Kutumia Njoo, Unifuate—Kwa Ajili ya Shule ya Jumapili

Kujiandaa Kufundisha katika Shule ya Jumapili

Kujifunza binafsi na kama familia nyumbani kunapaswa kuwa kitovu cha kujifunza injili. Hii ni kweli kwako na kwa wale unaowafundisha. Unapojiandaa kufundisha, anza kwa kuwa na uzoefu wako mwenyewe katika maandiko. Maandalizi yako muhimu zaidi yatatokea wakati unapopekua maandiko na kutafuta mwongozo wa Roho Mtakatifu.

Njoo, Unifuate—Kwa Ajili ya Watu Binafsi na Familia ni sehemu muhimu kwa vyote kujifunza kwako binafsi na maandalizi yako ya kufundisha. Itakusaidia kupata uelewa wa kina wa kanuni za mafundisho zinazopatikana katika maandiko. Itakuwezesha pia kuwatia moyo na kuwaalika washiriki wa darasa kutumia Njoo, Unifuate—Kwa Ajili ya Watu Binafsi na Familia kuboresha kujifunza kwao binafsi na kama familia maandiko (kwa msaada katika hili, ona “Mawazo ya Kuhimiza Kujifunza Binafsi na Kifamilia” katika nyenzo hii). Unapofanya hivi, kumbuka kuwa mwepesi kuona washiriki wa darasa ambao mazingira ya familia zao yanaweza yasiruhusu kujifunza maandiko kama familia na jioni ya familia nyumbani kila mara.

Wakati wa maandalizi yako, mawazo na fikra vitakujia kuhusu watu unaowafundisha, jinsi kanuni katika maandiko zitakavyobariki maisha yao, na jinsi unavyoweza kuwatia moyo kuzigundua kanuni hizo wanapojifunza maandiko kwa ajili yao wenyewe.

Mawazo ya Kufundishia

Unapojiandaa kufundisha, ungeweza kupata mwongozo wa ziada kwa kuchunguza mihutasari katika nyenzo hizi. Usifikirie juu ya mawazo haya kama maelekezo ya hatua kwa hatua lakini badala yake ni kama mapendekezo ya kuchochea mwongozo wako mwenyewe. Unawajua washiriki wako wa darasa, na utapata kuwajua hata vizuri zaidi pale mnapojifunza pamoja darasani. Bwana anawajua pia, na atakupa mwongozo wa njia nzuri zaidi za kuwasaidia washiriki wa darasa kujenga juu ya kujifunza injili wanakokufanya majumbani mwao.

Nyenzo nyingine nyingi zinapatikana kwa ajili yako kuweza kutumia wakati unapojiandaa, ikiwa ni pamoja na mawazo katika Njoo, Unifuate—Kwa Ajili ya Watu Binafsi na Familia na magazeti ya Kanisa. Kwa maelezo zaidi kuhusu nyenzo hizi na zingine, ona sehemu yenye kichwa cha habari “Nyenzo za Ziada” ndani ya nyenzo hii.

Baadhi ya vitu vya Kukumbuka

• Nyumbani ni sehemu bora zaidi kwa ajili ya kujifunza injili. Kama mwalimu, una wajibu muhimu kuunga mkono, kutia moyo, na kujenga juu ya kujifunza injili nyumbani.

• Uongofu wa washiriki wa darasa katika injili ya Yesu Kristo utaongezeka wanapoelewa na kutumia mafundisho ya kweli. Wahimize waandike na kutenda juu ya ushawishi wanaopokea kutoka kwa Roho Mtakatifu.

• Kufundisha ni zaidi ya kutoa mhadhara, bali pia ni zaidi ya kuongoza tu majadiliano. Sehemu ya wajibu wako ni kutia moyo ushiriki ambao unaadilisha na wenye msingi katika maandiko. Huna budi pia kushiriki umaizi wenye msukumo uliopokea pale ulipojifunza maandiko.

• Baba wa Mbinguni anataka wewe ufanikiwe kama mwalimu. Ametoa nyenzo nyingi kukusaidia, ikiwa ni pamoja na mikutano ya baraza la walimu. Katika mikutano hii unaweza kushauriana na walimu wengine kuhusu changamoto unazopata. Unaweza pia kujadili na kufanyia mazoezi kanuni za kufundisha kama Kristo.

• Watu hujifunza vizuri zaidi wanapokuwa na nafasi ya kufundisha. Mara kwa mara, fikiria kuwaruhusu washiriki wa darasa, ukijumuisha vijana, kufundisha sehemu ya somo. Weka msingi wa uamuzi huu kwenye mahitaji na uwezo wa washiriki wa darasa. Kama unamualika mshiriki wa darasa kufundisha, chukua muda kumsaidia kujiandaa mapema kwa kutumia mawazo yanayopatikana katika nyenzo hii na katika Njoo, Unifuate—Kwa Ajili ya Watu Binafsi na Familia. Kumbuka kwamba kama mwalimu aliyeitwa, unawajibika ipasavyo kwa kile kinachofundishwa katika darasa.

• Nyenzo hii hutoa mihutasari ya kufundisha kwa kila wiki ya mwaka isipokuwa kwa Jumapili mbili wakati mkutano mkuu unafanyika. Kwenye Jumapili ambayo Shule ya Jumapili haifanyiki kwa sababu ya mkutano wa kigingi au sababu nyingine yoyote, familia zinaweza kuendelea kusoma Kitabu cha Mormoni nyumbani kufuatana na ratiba ya muhtasari katika Njoo, Unifuate—Kwa Ajili ya Watu Binafsi na Familia. Ili kuweka darasa lako la Shule ya Jumapili kwenye ratiba, unaweza kuchagua kuruka somo au kuunganisha masomo mawili. Kuepuka mkanganyiko, marais wa Shule ya Jumapili wanaweza kuwashauri walimu wa Shule ya Jumapili kuhusu marekebisho haya kabla ya muda.