vahine e paraparau ra i roto i te piha ha’api’ira’a

Fa’a’ohipa i te Mai, pe’e mai—nō te Ha’api’ira’a Sābati

Fa’aineine nō te ha’api’i i roto i te Ha’api’ira’a Sābati

’Ia riro te tuatāpapara’a ta’ata hō’ē ’e te tuatāpapara’a ’utuāfare ’ei pū nō te ha’api’ira’a ’evanelia. E parau mau te reira nō ’oe ’e nō te mau ta’ata tā ’oe e ha’api’i ra. ’A fa’aineine ai ’oe nō te ha’api’i, ’a ha’amata nā ni’a i te fāri’ira’a i tō ’oe iho ’ite nō ni’a te mau pāpa’ira’a mo’a. E tupu ïa tā ’oe fa’aineinera’a faufa’a roa a’e i te ’imira’a ’oe i roto i te mau pāpa’ira’a mo’a ’e i te tītaura’a i te fa’aurura’a a te Vārua Maita’i.

’Ua riro te Mai, pe’e mai—nō te ta’ata hō’ē ’e te ’utuāfare ’ei tufa’a faufa’a rahi nō tā ’oe iho tuatāpapara’a ’e tā ’oe fa’aineinera’a nō te ha’api’i. E tauturu te reira ’ia noa’a te hāro’aro’a hōhonu a’e nō ni’a i te mau parau tumu o te ha’api’ira’a tumu e ’itehia i roto i te mau pāpa’ira’a mo’a. E noa’a ïa ia ’oe ’ia fa’auru ’e ’ia ani i te mau pīahi ’ia fa’a’ohipa i te Mai, pe’e mai—nō te ta’ata hō’ē ’e te ’utuāfare nō te fa’ananea atu ā i tā rātou iho tuatāpapara’a pāpa’ira’a mo’a ’e tā te ’utuāfare ho’i (nō te tauturu i te ravera’a i te reira, hi’o « Mau mana’o nō te fa’aitoitora’a i te tuatāpapara’a a te ta’ata iho ’e a te ’utuāfare » i roto i teie mātēria tauturu). ’A nā reira ai ’oe, e ha’amana’o i te vai ara noa i te mau pīahi ’aita te orara’a ’utuāfare e tauturu nei i te tuatāpapara’a pāpa’ira’a mo’a tāmau ’e te purera’a pō ’utuāfare tāmau.

I roto i tā ’oe fa’aineinera’a, e tae mai te mau mana’o ’e te mau fa’a’itera’a ia ’oe nō ni’a i te mau ta’ata tā ’oe e ha’api’i ra, nāhea te mau parau tumu i roto i te mau pāpa’ira’a mo’a e ha’amaita’i ai i tō rātou orara’a, ’e nāhea ’oe e nehenehe ai e fa’auru ia rātou ’ia ’ite mai i teie mau parau tumu ’a tuatāpapa ai rātou iho i te mau pāpa’ira’a mo’a.

Mau mana’o tauturu nō te ha’api’ira’a

’A fa’aineine ai ’oe ia ’oe nō te ha’api’i, e nehenehe e noa’a mai te tahi atu ā fa’aurura’a nā roto i te hi’ora’a i te mau arata’i ha’api’ira’a i roto i teie mātēria tauturu. ’Eiaha e fa’ariro i teie mau mana’o tauturu ’ei mau ta’ahira’a e rave hō’ē hō’ē, ’ei mau mana’o rā nō te fa’auru ia ’oe iho. ’Ua mātau ’oe i tā ’oe mau pīahi, ’e e riro ’oe i te mātau fa’ahou atu ia rātou ’a ha’api’i ’āmui ai ’outou i roto i te piha ha’api’ira’a. ’Ua mātau ato’a te Fatu ia rātou, ’e e fa’auru mai ’oia i te mau rāve’a maita’i roa a’e nō te tauturu i te mau pīahi ’ia patu i ni’a i te ha’api’ira’a ’evanelia tā rātou e rave nei i tō rātou fare.

E rave rahi atu ā mātēria tauturu e vai ra nō te tauturu ’ia ’oe ’ia fa’aineine, mai te mau mana’o o te Mai, pe’e mai—nō te ta’ata hō’ē ’e te ’utuāfare ’e te mau ve’a a te ’Ēkālesia. Nō te tahi atu ā ha’amāramaramara’a nō ni’a i teie mau mātēria tauturu ’e te tahi atu mau mātēria, ’a hi’o i te mau tuha’a « Te tahi atu mau mātēria tauturu ».

Te tahi mau mea e ha’amana’o noa

• ’O te fare te vāhi maita’i roa a’e nō te ha’api’i mai i te ’evanelia. ’Ei ’orometua ha’api’i, e hōpoi’a faufa’a rahi tā ’oe nō te pāturu, nō te fa’aitoito ’e nō te patu i ni’a i te ha’api’ira’a mai i te ’evanelia a te mau pīahi i te fare.

• E hōhonu atu ā te fa’afāriura’a o te mau pīahi i te ’evanelia a Iesu Mesia ’a hāro’aro’a ai rātou ’e ’a fa’a’ohipa ai i te ha’api’ira’a tumu mau. ’E fa’aitoito ia rātou ’ia pāpa’i ’e ’ia rave mai te au i te mau mana’o e tae mai ’ia rātou nō ’ō mai i te Vārua Maita’i.

• ’Ua hau atu te ha’api’ira’a i te a’o-noa-ra’a, ’ua hau ato’a rā te reira i te arata’i-noa-ra’a i te hō’ē tau’ara’a parau. Te tahi tuha’a o tā ’oe ’ohipa, ’o te fa’aitoitora’a ïa ia rātou ’ia parau mai i tō rātou mana’o ma te fa’atumu i ni’a i te mau pāpa’ira’a mo’a. ’Ia fa’a’ite ato’a ’oe i te mau mea fa’auru tā ’oe i ’apo mai i te tuatāpapara’a ’oe i te mau pāpa’ira’a mo’a.

• Tē hina’aro nei te Metua i te Ao ra ’ia manuia ’oe ’ei ’orometua ha’api’i. ’Ua hōro’a mai ’oia e rave rahi mātēria nō te tauturu ia ’oe ’ia manuia, ’oia ato’a te mau rurura’a ’āpo’ora’a ’orometua ha’api’i. I roto i teie mau rurura’a, e nehenehe tā ’oe e ’āpo’o ’e te tahi atu mau ’orometua ha’api’i nō ni’a i te mau fifi tā ’oe e fa’aruru nei. E nehenehe ato’a tā ’oe e tau’aparau ’e e fa’a’ohipa i te mau parau tumu nō te ha’api’ira’a mai tā te Mesia te huru.

• E ha’api’i maita’i mai te ta’ata ’ia fāna’o ’oia i te rāve’a nō te ha’api’i atu i te ta’ata. I te tahi taime, e nehenehe e fa’ati’a i te mau pīahi, te feiā ’āpī ato’a, ’ia ha’api’i i te hō’ē tufa’a o te ha’api’ira’a. A ha’amau i teie fa’aotira’a ’ia au i te mau hina’aro ’e te mau ’aravihi ’o te mau pīahi. Mai te mea e ani ’oe i te hō’ē pīahi ’ia ha’api’i, ’a rave i te taime nō te tauturu atu iāna ’ia fa’aineine nā mua roa ma te fa’a’ohipara’a i te mau mana’o e ’itehia i roto i teie mātēria tauturu ’e i roto i te Mai, pe’e mai—nō te ta’ata hō’ē ’e te ’utuāfare. ’A ha’amana’o ē, ’ei ’orometua ha’api’i i pi’ihia, tei ia ’oe te hōpoi’a nō te ha’api’i i te mea e ha’api’i i roto i te piha ha’api’ira’a.

• Tei roto i teie mātēria tauturu te mau arata’ira’a ha’api’ira’a nō te mau hepetoma ato’a o te matahiti, maori rā nā sābati e piti e tupu ai te ’āmuira’a rahi. I te mau sābati, ’aita ana’e te Ha’api’ira’a Sābati e fa’aterehia nō te ’āmuira’a titi ’e ’aore rā nō te tahi atu tumu, e ti’a i te mau ’utuāfare e tāmau noa i te tai’o i te Buka a Moromona i te fare mai te au i te tārena i fa’ata’ahia i roto i te Mai, pe’e mai—nō te ta’ata hō’ē ’e te ’utuāfare. Nō te ’āpe’e i te tārena a te Ha’api’ira’a Sābati, e ti’a ia ’oe ’ia mā’iti e vaiiho hō’ē ha’api’ira’a ’e ’aore rā ’ia ’āmui e piti ha’api’ira’a. ’Ia ’ore te ’āhuehue ’ia tupu, e ti’a i te mau peresideni Ha’api’ira’a Sābati e fa’aara ātea i te mau ’orometua nō te Ha’api’ira’a Sābati nō ni’a i teie mau tauira’a.