ol pipol oli stap wok long garen

Taem blong Pikimap Kaekae long Franis, i kam long James Taylor Harwood

18–24 Jenuware

Doktrin mo Ol Kavenan 3–5

“Wok blong Mi I Mas Gohed”

Sapos yu stadi long Doktrin mo Ol Kavenan 3–5 bifo yu luklukbak long ol aedia insaed long aotlaen ia, bae i helpem yu blong kasem help ia we i kam long Tabu Spirit. Aotlaen blong wik ia, insaed long Kam Folem Mi—Blong Wanwan Man, Woman mo Famli i save helpem yu blong andastanem histri ia we i mekem se ol revelesen ia oli kam, mo oli bin raetemdaon insaed long ol seksen ia.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Givim sam minit long ol memba blong klas blong oli luklukbak long ol skripja we oli bin ridim long hom, mo blong oli faenem wan ples we oli faenem se i gat mining long olgeta. Afta, invaetem olgeta blong oli serem wanem we oli bin lanem wetem wan narawan we i stap insaed long klas.

tijing pikja bokis

Stap Tijim Doktrin

Doktrin mo Ol Kavenan 3:1–15

Yumi mas trastem God be i no blong stap fraet long man.

• Olsem Josef Smit, yumi evriwan i gat ol eksperiens ia we, yumi filim fos blong ol nara pipol blong mekem wan samting we yumi save se i rong. ?Wanem trutok nao yumi lanem aot long Doktrin mo Ol Kavenan 3:1–15 we i save helpem yumi blong gohed blong stap fetful long God long ol kaen situesen olsem?

• Josef Smit i bin gat nid ia blong God i stretem hem from hem i bin stap fraet long man i moa bitim we hem i bin stap fraet long God; be semtaem tu, hem i bin gat nid blong oli leftemap tingting blong hem. Invaetem ol memba blong klas blong lukluk insaed long seksen 3 blong luk olsem wanem Lod i bin stretem, mo long semtaem, i bin leftemap tingting blong Josef. Eksampol. Oli save raetem lis, antap long bod, blong ol sentens we oli kamaot long ol ves 1 kasem 15 we i tekem ol strong tok blong Lod, mo ol nara sentens we i tekem ol toktok blong Lod blong leftemap tingting blong hem i sakem sin mo i gohed blong stap fetful. ?Wanem nao eksperiens blong Josef i stap tijim yumi abaot wei we Sevya i stap helpem yumi blong winim ol mistek blong yumi?

Doktrin mo Ol Kavenan 4

Lod i stap askem yumi blong givim seves long Hem wetem ful hat blong yumi.

• Ol kwaliti we i stap tokbaot ol wokman blong Lod, we oli putum i stap long Doktrin mo Ol Kavenan 4:5–6 oli ol kwaliti blong Jisas Kraes tu. Blong helpem ol memba blong klas blong lanem moa, yu save invaetem olgeta blong jusum wan long ol kwaliti ia mo faenem ol mining, o sam moa skripja we i save helpem olgeta blong andastanem moa kwaliti ia (eksampol, luk long toktok blong Sista Elaine S. Dalton insaed long “Sam Moa Risos”). Yu save invaetem sam pipol blong serem wanem we oli bin faenem. Oli save serem tu from wanem kwaliti we oli jusum i wan samting blong mas gat blong givim seves insaed long kingdom blong God. ?Olsem wanem nao yumi save developem olgeta kwaliti ia, i go moa? (luk long ves 7).

• Doktrin mo Ol Kavenan 4 i go long Josef Smit Senia, we i bin wantem save olsem wanem hem i save help wetem wok blong Lod. Seksen ia tu i save helpem eniwan long yumi we i wantem blong givim seves long Lod. Hemia i wan wei blong stadi long seksen ia: ol memba blong klas oli save wok long ol smol grup blong raetem ol defren kaen smol wok we ol wokman blong God oli gat blong mekem, mo oli yusum seksen 4 olsem wan gaed. ?Olsem wanem ol kwalifikesen ia oli defren long ol nara wok? ?From wanem olgeta kwaliti ia oli wan mas blong save mekem wok blong God? Toktok ia we i kam long Elda David A. Bednar insaed long “Sam Moa Risos” i save helpem ol memba blong klas blong andastanem hamas i impoten blong stap developem olgeta kwaliti ia.

Doktrin mo Ol Kavenan 5

Wan witnes abaot trutok, i save go long olgeta we oli gat tingting i stap daon mo stap biliv.

• Sapos oli bin soem ol gol buk ia i stap blong wol i lukluk long hem, ?bae hemia i save winim tingting blong evriwan se Buk blong Momon i tru? ?From wanem yes, o from wanem no? (luk long Doktrin mo Ol Kavenan 5:7). Maet ol memba blong klas oli save luklukgud insaed long seksen 5 blong kasem sam niu tingting we i save helpem olgeta blong helpem wan we i bin askem blong gat pruf se Buk blong Momon i tru. ?Wanem nao Lod i tijim Josef Smit mo Martin Haris, we i save helpem yumi kasem witnes blong yumiwan abaot ol trutok ia blong gospel?

  Martin Haris

  Martin Harris, i kam long Lewis A. Ramsey

sam moa risos pikja bokis

Sam Moa Risos

Klin fasin i minim paoa.

Sista Elaine S. Dalton i bin eksplenem toktok ia, klin fasin: “Klin Fasin i wan toktok we yumi nomo harem plante long sosaeti blong yumi tedei, be Latin rus toktok blong hem virtus i minim paoa. Olgeta woman mo man we oli gat klin fasin oli gat wan kwaet fasin blong luk samting i stret, mo oli gat wan paoa insaed long olgeta. Oli gat tras ia from se oli klin inaf blong kasem Tabu Spirit mo letem Tabu Spirit i lidim olgeta” (“A Return to Virtue,” Ensign o Liahona, Nov. 2008, 79).

Stap kam wan misinari.

Elda David A. Bednar i bin talem: “Rod ia, blong stap kam wan misinari, i no nidim blong wan yang man i werem wan waet sot mo wan nektae [o blong wan yang woman i werem wan dres] i go long skul evri dei, o blong hem i folem ol misinari gaedlaen blong stap go long bed mo blong girap. … Be yu save mekem tingting o filing blong yu blong wantem givim seves long God i kam antap moa [luk long Doktrin mo Ol Kavenan 4:3], mo yu save stat blong tingting olsem ol misinari oli tingting long hem, blong ridim wanem we ol misinari oli stap ridim, blong yu prea olsem ol misinari oli stap prea, mo blong yu filim wanem we ol misinari oli stap filim. Yu save stap longwe long ol fos blong wol ia we i mekem se Tabu Spirit i stap kamaot, mo yu save gro i kam antap long fasin blong gat tras mo mekem folem ol toktok blong Spirit” (“Becoming a Missionary,” Ensign o Liahona, Nov. 2005, 45–46).

Stap Kam Antap long Fasin blong Yumi blong Stap Tij

Askem ol kwestin we i leftemap tingting blong gat ol toktok insaed long klas, we i gat mining. Ol kwestin we oli gat moa bitim wan ansa we i stret i save invaetem olgeta we oli stap lan blong oli ansa folem ol tingting blong olgetawan, folem ol filing mo ol eksperiens blong olgetawan. Eksampol. Yu save askem: “?Olsem wanem nao yu save taem we God i stap toktok long yu?” (Luk long Teaching in the Savior’s Way, 33.)