E ’orometua ha’api’i ’oe i roto i te ’Ēkālesia a Iesu Mesia

’Ua pi’ihia ’oe e te Atua nō te ha’api’i i tāna mau tamari’i mai tā te Fa’aora i ha’api’i. ’Ua fa’ata’ahia ’oe i teie pi’ira’a nā roto i te mana o tōna autahu’ara’a mo’a. Noa atu ē, e ’ere ’oe i te hō’ē ’orometua ha’api’i ’aravihi, ’ia ora parau-ti’a rā ’oe, ’ia pure ’oe i te mau mahana ato’a, ’e ’ia tuatāpapa ’oe i te mau pāpa’ira’a mo’a, e hōro’a mai te Metua i te Ao ra i te fa’aurura’a ’e te mana o te Vārua Maita’i ia ’oe (hi’o 2 Nephi 33:1).

Te feiā tei tu’uhia mai i raro a’e i tā ’oe ti’a’aura’a, e mau tamari’i ïa nā te Metua i te Ao ra, ’e ’ua ’ite ’oia e aha tei tītauhia nō rātou, ’e nāhea i te toro maita’i a’e i te rima ia rātou. Nā roto i te Vārua Maita’i, e arata’i te Atua ia ’oe i roto i tā ’oe fa’aineinera’a ’e i te taime e ha’api’i ai ’oe. E heheu mai ’oia ia ’oe i te mea e parau ’e te mea e rave (hi’o 2 Nephi 32:5).

Te tumu faufa’a rahi nō te ha’api’ira’a i te ta’ata i te ’evanelia ’e te ha’api’ira’a mai i te reira, ’o te tauira’a ïa i te mau orara’a. Tā ’oe fā ’ei ’orometua ha’api’i o te tauturura’a ïa i te feiā tā ’oe e ha’api’i ra ’ia rave i te mau mea ato’a e rahi atu ā tō rātou fa’afāriura’a i te ’evanelia a Iesu Mesia—e tauto’ora’a ’o te ’ore e tupu i roto ana’e i te taime ha’api’ira’a. E ani i te feiā tā ’oe e ha’api’i ra ’ia ’āmui itoito mai i te ha’api’ira’a mai i te mau parau tumu ’e te ha’api’ira’a tumu a Iesu Mesia, ’e ’ia rave mai te au i te mea tā rātou i ’apo mai. E fa’aitoito ia rātou ’ia fa’ariro i tā rātou iho tuatāpapara’a ’e te tuatāpapara’a ’utuāfare i rāpae’au i te piha ha’api’ira’a ’ei fā mātāmua nō tā rātou tuatāpapara’a ’evanelia. ’Ia tuatāpapa ana’e rātou rātou iho ’e tō rātou ’utuāfare ma te fa’aro’o, e tītau manihini rātou i te Vārua i roto i tō rātou orara’a ’e nā te Vārua e fa’atupu i te fa’afāriura’a mau. Te mau mea ato’a tā ’oe e rave ’ei ’orometua ha’api’i, nō taua fā mo’a nei ïa.

E ha’api’i noa i te ha’api’ira’a tumu o te ’evanelia a Iesu Mesia i fa’aho’ihia mai ’e mai tei ’itehia i roto i te mau pāpa’ira’a mo’a ’e i te mau parau a te mau peropheta i te mau mahana hope’a nei. E tītau manihini te ha’api’ira’a tumu ateate—te parau mau mure ’ore ’e te tāuiui ’ore tei ha’api’ihia e te Atua ’e e tāna mau tāvini—i te Vārua ’e e mana ho’i tō te reira nō te fa’ataui i te mau orara’a.

Te pi’ira’a ’ia ha’api’i e ti’aturira’a mo’a ïa, ’e i te tahi mau taime e tae mai te mana’o ē, e’ita e mara’a ia ’oe. ’A ha’amana’o rā ē, nā tō ’oe Metua i te Ao ra i pi’i ia ’oe, ’e e ’ore roa ’oia e fa’aru’e ia ’oe. E ’ohipa teie nā te Fatu, ’e ’a tāvini ai ’oe « ma tō ’ā’au atoa, ma tō itoito ato’a, ma tō mana’o atoa, ’e tō pūai ato’a » (PH&PF 4:2), e fa’arahi ’oia i tō ’oe mau ’aravihi, mau hōro’a ’e mau tārēni ’e e ha’amaita’i tā ’oe tāvinira’a i te orara’a o te feiā tā ’oe e ha’api’i ra.