25–31 Jenuware

Doktrin mo Ol Kavenan 6–9

“Hemia I Spirit blong Revelesen”

Doktrin mo Ol Kavenan 6–9 i stap tijim ol impoten prinsipol abaot fasin blong stap kasem revelesen. Yusum olgeta prinsipol ia taem yu stap lukaotem revelesen abaot wei blong helpem ol memba blong klas blong oli lanem samting aot long ol seksen ia.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Blong leftemap tingting blong ol memba blong klas blong oli serem ol eksperiens blong olgeta blong stap stadi long Doktrin mo Ol Kavenan 6–9, yu save invaetem olgeta, olsem we yu ting se i stret, blong oli toktok raon long eni tingting we Spirit i bin talem long olgeta long taem we oli bin stap stadi. ?Wanem nao ol mesej we Lod i bin gat blong talem long olgeta?

Stap Tijim Doktrin

Doktrin mo Ol Kavenan 6; 8–9

Papa long Heven i stap toktok long mi tru long “Spirit blong trutok.”

• Lod i gat fulap samting blong tijim yumi abaot revelesen we i blong yumiwan, hemia insaed long ol seksen ia; mo maet bae yu no save kavremap evri samting long wan klas ia nomo. Bae i help blong serem klas long trifala grup, mo askem wanwan long ol grup ia blong luklukgud insaed long seksen 6, 8, o 9, mo lukaotem ol ansa long ol kwestin olsem ia: ?Olsem wanem Tabu Spirit i stap toktok long yumi? ?Olsem wanem wan i save luksave wan revelesen we i blong hemwan? ?Olsem wanem nao wan i save rere hemwan blong kasem revelesen? Afta, wan aot long wanwan grup ia, i save serem wetem haf blong klas wanem nao grup blong olgeta i bin faenem. Yu save leftemap tingting blong ol memba blong klas blong oli serem ol eksperiens blong olgetawan long saed blong fasin blong luksave revelesen we i blong yuwan. Eksampol. ?I gat eni samting insaed long Doktrin mo Ol Kavenan 6:22–24 we i save mekem yu tingting i gobak long ol eksperiens we yumi bin gat?

• Blong tokbaot revelesen we i blong yumiwan, maet bae sam long ol pipol insaed long klas blong yu bae oli filim se tingting i slak from se oli stap prea blong kasem help, be oli filim se oli no kasem eni help. Bae i save helpem olgeta blong save se Oliva Kaodri i bin gat trabol wetem ol sem kaen filing ia taem hem i no bin save mekem translesen i isi olsem we hem i bin hop from. Mebi yu save invaetem ol memba blong klas blong luklukgud insaed long kaonsel we Lod i bin givim long Oliva insaed long seksen 9. ?Wanem mesej we i stap long seksen ia we i save helpem wan we i filim se Lod i no stap ansarem ol prea blong hem? Ol toktok we oli stap long “Sam Moa Risos,” oli save help tu.

  

  Oliva Kaodri i kam long Lewis A. Ramsey

Doktrin mo Ol Kavenan 6–7

“Wanem yu wantem God i givim long yu,bambae hem i givim long yu.”

• Aotlaen blong wik ia, insaed long Kam Folem Mi—Blong Wanwan Man, Woman mo Famli i tokbaot se yumi mas lukluk gud long ol toktok olsem, wantem insaed long ol seksen 6–7. Maet ol memba blong klas oli save serem wanem nao oli bin lanem aot long smol stadi ia, o yu save mekem aktiviti ia tugeta olsem wan klas. ?Wanem nao, ol evri dei aksen blong yumi oli stap tijim yumi abaot ol samting we yumi wantem? ?Olsem wanem Lod i stap helpem yumi blong jenisim ol samting we yumi stap wantem?

Doktrin mo Ol Kavenan 6:29–37

Sapos yumi lukluk i go long Lod, Hem i save helpem yumi blong winim fasin blong gat tu tingting mo stap fraet.

• ?From wanem, samtaem, yumi stap “fraet blong mekem gud”? (ves 33). Mebi ol memba blong klas oli save givim samfala risen, wetem ol tingting we oli stap insaed long Doktrin mo Ol Kavenan 6:29–37 we i stap givim olgeta strong paoa long tingting blong mekem gud.

• Blong statem wan storian abaot wei we Jisas Kraes i stap helpem yumi blong “no gat tu tingting, mo no fraet” (ves 36), yu save askem ol memba blong klas blong raetem long wan pis pepa, sam samting we oli pipol oli stap fraet long hem. (Elda Ronald A. Rasband i bin givim sam eksampol long mesej blong hem “Yufala I No Mekem Tingting blong Yufala i Trabol” [Ensign o Liahona, Nov 2018, 18].) Afta, oli save ridim laod samfala long ol pepa ia mo toktok raon long wei we Sevya mo paoa blong Hem we i pem praes i save helpem yumi taem we yumi stap fraet. Doktrin mo Ol Kavenan 6:29–37 i givim samfala tingting (luk tu long 1 Jon 4:18). ?Wanem nao i minim blong “luk long [Kraes] long evri tingting”? (ves 36). ?Olsem wanem nao, taem yumi lukluk nomo long Sevya, i stap helpem yumi taem yumi fesem ol tu tingting o fraet?

Sam Moa Risos

Blong stap andastanem olsem wanem Papa long Heven i stap ansarem ol prea.

“Long laef blong mi, mi bin lanem se, samtaem, mi no bin kasem wan ansa long prea blong mi from se Lod i save se mi mi no rere from. Taem Hem i stap ansa, plante taem hem i ‘smol long ples ia mo smol longwe’ [2 Nifae 28:30] from se, hemia nomo mi save tekem, o hemia nomo mi mi glad blong save mekem” (Robert D. Hales, “Waiting upon the Lord: Thy Will Be Done,” Ensign o Liahona, Nov. 2011, 73).

“?Wanem nao yu mekem afta we yu bin rere gud, yu bin prea strong, yu bin wet wan longfala taem smol blong kasem wan ansa, be stil, yu no filim se yu kasem wan ansa? Maet bae yu wantem talem tangkyu taem hemia i hapen, from se hemia i wan pruf se Hem i trastem yu. Taem yu stap laef klin inaf mo joes blong yu i stret wetem ol tijing blong Sevya, mo yu nidim blong tekem aksen, blong gohed wetem tras. … Taem yu stap laef long wan stret mo gud fasin, mo yu stap tekem aksen wetem tras, bambae God i no save letem yu gohed i longwe tumas mo no givim wan filing blong woning sapos yu bin mekem wan rong desisen (Richard G. Scott, “Using the Supernal Gift of Prayer,” Ensign o Liahona, May 2007, 10).

Stap Kam Antap long Fasin blong Yumi blong Stap Tij

Talemaot we yu trastem se, olgeta ia we oli stap lan, oli save mekem samting ia. Sam pipol insaed long klas blong yu oli save filim se oli no gat tras long olgetawan, se oli no save lanem gospel. Tingting long sam wei we yu save talem gud long olgeta bakegen se, taem oli stap traehad blong lanem samting olgetawan, bae Tabu Spirit i tijim olgeta. (Luk long Teaching in the Savior’s Way, 29.)