“8–14 Febwari. Doktrin mo Ol Kavenan 12–13: ‘Antap long Hed blong Yufala, Ol Wokman we Yumi Wok Tugeta,’” Kam Folem Mi—Blong Sandei Skul: Doktrin mo Ol Kavenan 2021 (2020)
“8–14 Febwari. Doktrin mo Ol Kavenan 12–13; Josef Smit—Histri 1:66–75,” Kam Folem Mi—Blong Sandei Skul: 2021
8–14 Febwari
Doktrin mo Ol Kavenan 12–13; Josef Smit—Histri 1:66–75
“Antap long Hed blong Yufala, Ol Wokman we Yumi Wok Tugeta”
Semmak olsem we Tabu Spirit i bin givim laet long maen blong Josef Smit mo Oliva Kaodri long saed blong olgeta skripja, Hem i save givim insperesen long yu taem yu stap stadi wetem prea long Doktrin mo Ol Kavenan 12–13 mo Josef Smit—Histri 1:66–75.
Raetemdaon Ol Filing mo Tingting blong Yu
Invaetem Ol Man blong Serem Wanem Oli Gat
Wan wei blong leftemap tingting blong serem samting, i blong askem ol memba blong klas olsem wanem nao oli stap stadi long ol skripja blong olgeta. ?Wanem nao oli stap mekem blong faenem ol niu tingting insaed long ol skripja long wik ia?
Stap Tijim Doktrin
Jon Baptaes i bin putumbak Aronik Prishud.
-
Wan wei blong toktok raon long Doktrin mo Ol Kavenan 13, hem i blong ol memba blong klas oli tokabaot olsem wanem seksen ia i save helpem ol yut blong oli andastanem gud moa abaot Aronik Prishud. ?Wanem nao seksen 13 i stap tijim abaot Aronik Prishud we ol yang man mo ol yang woman oli mas andastanem? Blong givim wan janis long evriwan i tekpat, yu save askem ol memba blong klas blong oli sidaon tutu, mo oli toktok raon long kwestin ia, mo afta, oli serem wanem oli bin lanem aot long wanwan long olgeta, wetem klas.
-
Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong yusum samfala risos we i save help blong eksplenem sam long ol sentens we oli stap long Doktrin mo Ol Kavenan 13. Yu save askem ol memba blong klas blong serem wanem oli bin lanem taem oli bin stap stadi long ol risos ia. Blong statem toktok insaed long klas abaot ol ki we oli tokbaot insaed long seksen ia, yu save soem sam ki, mo invaetem ol memba blong klas blong tokbaot se, ol ki ia, bae i letem olgeta blong mekem wanem. Eksplenesen blong Sista Rut mo Elda Dale G. Renlund insaed long “Sam Moa Risos” i save help tu. ?Wanem blesing nao ol ki blong Aronik Prishud oli givim long yumi? ?Olsem wanem nao laef blong yumi bae i defren olgeta sapos i no gat olgeta blesing ia?
-
Pat blong wanem we i naes long gospel ia we i kambak, i we, i pusum yumi blong mekem ol semfala wok ia olsem ol man mo ol woman ia insaed long ol skripja: blong stap bildimap kingdom blong God long wol ia. Long wan wei, hemia i mekem se yumi “ol wokman we yumi wok tugeta” wetem Tufala. ?Hem i minim wanem blong stap olsem wan wokman we yu wok tugeta insaed long wok ia blong Lod? Matiu 3:13–17; Luk 1:13–17; 3:2–20 i save helpem ol memba blong klas blong oli andastanem gud moa wok ia we Jon Baptaes i bin mekem.
PikjaJosef Smit i stap baptaesem Oliva KaodriJosef Smit I Baptaesem Oliva Kaodri, i kam long Del Parson
Ol odinens oli givim yumi rod blong kasem paoa blong God.
-
Blong givim wan janis long ol memba blong klas blong testifae long wanwan abaot ol blesing we oli kam blong kasem ol prishud odinens, yu save invaetem olgeta blong luklukbak long Josef Smit—Histri 1:66–75, wetem not i go long ves 71, mo lukaotem ol blesing we Josef mo Oliva i kasem afta long baptaes mo prishud odinesen blong tufala. ?Olsem wanem ol odinens oli givim paoa long saed blong spirit? Afta, ol memba blong klas oli save serem tu ol eksperiens blong olgeta abaot wan taem we oli bin filim paoa blong God we i kam tru long ol prishud odinens, olsem baptaes, sakramen, o ol tempol odinens. Mo tu, yu save soem vidio ia: “Blessings of the Priesthood” (ChurchofJesusChrist.org) olsem pat blong toktok insaed long klas.
-
Ol memba blong klas bae oli save lanem samting sapos yu krietem wan jat we i soem olgeta blesing we oli kam aot long ol odinens blong prishud. Eksampol. Yu save raetem ol heding ia antap long bod: Ol Odinens mo Ol Blesing. Ol memba blong klas oli save luklukgud insaed long ol skripja olsem olgeta skripja ia blong fulumap jat we i stap: Jon 14:26; Ol Wok 2:38; Doktrin mo Ol Kavenan 84:19–22; 131:1–4; Josef Smit—Histri 1:73–74. Oli save putum tu ol narafala blesing we oli bin kasem from ol odinens ia. Maet oli save serem ol eksperiens blong ol taem we oli bin filim se ol odinens we oli bin kasem, i bin tekem paoa blong Sevya i kam insaed long laef blong olgeta.
Sam Moa Risos
?Wanem nao oli ol prishud ki?
Elda Dale G. Renlund mo waef blong hem, Ruth, i bin givim wan eksplenesen abaot ol prishud ki ia.
“Toktok ia ol prishud ki oli yusum long tu (2) defren wei. Faswan, i tokbaot wan spesifik raet o spesel janis we oli pasem long evriwan we oli kasem Aronik o Melkesedek Prishud. … Olsem, olgeta we oli holem Aronik Prishud, oli kasem ol ki blong seves blong ol enjel, mo ol kit blong gospel blong stap rere we i fasin blong sakem sin, mo baptaes andanit long wota blong kam klin aot long ol sin (luk long Doktrin mo Ol Kavenan 13:1; 84:26–27). Olgeta we oli holem Melkesedek Prishud, oli holem ki blong ol sikret blong kingdom, ki blong save ia we i blong God, mo ol kit blong evri blesing blong Jos long saed blong spirit (luk long Doktrin mo Ol Kavenan 84:19; 107:18). …
“Nambatu wei we oli yusum toktok ia, ol prishud ki, i blong tokbaot lidasip. Ol prishud lida oli kasem moa prishud ki, olsem raet blong prisaed ova long wan oganaesesen grup blong Jos, o wan kworom. Long saed ia, ol prishud ki oli atoriti mo paoa blong daerektem, lidim mo rul insaed long Jos” (The Melchizedek Priesthood: Understanding the Doctrine, Living the Principles [2018], 26).
Stap Kam Antap long Fasin blong Yumi blong Stap Tij
Serem testemoni blong yu plante taem. “Simpol mo tru witnes blong yu abaot wan trutok i save gat paoa blong lidim tingting blong olgeta we yu stap tijim. … Hem i no nid blong i gat ol flas toktok o i longfala” (Teaching in the Savior’s Way, 11). Tingting blong serem witnes blong yuwan abaot Aronik Prishud taem yu stap toktok raon long Doktrin mo Ol Kavenan 13.