki mo e ʻuhinga ʻo e haʻu kia Kalaisí? ʻOku ʻuhinga ki he hā ke “haohaoa ʻia Kalaisi”? (vakai foki, TF 76: 50–53, 69). Vahevahe hoʻo ngaahi ongo fekauʻaki mo e ‘uhinga ke “fakahaohaoaʻi ʻia Sīsuú” (TF 76:69), pea poupouʻi ʻa e kau mēmipa ʻo e kalasí ke nau vahevahe haʻanautolú.

• Koeʻuhí ko hoʻomou aleaʻi fakaʻosi ʻeni ʻa e Tohi ʻa Molomoná he taʻu ní, te ke ala kole ki he kau mēmipa ʻo e kalasí ke nau fakamatalaʻi ha niʻihi ʻo e ngaahi meʻa ne nau ongoʻi mo ako ʻi heʻenau ako e tohi ko ʻení. Ke tokoni ke fakahoko ʻe he kau mēmipa ʻo e kalasí ʻa e meʻá ni, te mou lava ʻo lau fakataha ʻa e Molonai 10:32–33 pea kole ke nau fakaʻaongaʻi ha ngaahi miniti siʻi ke fakalaulauloto ki he founga ʻo e tokoniʻi kinautolu ʻe he Tohi ʻa Molomoná ke nau haʻu kia Kalaisí. Te ke lava ʻo ʻeke ange: Kuo tokoniʻi fēfē kitautolu ʻe he Tohi ʻa Molomoná ke tau ʻofa lahi ange ki he ʻOtuá? Kuó ne tokoniʻi fēfē kitautolu ke tau falala kakato ange ki he ʻaloʻofa ʻa Kalaisí? Kuó ne tokoniʻi fēfē kitautolu ke “‘oua [te tau] fakaʻikaiʻi” e mālohi ‘o e Fakamoʻuí? Fakaafeʻi e kau mēmipa ʻo e kalasí ke fai ʻenau fakamoʻoni ki he Tohi ʻa Molomoná pea mo ʻene fakamoʻoni kia Sīsū Kalaisí.

Poupouʻi e Ako ʻi ʻApí

Ke tokoniʻi ʻa e kau mēmipa ʻo e kalasí ke nau nofo ʻamanaki atu ki hono ako ʻo e Tokāteline mo e Ngaahi Fuakavá he taʻu kahaʻú, te mou lava ʻo fakamanatu ʻa e Molonai 10:9–16 pea fakamatalaʻi ange ʻoku hoko e ngaahi meʻa-foakí ni ko ha fakamoʻoni kotoa ʻi he Siasí he ʻahó ni. ʻI heʻetau lau e Tokāteline mo e Ngaahi Fuakavá, te tau fakatokangaʻi ai e founga kuo fakaʻaongaʻi ai e ngaahi meʻa-foaki mo e mālohi ʻo e ʻOtuá ke fakahoko ʻEne ngāué ʻi he ngaahi ʻaho kimui ní.

Ngaahi Maʻuʻanga Tokoni Kehé

Ko hono fakaeʻa ʻo e ngaahi meʻa-foaki fakalaumālié ʻi he Tohi ʻa Molomoná.

• Ko e Faiako ʻaki e Laumālié: Nīfai mo Līhai (Hilamani 5:17–19.)

• Fuʻu tui lahi: ‘Alamā, ʻAmuleki, ‘Āmoni, mo ha niʻihi kehe ( ʻEta 12:13–22)

• Faifakamoʻui: ʻAlamā ( ‘Alamā 15:5–11)

• Ngaahi fuʻu mana lalahi: Ko e kau ākonga ʻe toko tolú (3 Nīfai 28:19–22)

• Kikite: Līhai (2 Nīfai 1:6–7)

• Ko e mamata ki he kau ʻāngeló: ‘Amuleki ( ʻAlamā 10:7–10)

• Fakaʻuhingaʻi ʻo e ngaahi leá: Mōsaia (Mōsaia 28:11–16)

Ko e fakamoʻoni ʻa Palesiteni Pilikihami ʻIongi ki he ngaahi meʻa-foaki fakalaumālié.

“Tuí. Ko e taimi ko ia ʻokú ke tui ai ki he ngaahi tefitoʻi moʻoni ʻo e ongoongoleleí pea maʻu ʻa e tuí, ʻa ia ko e meʻa-foaki ʻa e ʻOtuá, ʻokú ne toe fakalahi mai mo e tui ki he tui ko iá. …

“Ko e Meʻa-foaki ʻo e Faifakamoʻuí. ʻOku ou ʻi hení ke u fakamoʻoni ki ha fakamoʻui mahaki ʻe laungeau ne fai ki ha kakai tangata, kakai fefine, mo ha fānau, ʻaki ʻa e mālohi ʻo e ʻOtuá, ʻo fakafou ʻi he hilifaki ʻo e nimá, pea kuó u mamata ki ha tokolahi ʻi hono fokotuʻu mei he matapā ʻo e maté, ʻo fakafoki mai mei he ngutungutu ʻo ʻitānití; pea ne ʻi ai mo ha niʻihi ne ʻosi mavahe honau laumālié mei honau sinó, ne toe foki mai. ʻOku ou fakamoʻoni ne u ʻosi mamata ki hono fakamoʻui ʻo e mahakí ʻi he hilifaki ʻo e nimá, ʻo fakatatau mo e talaʻofa ʻa e Fakamoʻuí. …

“Kikité, Fakahaá, mo e ʻIIo. ʻE lava ke hoko ʻa e fefine mo e tangata kotoa ko ha taha maʻu fakahā, mo maʻu ha fakamoʻoni kia Sīsū, ʻa ia ko e laumālie ia ʻo e kikité, pea mo lava ke sioloto atu ki he finangalo ʻo e ʻOtuá fekauʻaki mo kinautolú, tukuange ʻa e koví, kae fili ʻa ia ʻoku leleí” (Ngaahi Akonaki ʻa e Kau Palesiteni ʻo e Siasí: Pilikihami ʻIongi [1997], 252–53).

“Puke maʻu ‘a e meʻa-foaki lelei kotoa pē.”

Naʻe fakamatalaʻi ʻe Palesiteni Tālini H. ʻOakesi ʻa e founga hono tāpuekina ʻene faʻeé ʻe he fekumi ki he ngaahi meʻa-foaki fakalaumālié: “ʻI he mālōlō hono husepānití, naʻe ʻikai kakato e moʻui siʻeku faʻē kuo uitoú. Naʻá ne lotu lahi ki he ngaahi meʻa naʻá ne fie maʻu ke fakahoko hono fatongia ke ohi hake ʻene kiʻi fānau iiki ʻe toko tolú! Naʻá ne fekumi, naʻá ne moʻui taau, pea naʻe fai tāpuekina ia! Naʻe tali ʻene ngaahi lotú ʻi ha ngaahi founga kehekehe, kau ai hano maʻu ʻo ha ngaahi meʻa-foaki fakalaumālie. Naʻe lahi, ka ko e ngaahi meʻa ʻoku mahuʻinga ʻi heʻeku manatú ko e ngaahi meʻa-foaki ʻo e tuí, fakamoʻoní, mo e poto” (“Spiritual Gifts,” Ensign, Sept. 1986, 72).

Fakatupulaki ʻEtau Founga Akoʻí

Tuku ha taimi ke feʻinasiʻaki ai e kau akó. “ʻI he taimi ʻoku vahevahe ai ʻe he kau akó ʻa e meʻa ʻoku nau akó, ʻoku ʻikai ngata pē heʻenau ongoʻi hono fakamālohia ʻe he Laumālié ʻenau fakamoʻoní, ka te nau fakalotolahiʻi foki e toenga ʻo e kalasí ke nau ʻiloʻi e moʻoní ʻiate kinautolu pē”(Ko e Faiako ʻi he Founga ʻa e Fakamoʻuí, 30).