“11–17 Jenuware. Doktrin mo Ol Kavenan 2; Josef Smit—Histri 1:27–65: ‘Hat blong Ol Pikinini Bae I Tanem I Go long Ol Papa blong Olgeta,’” Kam Folem Mi—Blong Sandei Skul: Doktrin mo Ol Kavenan 2021 (2020)
“11–17 Jenuware. Doktrin mo Ol Kavenan 2, Josef Smit—Histri 1:27–65,” Kam Folem Mi—Blong Sandei Skul: 2021
Hem i Bin Singaotem Mi long Nem blong Mi, i kam long Michael Malm
11–17 Jenuware
Doktrin mo Ol Kavenan 2; Josef Smit—Histri 1:27–65
“Hat blong Ol Pikinini Bae I Tanem I Go long Ol Papa blong Olgeta”
Bifo yu ridim ol aedia we oli stap long aotlaen ia, ridim Doktrin mo Ol Kavenan 2 mo Josef Smit—Histri 1:27–65, mo raetemdaon ol tingting long saed blong spirit we yu stap kasem.
Raetemdaon Ol Filing mo Tingting blong Yu
Invaetem Ol Man blong Serem Wanem Oli Gat
Blong leftemap tingting blong ol memba blong klas blong oli serem ol niu tingting mo ol eksperiens we oli bin kasem taem we oli bin stap stadi long olgeta skripja ia, yu save askem olgeta blong serem wan ves we i mekem olgeta blong oli tingting hevi i go dip moa bitim oltaem. ?Wanem nao i bin tajem olgeta fulap long ves ia?
Stap Tijim Doktrin
God i bin singaotem Josef Smit blong mekem wok blong Hem.
-
?Wanem nao bae klas blong yu i lanem sapos yufala i luklukbak long stori we i stap insaed long Josef Smit—Histri 1:27—65? Yu save invaetem ol memba blong klas blong oli talemsot stori ia, o, ol memba blong klas oli save talem stori ia long wanwan long olgeta taem yu putum olgeta oli sidaon tutu o long ol smol grup. Leftemap tingting blong olgeta blong talem hamas ditel we oli save tingbaot. ?Olsem wanem stori ia, i stap mekem testemoni blong yumi abaot hae koling blong Josef Smit, i kam strong moa? ?Wanem lesen nao yumi stap lanem aot long stori ia abaot wei we God i stap mekem wok blong Hem?
-
Tingting blong soem sam samting, o sam pikja we i go wetem wok we God i singaotem Josef Smit blong mekem, olsem Buk blong Momon, o wan pikja blong tempol. Ol memba blong klas oli save faenem ol ves insaed long Josef Smit—Histri 1:33–42 we i stap tij abaot ol trifala defren saed blong misin blong Profet. ?Olsem wanem wok we God i gat blong givim long Josef Smit i go wetem wok we God i givim long yumi? ?Wanem nao, ol profet blong yumi we oli stap laef, oli stap tijim yumi abaot wok ia?
Elaeja i kam blong tanem hat blong yumi i go long ol bubu blong yumi.
-
?Bae klas blong yu bae i lanem samting sapos yufala i toktok raon long huia i Elaeja, mo abaot siling paoa we hem i bin putumbak? Ol memba blong klas oli save rid abaot Elaeja insaed long Bible Dictionary o insaed long Gaed long Ol Skripja, o oli save luklukbak long wan stori blong laef blong hem (luk long 1 King 17–18). ?Olsem wanem infomesen ia i ademap moa save o i helpem yumi blong andastanem moa wanem we i stap long Doktrin mo Ol Kavenan 2? Yu save tokbaot yu se i minim wanem blong silim wan samting. Yu save yusum sam samting blong helpem yu, olsem wan tin kaekae, wan plastik blong storem samting, wan plastik bag we i gat sipa blong hem, o wan sil we i mekem wan pepa i kam ofisol. ?Olsem wanem nao yu olgeta samting ia oli save helpem yumi andastanem se i minim wanem blong silim ol famli tugeta? ?Olsem wanem paoa ia i stap help blong mekem ol stamba tingting blong kriesen blong wol i kamtru? (luk long Doktrin mo Ol Kavenan 138:47–48 mo toktok we i kam long Presiden Russel M. Nelson we i stap long “Sam Moa Risos”). Blong helpem ol memba blong klas blong luk olsem wanem profesi insaed long Doktrin mo Ol Kavenan 2 i bin kamtru, yufala i save toktok raon long Doktrin mo Ol Kavenan 110:13-16.
-
Maet blong stap lanem abaot “ol promes we Lod i bin mekem long ol papa” (Doktrin mo Ol Kavenan 2:2) bae i helpem olgeta we yu stap tijim olgeta blong oli andastanem gud moa prishud paoa we oli bin sendem Elaeja blong putumbak. ?Huia nao “ol papa” ia? (luk long Doktrin mo Ol Kavenan 27:9–10). ?Wanem nao ol promes we Lod i bin mekem wetem Ebraham, Aesak, mo Jekob? Jenesis 17:1–8; 22:16–18; 26:1–5, 24; 28:11–15; Ebraham 2:8–11). ?Hem i minim wanem blong “planem” olgeta promes ia insaed long hat blong yumi? ?Olsem wanem we, taem yumi mekem hemia, bae i helpem yumi blong tanem hat blong yumi i go long ol bubu blong yumi?
Palmaera Niu Yok Tempol
-
Blong givim insperesen long ol memba blong klas blong oli tanem hat blong olgeta i go long ol bubu blong olgeta, yu save invaetem samfala memba blong lidim wan storian raon long topik ia. Tingting blong stap yusum wod konsalten blong tempol mo famli histri. Yufala i save stat blong ridim Doktrin mo Ol Kavenan 2:2–3 mo stap invaetem ol lida blong oli serem ol eksperiens blong olgeta, abaot taem we hat blong olgeta i bin tanem i go long ol bubu blong olgeta. ?Wanem nao i bin hapen long laef blong olgeta we i bin helpem olgeta blong wantem blong lanem abaot famli histri blong olgeta? ?Wanem nao samfala tingting we oli save givim blong helpem ol nara memba blong klas blong tekpat moa long seves ia blong famli histri mo tempol seves? Toktok ia we i kam long Presiden Dallin H. Oaks, we i stap long “Sam Moa Risos, wetem ol vidio ia “The Promised Blessings of Family History” mo “If We Put God First” (ChurchofJesusChrist.org) oli save help blong givim insperesen long ol memba blong klas. Yu save sendem ol memba oli go long FamilySearch.org blong oli kasem moa aedia.
Sam Moa Risos
Stamba tingting blong Kriesen.
Presiden Russell M. Nelson i tijim:
“Laef we i no save finis, we Atonmen i mekem se i posibol blong yumi kasem, i hae stamba tingting biaen long Kriesen. Blong talemaot toktok ia long wan nara wei, sapos ol famli oli no sil long ol tabu tempol, bae Lod i spolem gud ful wol ia.
“Ol stamba tingting blong Kriesen, Foldaon, mo Atonmen, evriwan ia oli tanem olgeta i go long tabu wok ia we oli stap mekem insaed long ol tempol blong Jos Ia blong Jisas Kraes blong Ol Lata-dei Sent” (“The Atonement,” Ensign, Nov. 1996, 35). Luk tu long Moses 1:39.
Evriwan i save mekem wan samting.
Presiden Dallin H. Oaks i tijim: “Insaed long wok ia blong stap pemaot ol dedman, i gat fulap defren smol wok blong mekem. … Hadwok blong yumi i no blong fosem evriwan blong mekem evri samting, be hem i blong leftemap tingting blong evriwan blong mekem wan samting” (“Family History: ‘In Wisdom and in Order,’” Ensign, June 1989, 6).
Stap Kam Antap long Fasin blong Yumi blong Stap Tij
Yusum olgeta we oli no bin stadi long ol skripja insaed long hom. Meksua se evri memba blong klas oli filim gud blong stap tekpat mo serem tingting long taem blong storian, iven olgeta we maet oli no bin rid long hom.