Iesu Keriso

19–25 Aperila

Mataupu Faavae ma Feagaiga 41–44

“Au Tulafono e Pulea ai Lau Ekalesia”

O le a le mafai ona e talanoaina o se vasega mataupu faavae taitasi ua aoaoina i le Mataupu Faavae ma Feagaiga 41–44. Saili le musumusuga e fesoasoani ia te oe e filifili ai mataupu faavae o le a sili ona talafeagai mo lau vasega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ua lolomiina faaaliga i le vaega 42 , na tusia e Iosefa Samita faapea na “na latou taliaina ma le fiafia” (“Letter to Martin Harris,” Feb. 22, 1831, josephsmithpapers.org). Uunaia tagata o le vasega e faasoa mai soo se mea mai o latou aafiaga patino po o suesuega faaleaiga i lenei vaiaso na latou taliaina ma le fiafia.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 41–42

O tulafono a le Atua e pulea Lana Ekalesia ma e mafai ona pulea ai o tatou olaga.

• I le Mataupu Faavae ma Fegaiga 41, na fesoasoani le Alii i le Au Paia e saunia e taliaina Lana tulafono, lea o le a Ia faaalia i ni nai aso o mulimuli mai (tagai vaega 42). E mafai faapefea e le faaaliga i le vaega 41 ona fesoasoani i le Au Paia e taliaina le tulafono a le Atua? Ina ia fesoasoani i tagata o le vasega e tali lenei fesili, e mafai ona e faitau le Mataupu Faavae ma Feagaiga 41:1-6 ma sue mataupu faavae e mafai ona fesoasoani ia i tatou e talia le tulafono a le Atua. E mafai faapefea ona tatou faatatauina nei mataupu faavae pe a tatou maua avanoa e taliaina ai faatonuga mai le Alii?

• O leotootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo fautuaina ai le vaevaeina o le vaega 42 i ni vaega se lima o fuaiupu, e tofu ma se mataupu faavae taua o le talalelei. O nei vaega e ono faigofie ai mo oe le talanoaina o lenei vaega o se vasega. Mo se faataitaiga, e mafai ona e tusia mau fesootai i le laupapa ma valaaulia tagata taitasi o le vasega e filifili se vaega se tasi. Fai atu i tagata o le vasega e faitau a latou fuaiupu ma sue se mea latou te lagona e taua mo i tatou i o tatou aso. Ona mafai lea ona latou faasoa mai ni faataitaiga mai o latou olaga e faaalia ai pe faapefea ona faamanuiaina i tatou pe a tatou pulea o tatou olaga e nei tulafono.

Mataupu Faavae ma Feagaiga 41:9–11

Ua poloaiina e le Alii Ana auauna e ositaulaga.

• O Eteuati Paterika, le epikopo muamua o le Ekalesia toefuataiina, na poloaiina e tuu lana galuega ma “faaalu lona taimi atoa” e auauna atu i lona valaauga. E ui lava o lenei mea e le o manaomia mai ia i tatou, o a mea ua tatou maua i nei fuaiupu e mafai ona aoga i la tatou auauna atu i le Atua? (Mo nisi faamatalaga ia Eteuati Paterika, tagai “A Bishop unto the Church,” Revelations in Context, 77–83.)

Mataupu Faavae ma Feagaiga 42:61, 65–68; 43:1–7

E aumaia e faaaliga le filemu, olioli, ma le ola e faavavau.

• E pei o taitai anamua o le Ekalesia, e ono i ai ni fesili a tagata o lau vasega e foliga o ni “mealilo” ona latou te manaomia le taitaiga mai le Alii. E mafai ona e uunaia i latou e tusi i lalo se latou fesili o i ai, po o se faafitauli latou te manaomia ai ni faaaliga patino. O a mataupu tatou te maua i le Mataupu Faavae ma Feagaiga 42:61, 65-68 atonu e fesoasoani ia i tatou a o tatou sailia ni faaaliga?

• Ina ia fesoasoani i tagata ia malamalama pe faapefea ona tuuina mai e le Atua faaaliga e taitaia ai Lana Ekalesia, e mafai ona e valaaulia i latou e faitau le Mataupu Faavae ma Feagaiga 43:1–7. E mafai ona latou matamata i le vitio “Prophets and Revelation—Hearing His Voice” (ChurchofJesusChrist.org).

Mataupu Faavae ma Feagaiga 43:8–10

Tatou te potopoto faatasi e “aoao ma faagaeetia le tasi i le isi.”

• E mafai faapefea ona tatou faaaoga le Mataupu Faavae ma Feagaiga 43:8–10 e aoao ai se tasi e lagonaina le le manaomia ona sau i sauniga o le Ekalesia? O le lisi i le “Punaoa Faaopoopo” e mafai ona fesoasoani e taulai atu i lenei talanoaga i faamoemoega mamana o korama o le perisitua ma le Aualofa (e faatatau foi le lisi i vasega a Tamaitai Talavou.) E mafai e tagata o le vasega ona faasoa mai pe na faapefea ona faamanuiaina i latou e ala i le auai i korama, Aualofa, ma vasega o le Ekalesia. O a mea ua tau mai e fuaiupu 8-10 tatou te faia e saunia ai ma auai ia tatou sauniga?

  Vasega o le Aoga Sa a le autalavou

  O fonotaga i le lotu o se tasi ala tatou te “aoao ma faagaeetia le tasi i le isi.”

aikona o punaoa faaopoopo

Punaoa Faaopoopo

Mafuaaga ua faatulagaina ai tatou i korama ma Aualofa.

Na faamatalaina e Sister Julie B. Beck, le Peresitene Aoao talu ai o le Aualofa, le mafuaaga na faatulaga ai e le Atua i tatou i korama a le perisitua ma Aualofa:

1. “Ina ia faatulaga i tatou i lalo o le Perisitua ma e ala i le mamanu o le perisitua.”

2. “Ina ia taulai atu atalii ma afafine o le Tama Faalelagi i le galuega o le faaolataga ma ia auai ai i latou. O Korama ma Aualofa o se tulaga faalesoo ua faatulagaina faatasi ma le tiutetauave e fesoasoani i le galuega a lo tatou Tama ia aumaia le ola e faavavau mo Ana fanau.”

3. “E fesoasoani i epikopo ia pulea lelei le faleteuoloa a le Alii. O le faleteuoloa a le Alii e aofia ai le ‘taimi, taleni, agaalofa, o mea e maua, ma tupe’ a tagata faamaoni o le Ekalesia [Tusitaulima 2: Taitaiina o le Ekalesia, 6.1.3, ChurchofJesusChrist.org]. O taleni a le Au Paia e faaaoga e fesoasoani e tausia e matitiva ma ua lē tagolima ma fausia ai le malo o le Alii.”

4. “E saunia se nofoaga o le puipuiga ma le saogalemu mo fanau a le Tama Faalelagi ma o latou aiga i aso e gata ai.”

5. “Ia faamalosia ma lagolagoina i tatou ia tatou matafaioi ma tiutetauave i le aiga oni atalii ma afafine o le Atua.” (“Why We Are Organized into Quorums and Relief Societies” [Brigham Young University devotional, Jan. 17, 2012], speeches.byu.edu.)

Faaleleia o Lo Tatou Aoao Atu

Valaaulia. “Nai loo le tuuina atu soo o valaaulia e faia se mea patino, mafaufau e valaaulia tagata aoao e mafaufau i a latou lava auala e faaaoga ai mea ua latou aoaoina.” (Aoao Atu i le Ala a le Alii, 35).