30 nō Tītema–5 nō Tēnuare

Mau ’api ’ōmuara’a o te Buka a Moromona

« Te tahi fa’ahou ’ite nō Iesu Mesia »

ʼA tuatāpapa i te ’api upo’o parau o te Buka a Moromona ʼe te ’ōmuaraʼa ; te mau ʼiteraʼa pāpū o nā ’ite toʼotoru o nā ’ite toʼovaʼu, ʼe a te peropheta Iosepha Semita; ʼe te « Hōʼē haʼamāramaramaraʼa poto nō niʼa i te Buka a Moromona ». ʼA nā reira ai ʼoutou, ’a ʼimi i te mau muhumuhuraʼa a te Vārua Maitaʼi e nāhea ʼoutou e nehenehe ai e faʼauru i tā ʼoutou mau pīahi ʼia haʼamata i te hōʼē tuatāpararaʼa faufaʼa rahi o te Buka a Moromona.

Pāpa’i i te mau mau mana’o e tae mai

Fa’a’ite mai i te mana’o

Nō te haʼamata, e nehenehe ʼoutou e ani i te tahi mau pīahi ’ia faʼaʼite mai i te tahi mea tā rātou i haʼapiʼi mai nā roto mai i te mau ʼapi upoʼo parau o te Buka a Moromona tei faʼarahi i tō rātou ʼiteraʼa pāpū nō niʼa i teie buka moʼa.

Ha’api’i i te ha’api’ira’a tumu

ʼApi upoʼo parau o te Buka a Moromona

E nehenehe te Buka a Moromona e haʼapūai i tō tātou faʼaroʼo ia Iesu Mesia.

• E ti’a i te taiʼoraʼa i te ʼapi upoʼo parau o te Buka a Moromona, tei pāpaʼihia e Moroni, e faʼaineine i tā ʼoutou mau pīahi ʼia tuatāpapa i te Buka a Moromona i teie matahiti. Nāhea te mau poroʼi i niʼa i te ʼapi upoʼo parau e faʼananea ai i tā rātou tuatāpaparaʼa ? Penei aʼe e nehenehe tā ʼoutou e pāpaʼi i te hōʼē ʼaore rā e piti atu mau uiraʼa i niʼa i te tāpura ’ere’ere—mai teie Nō te aha i noaʼa ai ia tātou te Buka a Moromona ? ʼaore rā Nāhea te Buka a Moromona i taʼa ʼē ai i te tahi atu mau buka ?—’e e ani i te mau pīahi ’ia ʼimi i te mau pāhonoraʼa ’a hiʼo tātaʼitahi ai rātou ʼaore rā nā te mau pea i te ʼapi upoʼo parau. I muri iho ’ia fa’a’ite mai rātou i te mau manaʼo tei tae mai ia rātou ra. E ti’a atoʼa ia ʼoutou ʼia faʼaitoito i te mau pīahi ’ia tuatāpapa i tā rātou mau ʼōpuaraʼa nō te taiʼo i te Buka a Moromona i teie matahiti. ʼEi hiʼoraʼa, e aha tā rātou e ʼimi ? Nāhea rātou i te haʼapiʼi mai nā roto mai i te Vārua Maitaʼi ’a tuatāpapa ai rātou ?

• ʼUa faʼahitihia te hōʼē o te mau tumu faufaʼa rahi roa aʼe o te Buka a Moromona i niʼa i te ʼapi upoʼo parau : ʼia faʼaʼite pāpū atu hoʼi « i te ’āti Iuda ʼe i te Etene atoʼa hoʼi e, o Iesu te Mesia ». E nehenehe ʼoutou e ani i te mau pīahi ’ia faʼaʼite mai i te mau tufaʼa nō roto mai i te Buka a Moromona tei haʼapūai i tō rātou faʼaroʼo ia Iesu Mesia (e nehenehe atoʼa tā rātou e taiʼo i te mau tufaʼa tei tāpurahia i roto i « Te tahi atu ā mau rāveʼa tauturu »). E nehenehe te mau pīahi e taiʼo i te tahi o teie mau ʼīrava ’e te tahi pīahi i pihaʼi iho iāna ’e ʼia faʼaʼite mai e nāhea te Buka a Moromona i te fa’auru i tō rātou ʼiteraʼa pāpū nō te Faʼaora.

’Ōmuara’a o te Buka a Moromona

E tauturu te Buka a Moromona ia tātou « ʼia ha’afātata atu i te Atua ».

• E hōroʼa mai te ʼōmuaraʼa o te Buka a Moromona i te mau haʼamāramaramaraʼa faufaʼa rahi i te feiā taiʼo ʼia ta’a maita’i. E fana’o tā ʼoutou mau pīahi nā roto i te tuatāpaparaʼa i te ʼōmuaraʼa ʼe te ʼiteraʼa mai e toru e tae atu e pae tumu parau e nehenehe e tauturu nō te faʼaʼite atu i te tahi ’ē taʼata e taiʼo ra i te Buka a Moromona nō te taime mātāmua roa. I muri iho ’ia fa’a’ite mai te mau pīahi i te mea tā rātou i ʼite mai. E hinaʼaro atoʼa paha rātou e ha’uti i te hō’ē ti’ara’a i roto i te ’ōmuara’a o te Buka a Moromona i te hō’e ta’ata. E nehenehe te video tei faʼahitihia i roto i « Te tahi atu ā mau rāveʼa tauturu » e tauturu atoʼa.

• Tē vai ra paha tō te tahi mau pīahi mau ʼohipa i tupu tei haʼapāpū mai i te parau mau a te mau parau a Iosepha Semita : « E piri roa atu te hō’ē ta’ata i te Atua nā roto i te tamau-māite-ra’a i tāna mau ture [a te Buka a Moromona] i te hō’ē noa atu buka ». E ani i te mau pīahi ’ia faʼaʼite mai e mea nāhea te oraraʼa i te mau parau mau tā rātou i ʼapo mai i roto i te Buka a Moromona i tauturu ai ia rātou ’ia piri roa atu i te Atua. E ti’a atoʼa ia ʼoutou e ani i te mau pīahi ’ia faʼaʼite mai i te mau pāhonoraʼa i teie nā uiraʼa e toru tei uihia e te peresideni Russell M. Nelson : « ʼA tahi, e aha te huru o tō ’outou orara’a ʼāhani ’aita te Buka a Moromona ? Te piti, e aha tā ’outou e ’ore e ’ite ? ’E te toru, e aha tā ’outou e ’ore e fana’o ? » (« Te Buka a Moromona : E aha ïa te huru tō ’outou orara’a ’āhani ’aita te reira ? » (Ensign ʼaore rā Liahona, Novema 2017, 63).

• ʼUa taiʼo ānei te tahi pīahi i te mau tuhaʼa o te Buka a Moromona e tē vai ra te mau iʼoa huru ʼē nō te ʼōpuaraʼa nō te faʼaoraraʼa, mai tei parauhia i roto i te Mai, peʼe mai—nō te taʼata hō’ē ’e te ʼutāfare ? Mai te mea ē, ʼa ani ïa ia rātou ’ia fa’a’ite mai e aha tā rātou i haʼapiʼi mai.

« E parau faʼaʼite a nā ʼite toʼotoru » ; « E parau faʼaʼite a nā ʼite toʼovaʼu »

E ti’a ia tātou pāʼātoʼa ’ia riro ʼei mau ʼite nō te Buka a Moromona.

• E ti’a i te tuatāpaparaʼa i te mau ʼiteraʼa pāpū o nā ʼite toʼotoru ʼe o nā ʼite toʼova’u i te haʼapūai i te mau ʼiteraʼa pāpū o tā ʼoutou mau pīahi ʼe ʼia tauturu ia rātou ʼia feruri e nāhea e nehenehe ai ia rātou ʼia faʼaʼite i tō rātou iho ʼiteraʼa pāpū. E ani atu i te ʼāfaraʼa o te mau pīahi ʼia taiʼo i te « Parau faʼaʼite a nā ʼite toʼotoru » ’e i te tahi atu ʼāfaraʼa i te « Parau faʼaʼite a nā ʼite toʼovaʼu » e ʼia faʼaʼite mai i te mau manaʼo ʼaore rā mau mea haʼihaʼi tei haru i tō rātou mau feruriraʼa. Nāhea teie nā ʼiteraʼa pāpū e piti i taʼa ʼē ai i te tahi ’e te tahi ? Nāhea teie nā ʼiteraʼa pāpū e piti e tū’ati ai ? E aha tā tātou e ʼapo mai nā roto mai i teie mau ʼite nō niʼa i te faʼaʼiteraʼa i tō tātou ʼiteraʼa pāpū ? Nō te haʼamata i te hōʼē ’āparauraʼa nō te aha e mea faufaʼa rahi o nā ʼite toʼotoru, e nehenehe ïa tā ʼoutou e faʼaʼite i te parau ʼa te peresideni Dallin H. Oaks ʼaore rā te ʼiteraʼa pāpū a John Whitmer i roto i « Te tahi atu ā mau rāveʼa tauturu », ʼaore rā e nehenehe ʼoutou e mataʼitaʼi i te video « Te parau faʼaʼite a nā ʼite toʼotoru » (ChurchofJesusChrist.org).

ʼUa faʼaʼite nā ʼite toʼotoru i tō ratou ʼiteraʼa pāpū nō ni’a i te Buka a Moromona.

« Te ʼiteraʼa pāpū o te peropheta Iosepha Semita »

E mauihaʼa ’o Iosepha Semita i roto i te rima o te Atua nō te faʼahaere mai i te Buka a Moromona.

• ʼUa mātau aʼena paha te mau pīahi i te mau ʼohipa i tupu tei faʼaʼitehia i roto i « Te ’itera’a pāpū o te peropheta Iosepha Semita », e nehenehe rā ʼoutou e tauturu ia rātou ʼia ʼimi i te mau ʼitera’a ʼāpī. ʼEi hiʼoraʼa, e ani ia rātou ʼia tāpura mai te mau ʼohipa tumu tei tupu i roto i te ʼāʼamu a Iosepha Semita. E aha tā tātou e nehenehe e parau nā roto mai i te ʼohipa i tupu iāna nō niʼa i te faufaʼa rahi tā te Fatu i tuʼu i niʼa i te Buka a Moromona ?

• Tē faʼatiʼa nei te hīmene « ʼUa pou mai ra Moroni » (Te mau Hīmene, no. 9) i te ʼāʼamu nō te taeraʼa mai o te Buka a Moromona. I muri aʼe i te hīmeneraʼa ʼaore rā te faʼaroʼoraʼa i teie hīmene, e nehenehe te mau pīahi e ʼite mai i te mau faʼahitiraʼa parau i roto i « Te ’itera’a pāapū o te peropheta Iosepha Semita » o te tūʼati ʼaore rā o te haʼapūai i te mau parau i roto i te hīmene.

Faʼaitoito i te haʼapiʼiraʼa mai i te fare

Nō te faʼauru i te mau pīahi ʼia taiʼo i te 1 Nephi 1–7, e ani ia rātou ’ia ʼimi i te mau manaʼo ʼaore rā te mau parau mau ’o te tauturu ia rātou i roto i tō rātou orara’a i teie taime—ʼei hiʼoaraʼa, te hōʼē fifi ʼutuāfare ʼaore rā te hōʼē piʼiraʼa i roto i te ʼĒkālesia.

Te tahi atu ā mau mātēria

Mau tufaʼa o te Buka a Moromona ’o te faʼaʼite pāpū nei nō Iesu Mesia.

• Mosia 3:5–8

• Alama 5:48 ; 7:10–13

• Helamana 5:12

• 3 Nephi 9:13–18 ; 11:6–14

• Moroni 10:32-33

Mau videos nō niʼa i te Buka a Moromona i niʼa i te ChurchofJesusChrist.org.

• « ʼŌmuaraʼa o te Buka a Moromona »

• « E aha te Buka a Moromona ? Hōʼē hiʼoraʼa e 60 tetoni »

• « Hōʼē ʼāʼamau nō te Buka a Moromona »

Nō te tahi atu ā mau rāveʼa, ʼa hiʼo i te mau video nō niʼa i te Buka a Moromona i niʼa i te ChurchofJesusChrist.org ʼaore rā te rāveʼa roro uira nō te Vairaʼa Buka ʼEvanelia.

Te faufa’a o nā ʼite toʼotoru.

ʼUa haʼamāramarama mai te peresideni Dallin H. Oaks nō te aha te ’itera’a pāpū o nā ʼIte Toʼotoru i riro ai ʼei mea pūai roa:

« Tē tiʼa nei te parau faʼaʼite a nā ʼite toʼotoru o te Buka a Moromona ma te pūai rahi. E tumu ʼe e rāveʼa rahi tā teie nā ʼite toʼotoru ’ia faʼaʼore i tōna iho ʼiteraʼa pāpū ʼāhani e mea haʼavare, ʼaore rā nō te mārō i te mau huʼahuʼa ʼāhani e mea tano ʼore. Mai tei ʼite-maitaʼi-hia, nō te mau auraʼa ʼore ʼaore rā te mau pohehaeraʼa tei tupu i te tahi atu feiā faʼatere o te ʼĒkālesia, ʼua huri-tātaʼitahi-hia nā ʼite toʼotoru i rāpae’au i te ʼĒkālesia a Iesu Mesia i te Feiā Mo’a i te mau Mahana Hope’a Nei, fātata e vaʼu matahiti i muri aʼe i te piʼaraʼahia tō rātou ʼiteraʼa pāpū. ʼUa haere pāʼātoʼa rātou i tō rātou iho haereʼa, ma te ʼore e ʼanaʼanatae i te pāturu i te hōʼē tautoʼoraʼa hape. E tae noa atu i te hōpeʼa ʼo tō rātou oraraʼa—mai te 12 e tae atu i te 50 matahiti i muri aʼe i tō rātou huriraʼahia i rāpae—ʼaita te hōʼē ʼo teie mau ʼite i hahi ʼē atu i tōna ʼiteraʼa pāpū tei piahia ʼaore rā i parau i te tahi mea ʼo te haʼapōuri i te parau mau o te reira buka » (« Te ʼite : Martin Harris », Ensign, Mē 1999, 36).

Te ʼiteraʼa pāpū o John Whitmer.

ʼUa parau ʼo John Whitmer, te hōʼē o nā ʼite toʼovaʼu o te Buka a Moromona: « Aita roa aʼe vau i faʼaroʼo e ʼua huna te hōʼē o nā ʼite toʼotoru ʼaore rā toʼovaʼu i te ʼiteraʼa pāpū tā rātou i parau… ʼUa haere tō mātou mau iʼoa nā te mau fenua atoʼa, te mau reo ʼe te mau nūnaʼa atoʼa mai te hōʼē heheuraʼa nō ō mai i te Atua ra. E e faʼatupu te reira i te mau ʼōpuaraʼa a te Atua mai te au i te parau i pāpaʼihia ra » (i roto Noel B. Reynolds, ed., Book of Mormon Authorship Revisited : The Evidence for Ancient Origins [1997], 55–56).

Ha’amaita’iraʼa i tā tātou ha’api’ira’a

’Imi i tō ’outou iho fa’aurura’a. ʼEiaha e faʼariro i teie mau faʼanahoraʼa ʼei mau arataʼiraʼa e tiʼa ia ʼoutou ʼia peʼe atu, e faʼaʼohipa rā i te reira nō te tītau i te mau manaʼo ʼaore rā nō te faʼatupu i tō ʼoutou iho manaʼo ’a feruri ai ʼoutou i te mau hinaʼaro o tā ʼoutou mau pīahi.