15–21 Febwari

Doktrin mo Ol Kavenan 14–17

“Stanap Olsem Wan Witnes”

Tingting abaot doktrin mo ol samting we oli tokbaot gud long Doktrin mo Ol Kavenan 14–17. ?Olsem wanem nao yu save givim insperesen long ol pipol we yu stap tijim olgeta blong oli “stanap olsem wan witnes blong olgeta samting ia”? (Doktrin mo Ol Kavenan 14:8).

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

?Wanem nao ol memba blong klas blong yu oli faenem we i gat mining long olgeta long stadi blong olgetawan o wetem famli? Maet yu save invaetem klas blong serem wan niu tingting we oli kasem abaot fasin blong stap tekpat insaed long wok blong Lod, aot long wanwan seksen insaed long Doktrin mo Ol Kavenan 14-17.

Stap Tijim Doktrin

Doktrin mo Ol Kavenan 14–16

Lod i stap invaetem yumi blong tekpat long wok blong Hem.

• ?Wanem nao ol memba blong klas oli save abaot Witma famli? (luk long Saints, 1:68–69). Bae i save help blong oli raetemdaon long bod, lis blong ol samting we i tru abaot Witma famli. ?Olsem wanem nao olgeta tru samting ia oli helpem yumi blong andastanem moa kaonsel blong Lod i go long famli Witma, we i stap long ol seksen 14–16? Eksampol. ?From wanem maet Lod i bin komperem wok blong Hem long wok blong stap pikimap kaekae insaed long wan bigfala garen?

• Blong letem ol memba blong klas blong oli serem ol tingting blong olgeta abaot fasin blong tekpat insaed long wok blong Lod, yu save raetem olgeta refrens ia long bod: Doktrin mo Ol Kavenan 14:1; 14:2–4; 14:5, 8; 14:6–7; 14:9–11; 15:6. Ol memba blong klas oli save sidaon tutu, mo ridim wan long ol skripja ia, mo toktok raon long wanem nao oli lanem abaot wok blong Lod. Sam long olgeta oli save serem, wetem klas, wanem nao oli bin toktok raon long hem.

• Invaetem ol memba blong klas blong oli serem ol eksperiens blong olgeta blong stap helpem ol narawan blong oli kam kolosap moa long Sevya, mo hemia i tekem tu tru long ol fultaem o seves misinari, mo tu, tru long wok blong givhan. ?Olsem wanem nao oli bin luk ol toktok blong Lod we oli stap long Doktrin mo Ol Kavenan 15:6 mo 16:6 i kamtru insaed long laef blong olgeta? ?Wanem nao yumi save lanem aot long ol seksen ia we i save helpem yumi blong rere blong serem gospel?

  

  Droing blong ol wokman insaed long wan garen blong wit, i kam long Greg Newbold

Doktrin mo Ol Kavenan 17

Yumi save gohed blong stap tru long wanem we yumi save, iven sapos ol narawan oli no wantem lisin o akseptem yumi.

• ?From wanem Lod i givim olgeta witnes blong Buk blong Momon? Ol memba blong klas oli save serem ol aedia we oli bin kam long olgeta taem oli bin stap ridim Doktrin mo Ol Kavenan 17. Oli save faenem sam moa aedia insaed long ol skripja we oli tokbaot long heding blong seksen 17 o long “Testemoni blong Olgeta Tri Witnes,” we yumi save faenem long stat blong Buk blong Momon. ?Olsem wanem nao testemoni blong Olgeta Tri Witnes i lidim testemoni blong yumi long saed blong Buk blong Momon?

• Iven sapos yumi no bin luk ol enjel, o sapos yumi no bin holem ol buk we oli wokem long gol, yumi stil save talem witnes blong yumi long saed blong Buk blong Momon. ?Wanem nao i stap long seksen 17 (wetem heding blong seksen ia) we ol memba blong klas oli filim se hemia i blong olgeta? ?Sapos wan i askem yu se from wanem yu biliv se Buk blong Momon i tru, wanem nao bae yu talem? Maet ol memba blong klas oli save raetem wan sot ansa, mo yu save invaetem samfala blong oli serem wanem we oli bin raetem. Kwot blong toktok blong Presiden Esra Taf Benson we i stap long “Sam Moa Risos” i save givim insperesen long ol memba blong oli talemaot witnes blong olgeta long saed blong Buk blong Momon i go long ol narawan.

• Bae i save givim insperesen blong gat wan memba blong klas i serem ol eksperiens blong ol nara witnes we oli bin luk ol buk we oli wokem long gol (luk long “Testemoni blong Olgeta Eit Witnes” insaed long Buk blong Momon mo insaed long eksperiens blong Meri Witma insaed long Saints, 1:70–71). ?Wanem nao yumi lanem aot long ol eksperiens blong olgeta witnes ia?

• Maet yu save serem samfala pat blong vidio ia: “A Day for the Eternities” (ChurchofJesusChrist.org) olsem pat blong toktok raon blong yufala abaot ol witnes blong Buk blong Momon (pat abaot Olgeta Tri Witnes i stat long 15:00).

Sam Moa Risos

Stap serem witnes blong yumi abaot Buk blong Momon.

Presiden Esra Taf Benson i bin givim invitesen ia i go long ol memba blong Jos long 1988:

“Buk blong Momon i tul ia we God i mekem blong ‘swipim wol olsem wan bigfala wota, blong karem i kam wanples, olgeta we [hem] i jusumaot.’ (Moses 7:62.) Tabu buk ia blong ol skripja, i nid blong kam moa insaed long ol prijing blong yumi, ol tijing blong yumi, mo misinari wok blong yumi.

“ … Long taem ia blong lektronik media mo fasin blong serem bigwan toktok we oli printim, God bae i mekem yumi mas ansa sapos yumi no stap muvum Buk blong Momon long wan wei we i moa bigwan.

“Yumi gat Buk blong Momon, yumi gat ol memba, yumi gat olgeta misinari, yumi gat ol risos, mo wol ia i gat nid long olgeta samting ia. !Taem, hem i naoia!

“Ol brata mo sista we mi lavem. Yu no stap tokbaot tumas paoa ia blong Buk blong Momon, o tabu rol ia we hem i gat, o hamas nao yumi mas muvum buk ia i go” (Teachings of Presidents of the Church: Ezra Taft Benson [2014], 143–44).

Stap Kam Antap long Fasin blong Yumi Blong Stap Tij

Askem ol kwestin we i invaetem wan blong serem testemoni. Wan kwestin we oli askem wetem insperesen i save kam wan wei we i gat paoa blong invaetem Spirit. Eksampol. Taem yu stap tijim Doktrin mo Ol Kavenan 14:9, yu save askem wan kwestin olsem: “?Olsem wanem nao yu yu kam blong save se Jisas Kraes i ‘wan laet we tudak i no save haedem’?” (Luk long Teaching in the Savior’s Way, 32.)