Kopi blong orijinol buk blong Buk blong Momon.

1–7 Febwari

Doktrin mo Ol Kavenan 10–11

“Blong Yu Save Kamaot Olsem Man we I Win”

?Wanem filing nao yu bin gat taem yu bin stap ridim Doktrin mo Ol Kavenan 10–11? ?Wanem tingting nao i bin kam long yu abaot ol nid blong ol pipol we yu stap tijim?

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Blong givim wan janis long ol memba blong klas blong oli tokabaot wanem we oli bin lanem long taem blong stadi blong olgetawan mo wetem famli, yu save raetem long bod: Doktrin mo Ol Kavenan 10 mo Doktrin mo Ol Kavenan 11. Sam memba blong klas, oli save raetem, andanit long eni heding, namba blong wan ves we oli faenem se i wan impoten trutok. Jusum samfala ves nomo, mo invaetem ol memba blong klas blong oli serem ol trutok ia we oli bin faenem long ol ves ia.

Stap Tijim Doktrin

Doktrin mo Ol Kavenan 10:1–33

Setan i wantem blong prapa spolem gud wok blong God.

• Doktrin mo Ol Kavenan 10 i save helpem ol memba blong klas blong luksave mo stanap agensem ol traehad blong Setan blong prapa spolem gud fet blong olgeta. Blong givim sam histri raon long seksen ia, yu save invaetem wan memba blong klas blong serem stori blong Martin Haris we i bin lusum olgeta 116 pej blong translesen blong Buk blong Momon (luk long heding blong seksen blong Doktrin mo Ol Kavenan 3 mo Ol Sent, 1:50–53). Afta, ol memba blong klas oli save luklukgud insaed long Doktrin mo Ol Kavenan 10:1–33 blong faenem plan blong Setan long saed blong ol pej ia we oli go lus. ?Wanem nao yumi lanem aot long ol ves ia abaot ol wei we Setan i wok, mo from wanem hem i stap mekem olgeta samting ia? (luk tu long ves 63). ?Olsem wanem nao hem i stap wok long ol semmak wei long taem blong yumi tedei? ?Olsem wanem Lod i stap helpem yumi blong winim Setan insaed long laef blong yumi?

Doktrin mo Ol Kavenan 10:34–52

“Waes blong [Lod] i bigwan moa bitim ol trik blong devel.”

• Taem yumi filing se tingting i slak from ol sin blong yumi, yumi save faenem hop taem yumi save olsem wanem Lod i bin stretem ol samting from sin ia we Josef Smit mo Martin Haris i bin mekem taem we tufala i no bin obei long Lod, mo tufala i bin lusum ol 116 pej blong translesen blong Buk blong Momon. Tingting long wei we yu save helpem ol memba blong klas blong oli save faenem hop long stori ia. Eksampol, yu save invaetem olgeta blong serem wan samting we oli bin lanem abaot Lod aot long Doktrin mo Ol Kavenan 10:34–52 (luk tu long Doktrin mo Ol Kavenan 3:1–3). Ol memba blong klas oli save serem olsem wanem nao oli bin luk se “waes blong [Lod] i bigwan moa bitim ol trik blong devel” (Doktrin mo Ol Kavenan 10:43). ?Olsem wanem nao,save ia, i bildimap laef blong yumi long Hem?

  

  Momon I Stap Raetemsot Histri long Ol Buk, i kam long Tom Lovell

Doktrin mo Ol Kavenan 11

Sapos yumi stap askem God, bambae yumi kasem samting.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i stap invaetem yumi blong ridim Doktrin mo Ol Kavenan 11 olsem se oli bin raetem hemia i kam stret long yumi bakegen. Maet ol memba blong klas oli glad blong serem wan samting aot long seksen ia, we oli filim se i blong olgeta stret. ?Olsem wanem nao oli plan blong yusum long laef blong olgeta ol samting ia we oli bin lanem?

• Wan wei blong leftemap tingting blong toktok raon long Doktrin mo Ol Kavenan 11, hem i blong invaetem ol memba blong klas blong faenem wan prinsipol insaed long seksen ia, mo afta, raetem wan kwestin abaot prinsipol ia. Ol kaen kwestin ia, i save go olsem: “?I minim wanem blong stap strong wetem Kraes wetem ful hat blong yu?” (ves 19) o “?Hao nao yumi kasem toktok blong God?” (ves 21). Ol memba blong klas oli save putum kwestin blong olgeta antap long wan pis pepa mo oli pasem ol pepa blong olgeta i go raon long rum, mo wanwan i save ademap ol tingting mo samfala ansa long kwestin blong wanwan. (Bae i help blong serem klas i go long ol smol grup fastaem.) Afta, ol memba blong klas oli save serem wetem klas, wanem we ol narawan oli bin raetem abaot kwestin blong olgeta.

Doktrin mo Ol Kavenan 11:8–26

God i givim yumi Spirit blong Hem taem yumi stap mekem yumiwan i rere long wei blong Hem.

• ?Bae ol memba blong klas blong yu oli lanem samting sapos oli tokabaot olsem wanem blong luksave revelesen we i blong yuwan tru long Spirit? Sapos i olsem, maet bae yu statem toktok ia taem yu invaetem olgeta blong traem tingting long tingting blong olgeta se oli stap askem olgeta blong oli raetemdaon samfala trutok long wei blong kasem revelesen we i blong yuwan nomo. ?Wanem nao bae oli karem we i stap long Doktrin mo Ol Kavenan 11:8–26? Eksampol. ?Wanem nao bae oli raetem abaot wei blong rere blong kasem daereksen from laef blong yumi mo kasem ol ansa blong ol kwestin blong yumi? ?Wanem nao bae oli talem abaot wei blong luksave ol ansa ia taem oli kam? Invaetem ol memba blong klas blong oli tingting hevi long wei blong yusum wanem we oli bin lanem taem oli stap traehad blong lukaotem revelesen we i blong olgetawan.

  Olsem pat blong aktiviti ia, yu save serem toktok ia we i kam long Sista Julie B. Beck, foma Rilif Sosaeti Jeneral Presiden: “Fasin blong kwalifae from, kasem mo mekem folem ol revelesen blong yuwan, hem i wan impoten skil we yu save kasem long laef ia. (“And upon the Handmaids in Those Days Will I Pour Out My Spirit,” Ensign o Liahona, May 2010, 11).

Stap Kam Antap long Fasin blong Yumi blong Stap Tij

Yusum olgeta we oli stap traehad. ?Wanem nao yu save mekem taem we i luk se wan memba blong klas i no stap nating wetem ol narawan insaed long klas? Samtaem, hem i mas filim nomo se hem i stap insaed. Tingting blong askem man o woman ia blong tekpat long wan lesen we bae i kam antap. Sapos hem i no wantem givhan long yu long fas ples, gohed blong soem lav mo wari long hem. (Luk long Teaching in the Savior’s Way, 8–9