Mpangilio wa Kufundisha

Katika nyenzo hii, utapata mpangilio ufuatao wenye hatua‑tatu unaorudiwa katika kila muhtasari: alika kushiriki, fundisha mafundisho, na himiza kujifunza nyumbani. Unapofundisha, vipengele vya mpangilio huu vinaweza kuingiliana au kutokea kwa utaratibu tofauti. Kwa mfano, fikiria kuwa kushiriki ni fursa ya kufundisha mafundisho, na kufundisha mafundisho kunapaswa kuhusisha mialiko ya kushiriki. Vivyo hivyo, kuhimiza kujifunza nyumbani kunaweza kutokea katika mjadala mzima wa darasa. Ruhusu mabadiliko katika mpangilio huu yatokee kiuhalisia, yakifuata msukumo wa Roho ili kukidhi mahitaji ya watu unaowafundisha.

Alika Kushiriki

Kama sehemu ya kila darasa, waalike washiriki wa darasa washiriki umaizi na uzoefu waliokuwa nao wiki iliyopita walipojifunza maandiko kama watu binafsi na kama familia na kutumia kile walichojifunza. Wasaidie washiriki wa darasa waone kwamba kujifunza kwao binafsi nje ya darasa ni muhimu. Uongofu wao binafsi utakuja sio tu kupitia mafunzo ya Jumapili bali pia kupitia uzoefu wao wa kila siku. Wakati washiriki wa darasa wanaposikia uzoefu wa wenzao, kuna uwezekano mkubwa wa kutafuta uzoefu kama huo wao wenyewe.

Sio kila mmoja atakuwa ameshasoma sura za kila somo, na hata baadhi ya wale waliosoma wanaweza kuhisi hofu kushiriki. Hakikisha washiriki wote wa darasa wanahisi kuwa sehemu ya thamani ya darasa, bila kujali wana kitu cha kushiriki au la.

Fundisha Mafundisho

Wewe na washiriki wa darasa wako mnapaswa kulenga kwenye mafundisho—kweli za milele za injili—zinazopatikana katika vifungu vya maandiko vilivyotolewa. Unapojadili mafundisho kutoka kwenye maandiko, ni mistari ipi, dondoo zipi, uzoefu upi, maswali yapi, na nyenzo zipi za ziada ungeweza kushiriki? Ungewezaje kutumia nyenzo hizi kuwasaidia washiriki wa darasa kugundua na kuelewa kanuni za injili? Je, ni kwa namna ipi unaweza kuwahimiza washiriki wa darasa kuandika na kufanyia kazi mawazo na misukumo wanayopokea?

Himiza Kujifunza Nyumbani

Mwishoni mwa somo, chukua muda kupitia kwa ufupi mazungumzo ya wiki ijayo. Fikiria jinsi ya kuwapa mwongozo washiriki wa darasa kuendelea kujifunza kutoka katika Kitabu cha Mormoni nyumbani, binafsi na pamoja na familia zao.