“29 Mati–4 Aperila. Eseta: “O Aʼu o Lē o Ola, o Aʼu o Lē na Fasia” Sau, Mulimuli Mai ia te A’u—Mo Le Aoga Sa: Mataupu Faavae ma Feagaiga 2021 (2020)
“29 Mati–4 Aperila. Eseta,” Sau, Mulimuli Mai ia te A’u—Mo Le Aoga Sa: 2021
29 Mati–4 Aperila
Eseta
“O Aʼu o Lē o Ola, o Aʼu o Lē na Fasia”
E leai se isi mea e sili atu le taua mo i tatou e malamalama i ai nai lo le Togiola a Iesu Keriso. Mafaufau i tagata o le a auai i lau vasega; o a mea o le a fesoasoani ia i latou ia atili faatuatua atoatoa ia Iesu Keriso?
Tusi Faamaumau Ou Lagona Uunai
Valaaulia le Fefaasoaai
A o suesue e lau vasega le Mataupu Faavae ma Feagaiga i lenei tausaga, atonu na latou iloaina ni fuaitau e uiga i le Faaola e taua ia i latou. Amata le vasega i le tuuina atu ia i latou avanoa e faasoa mai ai na fuaitau. Ua mafai faapefea e a tatou suesuega o le Mataupu Faavae ma Feagaiga ona faateleina lo tatou faatuatua ia Iesu Keriso?
Aoao Atu le Aoaoga Faavae
Na faataunuuina e Iesu Keriso se “togiola atoatoa.”
-
Ona o le Togiola a Iesu Keriso o se aoaoga faavae taua tele, mafaufau ia lava se taimi ia mautinoa ai ua malamalama i ai le vasega. Ina ia faia lenei mea, e mafai ona e tusia i le laupapa fesili e faapea: O le a le Togiola a Iesu Keriso? E faapefea ona aafia ai lou olaga i aso taitasi? E faapefea ona aafia ai lou ola e faavavau? E faapefea ona ou maua le mana laveai a le Faaola i lou olaga? Tuu atu i tagata o le vasega ni nai minute e mafaufau loloto ai i nei fesili ma sue ni mau e fesoasoani e tali ai. E mafai e le vasega ona tusi a latou mau fesootai i le laupapa, ma e mafai ona outou talanoaina ni nai mau faatasi o se vasega. O nisi nei o faataitaiga: Luka 22:39–44; 1 Ioane 1:7; 2 Nifae 2:6–9; Mosaea 3:5–13, 17–18; Alema 7:11–14; Moronae 10:32–33; Mataupu Faavae ma Feagaiga 19:16–19; 45:3–5.
-
Atonu e aoga mo le vasega le matamata i le vitio “The Savior Suffers in Gethsemane” (ChurchofJesusChrist.org) ae lei faitauina upu a le Faaola e uiga i Lona puapuaga i le Mataupu Faavae ma Feagaiga 19:16–19. E faapefea e nei fuaiupu ona faateleina lo tatou faafetaia o le taulaga a Iesu Keriso? O isi vitio o le Eseta e mafai ona e faasoa atu ua lisiina i le “Punaoa Faaopoopo.”
AtaO Iesu o loo TataloAlii o le Tatalo, saunia e Yongsung Kim
Mataupu Faavae ma Feagaiga 76:11–14, 20–24; 110:1–10
Na molimau mai le Perofeta o Iosefa Samita o loo soifua Iesu Keriso.
-
Na vaai Iosefa Samita i le Faaola toetu ma na tuuina mai se molimau mamana faapea o loo soifua Iesu Keriso. Ina ia fesoasoani i tagata o le vasega e suesue le molimau a Iosefa Samita, e mafai ona e vaevaeina i latou i ni vaega se lua ma tofia vaega taitasi e faitau le Mataupu Faavae ma Feagaiga 76:11–14, 20–24 po o le 110:1–10. Valaaulia tagata taitoatasi o le vasega e sue se upu pe lua foi i nei fuaiupu e faamatala ai le Faaola. E mafai e tagata o le vasega ona auauai e tusi upu na latou maua i le laupapa, ma e mafai ona e faaaoga na upu e taitaia se talanoaga i uiga auaumama ma le mana o le Faaola. E faapefea e le molimau a Iosefa Samita ona faamalosia lo tatou faatuatua i le paia ma le misiona a Iesu Keriso?
-
Atonu na faafesootai e ni tagata o le vasega aoaoga i le Mataupu Faavae ma Feagaiga ma upu ma mataupu faavae i le viiga “Ua ou Iloa Lou Faaola” (Viiga, nu. 73; tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). Atonu latou te naunau e faasoa mai mea sa latou mauaina. E mafai foi ona outou faitauina pe usuina lenei viiga o se vasega ma vaai mo sootaga i mau nei: Mataupu Faavae ma Feagaiga 6:34; 45:3–5; 84:77; 98:18; 138:23. Na faapefea ona tatou taunuu i le iloa o loo soifua lo tatou Faaola?
Mataupu Faavae ma Feagaiga 29:26–27; 42:45–46; 63:49; 88:14–17, 27–31; 93:33–34
Ona o Iesu Keriso, o le a tatou toetutu.
-
Ina ia fesoasoani i tagata o le vasega e talanoaina mea ua aoao mai e le Mataupu Faavae ma Feagaiga e uiga i le toetu, e mafai ona e valaaulia i latou e mafaufau faapea o se uo po o se isi o le aiga ua fesili mai i le uiga o le toetu. E mafai faapefea ona tatou fesoasoani i lena tagata ia malamalama po o le a le toetu? Uunaia tagata o le vasega e saili i le Mataupu Faavae ma Feagaiga 88:14-17, 27-31 mo se mea e ono fesoasoani. O isi mau fesootai e aoga e aofia ai le Alema 11:40 -45 ma le Alema 40:21-23). O a mea o le a tatou faasoa atu e fesoasoani ai i la tatou uo po o le tagata o le aiga ia lagona le olioli ma le faamoemoe lena e oo mai i le aoaoga faavae o le toetu?
-
E mafai faapefea ona e fesoasoani i tagata o le vasega ia mafaufau loloto e uiga i le meaalofa a le Faaola o le toetu? Atonu e mafai ona e tusia i le laupapa Ona o Iesu Keriso … ma valaaulia tagata o le vasega e vaai i fuaitau nei mo upu e mafai ona faauma ai lenei fuaitau: Mataupu Faavae ma Feagaiga 29:26–27; 42:45–46; 63:49; 93:33–34. E mafai faapefea e nei fuaiupu ona aafia ai le ala tatou te vaai ai i le oti? E faapefea ona aafia ai o tatou olaga i aso uma?
Punaoa Faaopoopo
Vitio o le Eseta i le ChurchofJesusChrist.org.
“O Loo Soifua o Ia: O Molimau ia Iesu Keriso”
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fcb%2Fef%2Fcbefd1853e142c3320cb41643c1670f047eaea57%2Fcbefd1853e142c3320cb41643c1670f047eaea57.jpeg/full/!250,/0/default)
“Aua o Loo Soifua o Ia”
“Ona o Ia.”
“Lona Suafa Paia—O Se Folafolaga o le Eseta”
Faaleleia o Lo Tatou Aoao Atu
Fesoasoani i tagata o le vasega e suesue i tusitusiga paia. “Fai ni fesili e manaomia ai e le tagata aoao ona saili tali i tusitusiga paia. … Fesoasoani ia i latou ia iloa e ui sa tusia tusitusiga paia i le tele o tausaga ua mavae, o loo i ai tali a le Alii i fesili ma faafitauli tatou te faafeagai uma ma tatou” (Aoao Atu i le Ala a le Faaola, 30).