fale o Peter Whitmer

Fale o Peter Whitmer, saunia e Al Rounds

1–7 Mati.

Mataupu Faavae ma Feagaiga 20–22

“O Le Tulai Mai o le Ekalesia a Keriso”

Tusi Faamaumau ou lagona uunai a o e suesue i le Mataupu Faavae ma Feagaiga 20–22. O nisi o nei uunaiga e ono taitai atu i ni manatu o le a fesoasoani ia te oe ao e aoao atu.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

A o latou suesue i le fale, atonu na maua e tagata o le vasega ni manatu i faamanuiaga o le mauaina o le Ekalesia moni i le lalolagi. Valaaulia i latou e faasoa mai ni fuaitau mai nei vaega e faaalia ai pe aisea latou te faafetai ai na toefuatai mai le Ekalesia.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 20–21

Ua Toefuataiina Mai le Ekalesia a Iesu Keriso.

• E ono aoga mo tagata o le vasega le suesueina o mea e tutusa ai Le Ekalesia a Iesu Keriso o le Au Paia o Aso e Gata Ai ma le Ekalesia na faatuina e Keriso anamua. E mafai ona e tusi i le laupapa se kata o koluma e fa e faaigoaina Aoaoga Faavae, Sauniga, Pule o le Perisitua, ma Perofeta. E mafai ona e saunia mau fesootai nei e uiga i le Ekalesia a Keriso anamua: Mataio 16:15–19; Ioane 7:16–17; Efeso 2:19–22; 3 Nifae 11:23–26; Moronae 4–5. E mafai e tagata o le vasega ona faailoa mai mea ua aoao mai e fuaitau taitasi e uiga i le Ekalesia a Keriso ma tusi mau fesootai i le koluma sao i le laupapa. (O nisi mau fesootai e mafai ona faatatau i koluma e sili atu i le tasi.) E mafai ona latou faia foi i mau fesootai nei e uiga i le Ekalesia toefuataiina a Keriso: Mataupu Faavae ma Feagaiga 20:17–25, 60, 72–79; 21:1–2. O le a se mea ua e aoaoina e uiga i le Toefuataiina o le Ekalesia a Keriso mai lenei faatusatusaga?

Mataupu Faavae ma Feagaiga 20:37, 75–79; 22

O sauniga paia e fesoasoani ia i tatou e avea e pei o le Faaola.

• Valaaulia tagata o le vasega e suesue agavaa mo le papatisoga ua faamatalaina i le Mataupu Faavae ma Feagaiga 20:37, ma fai ia i latou e mafaufau loloto i fesili e pei o: E faapefea e nei agavaa ona fesoasoani ia i tatou e saunia ai ia papatisoina i le Ekalesia a le Alii? O le a le uiga o le tauave o le suafa o Keriso i o tatou luga? (tagai Mosaea 5:5-12). O a mea e fesoasoani ia te oe e faatumauina lou “naunautaiga e auauna atu ia [Iesu Keriso] e oo i le iuga?

• O a ni mea ua aoao mai e le vaega 22 e uiga i le papatisoga? Fai atu i tagata o le vasega e mafaufau faapea e i ai sa latou uo sa papatiso i se isi lotu. E mafai ona latou faitau i lenei vaega e maua ai fautuaga e fesoasoani i la latou uo ia malamalama pe aisea e manaomia ai le papatisoga i le Ekalesia toefuataiina a le Faaola. E mafai e tagata o le vasega ona faatino lenei ata o se vasega po o ni vaega taitoalua.

• Faitau le Mataupu Faavae ma Feagaiga 20:75-79 faatasi, ma valaaulia tagata o le vasega e mafaufau po o a mea ua aoao mai e nei fuaiupu e uiga i le Faaola ma Lona mana i o tatou olaga. O a upu po o fuaitau e tulaga ese mai pe a tatou faitau i tatalo o le faamanatuga i lenei ala? Aisea e taua ai le taumamafa i le faamanatuga i vaiaso taitasi?

  tiakono o loo tufaina le Faamanatuga

  O le faamanatuga o se sauniga paia.

Mataupu Faavae ma Feagaiga 20:38–60

O le auaunaga o le perisitua e faamanuia ai tagata o le Ekalesia ma o latou aiga.

• O le faamatalaga o tiute o le perisitua i le Mataupu Faavae ma Feagaiga 20:38-60 e mafai ona fesoasoani i tagata o lau vasega e faateleina ai lo latou malamalama i le auaunaga a le perisitua. Atonu e mafai ona e valaaulia i latou e mafaufau faapea o se uo faatoa papatiso po o se tagata o le aiga o le a faauuina i se tofi o le perisitua. O le a faapefea ona latou faaaogaina nei fuaiupu e fesoasoani ia te ia e malamalama i ona tiute? O a faataitaiga o le a latou faasoa atu e fesoasoani ia te ia e malamalama ai pe faapefea e le faataunuuina o na tiute ona fesoasoani ia te ia ia avea atili ai faapei o Iesu Keriso? Atonu e mafai ona latou faatinoina lenei talanoaga.

  E faaopoopo i ai, e faapefea ona latou faaaoga nei fuaiupu e fesoasoani i se tamaitai faatoa papatiso e iloa ai pe faapefea ona ia mafai ona auai i le galuega ua faamatalaina iinei? (O le faamatalaga i le “Punaoa Faaopoopo” e mafai ona fesoasoani.)

Mataupu Faavae ma Feagaiga 21:4–7

E faamanuiaina i tatou pe a tatou maua le afioga a le Alii e ala i Lana perofeta.

• O leMataupu Faavae ma Feagaiga 21 o loo i ai ni faamatalaga mamana e uiga i le mulimuli i le perofeta a le Alii. Ina ia fesoasoani i tagata o le vasega e mafaufau loloto ma talanoaina nei fuaitau, fai ia i latou e sue fuaiupu 4-7 mo se fuaitau latou te mananao e malamalama atili ai ma tusi se fuaitau i le laupapa. Filifili ni nai fuaitau, ma talanoaina o se vasega lo latou uiga. O le a se mea ua aoao mai e nei fuaitau e uiga i le mulimuli i le perofeta a le Alii?

aikona o punaoa faaopoopo

Punaoa Faaopoopo

Tatou te galulue uma i le mana o le perisitua.

“Ua faauuina alii i tofi o le perisitua, a o valaaulia uma alii ma tamaitai ia maua le mana ma faamanuiaga o le perisitua i o latou olaga. …

“… [O tamaitai] e talai ma tatalo i faapotopotoga, faataunuu le tele o tofiga o le taitaiga ma le auauna atu, auai i aufono o le perisitua i le faalelotoifale ma lautele, ma auauna i misiona talai aloaia i le salafa o le kelope. I nei ala ma isi, e faaaoga ai e tamaitai le pule o le perisitua e ui lava e lei faauuina i latou i tofi o le perisitua. …

“… I valaauga faalelotu, sauniga o le malumalu, sootaga faaleaiga, ma auaunaga filemu, ma taitoatasi, o tamaitai ma alii o le Au Paia o Aso e Gata Ai e agai i luma ma le mana o le perisitua ma le pule. O lenei galulue soosoo tauau a alii ma tamaitai i le faataunuuina o le galuega a le Atua e ala i Lona mana e totonugalemu i le talalelei a Iesu Keriso” (Gospel Topics, “Joseph Smith’s Teachings about Priesthood, Temple, Women,” topics.ChurchofJesusChrist.org).

Faaleleia o Lo Tatou Aoao Atu

Tatou te aoao faatasi. I le avea ai o se faiaoga, e te aoao faatasi ma lau vasega. Faaali lou naunautaiga ina ia aoao mai ia i latou e ala i le faalogo atu i o latou manatu.