tusiupu o loo tusitusi i se pepa

25–31 Ianuari

Mataupu Faavae ma Feagaiga 6-9

“O le Agaga o Faaaliga Lenei”

Ua aoao mai e leMataupu Faavae ma Feagaiga 6-9 mataupu faavae taua e uiga i le mauaina o faaaliga. Faaaoga nei mataupu faavae e ala i le sailia o faaaliga e uiga i le ala e fesoasoani ai i tagata o le vasega e aoao mai nei vaega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai o latou aafiaga i le suesueina o le Mataupu Faavae ma Feagaiga 6-9, e mafai ona e valaaulia i latou e talanoaina, pe a talafeagai, soo se uunaiga faaleagaga na latou maua i le taimi o a latou suesuega. O a ni savali a le Alii na i ai mo i latou?

aikona o le aoao atu

Aoao Atu le Aoaoga Faavae

Mataupu Faavae ma Feagaiga 6; 8–9

E talanoa mai le Tama Faalelagi ia te au e ala i “le Agaga lea o le upumoni.”

• E tele mea a le Alii e aoao ai i tatou e uiga i faaaliga patino i nei vaega, ma atonu e le mafai ona e aoaoina atu uma i le vasega e tasi. Atonu e mafai ona e vaevaeina le vasega i ni vaega se tolu ma totofi i vaega taitasi ia suesue vaega 6, 8, po o le 9, , ma vaavaai mo tali i fesili e pei o nei: E faapefea ona talanoa mai le Agaga Paia ia i tatou? E faapefea ona tatou iloaina faaaliga patino? E mafai faapefea ona tatou saunia i tatou lava ia maua faaaliga? Ona mafai lea e se tasi mai vaega taitasi ona faasoa puupuu i le vasega mea na iloa e a latou vaega. E mafai foi ona e uunaia tagata o le vasega e faasoa mai o latou lava aafiaga i le iloaina o faaaliga patino. Mo se faataitaiga, pe i ai se mea i le Mataupu Faavae ma Feagaiga 6:22-24 e faamanatu ai ia i tatou aafiaga na tatou maua?

• O le talanoa i faaaliga patino atonu e faalotovaivai i tagata o lau vasega o e tatalo mo le taitaiga ae le lagonaina na latou maua se faaaliga. E mafai ona fesoasoani ia i latou le iloa na tauivi Oliva Kaotui ma lagona faapea ina ua le mafai ona faigofie ona ia faaliliu e pei ona ia faamoemoe i ai. Atonu e mafai ona e valaaulia tagata o le vasega e suesue le fautuaga a le Alii ia Oliva i le vaega 9. O a savali i lenei vaega e mafai ona fesoasoani i se tasi e lagonaina e le o tali mai le Alii ia latou tatalo? O fuaitau i le “Punaoa Faaopoopo” e mafai foi ona fesoasoani.

  Oliva Kaotui

  Oliva Kaotui, saunia e Lewis A. Ramsey

Mataupu Faavae ma Feagaiga 6-7

“E pei ona e manao mai ai ia te aʼu, o le a faapea lava.”

• O leotootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga o loo fautuaina ai ni vaega taua o upu e pei o le manao i vaega 6–7. Atonu e mafai e tagata o le vasega ona faasoa mai mea na latou aoaoina mai lena gaoioiga, pe e mafai ona e faia le gaoioiga faatasi o se vasega. O a mea ua aoao ai i tatou e a tatou faatinoga i aso taitasi e uiga i o tatou manao? E mafai faapefea ona fesoasoani le Alii ia i tatou e suia o tatou manao?

Mataupu Faavae ma Feagaiga 6:29–37

Afai tatou te vaavaai atu i le Alii, e mafai ona Ia fesoasoani ia i tatou e faatoilalo le masalosalo ma le fefe.

• Aisea e i ai taimi tatou te “fefefe … e fai mea lelei”? (fuaiupu 33). Atonu e fautuaina mai e tagata o le vasega ni mafuaaga tatau, faatasi ma ni manatu mai le Mataupu Faavae ma Feagaiga 6:29-37 lea e tuuina atu ia i latou le lototele e fai mea lelei.

• Ina ia amataina se talanoaga e uiga i le ala e fesoasoani ai Iesu Keriso ia i tatou “aua le masalosalo, aua le fefefe” (fuaiupu 36), e mafai ona e fai i tagata o le vasega e tusi i ni fasi pepa ni mea e ono fefefe ai tagata. (Na tuuina mai e Elder Ronald A. Rasband ni faataitaiga i lana savali “Aua le Atuatuvale” [Ensign po o le Liahona, Nov. 2018, 18].) Ona mafai lea ona e faitauina leotele ni nai pepa ma talanoaina le ala e mafai ai ona fesoasoani le Faaola ma Lona mana togiola ia i tatou pe a tatou fefefe.. Mataupu Faavae ma Feagaiga 6:29–37 o loo i ai ni manatu (tagai foi 1 Ioane 4:18). O le a le uiga o le “vaai ia [Keriso] i mafaufauga uma”? (fuaiupu 36). E faapefea e lenei taulai atu i le Faaola ona fesoasoani ia i tatou pe a tatou feagai ma le masalosalo po o le fefe?

aikona o punaoa faaopoopo

Punaoa Faaopoopo

Malamalama i ala e tali mai ai le Tama Faalelagi i tatalo

“I lo’u olaga ua ou aoao ai o nisi taimi ou te le maua ai se tali i se tatalo ona ua silafia e le Alii ou te le o sauni. Ae a tali mai o Ia, e masani lava ‘o si mea itiiti i i ma sina mea itiiti i o’ [2 Nifae 28:30] aua na pau na o mea e mafai ona ou tauaveina po o mea ua ou naunau e fai” (Robert D. Hales, “Faatalitali i le Alii: Ia Faia Lou Finagalo,” Ensign po o le Liahona, Nov. 2011, 73).

“O le a lau mea e fai pe a ua uma ona e saunia ma le faaeteete, ua tatalo faatauanau, faatalitali mo se taimi umi mo se tali, ae e te le o lagonaina lava se tali? E mafai ona e manao e faaali atu le faafetai pe a tupu mai lena mea, aua o se faamaoniga lena o Lona talitonuina. Afai e te ola agavaa ma o loo ogatusa lau filifiliga ma aoaoga a le Faaola ma ua manaomia ona e gaoioi, ia faia loa ma le faatuatua. … Afai e te ola amiotonu ma o loo e faatinoina ma le faatuatuaina, o le a le tuuina lava oe e le Atua e te alu mamao ese atu e aunoa ma se uunaiga lapata’i pe afai e sese lau faaiuga ua fai” ( Richard G. Scott, “Faaaogaina o le Meaalofa Faalelagi o le Tatalo,,” Ensign po o le Liahona, Me 2007, 10).

Faaleleia o Lo Tatou Aoao Atu

Faaali atu lou talitonu i taumafaiga a tagata aoao. Atonu e lagona e nisi tagata i lau vasega le tuuatoatasi i a latou taumafaiga e aoao le talalelei. Manatunatu pe faapefea ona e faamautinoa i tagata o le vasega a latou taumafai e aoao i latou lava, o le a faiaoga le Agaga Paia ia i latou. (Tagai Aoao Atu i le Ala a le Faaola,29,)