Iosefa Samita ma Molimau e Toatolu o loo tootutuli i le tatalo

15–21 Fepuari.

Mataupu Faavae ma Feagaiga 14-17

“Tu Atu o se Molimau”

Mafaufau i le aoaoga faavae ma mea na tutupu ua faamatalaina i le Mataupu Faavae ma Feagaiga 14–17. O le a faapefea ona e uunaia tagata e te aoaoina ia “tu o se molimau o [nei] mea”? (Mataupu Faavae ma Feagaiga 14:8).

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O a mea na maua e tagata o lau vasega e aoga i a latou suesuega patino pe faaleaiga o tusitusiga paia? Atonu e mafai ona e valaaulia le vasega e faasoa mai se tasi o manatu e uiga i le auai i le galuega a le Alii mai vaega taitasi i le Mataupu Faavae ma Feagaiga 14-17.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 14-16

Ua valaaulia i tatou e le Alii e auai i Lana galuega.

• O a mea ua iloa e tagata o le vasega e uiga i le aiga o Uitimera? (Tagai Au Paia, 1:68–69). Atonu e aoga mo i latou le lisi i le laupapa o nisi o mea moni e uiga i le au Uitimera. E faapefea e nei mea moni ona fesoasoani ia i tatou e malamalama atili ai i le fautuaga a le Alii i le au Uitimera i vaega 14–16? Mo se faataitaiga, aisea e ono faatusatusa ai e le Alii Lana galuega i se fanua ua seleseleina?

• Ina ia faatagaina tagata o le vasega e faasoa mai o latou manatu e uiga i le auai i le galuega a le Alii, e mafai ona e tusia nei mau fesootai i le laupapa: Mataupu Faavae ma Feagaiga 14:1; 14:2–4; 14:5, 8; 14:6–7; 14:9–11; 15:6. E mafai e tagata o le vasega ona faitau se tasi o nei fuaitau o mau i paga ma talanoaina mea ua latou aoao e uiga i le galuega a le Alii. E mafai e ni nai paga ona faasoa mai i le vasega mea na latou talanoaina.

• Valaaulia tagata o le vasega e faasoa mai o latou aafiaga i le fesoasoani atu i isi e faalatalata atili i le Faaola, e aofia ai o ni faifeautalai po o faifeau auauna ma e ala i le auaunaga. Ua faapefea ona latou vaaia afioga a le Alii i le Mataupu Faavae ma Feagaiga 15: 6 ma le 16:6 ua faataunuuina i o latou olaga? O le a se mea ua tatou aoao mai nei vaega e mafai ona fesoasoani ia i tatou e faasoa atu ai le talalelei?

  tagata galulue fanua o loo seleseleina le saito

  ata o tagata galulue fanua na tusia e Greg Newbold

Mataupu Faavae ma Feagaiga 17

E mafai ona tatou tumau i le faamaoni i mea ua tatou iloa, e tusa lava pe teena i tatou e isi.

• Aisea na saunia ai e le Alii ni molimau o le Tusi a Mamona? E mafai e tagata o le vasega ona faasoa mai manatu na oo ia i latou a o latou faitau i le Mataupu Faavae ma Feagaiga 17. E ono maua nisi manatu i mau o loo taua i le ulutala o le vaega 17 po o le “Mau a Molimau e Toatolu,” o loo i le amataga o le Tusi a Mamona. Ua faapefea ona faamalosia a tatou molimau e mau a Molimau e Toatolu o le Tusi a Mamona?

• E ui lava tatou te lei vaai i ni agelu pe uuina papatusi auro, e mafai pea ona tatou molimau i le Tusi a Mamona. O a mea ua maua e tagata o le vasega i le vaega 17 (e aofia ai le ulutala o le vaega) latou te lagona e aoga ia i latou? Afai e fesili atu se tasi pe aisea tatou te talitonu ai e moni le Tusi a Mamona, o le a sa tatou tala? Atonu e mafai e tagata o le vasega ona tusi se tali puupuu, ona e valaaulia lea o nisi e faasoa mai mea na latou tusia. O le upusii a Peresitene Ezra Taft Benson i le “Punaoa Faaopoopo” e ono uunaia tagata e fai atu a latou molimau o le Tusi a Mamona i isi.

• E ono musuiaina foi le valaaulia o se tagata o le vasega e faasoa mai ni aafiaga o isi molimau o papatusi auro (tagai “O le Mau a Molimau e Toavalu” i le Tusi a Mamona ma le aafiaga o Mary Whitmer i le Au Paia,, 1:70–71). O le a se mea ua tatou aoao mai aafiaga o nei molimau?

• E mafai ona e faasoa atu ni vaega mai le vitio “A Day for the Eternities” (ChurchofJesusChrist.org) o se vaega o lau talanoaga e uiga i molimau o le Tusi a Mamona (le vaega e uiga i Molimau e Toatolu e amata i le 15:00)?

aikona o punaoa faaopoopo

Punaoa Faaopoopo

Faasoaina o la tatou molimau o le Tusi a Mamona.

Sa tuuina mai e Peresitene Ezra Taft Benson le valaaulia lenei i tagata o le Ekalesia i le 1988:

“O le Tusi a Mamona o le meafaigaluega lea ua mamanuina e le Atua e ‘tafi [ai] le lalolagi … e pei o se lolo, ae faapotopoto [Ana] au filifilia.” (Mose 7:62.) E manaomia e lenei vaega o tusitusiga paia ona avea atili ma totonugalemu o la tatou talaiga, la tatou aoao atu, ma la tatou galuega faafaifeautalai.

“… I lenei vaitau o ala o faasalalauga faaeletonika ma le anoanoai o le faasalalauina o le afioga lolomi, o le a faamasinoina ai i tatou e le Atua pe afai tatou te le tuleia le Tusi a Mamona i se auala silisili.

“Ua i ai ia i tatou le Tusi a Mamona, ua i ai ia i tatou tagata o le au paia, ua i ai ia i tatou faifeautalai, ua i ai ia i tatou punaoa, ae o le manaoga ua i ai i le lalolagi lea. O le taimi lava lenei!

“O’u uso e ma tuafafine pele, e faigata ona tatou malamalama i le mana o le Tusi a Mamona, po o le matafaioi paia e tatau ona ia faia, po o le tele e tatau ona tuleia” (Aoaoga a Peresitene o le Ekalesia: Ezra Taft Benson [2014], 153–62).

Faaleleia o Lo Tatou Aoao Atu

Fai ni fesili e valaaulia ai molimau. O se fesili musuia e mafai ona avea o se auala mamana e valaaulia ai le Agaga. Mo se faataitaiga, a aoao atu le Mataupu Faavae ma Feagaiga 14:9, e mafai ona e fai atu se fesili e pei “Na faapefea ona e iloa o Iesu Keriso o ‘se malamalama e lē mafai ona natia i le pouliuli’?” (Tagai Aoao Atu i le Ala a le Faaola, 32. )