Hō’ē hōho’a nō te ha’api’ira’a

I roto i teie mātēria tauturu, e ’ite ’oe i teie nei hōho’a toru ta’ahira’a e fa’ahiti-noa-hia i roto i te mau arata’ira’a ato’a : tītau i te mana’o, ha’api’i i te ha’api’ira’a tumu, ’e fa’aitoito i te ha’api’ira’a mai i te fare. I roto i tā ’oe ha’api’ira’a, e nehenehe teie mau ta’ahira’a o te hōho’a e ’āno’i ’e ’aore rā e tupu i roto i te tahi ’ē atu ’ana’ira’a. ’Ei hi’ora’a, e nehenehe ē, ’o te fa’a’itera’a te rāve’a nō te ha’api’i i te ha’api’ira’a tumu, ’e ’o te ha’api’ira’a i te ha’api’ira’a tumu te rāve’a nō te anira’a ’ia fa’a’ite mai. Nā reira ato’a, e nehenehe e tupu mai te fa’aitoitora’a i te ha’api’ira’a mai i te fare nā roto i te hō’ē tau’ara’a parau i roto i te piha ha’api’ira’a. ’A vaiiho i te reira ’ia tupu au noa mai, nā roto i te pe’era’a i te mau muhumuhu a te Vārua nō te pāhono atu i te mau hina’aro o tā ’oe mau pīahi.

Tītau i te mana’o

’Ei tuha’a nō te mau ha’api’ira’a ato’a, e ani i te mau pīahi ’ia fa’a’ite mai i tā rātou i ’apo mai ’e te mau ’ohipa i tupu nō rātou i te hepetoma i ma’iri ’a tuatāpapa ai rātou i te mau pāpa’ira’a mo’a ’e ’a rave ai rātou i te mau mea e ’apohia mai, ’ei ta’ata hō’ē ’e ’ei ’utuāfare. ’A tauturu i te mau pīahi ’ia ’ite ē e mea faufa’a rahi roa tā rātou iho ha’api’ira’a mai i rāpae’au i te piha ha’api’ira’a. E’ita tō rātou fa’afāriura’a ta’ata hō’ē e tae mai nā roto ana’e i te ha’api’ira’a i te mahana sābati, nā roto ato’a rā i te mau mea tā rātou e rave i te mau mahana ato’a. ’Ia fa’aro’o ana’e te mau pīahi i te mau mea i tupu nō te tahi ’e te tahi, e mea pāpū ē, e fa’auruhia rātou ’ia tūtava i te ’imi i te ’ohipa mai te reira nō rātou iho.

E’ita te tā’āto’ara’a o te mau pīahi e tai’o i te mau pene nō te ha’api’ira’a tāta’itahi, ’e noa atu ē ’ua tai’o rātou, tē vai ra e’ita e au maita’i i te fa’a’ite mai i tō rātou mau mana’o. E ha’apāpū ē ’ua ’ite te mau pīahi ato’a ē, e tufa’a faufa’a rātou nō te piha ha’api’ira’a, ’ua tai’o rātou ’aore rā ’aita.

Ha’api’i i te ha’api’ira’a tumu

’Ia fa’atumu ’oe ’e te mau pīahi i ni’a i te ha’api’ira’a tumu—te mau parau mau mure ’ore o te ’evanelia—e ’itehia i roto i te mau tuha’a ’īrava tei fa’ata’ahia nō te tai’o. ’A tuatāpapa ai ’outou i te ha’api’ira’a tumu i roto i te mau pāpa’ira’a mo’a, e aha te mau ’īrava, te mau fa’ahitira’a parau, te mau ’ohipa i tupu, te mau uira’a ’e te tahi atu ā mau mātēria tauturu e nehenehe e fa’a’ite atu ? Nāhea ’oe e fa’a’ohipa ai i teie mau mātēria nō te tauturu i te mau pīahi ’ia ’ite ’e ’ia ta’a i te mau parau tumu o te ’evanelia ? Nāhea e nehenehe ai ia ’oe ’ia fa’aitoito i te mau pīahi ’ia pāpa’i ’e ’ia rave mai te au i te mau mana’o ’e te mau fa’a’itera’a tā rātou i fāri’i ?

Fa’aitoito i te ha’api’ira’a i te fare

I te pae hope’a o te ha’api’ira’a, ’a rave i te tahi taime nō te hi’o i te tau’ara’a parau nō te hepetoma nō muri mai. ’A feruri e nāhea i te fa’auru i te mau pīahi ’ia tāmau ā i te ’apo mai i te ha’api’ira’a i roto i Buka a Moromona, ’ei ta’ata hō’ē ’e ’ei ’utuāfare.