Tabu Bus

Tabu Bus, i kam long Greg K. Olsen

4–10 Jenuware

Josef Smit—Histri 1:1–26

“Mi Bin Luk Wan Laet, I Saen Antap I Kamdaon”

Yu mas tingbaot se moa impoten wei blong yu stap rere, i blong yu stadi long ol skripja mo blong yu stap laef folem wanem we yu stap lanem. Spirit i save helpem yu blong save wanem blong lukluk nomo long hem insaed long klas.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

?Wanem niu tingting nao ol memba blong klas oli kasem taem we oli bin stap stadi long Josef Smit—Histri 1:1–26 long wik ia? Maet yu save soem wan pikja blong Josef Smit o blong Fas Visen, mo invaetem ol memba blong klas blong oli raetemdaon long bod samfala long ol niu tingting ia we i bin kamaot long stadi blong olgeta, hemia wetem olgeta ves we ol niu tingting ia oli kamaot long ol. Oli save serem tu olsem wanem, testemoni blong olgeta abaot Josef Smit mo misin blong hem, i bin gro taem we oli stap lan abaot hem long wik ia.

tijing pikja bokis

Stap Tijim Doktrin

Josef Smit—Histri 1:5–18

Sapos yumi stap askem samting wetem fet, bambae God i ansarem yumi.

• Maet bae ol memba blong klas blong yu oli save tingting long olgetawan taem we oli stap rid abaot tingting blong hat blong Josef blong wantem lukaotem trutok insaed long wan wol we i stap tijim plante tingting we oli no go tugeta. ?Olsem wanem nao ol tingting we oli fasfas long taem blong yumi tedei, i semmak long wanem we hem, hem i bin fesem? Blong helpem ol memba blong klas blong oli luk olsem wanem yumi save faenem ol ansa blong ol kwestin blong yumi, yu save invaetem olgeta blong raetemdaon long bod, lis blong ol defren wei we oli pipol oli stap lukaotem trutok. Afta long hemia, oli save luklukbak long Josef Smit—Histri 1:5–18 mo ademap long lis wanem we Josef Smit i bin mekem blong faenem ol ansa blong ol kwestin blong hemwan.

• Ol memba blong klas oli save serem olsem wanem nao oli bin folem eksampol blong Josef Smit long taem we oli stap lukaotem trutok, mo olsem wanem nao God i bin ansarem olgeta. Toktok blong Presiden Russel M. Nelson we i stap long “Sam Moa Risos” i givim sam rod blong folem blong yumi save askem trutok long God.

  yangfala gel i stap prea

  Prea i letem yumi toktok wetem God.

Josef Smit—Histri 1:15–20

Josef Smit i bin luk God Papa mo Pikinini blong Hem, Jisas Kraes.

• Fas Visen i soemaot samfala trutok abaot God, we i bin agensem wanem we plante oli bin biliv long hem long taem blong Josef. Ol memba blong klas oli save ridim Josef Smit—Histri 1:15–20 mo faenemaot sam samting we oli lanem abaot God. ?From wanem hem i impoten blong save olgeta trutok ia abaot God?

• Sapos Josef Smit bae i visitim klas blong yumi, ?wanem nao bae yumi askem hem abaot eksperiens blong hem? Vidio ia, “Ask of God: Joseph Smith’s First Vision” (ChurchofJesusChrist.org) i save givim sam moa tingting long ol memba blong klas abaot Fas Visen blong Josef Smit (luk long “Sam Moa Risos”). Maet bae oli save tingting hevi long wei we bae oli save komplitim wan sentens olsem hemia: “From Fas Visen i bin hapen, naoia mi save se …” ?Wanem blesing nao i kam insaed long laef blong yumi from Fas Visen ia i bin hapen?

• Blong ademap tingting long spirit blong storian blong yufala, ol memba blong klas oli save rid o singsing long “Prea blong Josef Smit” (STSP ol pej 14–15). ?Hym ia i helpem yumi blong andastanem wanem mo filim wanem abaot Fas Visen? Maet samfala memba blong klas oli save serem olsem wanem oli bin kam blong save blong olgetawan, se Josef i rili bin luk God Papa mo Jisas Kraes insaed long Tabu Bus ia. O, yu save invaetem ol fultaem misinari (o wan niu riten misinari) blong kam long klas mo tokbaot olsem wanem Fas Visen i bin gat paoa insaed long laef blong ol pipol we oli bin tijim.

Josef Smit—Histri 1:21–26

Yumi save gohed blong stap tru long wanem we yumi save, iven sapos ol narawan oli no wantem lisin o akseptem yumi.

• Ol memba blong klas oli save poenemaot samfala samting we Josef Smit i bin gotru long hem taem hem i stat blong talemaot long ol nara pipol abaot visen blong hem (luk long Josef Smit—Histri 1:21–26). Maet oli save serem samfala ves we i bin givim insperesen long olgeta long ol taem we ol narawan oli bin jalenjem ol bilif blong olgeta.

• Sapos yu save sam memba blong wod we oli bin gotru long fasin blong agens from se oli bin ol memba blong Jos, tingting blong askem olgeta blong kam long klas, we oli rere blong serem olsem wanem blong kipim fet blong olgeta i strong i stap. ?Wanem nao yumi lanem aot long eksampol blong Josef Smit insaed long Josef Smit—Histri 1:21–26?

sam moa risos pikja bokis

Sam Moa Risos

Folem eksampol blong Josef.

Presiden Russell M. Nelson i tijim:

“Profet Josef Smit i putum wan paten i stap blong yumi folem blong stretem ol kwestin blong yumi. Folem promes blong Jemes se sapos yumi no gat waes, yumi save askem long God, [luk long Jemes 1:5], nao Josef i tekem kwestin blong hem i go stret long Papa long Heven. Hem i askem revelesen blong hemwan, mo from hem i lukaotem, nao hemia i openem las dispensesen ia.

“Long semmak fasin, ?wanem we yu stap lukaotem ia, bae i openem wanem long yu? ?Wanem waes nao yu no gat? ?Wanem nao yu filim se yu mas save o andastanem kwik naoia? Folem eksampol blong Profet Josef. Faenem wan kwaet ples we yu save go long hem oltaem. Putum tingting blong yu i stap daon long fes blong God. Talemaot hat blong yu long Papa blong yu long Heven. Tanem yu i go long Hem blong kasem ol ansa mo kasem kamfot” (“Revelesen blong Jos, Revelesen blong Laef blong Yumi,” Liahona, Mei 2018, 93).

Fas Visen blong Josef Smit.

Blong ridim long ditel wanem i bin hapen long Fas Visen, we oli kamaot long ol defren storian blong Josef Smit, luk long Saints 1:14–16.

Stap Kam Antap long Fasin blong Yumi blong Stap Tij

Lukaotem insperesen blong yuwan. No tekem se ol aotlaen ia oli ol instraksen we yu mas folem taem yu stap tij. Be, yusum olgeta blong straekem ol aedia mo givim insperesen taem yu stap tingting hevi long doktrin we i stap long ol skripja mo ol nid blong ol pipol we yu stap tijim.