faatoaga a Matini Harisi

Faatoaga a Matini Harisi, saunia e Al Rounds

22–28 Fepuari

Mataupu Faavae ma Feagaiga 18–19

“Ua Tele lava le Taua o Agaga”

Ua na o le Agaga Paia e mafai ona suia le loto o le tagata. Na aoao mai Peresitene Henry B. Eyring, “Afai e te aoaoina atu mataupu faaleaoaoga faavae, o le a oo mai le Agaga Paia” (“Discussion with Elder Richard G. Scott and Elder Henry B. Eyring” [Church Educational System satellite training broadcast, Aug. 11, 2003]).

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai o latou aafiaga i tusitusiga paia, faitau faatasi le Mataupu Faavae ma Feagaiga 18:34-36. Ona valaaulia lea o tagata o le vasega e faasoa mai se fuaiupu sa latou faitau i ai i lenei vaiaso ma latou iloa ai le siufofoga o le Alii.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 18:10–16; 19:15–20, 39–41

E olioli le Alii pe a tatou salamo.

• O le tele o tagata e faafesootai le salamo ma lagona le lelei. E faapefea e fetalaiga a le Alii i le Mataupu Faavae ma Feagaiga 18 ma le19 ona fesoasoani i tagata o le vasega e vaai i le salamo o se mea e olioli ai? E mafai ona e tusi i le laupapa le O le salamo o le  ma fai i le vasega e fautua mai ni auala e faauma ai lenei fuaiupu, e faalagolago i mea na latou faitau mai vaega 18 ma le19. (Mafaufau e iloilo Mataupu Faavae ma Feagaiga 18:10–16; 19:15–20, 39–41 i le vasega.)

• O le a le uiga o le “alagaina o le salamo”? (Mataupu Faavae ma Feagaiga 18:14). Atonu e mafai e tagata o le vasega ona mafaufau i lenei fesili ao latou faitauina le Mataupu Faavae ma Feagaiga 18:10-16. Aisea e filifili ai tagata i nisi taimi e aua le salamo? E mafai faapefea ona tatou uunaia i latou tatou te alolofa i ai ia o mai i le Faaola ma maua le faamagaloga? Uunaia tagata o le vasega e vaai mo se mea i le Mataupu Faavae ma Feagaiga 18:10–16 po o le 19:15–20 e mafai ona fesoasoani.

Mataupu Faavae ma Feagaiga 18:10-16

“Ua tele lava le taua o agaga i le silafaga a le Atua.”

• E mafai faapefea ona e fesoasoani i tagata o le vasega ia malamalama i le taua tele o i tatou i le silafaga a le Atua? Atonu e mafai ona latou faitau i le Mataupu Faavae ma Feagaiga 18:10-16 ma faasoa mai ni aafiaga na latou malamalama ai i lo latou taua i le Atua. E mafai faapefea e nei fuaiupu ona aafia ai le ala tatou te vaai ai ia i tatou lava? isi tagata? E faapefea ona faaali mai e le Atua ia i tatou e taua tele i tatou ia te Ia?

  O Iesu o loo siiina se tamaitiiti

  Taua o se Agaga, saunia e Liz Lemon Swindle

Mataupu Faavae ma Feagaiga 19:15–19

Na puapuagatia Iesu Keriso mo tagata uma.

• E mafai faapefea ona e fesoasoani i tagata o le vasega ia lagona le molimau a le Agaga Paia a o latou mafaufau loloto i le faamatalaga a le Faaola i Lona lava puapuaga togiola? (Mataupu Faavae ma Feagaiga 19:15–19). Atonu e mafai ona e valaaulia se tasi e usu se viiga e fiafia i ai e uiga i le Faaola. E mafai foi ona e faaali atu se ata o le Faaola ma valaaulia tagata o le vasega e faitau fuaiupu 15-19; ona mafai lea ona latou tusi i lalo o latou manatu ma lagona. (O upu a Elder D. Todd Christofferson i le “Punaoa Faaopoopo” e mafai foi ona faateleina le faafetai o tagata o le vasega mo puapuaga o le Faaola.) O se fuaiupu faapea i le laupapa e mafai ona fesoasoani i tagata o le vasega e mafaufau: Ou te faafetai mo le Togiola a Iesu Keriso aua … Atonu e naunau ni nai tagata o le vasega e faasoa mai mea na latou tusia ma faasoa mai a latou molimau ia Iesu Keriso.

Mataupu Faavae ma Feagaiga 19:16-26, 34-41

O le faia o le finagalo o le Atua e manaomia ai le ositaulaga.

• Ao feagai tagata o le vasega ma tulaga e tatau ai ona faia ni osigataulaga mo le talalelei, atonu e musuia mo i latou le aoao e uiga i le ositaulaga a Matini Harisi na fai ina ia mafai ona lolomiina le Tusi a Mamona. E mafai ona e valaaulia se tasi e sau i le vasega ua saunia e faamatala mai le filifiliga a Matini e mokesi lana faatoaga e totogi ai le lolomiina o le Tusi a Mamona (tagai Au Paia, 1:76-78). O a ni fuaiupu mai le vaega 19 na ono fesoasoani ia te ia e fai lana filifiliga? Atonu e te manao e valaaulia tagata o le vasega e faasoa mai le ala na faamanuiaina ai i latou e le Tusi a Mamona ma lo latou faafetai mo le taulaga a Matini Harisi ma isi na ositaulaga ina ia mafai ai ona lolomiina le tusi.

• Atonu e mafai e se tasi i le vasega ona faasoa mai se ositaulaga na latou faia mo le Alii. O lenei mea e ono taitaia mafaufau o tagata o le vasega e uiga i lo latou lava naunautai e ositaulaga. Uunaia i latou e faasoa mai se mea na latou maua mai le Mataupu Faavae ma Feagaiga 19 e uunaia ai i latou e fai ni osigataulaga ina ia faia le finagalo o le Atua (tagai faapitoa lava i fuaiupu 16–26, 34–41).

aikona o punaoa faaopoopo

Punaoa Faaopoopo

O le tau o le alofa o le Atua.

E faasino i le Mataupu Faavae ma Feagaiga 19:18, na saunoa Elder D. Todd Christofferson: “Ia tatou mafaufau i le tau o le alofa faapelepele o le Atua. … O Ona tiga i Ketesemane ma luga o le satauro sa sili atu i lo tiga e mafai e se tagata ona lavatia. Ae ui i lea, ona o Lona alofa mo Lona Tama ma mo i tatou, sa Ia tumau ai ma, o se taunuuga, ua mafai ona ofo maia ia i tatou le tino ola pea ma le ola e faavavau.” (“Tumau i Lou Alofa,” Ensign po o le Liahona, Nov. 2016, 50).

Faaleleia o Lo Tatou Aoao Atu

Fatu se Siosiomaga e Valaauliaina le Agaga. E tele auala e mafai ai ona valaaulia le Agaga i lau vasega. O se musika muai taina e mafai ona uunai le faaaloalo. O foliga alofa ma le molimau e mafai ona fatuina se siosiomaga mafanafana, ma faaleagaga. (Tagai Aoao Atu i le Ala a le Faaola, 15.)