aiga o loo faitauina tusitusiga paia

28 Tesema–3 Ianuari

Mataupu Faavae ma Feagaiga 1

“Faalogo Maia, Outou e Tagata”

A o e faitauina le Mataupu Faavae ma Feagaiga 1, mafaufau e uiga i fuaiupu e mafai ona e taulai atu i ai i le vasega ma le ala e mafai ai ona e fesoasoani i tagata o le vasega e aoao mai nei fuaiupu.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai ona e amata lau suesuega i le vasega o le Mataupu Faavae ma Feagaiga i le fesili atu i tagata o le vasega i o latou lagona i le suesueina o lenei tusi o tusitusiga paia i lenei tausaga. O a fuaitau mai le vaega 1 e fesoasoani ia i latou e lagona ai le fiafia e faitau le Mataupu Faavae ma Feagaiga? Atonu e mafai ona e fai atu ia i latou e sue le vaega 1 mo se fuaiupu latou te ono faasoa atu pe a latou taumafai e uunaia se tasi e faitau lenei tusi paia.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 1

Ua valaaulia i tatou e le Alii ia “suesue i nei poloaiga.”

• Ao outou talanoaina le “faatomuaga” a le Alii i le Mataupu Faavae ma Feagaiga fuaiupu 6), atonu e fesoasoani mo se tasi i le vasega e faamatala mai po o le a le faatomuaga ma lona faamoemoega i se tusi. Ona mafai lea e le vasega ona talanoaina pe faapefea e le vaega 1 ona faataunuu lea faamoemoe mo le Mataupu Faavae ma Feagaiga. Mo se faataitaiga, o a autu mo le tusi o loo faailoa mai e le vaega 1 ? O a faamoemoega o le tusi? O a mea ua tatou maua i lenei vaega e mafai ona uunai ai le ala tatou te faitauina ai le Mataupu Faavae ma Feagaiga i lenei tausaga?

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ua valaaulia i tatou e mafaufau i le ala o le a tatou faatino ai le poloaiga a le Alii i le “suesue i nei poloaiga” (fuaiupu 37). Atonu e mafai e tagata o le vasega ona faasoa mai mea ua latou fuafua i lenei tausaga ia aoga ai la latou suesuega o le Mataupu Faavae ma Feagaiga. O a mea o le a latou sailia? E faapefea ona ese le suesueina nai lo le faitau? O a auala o suesuega na latou maua sa sili ona aoga?

Mataupu Faavae ma Feagaiga 1:1–6, 23–24, 37–39

E fetalai le Atua e ala mai i Ana auauna, ma o Ana upu o le a faataunuuina.

• E toatele i tatou e i ai aiga, uo, ma e masani e le tutusa o tatou talitonuga e uiga i perofeta soifua. Atonu e mafai e tagata o le vasega ona faasoa mai upumoni latou te maua i le vaega 1 e mafai ona latou faaaoga e tali atu ai i se tasi e fesiligia o latou talitonuga e uiga i perofeta. E mafai ona e fautua atu ia faapitoa lava le vaai i fuaiupu 1-6 ma le 37-39. O a mea ua aoao mai e nei fuaiupu e uiga i le Alii ma Ana perofeta?

• Atonu e fiafia tagata o le vasega e iloa ina ua valaaulia e Iosefa Samita se aufono e talanoaina le lolomiina o faaaliga a le Perofeta, na tetee nisi o sui o le aufono i le manatu. Na maasiasi i latou i le vaivai o Iosefa i le tusitusi, ma na popole i latou o le lolomiina o faaaliga e ono tulai mai ai nisi faafitauli mo le Au Paia (tagai Au Paia, 1:140–43). Ua faapefea ona talanoaina e le vaega 1 nei popolega? (Tagai, mo se faataitaiga, fuaiupu 6, 24, 38).

• Ua aoao mai e upu o le viiga “O Mai Faalogo i le Perofeta” (Viiga, nu. 13) nisi o mataupu faavae o loo aoaoina i le vaega 1. Atonu e mafai ona outou usuina pe faitau le viiga faatasi ona valaaulia lea o tagata o le vasega e sue laina i le viiga ma fuaiupu i le vaega 1 o loo aoaoina na lava mataupu faavae.

  sauniga o le konafesi aoao

  E fetalai mai le Atua ia i tatou e ala mai i Ana perofeta.

Mataupu Faavae ma Feagaiga1:12–30, 35–36

Ua toefuatai mai e le Alii Lana talalelei e fesoasoani ia i tatou e fetaiai ma luitau i aso e gata ai.

• O a manatu na maua e tagata o le vasega ao latou faitauina le faamatalaga o aso e gata ai i fuaiupu 13-16? O a ni mea o tutupu i le lalolagi i aso nei ua faataunuu ai lenei faamatalaga valoia? Valaaulia tagata o le vasega e faasoa mai se mea sa latou maua i le vaega 1 sa fesoasoani latou te lagona ai le filemu ma le lototele e ui lava i luitau o o tatou aso.

• Ina ia fesoasoani i tagata o le vasega e mafaufau loloto i faamanuiaga ua tatou maua ona o le talalelei ua toefuatai mai, e mafai ona e tusi i le laupapa O a mea ua aoao mai fuaiupu 17–23 pe aisea na toefuatai mai ai e le Alii Lana talalelei? E mafai e tagata o le vasega ona suesue i nei fuaiupu ma faasoa mai o latou lagona i le tasi ma le isi. Mo se faataitaiga, ua faapefea ona fesoasoani upumoni na toefuatai mai e ala ia Iosefa Samita ia i tatou e faateleina ai lo tatou faatuatua? (Tagai fuaiupu 21).

Mataupu Faavae ma Feagaiga 1:19–28

E faaaoga e le Alii “mea vaivai ma faatauvaa” e faataunuu ai Lana galuega.

• O le tasi autu taua o le Mataupu Faavae ma Feagaiga 1 o le matafaioi o “mea vaivai ma faatauvaa” i le galuega sili o aso e gata ai a le Alii (fuaiupu 23). Valaaulia tagata o le vasega e suesue fuaiupu 19-28 e iloa ai pe faapefea ona aoga upu “vaivai” ma “faatauvaa” ia i tatou o ni auauna a le Alii. A o latou faasoa mai mea na latou maua, e mafai ona outou talanoaina fesili faapenei: O a uiga e finagalo le Alii i Ana auauna ia maua? O a mea o le a faataunuu e le Alii e ala i Ana auauna i aso e gata ai? Ua faapefea ona faataunuu valoaga i nei fuaiupu i le lalolagi atoa ma o tatou lava olaga?

Faaleleia o Lo Tatou Aoao Atu

Fesoasoani i tagata aoao e faatatau tusitusiga paia ia i latou lava. O upumoni lava na sa uunaia ai uluai Au Paia e mafai ona fesoasoani ia i tatou e feagai ma luitau o aso nei. A o aoao atu le Mataupu Faavae ma Feagaiga, fesoasoani i tagata o le vasega e fai ni fesootaiga i le va o le Alii ia Iosefa Samita ma mea e ono tau atu e le Alii ia i latou patino lava. (Tagai Aoao Atu i le Ala a le Faaola,21.)