Iesu o loo tulai i luma o tagata o loo tootutuli

O le a Tootutuli Uma Tulivae, saunia e J. Kirk Richards

22–28 Mati

Mataupu Faavae ma Feagaiga 29

O le a faapotopoto e Iesu Keriso Ona Tagata

O le ala sili e saunia ai e aoao atu le Mataupu Faavae ma Feagaiga 29 o le suesue i ai ma le agaga tatalo ma saili le taitaiga a le Agaga. Mafaufau isi auala e valaaulia ai le Agaga i lou olaga, e pei o le anapogi, auai i le malumalu, ma le auauna atu i isi.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

I le Mataupu Faavae ma Feagaiga 29:5, na tau atu e le Alii i le Au Paia, “ia sii i luga o outou loto ma fiafia.” E mafai ona e valaaulia tagata o le vasega e faasoa mai se mea na latou aoaoina i a latou lava suesuega pe faaleaiga foi na mafai ai ona “ia sii i luga o [latou] loto ma fiafia.”

aikona o le aoao atu

Aoao Atu le Aoaoga Faavae

Mataupu Faavae ma Feagaiga 29

Ua saunia e le Tama Faalelagi se fuafuaga mo lo tatou faaeaga.

• O se tasi ala e uunaia ai le aoao i le fale o le faia lea o gaoioiga i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Mo se faataitaiga, e mafai ona e lisiina i le laupapa ni vaega o le fuafuaga o le faaolataga, e pei o le muai olaga, Foafoaga, o le Togiola a Iesu Keriso, ma isi. E mafai e tagata o le vasega ona faasoa mai mea na latou aoao mai i le Mataupu Faavae ma Feagaiga 29 e uiga i nei vaega o le fuafuaga. E mafai foi ona e tuu atu latou te faasoa mai mea latou te ono aoao atu mai lenei vaega i se tasi e le iloa le fuafuaga a le Atua.

Mataupu Faavae ma Feagaiga 29:1-8, 14 -21

O le a faapotopotoina e Iesu Keriso Ona tagata ae lei oo Lona Afio Mai Faalua.

• Ina ia fesoasoani i tagata o le vasega ia malamalama pe aisea e faapotopoto ai e Iesu Keriso Ona tagata, e mafai ona e valaaulia i latou e faitau fuaiupu 1-8 ma talanoaina fesili e uiga i le faapotopotoina, e pei o: Ua faapefea ona tatou lagonaina le faapotopotoina ma le puipuia o i tatou, e pei o se matuamoa ona ofaofatai ma puipuia lana toloai? E faapefea ona tatou faapotopoto i le Faaola? (tagai, mo se faataitaiga, fuaiupu 2). Atonu e mafai e tagata o le vasega ona faasoa mai pe na faapefea ona faamanuiaina i latou e le faapotopoto ma tapuai faatasi ma isi tagata o le Ekalesia.

  matuamoa ma le toloai

  Ua Faafia, saunia e Liz Lemon Swindle

• Ina ia fesoasoani i tagata o le vasega e mafaufau i lo latou tiutetauave o le fesoasoani i le Tama Faalelagi e faapotopoto Lana fanau, e mafai ona e faasoa atu upu a Peresitene Russel M. Nelson i le “Punaoa Faaopoopo.” E mafai foi ona e faaalia le vitio “A Witness of God” (ChurchofJesusChrist.org). O le a se mea ua tatou aoao e uiga i le faapotopotoina mai nei savali? E faapefea e nei savali ona faamalosia le fetalaiga a le Alii i le Mataupu Faavae ma Feagaiga 29:1-8?

• Nai nisi o mea na tutupu i aso e gata ai i le Mataupu Faavae ma Feagaiga 29: 14-21 e ono faapopole ai tagata o le vasega. Tuu avanoa ia i latou e faasoa mai o latou lagona. O le a le lapataiga a le Alii ia i tatou i nei mea na tutupu? O a mea moni mautinoa ua tatou iloa e uiga i le Faaola ma le faapotopotoina mai fuaiupu 1-8? E faapefea ona fesoasoani le faapotopotoina ia i tatou e tepa taulai atu i nei mea ma le faatuatua nai lo le fefe? O se vaega o lau talanoaga, e mafai foi ona outou usuina se viiga e uiga i le faapotopotoina, e pei o le “Isaraelu, Ua Valaau Mai le AtuaViiga nu.6), ma talanoaina mea ua aoao mai e le viiga e uiga i le faapotopotoina o Isaraelu.

Mataupu Faavae ma Feagaiga 29:34-35

O poloaiga taitasi a le Alii e faaleagaga.

• E ui lava o nisi poloaiga atonu e foliga faaletino, o poloaiga uma lava e faaleagaga i le Alii. Ina ia malamalama i lenei upumoni, e mafai e tagata o le vasega ona faitau faatasi fuaiupu 34-35 ma lisi ni poloaiga i le laupapa, faatasi ma mataupu faavae faaleagaga ma faamanuiaga e fesootai i ai. E mafai ona latou faasoa mai faataitaiga mai o latou olaga pe mai tusitusiga paia na fesoasoani ia i latou e iloa le natura faaleagaga o poloaiga a le Atua. E mafai faapefea e lenei gaoioiga ona aafia ai le ala tatou te vaai ai i poloaiga?

aikona o punaoa faaopoopo

Punaoa Faaopoopo

Mataupu Faavae ma Feagaiga 29

Auai i le Faapotopotoina o Isaraelu

Na aoao mai Peresitene Russell M. Nelson:

“O nei aso e moni lava o aso e gata ai, ma ua faanatinati e le Alii Lana galuega e faapotopoto Isaraelu. O lena faapotopotoina o le mea aupito sili lea ona taua o loo tupu i le lalolagi i le taimi nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii. Ma afai e te filifili e, pe afai e te manao ai, e mafai ona avea oe o se vaega taua o lena mea. E mafai ona avea oe o se vaega tele o se mea tele, se mea maoae, se mea e malualii!

“Pe a tatou talanoa i le faapotopotoina ua na ona tatou fai atu lava o lenei upumoni faalefaavae: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso. Latou te filifili mo i latou lava pe latou te mananao e iloa atili. …

“Sa faapolopolo e lo tatou Tama Faalelagi Ana agaga aupito sili ona tamalii—atonu e mafai ona ou fai atu o Lana ‘au aupito lelei—mo le toe laasaga lenei. O na agaga tamalii—na tagata taaalo silisili ona lelei, na toamanumanu—o outou!” (“Faamoemoe o Isaraelu” [faigalotu i le lalolagi atoa mo le autalavou). 3 Iuni, 2018], ChurchofJesusChrist.org.

Faaleleia o Lo Tatou Aoao Atu

Aoao atu i le manino ma le faigofie. Nai lo le taumafai e faafiafia lau vasega, aoao atu aoaoga faavae manino ma faigofie. E mafai ona e talitonuina “o le mana o le afioga a le Atua” e i ai “sona uiga mamana tele atu i luga o mafaufau o tagata nai … po o se isi lava mea” (Alema 31:5).