Lehi e rātere ra nā pīha’i iho i te Miti Ute’ute, nā Gary Smith

6–12 nō Tēnuare

1 Nephi 1–7

« E haere atu vau, e rave ho’i »

E haʼamata tā ʼoutou faʼaineineraʼa ʼei ʼorometua nō te haʼapiʼiraʼa sābati nā roto i tā ʼoutou iho tuatāpaparaʼa i te mau pāpaʼiraʼa moʼa. E ara maitaʼi ʼe e pāpaʼi i te mau muhumuhu vārua tā ʼoutou e fāriʼi. E nehenehe te Mai, peʼe mai—nō te ta’ata hō’ē ʼe te ʼutuāfare e tauturu i tā ʼoutou tuatāpaparaʼa.

Pāpa’i i te mau mana’o e tae mai

Fa’a’ite mai i te mana’o

E rave rahi paha o tā ʼoutou mau pīahi tei mātau maita’i i te 1 Nephi 1–7, i te mau taime atoʼa rā e taiʼo tātou i te mau pāpaʼiraʼa moʼa, e nehenehe tātou e haʼapiʼi mai i te mau parau mau e tano i tō tātou huru oraraʼa i teienei. Nō te haʼamata i tā ʼoutou tuatāpaparaʼa, penei a’e e nehenehe tā ʼoutou e ani i te mau pīahi e aha tā rātou i haʼapiʼi mai ʼaore rā i faʼahaʼamanaʼohia i roto i tā rātou tuatāpaparaʼa i teie hepetoma.

Ha’api’i i te ha’api’ira’a tumu

1 Nephi 1 ; 3–6

E tao’a faufaʼa rahi mau te mau pāpaʼiraʼa moʼa.

• Hōʼē poroʼi faufaʼa roa i roto i te Buka a Moromona ’o te faufaʼa rahi ïa o te parau a te Atua. E nehenehe te reira e riro ʼei hōʼē poroʼi maitaʼi nō te faʼaʼite atu ʼa haʼamata ai tā ʼoutou mau pīahi i te tuatāpapa i te Buka a Moromona. E ha’amata ʼoutou ma te ani atu i te pīahi tātaʼitahi ’ia māʼiti i te hōʼē pene i roto i te 1 Nephi 1 ; 3–6 ʼe ʼia taiʼo vitiviti atu i te reira, ma te ʼimi i te mau rāveʼa i haʼamaitaʼi-tiʼa-hia ai ʼaore rā nā roto i te tahi ’ē atu rāveʼa i te parau a te Atua, te mau melo nō te ʼutuāfare o Lehi. (E fana’o te mau pīahi ma te ravera’a i teie ’ohipara’a nā roto i te mau pupu na’ina’i.) Ani i muri iho i te mau pīahi ’ia fa’a’ite mai e aha tā rātou i ’ite mai. E aha tā teie mau ʼāʼamu e ha’api’i nei ia tātou nō ni’a i te faufaʼa rahi o te mau pāpaʼiraʼa moʼa ?

• Te hōʼē o tā ʼoutou mau fā ʼei ʼorometua haʼapiʼi ’o te faʼaitoitoraʼa ïa i te taʼata hō’ē ʼe te ʼutuāfare ʼia tuatāpapa i te ʼevanelia i rāpae’au i te piha haʼapiʼiraʼa. Penei a’e e ani ʼoutou i te mau pīahi ’ia hiʼopoʼa e nāhea tō Lehi tuatāpaparaʼa i te mau ʼapi veo (hiʼo 1 Nephi 5:10–19), ʼe i muri iho e ui atu ʼoutou i te mau uiraʼa mai teie i muri nei : E aha te huru o Lehi i mua i te mau pāpaʼiraʼa moʼa ? ʼUa ʼite ānei ʼoia i te faufaʼa i roto ia rātou ? E ti’a atoʼa i te mau pīahi ʼia hiʼohi’o i te poroʼi a Elder Richard G. Scott « Te mana o te pāpa’iraʼa moʼa », Ensign ʼaore rā Liahona,Novema 2011, 6–8) ʼaore rā e taiʼo i te hōʼē tufaʼa nō roto mai i teie poroʼi i roto i « Te tahi atu mau mātēria tauturu ». Nāhea tātou i te faʼaʼohipa i te mau haʼapiʼiraʼa a Elder Scott ʼa tuatāpapa ai tātou i te Buka a Moromona i teie matahiti ?

• ’Ei pupu, ’a hīmene i te hōʼē hīmene nō niʼa i te mau pāpaʼiraʼa moʼa, mai te « ʼIa taiʼo vau i te parau moʼa » (Te mau Hīmene, n° 169). E ani ʼoutou i te mau pīahi ’ia faʼaʼite mai, nāhea tā rātou tuatāpaparaʼa i te pāpaʼiraʼa moʼa i haʼamaitaʼi ai i tō rātou oraraʼa. E nehenehe atoʼa rātou e faʼaʼite mai e nāhea te mau pāpaʼiraʼa moʼa i te faʼaurura’a ia rātou ʼia « haere mai i… te Atua… ʼe ora ai » (1 Nephi 6:4).

1 Nephi 2:11–19 ; 3:28–31

E noaʼa ia tātou tō tātou iho ʼiteraʼa pāpū ʼia tāmarū anaʼe tātou i tō tātou ʼāʼau.

• ʼUa mātauhia ʼo Nephi nō tōna faʼaroʼo pūai i te Fatu, e riro paha ’ei tautururaʼa nō te mau pīahi ʼia ʼite rātou ē ʼua tītauhia iāna ʼia haʼa ʼia noaʼa tōna iho ʼiteraʼa pāpū—mai ia tātou pāʼātoʼa. Penei a’e e nehenehe te mau pīahi ’ia ʼite mai i roto i te 1 Nephi 2:16-19 e aha te mea i ti’a ai ia Nephi ʼia noaʼa tōna iho ʼiteraʼa pāpū. ’Ia hiʼopoʼa faʼahou rātou i te mau ʼīrava 11–14 nō te hiʼo i te tumu i ʼore ai i noaʼa ia Lamana ʼe ia Lemuela te hōʼē ʼiteraʼa pāpū. E riro paha e taime maitaʼi nō te ani i te mau pīahi ’ia faʼaʼite mai e nāhea te noaʼara’a tō rātou iho mau ʼiteraʼa pāpū.

• E hinaʼaro paha tātou i te tahi taime ’ia tupu mai te hōʼē temeio nō te noa’a ʼaore rā nō te haʼapūai i tō tātou ʼiteraʼa pāpū. ʼUa fārerei nā Lamana ʼe Lemuela i te hōʼē melahi, ʼe e au ra ʼaita roa tō rāua faʼaroʼo i maitaʼi mai. E aha tā te mau pīahi e haʼapiʼi mai nā roto mai i teie ʼohipa i tupu, tei faʼaʼitehia i roto i te 1 Nephi 3:28-31, nō niʼa i te mea tei haʼapūai i tō tātou iho ʼiteraʼa pāpū ? (hi’o ato’a 1 Nephi 2:16). ʼA feruri i te faʼaʼite atu i te faʼahitiraʼa parau a te peresideni Harold B. Lee i roto i « Te tahi atu mau mātēria tauturu ». E aha tā tātou e rave nō te ha’apūai i tō tātou ’itera’a pāpū ?

1 Nephi 3–4

E faʼaineine te Atua i te hōʼē rāveʼa nō tātou nō te rave i tōna hinaʼaro.

• E mea faʼahiahia te ʼohipa i tupu i te mau tamāroa a Lehi i roto i te 1 Nephi 3–4, tera rā, e rave rahi o tātou tei fāriʼi i te mau ’itera’a i reira tātou i te pe’era’a i te hinaʼaro o te Atua noa atu te fifi. ʼA taiʼo ai te mau pīahi i te 1 Nephi 3–4 i teie hepetoma, e aha te mau parau mau i ʼitehia mai e rātou tei faʼahaʼamana’o ia rātou i te tahi ʼohipa tei tupu ia rātou iho ? Penei aʼe e ani ʼoutou i te mau pīahi ’ia faʼaʼite mai i te mau ʼīrava tei haʼapiʼi i teie mau parau mau, ʼe e ani ia rātou ʼia faʼaʼite mai i te mau ʼohipa tei tupu i niʼa ia rātou. Nāhea teie mau parau mau e tauturu ai ia tātou ʼia ani anaʼe mai te Atua ia tātou ʼia rave i te tahi mea fifi ?

• E vāhi te mau pīahi nā roto i na pupu e toru ʼe e faʼataʼa i te pupu tātaʼitahi ʼia tuatāpapa i te hōʼē o te mau tāmataraʼa nō te tiʼi i te mau ʼapi veo ia Labana ra (hiʼo 1 Nephi 3:9–21 ; 1 Nephi 3:22–31 ; 4:1–4 ; ʼe 1 Nephi 4:5–38). E ani i muri iho i te pupu tātaʼitahi ’ia faʼaʼite mai e aha tā te mau tāmataraʼa tātaʼitahi e haʼapiʼi nei ia tātou nō niʼa i te faʼatupuraʼa i te hinaʼaro o te Atua. Nāhea teie mau hiʼoraʼa e tano ai i tā tātou iho mau tautoʼoraʼa ʼia rave i te hinaʼaro o te Atua ?

’Ua ’ī rātou i te ʼoaʼoa, nā Walter Rane

Faʼaitoito i te haʼapiʼiraʼa mai i te fare.

Nō te fa’auru i te mau pīahi ʼia taiʼo i te 1 Nephi 8–10, e nehenehe ’outou e faʼaʼite atu i teie fa’ahitira’a parau a te peresideni Dieter F. Uchtdorf : « Nā roto i te mau pūai e rave rahi e tāmata nei e ’ume ia tātou, nāhea tātou i te tāpe’a i tā tātou hi’ora’a ātea ’ia rōtahi i ni’a i te ’oa’oa hanahana i fafauhia i te feiā ha’apa’o maita’i ? Tē ti’aturi nei au ē, e nehenehe te pāhonora’a e ’itehia i roto i te hō’ē moemoeā a te hō’ē peropheta, e rave rahi tauatini matahiti i teienei. ’O Lehi te i’oa o te reira peropheta, e ’ua pāpa’ihia tāna moemoeā i roto i te Buka a Moromona tao’a rahi ’e te māere » (« E toru tuahine », Ensign ʼaore rā Liahona, Novema 2017, 18–19).

Te tahi atu mau mātēria tauturu

Mau video nō te Buka a Moromona.

’Imi i te mau video e faʼaʼite mai i te mau ʼāʼamu i roto i te 1 Nephi 1–7 i roto i te ha’aputura’a video o te Buka a Moromona i niʼa i te ChurchofJesusChrist.org ʼaore rā te faʼanahoraʼa Vairaʼa Buka ʼEvanelia.

E mana pūai tō te mau pāpaʼiraʼa moʼa.

ʼUa faʼaʼite pāpū o Elder Richard G. Scott i te faufaʼa rahi o te mau pāpaʼiraʼa moʼa:

« E au te mau pāpa’ira’a mo’a mai te tahi mau mori ’o te tūrama i tō tātou feruriraʼa ʼe ’o te faʼaineine ia tātou ʼia fāriʼi i te arata’iraʼa ʼe te faʼaurura’a nō ni’a mai ra. E nehenehe rātou e riro mai ʼei tāviri nō te ʼīriti i te rēni ’āparauraʼa ’e tō tātou Metua i te Ao ra ʼe i tāna Tamaiti Here o Iesu Mesia.

E nehenehe… rātou e riro mai ʼei mau hoa pāpū, ʼaore e ’ōti’a fenua ʼe aore rā, e ’ōti’a tau. E roaʼa noa te reira i te mau taime atoʼa e hinaʼarohia ai. Mai te mea ē, e faʼaʼohipahia rātou, e hōro’a mai te reira i te niu o te parau mau, tā te Vārua Maitaʼi ho’i e faʼahaʼamana’o mai. Te ʼaporaʼa mai, te feruri-hōhonu-raʼa, te ʼimiraʼa ʼe te tāmau-ʼāʼau-raʼa i te mau pāpa’iraʼa mo’a, e au ïa mai te faʼaʼīraʼa i te hōʼē ’āfata i te mau hoa, te mau faufaʼa ʼe te mau parau mau ’o te nehenehe e faʼaʼohipahia i te mau huru taime atoʼa, ʼe i te mau huru vāhi atoʼa nā te ao nei…

E nehenehe te feruri-hōhonu-raʼa i te hōʼē pāpa’iraʼa mo’a, e riro ʼei tāviri nō te ʼīriti i te heheuraʼa ʼe te arata’iraʼa ʼe te faʼaurura’a a te Vārua Maitaʼi. E nehenehe tā te pāpa’iraʼa mo’a e tamārū i te hōʼē vārua pe’ape’a, e hōro’a hoʼi i te hau, te tīa’i, ’e te faʼaho’iraʼa mai i te ti’aturiraʼa i roto i te ti’ara’a o te hōʼē taʼata ʼia upoʼoti’a i roto i te mau tītauraʼa o te oraraʼa nei. E mana pūai tō rātou nō te faʼaora i te mau tītauraʼa nō te pae ’āehuehu mai te mea ē, tē vai ra te faʼaroʼo i roto i te Faʼaora. E nehenehe tā te mau pāpa’iraa mo’a e faʼa’oi’oi i te faʼaoraraʼa pae tino »’ (« Te mana o te pāpaʼiraʼa mo’a », Ensign ʼaore rā Liahona, Novema 2011, 6).

E tiʼa i tō tātou ʼiteraʼa pāpū ʼia faʼaʼāpīhia i te mau mahana atoʼa.

ʼUa haʼapiʼi te peresideni Harold B. Lee, « Tō ʼoutou ʼiteraʼa pāpū tei mauhia e ʼoutou i teie mahana, e ʼere faʼahou ïa nō ʼoutou ʼananahi maoti ’ia rave ʼoutou i te tahi mea nō te reira ʼiteraʼa pāpū » (Te mau Haʼapiʼiraʼa a te mau peresideni o te ʼĒkālesia : Harold B. Lee [2000], 43).

Ha’amaita’ira’a i tā tātou ha’api’ira’a

Fa’a’ohipa i te mau ’ā’amu ’e te mau hi’ora’a nō te ha’api’i i te mau parau tumu o te ’evanelia. E rave rahi mau parau mau mure ʼore i roto i te mau pāpaʼiraʼa moʼa tei haʼapiʼihia nā roto i te mau mea i tupu ʼaore rā te mau ʼāʼamu e vai nei i roto. ʼA faʼaineine ai ʼoutou i te haʼapiʼi, ʼa feruri i te mau ʼohipa tei tupu ia ʼoutou o te nehenehe e riro ʼei ʼiteraʼa piti nō te mau ʼāʼamu i roto i te mau pāpaʼiraʼa moʼa ʼe te mau parau tumu tā te reira e faʼahōhoʼa nei. (Hi’o Ha’api’ira’a mai tā te Fa’aora, 22)