tusitusiga o le Tusi a Mamona

Kopi o le uluai tusitusiga o le Tusi a Mamona.

1–7 Fepuari

Mataupu Faavae ma Feagaiga 10–11

“Ia Mafai Ona e Sau ai ua Manumalo”

O a ni uunaiga na e maua ao e faitau i le Mataupu Faavae ma Feagaiga 10–11? O a mafaufauga na oo mai ia te oe e uiga i manaoga o tagata e te aoaoina?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia tuu atu i tagata o le vasega se avanoa e talanoa ai e uiga i mea na latou aoaoina ia latou suesuega o tusitusiga paia patino pe faaleaiga, e mafai ona e tusia i le laupapa Mataupu Faavae ma Feagaiga 10 ma le Mataupu Faavae ma Feagaiga 11. E mafai e nisi tagata o le vasega ona tusia, i lalo o se tasi o nei autu, le numera o se fuaiupu na latou maua ai se upumoni taua. Filifili ni nai fuaiupu, ma valaaulia tagata o le vasega e faasoa mai ni upumoni na latou maua iina.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 10:1–33

Ua saili Satani e faaumatia le galuega a le Atua.

• E mafai e leMataupu Faavae ma Feagaiga 10 ona fesoasoani i tagata o le vasega ia iloa ma tetee i taumafaiga a Satani e faaumatia lo latou faatuatua. Ina ia tuuina atu ni tusiga faaletalafaasolopito mo lenei vaega, e mafai ona e valaaulia se tagata o le vasega e faasoa mai le tala ia Matini Harisi ina ua leiloloa itulau e 116 o le faaliliuga o le Tusi a Mamona (tagai i le ulutala o le Mataupu Faavae ma Feagaiga 3 ma le Au Paia, 1:50–53). Ona mafai lea e tagata o le vasega ona sue le Mataupu Faavae ma Feagaiga 10:1–33 e saili le fuafuaga a Satani mo laupepa ua leiloloa. O a ni mea ua tatou aoao mai i nei fuaiupu e uiga i auala e galue ai Satani ma pe aisea e fai ai e ia nei mea? (Tagai foi fuaiupu 63). O faapefea ona ia galue faapea i o tatou aso? E faapefea ona fesoasoani le Alii ia i tatou e manumalo ia Satani i o tatou olaga?

Mataupu Faavae ma Feagaiga 10:34–52

“E sili atu [le poto o le Alii] nai lo le faitogafiti-poto o le tiapolo. ”

• Pe a tatou lagona le lotovaivai i a tatou agasala, e mafai ona tatou maua le faamoemoe i le iloaina o le ala na sui ai le Alii mo le agasala na faia e Iosefa Samita ma Matini Harisi ina ua le usiusitai i le Alii ma leiloloa ai itulau e 116 o le faaliliuga o le Tusi a Mamona. Mafaufau pe faapefea ona e fesoasoani i tagata o le vasega ia maua le faamoemoe i lenei tala. Mo se faataitaiga, e mafai ona e valaaulia i latou e faasoa mai se mea na latou aoao e uiga i le Alii mai le Mataupu Faavae ma Feagaiga 10:34–52 (tagai foi Mataupu Faavae ma Feagaiga 3:1–3). E mafai e tagata o le vasega ona faasoa mai le ala na latou vaaia ai “e sili atu [le poto o le Alii] nai lo le faitogafiti-poto o le tiapolo” (Mataupu Faavae ma Feagaiga 10:43). E mafai faapefea e lenei malamalama ona faamalosia lo tatou faatuatua ia te Ia?

  Mamona o loo otootoina ia papatusi auro

  Mamona o loo Otootoina ia Papatusi, saunia e Tom Lovell

Mataupu Faavae ma Feagaiga 11

Afai tatou te ole atu i le Atua, o le a tatou maua ai.

• O leotootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ua valaaulia i tatou ia faitau le Mataupu Faavae ma Feagaiga 11 ia faapei na tusia mo i tatou. Atonu o le a loto le vasega e faasoa mai se mea mai le vaega lena e faapitoa lava le aoga ia i latou. E faapefea ona latou fuafua e faaaoga mea sa latou aoaoina?

• O se tasi o auala e uunaia ai le talanoaga e uiga i le Mataupu Faavae ma Feagaiga 11 o le valaaulia lea o tagata o le vasega e sue se mataupu faavae i le vaega ona tusi lea o se fesili e faatatau i ai. O ia fesili e mafai ona aofia ai “O le a le uiga o le pipii atu ia Keriso ma lou loto atoa?” (fuaiupu 19) po o le “E faapefea ona tatou maua le upu a le Atua?” (fuaiupu 21). E mafai e tagata o le vasega ona tuu a latou fesili i le pito i luga o se fasi pepa ma faasolo atu a latou pepa faataamilo i le potu, ma faaopooopo ni manatu ma ni tali e maua i fesili a isi. (E mafai ona fesoasoani le vaevae muamua o le vasega i ni vaega toalaiti.) Ona mafai lea ona faasoa e le vasega nisi o manatu na tusia e isi e uiga i la latou fesili.

Mataupu Faavae ma Feagaiga 11:8–26)

O le a tuu mai e le Atua Lona Agaga ao tatou saunia i tatou lava i Lana ala.

• Mata o le a manuia lau vasega mai le talanoaina o auala e iloa ai faaaliga patino e ala i le Agaga? Afai o lea, e mafai ona e amata se talanoaga e ala i le valaaulia o i latou e mafaufau faapea na fesiligia i latou e tusi ni upumoni e uiga i le ala e maua ai faaaliga patino. O a ni mea e mafai ona latou faaaofia mai le Mataupu Faavae ma Feagaiga 11:8-26? Mo se faataitaiga, o a mea o le a latou tusia e uiga i le saunia e maua le taitaiga mo o tatou olaga ma tali i a tatou fesili? O le a se latou tala e fai e uiga i le iloaina o tali pe a oo mai? Valaaulia tagata o le vasega e mafaufau loloto pe faapefea ona latou faaaogaina mea ua latou aoao ao latou tauivi e saili faaaliga patino.

  O se vaega o lenei gaoioiga, e mafai ona e faasoa atu lenei saunoaga mai ia Sister Julie B. Beck, o le sa avea muamua ma Peresitene Aoao o le Aualofa: “O le tomai e agavaa ai, mauaina, ma le faatinoina o faaaliga faaletagata lava ia, o le tomai aupito sili ona taua lea e tasi e mafai ona maua i lenei olaga” (“Ou te Liligi Ifo Foi Lou Agaga i Auauna Fafine i ia Ona Aso,” Ensign po o le Liahona, Me 2010, 11).

Faaleleia o Lo Tatou Aoao Atu

Ia aofia ai i latou o loo tauivi pea. O a ni mea e mafai ona e faia pe afai o se tagata o le vasega ua foliga mai ua tosina ese mai le isi vaega o le vasega? O nisi taimi e manaomia e ia le na ona faaauai lava. Mafaufau e fai atu i lenei tagata ia auai i se lesona i le lumanai. Afai e le tali mai o ia i au taumafaiga i le taimi muamua, faaauau pea ona faaalia le alofa ma le popole. (Tagai Aoao Atu i le Ala a le Faaola, 8–9.)