“ʻAho 21–27 ʻo Tīsemá. Kilisimasí: ‘Te Ne Hāʻele Mai ki he Māmaní ke Huhuʻi Hono Kakaí,’’” Haʻu, ʻo Muimui ʻIate Au—Maʻá e Lautohi Faka-Sāpaté: Tohi ‘a Molomoná 2020 (2020)
“ʻAho 21–27 ʻo Tīsemá. Kilisimasí,” Haʻu, ʻo Muimui ʻIate Au—Maʻá e Lautohi Faka-Sāpaté: 2020
Vakai ki he Lami ʻa e ʻOtuá, tā fakatātaaʻi ʻe Walter Rane
ʻAho 21–27 ʻo Tīsemá
Kilisimasí
“Pea te Ne Hāʻele Mai ki he Māmaní ke Huhuʻi Hono Kakaí”
ʻI hoʻomou ako ko ia e ʻaloʻi ʻo Sīsū Kalaisí he uike ní, fakakaukau pe te ke tokoniʻi fēfē hoʻo kalasí ke fakamālohia ʻenau fakamoʻoni kia Sīsū Kalaisi pea mo ʻEne Fakaleleí. ʻE lava ke tokoni ha niʻihi ʻo e ngaahi fakakaukau ʻi he lēsoni ko ʻení.
Lekooti ʻa e Ngaahi Ongo ʻOkú ke Maʻú
Fakaafeʻi e Feʻinasiʻakí
Fakaafeʻi ʻa e kau mēmipa ʻo e kalasí ke nau tauhoa pe faʻu ha fanga kiʻi kulupu pea vahevahe ʻa e founga kuo hanga ai ʻe he ako he taʻú ni kia Sīsū Kalaisi ʻi he Tohi ʻa Molomoná ʻo fakamālohia ʻenau tui kiate Ia mo ʻEne ngaahi akonakí.
Akoʻi e Tokāteliné
1 Nīfai 11:13–23; Hilamani 14:1–13; 3 Nīfai 1:4–22
Naʻe ʻaloʻi ʻa Sīsū Kalaisi ke hoko ko hotau Fakamoʻui.
-
Te ke fakaʻaongaʻi fēfē ʻa e Tohi ʻa Molomoná ke akoʻi e kau mēmipa ʻo e kalasí fekauʻaki mo hono ʻaloʻi toputapu ʻo e Fakamoʻuí? Ko ha founga ʻe taha ko hano vahevahe ʻa e kalasí ki ha kulupu ʻe tolu pea ʻoange ki he kulupu takitaha ha taha ʻo e ngaahi potufolofola ko ʻení ke nau lau fakataha: 1 Nīfai 11:13–23; Hilamani 14:1–13; mo e 3 Nīfai 1:4–22. Kole ki he ngaahi kulupú ke nau aleaʻi ʻa e meʻa ʻoku akoʻi ʻe he ngaahi potufolofola ko ʻení fekauʻaki mo e ʻaloʻi ʻo e Fakamoʻuí. Hili ia pea ʻe lava ke vahevahe ʻe he kulupu takitaha mo e toenga ʻo e kalasí ʻa e meʻa naʻa nau aleaʻí. Ko e hā ʻoku mahuʻinga ai ke maʻu ʻa e fakamoʻoni ʻo e Tohi ʻa Molomoná ki he aloʻi ʻo e Fakamoʻuí?
-
ʻOku mahuʻinga ke ʻilo ki he ʻaloʻi ʻo Kalaisí, ka ʻoku mātuʻaki mahuʻinga ke ʻilo hono ʻuhinga naʻe aloʻi aí. Te ke tokoniʻi fēfē ʻa kinautolu ʻokú ke akoʻí ke nau fakalaulauloto ki he mālohi huhuʻi ʻo Sīsū Kalaisí? Mahalo naʻa lava ke vahevahe ʻe he kau mēmipa ʻo e kalasí ha niʻihi ʻo e ngaahi talanoa mo e ngaahi potufolofola ne nau ako ʻi he uike ko ʻení (vakai, lēsoni ‘o e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Poupou’i kinautolu ke nau vahevahe ʻa e founga naʻe fakatupulaki ai ʻe he ngaahi meʻa ne nau akó ʻa ʻenau houngaʻia ʻi he ʻaloʻi ʻo e Fakamoʻuí mo Hono mālohi huhuʻí.
-
Ke kamataʻi ha fealēleaʻaki ki he ngaahi meʻa-foaki kuo foaki mai ʻe he ʻOtuá ʻo fakafou mai ʻi Hono ʻAló, te ke lava ʻo fakaafeʻi ha niʻihi tokosiʻi ʻo e kau mēmipa ʻo e kalasí ke nau fakamatala ki ha ngaahi meʻaʻofa mahuʻinga ne nau maʻu ʻi he Kilisimasí. ʻOku tau fakahaaʻi fēfē ʻetau houngaʻia ʻi he ngaahi meʻaʻofa ʻoku tau maʻú? Hili ia pea ʻe lava ke lau ʻe he kau mēmipa ʻo e kalasí ʻa e lea ʻa Palesiteni Tōmasi S. Monisoni ʻi he “Ngaahi Maʻuʻanga Tokoni Kehé” pea aleaʻi ʻa e ngaahi meʻaʻofa ʻe fā naʻe lau ki ai ʻa Palesiteni Monisoní. Ko e hā e fatongia ʻo e Fakamoʻuí ʻi he ngaahi meʻaʻofa ko ʻení? Te tau fakahaaʻi fēfē ʻetau houngaʻia ki he Tamai Hēvaní koeʻuhí ko e ngaahi meʻaʻofa ko ʻení?
-
Fakakaukau ke ke fakaafeʻi e kau mēmipa ʻo e kalasí ke nau tā pe hivaʻi ha ngaahi himi faka-Kilisimasi, ko ha konga hoʻomou aleaʻi ʻo e Kilisimasí. Te mou toe lava foki ke vakavakaiʻi ha niʻihi ʻo e ngaahi maʻuʻanga tokoni kuo hiki ʻi he “Ngaahi Maʻuʻanga Tokoni Kehé.”
Peesi talamuʻaki ‘o e Tohi ʻa Molomoná; talateu ki he Tohi ‘a Molomoná; 2 Nīfai 25:23, 26; 33:4, 10
ʻOku fakamoʻoni e Tohi ʻa Molomoná kia Sīsū Kalaisi.
-
ʻI he ʻamanaki ʻosi hoʻomou ako e Tohi ʻa Molomoná ʻi he Lautohi faka-Sāpaté, mahalo naʻa fie maʻu ke ke ʻoange ki he kau mēmipa ʻo e kalasí ha faingamālie ke nau fakakaukau ai ki ha meʻa ne nau ako fekauʻaki mo Sīsū Kalaisi ʻi he Tohi ʻa Molomoná he taʻú ni. Ke tokoni ke kamataʻi ha fealēleaʻakí, te mou lava ʻo lau fakataha ʻa e 2 Nīfai 25:23, 26 mo e 33:4, 10, pea pehē mo e ngaahi konga mei he talateu ki he Tohi ʻa Molomoná mo e peesi talamuʻakí. Te ke lava foki ke vahevahe ha talanoa pe potufolofola naʻá ne ʻomi koe ke ofi ange kia Sīsū Kalaisi pea toki ʻoange ha ngaahi miniti siʻi ki he kau mēmipa ʻo e kalasí ke nau vahevahe ai ʻenau ngaahi talanoá pe ngaahi potufolofolá. Fai haʻo fakamoʻoni ki he Tohi ʻa Molomoná, pea fakaafeʻi ʻa e kau mēmipa ʻo e kalasí ke nau fai e meʻa tatau.
Poupouʻi e Ako ʻi ʻApí
Ke ueʻi ʻa e kau mēmipa ʻo e kalasí ke nau kamata lau ʻa e Tokāteline mo e Ngaahi Fuakavá, te ke lava ʻo vahevahe haʻo veesi manako pe ha aʻusia fakalaumālie ne ke maʻu ʻi he lolotonga hoʻo ako e Tokāteline mo e Ngaahi Fuakavá.
Ngaahi Maʻuʻanga Tokoni Kehé
Ngaahi maʻuʻanga tokoni ‘o e Kilisimasí.
-
Ngaahi ʻīmisi ʻi he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.
-
“Kuo Aloʻi ha Fakamoʻui— vitiō faka-Kilisimasi” (vitiō, ChurchofJesusChrist.org)
2:3 -
ʻGood Tidings of Great Joy: The Birth of Jesus Christ” video
-
First Presidency Christmas Devotionals (ChurchofJesusChrist.org/broadcasts/first-presidency-christmas-devotionals)
Ko e ngaahi meʻaʻofa ʻa e Fakamoʻuí
Naʻe akoʻi ʻe Palesiteni Tōmasi S. Monisoni:
“‘Oku ou fakakaukau ki he ngaahi faikehekehe ʻo e Kilisimasí. ‘Oku aʻu ki ha ngaahi meʻaʻofa totongi mamafa, kofukofuʻi fakapalofesinale, ʻi honau tuʻunga māʻolunga taha ʻi he katiloka fakakomēsialé pea tuʻu ai ʻa e fakamatala ‘Ki he tokotaha ʻokú ne maʻu e meʻa kotoa peé.’ Naʻá ku fakatokangaʻi ha taha ʻo e ngaahi tohi peheé ʻoku kofukofuʻi ai ha ʻapi sikuea fute ʻe fā afe, ʻaki ha fuʻu loufau lahi mo ha kaati taʻe fakatataua ʻoku pehē, “Maʻu ha Kilisimasi Fiefia.” ʻOku kau mo ha ngaahi meʻa kehe ʻa ia ʻoku kau ai ha ngaahi ʻakau tāpulu kuo fakafonofono taiamoni maʻá e tokotaha tāpulú, ʻeva vaka ʻi he feituʻu Kalipiané ki ha taha, pea mo ha folau fakatuʻumālie ki he ʻOtu ʻĀlipí ʻi Suisalani ki ha taha. ʻOku hangē ʻoku feʻunga ia mo e kaveinga ʻo ha fakatātā fakaoli ʻo e Kilisimasí ʻoku hā ai e fononga ʻa e Kau Poto ʻe Toko Tolú ki Pētelihemá mo e ngaahi puha meʻaʻofá ʻi heʻenau fanga kāmelí. ʻOku pehē ʻe ha taha, ‘Tokanga ki heʻeku leá, Pelifasa, ʻoku tau kamata ha faʻahinga meʻa ʻaki e ngaahi meʻaʻofa ko ʻení ʻa ia he ʻikai toe lava ʻo mapuleʻi!’…
“Tau fakangaloʻi muʻa ʻi ha ngaahi miniti siʻi ʻa e ngaahi makasini ʻo e Kilisimasí, mo honau ngaahi meʻaʻofa ʻoku fungani hono fakamatalaʻí. ʻOua te tau fakakaukau ki he ngaahi matalaʻiʻakau maʻá e Faʻeé, ʻa e hēkesi makehe maʻá e Tamaí, ʻa e kiʻi tamapua fakaʻofoʻofá, ʻa e lēlue ʻoku leá, ʻa e pasikala ne tali fuoloa ki aí … kae fakahangatonu ʻetau fakakaukaú ki he ngaahi meʻa-foaki ʻofa mei he ʻOtuá ʻoku tuʻuloá. Kuó u fili mei ha lisi ʻo ha ngaahi meʻa lahi ha meʻa pē ʻe fā: …
“‘Uluakí, ko e meʻaʻofa ʻo e ʻaloʻí. Kuo foaki kakato ia kiate kitautolu takitaha. Ko hotau faingamālie fakalangi ke mavahe mei hotau ʻapi fakalangí ki ha sino fakamatelie pea mo fakahaaʻi ʻaki ʻetau moʻuí ʻa ʻetau taau mo feʻunga ke foki ʻi ha ʻaho kiate Ia, ko ha kakai mahuʻinga ʻoku tau ʻofa ai, pea mo ha puleʻanga ʻoku ui ko e puleʻanga fakasilesitialé. Ko hotau fatongia ke fakahaaʻi ʻetau houngaʻiá ʻaki ʻetau tōʻonga ʻi heʻetau moʻuí. …
“Uá, ko e meʻaʻofa ʻo e melinó. ʻI he māmani vātau ʻoku tau nofo aí, ʻuʻulu ʻa e ngaahi meʻalelé, longoaʻa ʻa e ngaahi tuʻuaki he mītiá, pea mo e ngaahi fiemaʻu ki hotau taimí—ʻo ʻikai ha lave ia ki he ngaahi palopalema ʻo e māmaní—ʻoku fakatupu langa ʻulu, fakatupu felāngaaki, mo holoki hotau ivi ke matuʻuakí. …
“ʻOku folofola mai ʻa Ia naʻá ne fuesia ʻa e mamahí mo maheni mo e loto-mamahí, ki he loto mafasia kotoa pē mo foaki mai ʻa e meʻaʻofa ʻo e melinó. ‘ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia’ (Sione 14:27). …
“Tolú, ko e meʻaʻofa ʻo e ʻofá. Naʻe ʻeke ʻe he loea naʻe fakataufolofola kia Sīsuú, ‘ʻEiki, ko e fekau fē ’oku lahi ‘i he fono?’ Ko e talí: “Ke ke ʻofa ki he ʻEiki ko ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa.
“Ko e ʻuluaki pea ko e lahi ia ʻo e fekaú.
“Pea ko hono ua ʻoku tatau mo iá, Ke ke ʻofa ki ho kaungāʻapí ʻo hangē pē ko koé” (Mātiu 22:36–39). …
“Faá, ko e meʻaʻofa ʻo e moʻuí—ʻa e moʻui taʻe-faʻa-maté. ʻOku ʻi he palani ʻa ʻetau Tamai Hēvaní ʻa e ongoʻi taupotu taha ʻo e ʻofa moʻoní. Ko e meʻa kotoa ʻoku tau fakamahuʻingaʻí, ʻa hotau ngaahi fāmilí, hotau ngaahi kaungāmeʻá, ʻetau fiefiá, ʻetau ʻiló, ʻetau fakamoʻoní, ʻe mole ka ne taʻeʻoua ʻetau Tamaí mo Hono ʻAlo ko Sīsū Kalaisí. ʻOku kau ʻi he ngaahi fakakaukau mo e ngaahi tohi mahuʻinga taha ʻi he māmaní ʻa e fakamatalaʻi fakalangi ʻo e moʻoní: ‘He naʻe ʻofa pehē ʻa e ‘Otuá ki māmani, naʻá ne foaki hono ʻAlo pē taha naʻe fakatupú, koeʻuhí ko ia kotoa pē ‘e tui kiate iá ke ʻoua naʻa ‘auha, kae maʻu ʻa e moʻui taʻengatá’ (Sione 3:16)” (“Gifts,”Ensign, May 1993, 59–62).
Fakatupulaki ʻEtau Founga Akoʻí
ʻOku sai pē ke te pehē “ʻOku ʻikai ke u ʻilo.” Neongo ‘oku totonu ke ke fai ho lelei tahá ke tali ha ngaahi fehuʻi ʻa e kau mēmipa hoʻo kalasí fekauʻaki mo e ongoongoleleí, ka ʻoku ʻikai ʻamanaki ʻa e ʻEikí ke ke ʻilo e meʻa kotoa. Ko e taimi ʻoku ʻikai ke ke ʻilo ai ha founga ke tali ha faʻahinga meʻá, fakakaukau ke ke tali ʻaki haʻo fakaafeʻi ʻa e kalasí ke nau fekumi fakataha ki ha tali ʻi he folofolá pea vahevahe ʻa e meʻa ʻoku nau maʻú. (Vakai, Ko e Faiako ʻi he Founga ʻa e Fakamoʻuí, 24