alii o loo galulue i le fanua

Taimi o le Seleselega i Farani, saunia e James Taylor Harwood.

18–24 Ianuari.

Mataupu Faavae ma Feagaiga 3-5

“O le a Alu Pea i Luma Lau Galuega”

O le suesueina o le Mataupu Faavae ma Feagaiga 3–5 ae e te lei iloiloina manatu i lenei otootoga o le a fesoasoani ia te oe ia maua le taitaiga mai le Agaga Paia. O leotootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga e mafai ona fesoasoani e te malamalama ai i le talafaasolopito lea na taitai atu i faaaliga ua faamaumauina i nei vaega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu atu i tagata o le vasega ni nai minute e iloilo ai mau na latou faitauina i le fale ma sue se fuaitau aoga na latou maua. Ona valaaulia lea o i latou e faasoa mai mea na latou aoaoina i se isi tagata i le vasega.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 3:1–15

E tatau ona tatou faalagolago i le Atua nai lo le fefe i tagata.

• E pei o Iosefa Samita, ua tatou aafia uma lava i se taimi na tatou lagona ai le uunaia e tagata e fai se mea tatou te iloa e sese. O a upumoni ua tatou aoao mai le Mataupu Faavae ma Feagaiga 3:1-15 e mafai ona fesoasoani ia i tatou ia tumau le faamaoni i le Atua i na tulaga?

• Na manaomia ona aoaia Iosefa Samita mai le fefe i tagata nai lo le Atua, ae na ia manaomia foi le faamalosiauina. Valaaulia tagata o le vasega e vaai i le vaega 3 mo le ala na aoaia ma faamalosiauina ai e le Alii Iosefa. Mo se faataitaiga, e mafai ona latou lisi i le laupapa fuaitau mai fuaiupu 1-15 o loo i ai aoaiga ma isi fuaitau o loo i ai Lana faamalosiau ia salamo ma tumau i le faamaoni. O le a se mea ua aoao mai e le aafiaga o Iosefa ia i tatou e uiga i le auala e fesoasoani ai le Faaola ia i tatou e faatoilalo a tatou mea sese?

Mataupu Faavae ma Feagaiga 4

Ua valaaulia i tatou e le Alii ia auauna atu ia te Ia ma o tatou loto atoa.

• O uiga e faamatala ai auauna a le Alii ua lisiina i le Mataupu Faavae ma Feagaiga 4:5-6 o uiga foi ia o Iesu Keriso. Ina ia fesoasoani i tagata o le vasega e aoao atili, e mafai ona e valaaulia i latou e filifili se tasi o uiga ma sue faamatalaga po o isi mau e fesoasoani ia i latou e malamalama atili ai i uiga (tagai, mo se faataitaiga, i le fuaitau a Sister Elaine S. Dalton i le “Punaoa Faaopoopo”). E mafai ona e valaaulia ni nai tagata e faasoa mai ni mea sa latou maua. E mafai foi ona latou faasoa mai pe aisea e manaomia ai le uiga na latou filifilia mo le auaunaga i le malo o le Atua. E mafai faapefea ona tatou atiina ae atili nei uiga? (Tagai fuaiupu 7).

• Sa tuuina atu le Mataupu Faavae ma Feagaiga 4 ia Iosefa Samita le Matua, lea na fia iloa le ala na te fesoasoani ai i le galuega a le Alii. E mafai foi ona fesoasoani lenei vaega i soo se tasi e fia auauna atu i le Alii. O se tasi lea o ala e suesue ai lenei vaega: e mafai e tagata o le vasega ona galulue i tamai vaega e tusi se faamatalaga o se galuega mo auauna a le Atua, e faaaoga ai le vaega 4 o se taiala. E faapefea ona ese nei agavaa mai isi faamatalaga o galuega? Aisea e manaomia ai nei agavaa i le faia o le galuega a le Atua? E mafai ona fesoasoani le saunoaga a Elder David. A. Bednar i le “Punaoa Faaopoopo” i tagata o le vasega e malamalama ai i le taua o le atiina ae o nei agavaa.

Mataupu Faavae ma Feagaiga 5

O se molimau o le upumoni e oo mai ia i latou e lotomaualalo ma talitonu.

• Ana faapea e faaali atu papatusi auro i le lalolagi e vaai i ai, mata o le a faamaonia ai i tagata uma e moni le Tusi a Mamona? Aisea pe aisea foi e leai ai? (tagai i le Mataupu Faavae ma Feagaiga 5:7). Atonu e mafai e tagata o le vasega ona suesue le vaega 5 mo manatu e mafai ona fesoasoani ia i latou e tali atu ai i se tasi e fesili mai mo se faamaoniga e moni le Tusi a Mamona. O le a le mea na aoao mai e le Alii ia Iosefa Samita ma Matini Harisi e mafai ona fesoasoani ia i tatou e maua ai sa tatou lava molimau o upumoni o le talalelei?

  Matini Harisi

  Matini Harisi, saunia e Lewis A. Ramsey

aikona o punaoa faaopoopo

Punaoa Faaopoopo

O le mama aiai o lona uiga o le malosi.

Na tuuina mai e Sister Elaine S. Dalton lenei faamatalaga o le mama aiai: “Mama aiai o se upu e seasea tatou faalogo i ai i nei aso, ae o le upu Latina e tupuga mai ai virtus o lona uiga o le malosi. O tamaitai ma alii e mama ua ia i latou se agatamalii filemu ma le malosiaga i totonu. E to’a i latou aua ua latou agavaa e maua ma ia taialaina e le Agaga Paia” (“O se Toe Foi i le Amio Lelei,” Ensign po o le Liahona, Nov. 2008, 79).

Avea ma se Faifeautalai.

Na saunoa mai Elder David A. Bednar: “O le faagasologa o le avea ma se faifeautalai e le manaomia ai le ofuina i le aoga e se alii talavou o se ofutino paepae ma le fusiua i aso uma [po o se ofu lotu (dress) mo tamaitai], po o le mulimulitai i taiala a faifeautalai mo le taimi e moe ma ala ai. … Ae e mafai ona faateleina lou manao e auauna atu i le Atua [tagai Mataupu Faavae ma Feagaiga 4:3],ma e te mafai ona amata ona mafaufau e pei o faifeautalai, ia faitau i mea e faitauina e faifeautalai, ia tatalo e pei o faifeautalai, ia lagona mea e pei ona lagonaina e faifeautalai. E mafai ona e aloese mai aafiaga faalelalolagi lea e mafua ai ona alu ese le Agaga Paia, ma e mafai ona tupu a’e lou lagona mautinoa i le iloaina lea ma le tali atu i uunaiga faaleagaga” (“Avea ma se Faifeautalai,” Ensign po o le Liahona, Nov. 2005, 45–46).

Faaleleia o Lo Tatou Aoao Atu

Fai fesili e uunaia ai talanoaga aoga. O fesili e sili atu i le tasi le tali sao e valaaulia tagata aoao e tali mai e faalagolago i o latou manatu patino, lagona, ma aafiaga. Mo se faataitaiga, e mafai ona e fesili atu, “E faapefea ona e iloa le taimi e fetalai mai ai le Atua ia te oe?” (Tagai Aoao Atu i le Ala a le Faaola, 33.)