“4–10 Ianuari. Iosefa Samita—Talafaasolopito 1:1-26 “Na Ou Vaai i se Malamalama Faaniutu,’” Sau, Mulimuli Mai ia te Au—Mo Le Aoga Sa: Mataupu Faavae ma Feagaiga 2021 (2020)
“4–10 Ianuari. Iosefa Samita—Talafaasolopito 1:1-26,” Sau, Mulimuli Mai ia te Au—Mo Le Aoga Sa: 2021
Vao Paia, saunia e Greg K. Olsen
4–10 Ianuari
Iosefa Samita—Talafaasolopito 1:1–26
“Na Ou Vaai i se Malamalama Faaniutu”
Ia manatua o lau sauniuniga aupito i taua o le suesueina o tusitusiga paia ma ola i mea ua e aoaoina. E mafai e le Agaga ona fesoasoani ia te oe e iloa mea e taulai i ai i totonu o le vasega.
Tusi Faamaumau Ou Lagona Uunai
Valaaulia le Fefaasoaai
O a ni manatu na aoao e tagata o le vasega ao latou suesueina le Iosefa Samita—Talafaasolopito 1:1–26 i lenei vaiaso? Atonu e mafai ona e faaali atu se ata o Iosefa Samita po o le Uluai Faaaliga ma valaaulia tagata o le vasega e tusi i le laupapa ni manatu mai a latou suesuega, faapea ai ma fuaiupu na latou maua mai ai. E mafai foi ona latou faasoa atu le ala na faatupulaia ai a latou molimau ia Iosefa Samita ma lana misiona ao latou aoao e uiga ia te ia i lenei vaiaso.
Aoao Atu le Aoaoga Faavae
Iosefa Samita—Talafaasolopito 1:5–18
Afai tatou te ole atu ma le faatuatua, o le a tali mai le Atua ia i tatou.
-
E ono mafai e tagata o lau vasega ona fesootai i le naunautaiga o Iosefa e saili le upumoni i se lalolagi o loo aoao ai le tele o manatu e feteenai. E faapefea ona tutusa le le mautonu i o tatou aso ma mea na feagai ma ia? Ina ia fesoasoani i tagata o le vasega ia iloa le auala e mafai ona maua ai tali ia tatou fesili, e mafai ona e valaaulia i latou e lisi i le laupapa auala eseese e saili ai e tagata le upumoni. Ona mafai lea ona latou iloiloina le Iosefa Samita—Talafaasolopito 1:5–18 ma faaopoopo i le lisi mea na fai e Iosefa Samita na maua ai tali o ana fesili.
-
Atonu e mafai e tagata o le vasega ona faasoa mai pe na faapefea ona latou mulimuli i le faataitaiga a Iosefa Samita i lo latou sailia o le upumoni ma le ala na tali atu ai le Atua ia i latou. O le saunoaga a Peresitene Russell M. Nelson i le “Punaoa Faaopoopo” o loo fautua mai ai ni ala e mafai ona tatou sailia ai le upumoni mai le Atua.
Atatamaitai talavou o loo tataloO le tatalo e mafai ai ona tatou talanoa ma le Atua.
Iosefa Samita—Talafaasolopito 1:15–20
Na vaai Iosefa Samita i le Atua le Tama ma Lona Alo, o Iesu Keriso.
-
Na faailoa mai e le Uluai Faaaliga ni nai upumoni e uiga i le Atua e feteenai ma mea na talitonu i ai le toatele i aso o Iosefa. E mafai e tagata o le vasega ona faitau i le Iosefa Samita—Talafaasolopito 1:15–20 , ma faailoa mai se mea na latou aoaoina e uiga i le Atua. Aisea e taua ai le iloa o nei upumoni e uiga i le Atua?
-
A faapea e asiasi mai Iosefa Samita i la tatou vasega, o lea se mea o le a tatou fesili atu ai ia te ia e uiga i lona aafiaga? O le vitio “Ask of God: Joseph Smith’s First Vision” (Churchof JesusChrist.org) e mafai ona aumaia i tagata o le vasega nisi mea e uiga i le Uluai Faaaliga a Iosefa Samita (tagai foi i le “Punaoa Faaopoopo”). Atonu e mafai ona latou mafaufau loloto pe faapefea ona latou faaumaina se fuaiupu e pei o lea “Ona sa tupu le Uluai Faaaliga, ua ou iloa…” O a faamanuiaga ua oo mai i o tatou olaga ona o le Uluai Faaaliga?
-
Ina ia faaopoopo i le agaga o la outou talanoaga, e mafai e tagata o le vasega ona faitau pe usu le viiga “O Le Talosaga Muamua a Iosefa Samita” (Viiga, nu. 14). O le a le mea ua fesoasoani lenei viiga tatou te malamalama ai ma lagonaina e uiga i le Uluai Faaaliga? Atonu e mafai e ni nai tagata o le vasega ona faasoa mai le ala na latou iloa ai mo i latou lava o Iosefa na vaai moni lava i le Atua le Tama ma Iesu Keriso i le Vao Paia. E mafai ona e valaaulia faifeautalai (po o se tasi e lei leva ona foi mai le misiona) e asiasi i le vasega ma talanoa pe na faapefea ona uunaia e le Uluai Faaaliga olaga o tagata na latou aoaoina.
Iosefa Samita—Talafaasolopito 1:21–26
E mafai ona tatou tumau i le faamaoni i mea tatou te iloa, e tusa lava pe teena tatou e isi.
-
E mafai e tagata o le vasega ona faailoa mai ni mea na aafia ai Iosefa Samita ina ua ia amata faamatala atu i isi tagata e uiga i lana faaaliga (tagai Iosefa Samita—Talafaasolopito 1:21–26). Atonu e mafai ona latou faasoa mai ni fuaitau e musuia i latou pe a luiina o latou talitonuga.
-
Afai e te iloaina ni tagata o le uarota na aafia i ni feteenaiga ona o i latou o ni tagata o le Ekalesia, mafaufau e fai ia i latou ia o mai saunia e faasoa mai pe faapefea ona latou faatumauina le malosi o lo latou faatuatua. O a ni mea e mafai ona tatou aoao mai i le faataitaiga a Iosefa Samita i le Iosefa Samita—Talafaasolopito 1:21–26?
Punaoa Faaopoopo
Mulimuli i le Faataitaiga a Iosefa.
Na aoao mai Peresitene Russell M. Nelson:
“Ua faatulagaina e Iosefa Samita se mamanu mo i tatou i le foiaina o a tatou fesili. I le gauai atu i le folafolaga a Iakopo pe afai ua leai se poto ia i tatou ia tatou ole atu i le Atua [tagai Iakopo 1:5], sa avatu ai e le taulealea o Iosefa lana fesili ma tuusao atu i le Tama Faalelagi. Sa ia saili atu i faaaliga faaletagata lava ia, ma o lana sailiga na matala ai lenei tisipenisione mulimuli.
“I se tulaga faapena, o le a se mea e tatala mai e lau sailiga mo oe? O le a le poto e le o ia te oe? O le a se mea e te lagonaina ua manaomia vave ona iloa pe malamalama i ai? Mulimuli i le faataitaiga a le Perofeta o Iosefa. Saili se nofoaga filemu e mafai ona e alu soo i ai. Ia faamaualaloina oe lava ia i luma o le Atua. Liligi atu lou loto i lou Tama Faalelagi. Liliu atu ia te Ia mo tali ma le faamafanafanaga” (“Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95).
O Le Uluai Faaaliga a Iosefa Samita.
Ina ia faitau i se faamatalaga o le Uluai Faaaliga i le tele o tala a Iosefa Samita, tagai Au Paia, 1:14-16.
Faaleleia o Lo Tatou Aoao Atu
Sailia au lava musumusuga. Aua nei vaai atu i nei otootoga faapea o ni faatonuga e tatau ona e mulimuli ai a o e aoao atu. Nai lo lena, faaaoga e uunaia ai manatu ma maua ai musumusuga ao e mafaufau loloto i tusitusiga paia ma manaoga o tagata o loo e aoaoina.